လါယနူၤအါရံၤ ၂၂ သီ၊ ၂၀၁၉နံၣ်။ နါဖီၣ်မွံၤရှါ
ကညီဖိအမုၢ်နံၤဒိၣ်မုၢ်နံၤထီတနံၤ လၢအလီၤဘၣ်ဖဲ လါဖြ့ၤဘြူၤအါရံၤ ၁၁ အနံၤ လၢအမ့ၢ်၀ဲ (၇၁)နံၣ်ၦဲၤထီၣ်ကညီဒီကလုာ်အမုၢ်နံၤအံၤ တၢ်ကပာ်ဖှိၣ်မၤလၤကပီၤအီၤဖဲဧရၣ်၀တံၣ် ကီၢ်ခီဒိၣ်မၠီမၠးဒီးလၣ်ပိၣ်တၣ် ကီၢ်ဆၣ်အဂ့ၢ် သ့ၣ်ညါဘၣ်လၢ မၠီမၠးကီၢ်ဆၣ်ကညီလံာ်လဲၢ်ဒီးတၢ်ဆဲးတၢ်လၤကမံးတံာ်အိၣ်န့ၣ်လီၤႉ
မၠီမၠးကီၢ်ဆၣ် ကညီလံာ်လဲၢ်ဒီး တၢ်ဆဲးတၢ်လၤကမံးတံာ် တီခိၣ်ရိၣ်မဲ၀ဲဒီး တၢ်ကမၤလၤကပီၤဖှိၣ်၀ဲ ကညီဒီကလုာ်အမုၢ်နံၤအံၤလၢအဆိကတၢၢ်တဘျီလၢ ကီၢ်ဆၣ်ခံဘ့ၣ်အပူၤဖဲမံသွ့ခၠီကရူၢ်၊ စခဲကၠံသ၀ီအပူၤအဂ့ၢ်န့ၣ်လီၤႉ
မၠီမၠးကီၢ်ဆၣ်ကညီလံာ်လဲၢ်ဒီးတၢ်ဆဲးတၢ်လၤကမံးတံာ်ၦၤဘၣ်မူဘၣ်ဒါလၢအမ့ၢ်မါစါစၣ်စံး၀ဲလၢ“ကညီသးစၢ်လၢအိၣ်ဖဲအံၤသ့ၣ်တဖၣ် ကတီၢ်အံၤ အသးသဟီၣ်ဟဲဆူၣ်ထီၣ်လၢကမၤလၤကပီၤ၀ဲန့ၣ်လီၤႉ မ့ၢ်၀ံၤကတီၢ်အံၤ တၢ်အိၣ်သးဟဲအိၣ်ထီၣ်ဖျိဖျိဖျါဖျါသနာ်က့ပၣ်ဃုာ်စ့ၢ်ကီးလီၤႉ တၢ်မၤလၤကပီၤဘျီ၀ဲအံၤ တၢ်ပညိၣ်အဒိၣ်ကတၢၢ်န့ၣ် တၢ်ကမၤလဲၣ်ထီၣ်အီၤဒီးဂံၢ်ဘါကဆူၣ်ထီၣ်အဂီၢ်န့ၣ်လီၤႉ”အဂ့ၢ် စံး၀ဲဒၣ်န့ၣ်လီၤႉ
ကညီဒီကလုာ်အမုၢ်နံၤအံၤတၢ်မၤလၤကပီၤအီၤလၢမၠီမၠးကီၢ်ဆၣ်ပတီၢ်ဒီးကီၢ်ဆၣ်ဒီး၀့ၢ်လၢအပၣ်ဃုာ်တဖၣ်ဒ်အမ့ၢ်၀့ၢ်မၠီမၠး၊ ၀့ၢ်အ့ၣ်မဲ၊ ၀ါခဲၣ်မးကီၢ်ဆၣ်၊ လၣ်ပိၣ်တၣ်ကရူၢ်လၣ်ပိၣ်တၣ်ကီၢ်ဆၣ်ဒီး ပၠ့စလူၣ်ကီၢ်ဆၣ်သ့ၣ်တဖၣ်ပာ်ဖှိၣ်မၤအီၤအဂ့ၢ်မါစါစၣ်စံးအါထီၣ်၀ဲန့ၣ်လီၤႉ
လၢန့ၢ်အမဲာ်ညါ ၂၀၁၉နံၣ် ကညီဒီကလုာ်အမုၢ်နံၤ တၢ်ရဲၣ်တၢ်ကျဲၤအံၤတၢ်ကမၤအီၤလၢ ဧရၣ်၀တံၣ်ကီၢ်ခီဒိၣ်ပါတနီၣ်၊ ညီၣ်တိ၊ မအူၣ်ပ့ၣ်၊ ဒနူၣ်ဖၠူၣ်၊ ကၠိၣ်ပၠီၣ်၊ ဟ့သတး၊ ကၠီကိ၊ ကၣ်ကၠံတီၣ်တၢ်လီၢ်သ့ၣ်တဖၣ်အံၤ ကညီလံာ်လဲၢ် ဒီးတၢ်ဆဲးတၢ်လၤ ကမံးတံာ်သ့ၣ်တဖၣ် တီခိၣ်ရိၣ်မဲအီၤဒီးတၢ်ကမၤလၤကပီၤ လၢကီၢ်ဆၣ်ပတီၢ်စုာ်စုာ်အဂ့ၢ်န့ၣ်လီၤႉ
မအူၣ်ပ့ၣ်ကညီလံာ်လဲၢ်ဒီး တၢ်ဆဲးတၢ်လၤနဲၣ်ရွဲၣ်စီၤနဲၣ်လ့စီၣ်စံး၀ဲလၢ “ကညီဒီကလုာ်အမုၢ်နံၤအံၤ လၢအပူၤကွံာ်ကညီဖိသ့ၣ်တဖၣ်လိၣ်ဘၣ်ဃ့ထီၣ်အီၤတခါလီၤႉ အဲၣ်ဒိးတဲဟ့ၣ်ဂံၢ်ဟ့ၣ်ဘါလၢကတီၢ်အံၤ မ့ၢ်၀ဲဖျိဖျိဖျါဖျါအဃိဆၢမုၢ်လၢ်လၢတၢ်ကမၤအီၤကိးတီၤဒဲးန့ၣ်လီၤႉ”အဂ့ၢ် စံးဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤႉ
ကညီဒီကလုာ်အမုၢ်နံၤအံၤ လၢအပူၤကွံာ်န့ၣ် တၢ်မၤလၤကပီၤအီၤထဲဒၣ်လၢ ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ၊ ကီၢ်ဆၢတၢ်လီၢ်သ့ၣ်တဖၣ်အပူၤဒီးဖဲကီၢ်ခိၣ်အူသ့စ့ၣ်ထီၣ်ဒီးမၤ၀ဲကီၢ်ဒီဘ့ၣ်တၢ်ပတုာ်တၢ်ခးဒီး ခ့ၣ်အဲၣ်ယူၣ်၀ံၤအလီၢ်ခံတၢ်က့ၤမၤအီၤလၢတၢ်လီၢ်အဂၤသ့ထီၣ်၀ဲဒၣ်န့ၣ်လီၤႉ
ဖဲ ၁၉၄၈နံၣ်လါဖ့ၤဘြူၤအါရံၤ(၁၁) အနံၤန့ၣ် ကညီဖိလၢကီၢ်ပယီၤဒီဘ့ၣ်အံၤ အနီၣ်ဂံၢ်အိၣ်လၢ လွံၢ်ကလီၢ်ဘျဲၣ်ကိးသတြီထီၣ်၀ဲဒ်အမ့ၢ်“ဟ့ၣ်ကညီကီၢ်တဘျီဃီ၊ ကညီတဘးပယီၤတဘးဒုးနဲၣ်ခဲအံၤ၊ ကလုာ်တၢ်သဘံၣ်သဘုၣ်ပတသးလီ၊ ထံကီၢ်တၢ်ဒုးတၢ်ယၤပတသးလီ”ဃ့ထီၣ်၀ဲဆူ (ဖဆပလ)ကီၢ်ပဒိၣ်အအိၣ်လၢတၢ်မုာ်တၢ်ခုၣ်အပူၤန့ၣ်လီၤႉ
မုၢ်နံၤအ၀ဲန့ၣ်တၢ်က့ၤပာ်ပနီၣ်အီၤလၢကညီဒီကလုာ်အမုၢ်နံၤဖဲ ၁၉၅၃နံၣ် ဖဲတၢ်မၤ၀ဲကီၢ်သူလ့ၤဒီဘ့ၣ်ခီကရဲးတၢ်အိၣ်ဖှိၣ်ဖးဒိၣ် အပူၤန့ၣ်လီၤႉ
