မၠၣ်၀တံၣ်၀့ၢ် ၦၤလၢတၢ်ဖီၣ်ဒီးတီၣ်ထီၣ်ကွီၢ်မ့ၣ်နီၣ်ဂံၢ် ၅၀၅(က) တဖၣ်အကျါ တၢ်ပျၢ်လီၤကွံာ် ၂၀ ဂၤ
လါအီးကထိဘၢၣ် ၁၉ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် မၠၣ်၀တံၣ်၀့ၢ် ဖဲတနံၤအံၤ(လါအီးကထိဘၢၣ် ၁၉)သီ မုၢ်ထူၣ် ၁၂ နၣ်ရံၣ်အဆၢကတီၢ် ကီၢ်ဆၣ်စံၣ်ညီၣ်ကွီၢ်ဘျီၣ်အံၤထူးသံကွံာ်၀ဲတၢ်မူးတၢ်ရၢ်ဒီး ပျၢ်လီၤကွံာ်ၦၤလၢတၢ်ဖီၣ်လိာ်ဘၢလိာ်ကွီၢ်ဃာ်အီၤလၢကွီၢ်မ့ၣ် နီၣ်ဂံၢ် ၅၀၅(က)လၢအဘၣ်ထီၣ်တၢ်မူးတၢ်ရၢ်(၂၀)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ မၠၣ်၀တံၣ်၀့ၢ်ပူၤဖဲအပူၤကွံာ်လါဖ့ၤဘြူၤအါရံၤန့ၣ် ၦၤလၢအထီဒါသုးမီၤစိရိၤပာ်ဖျါထီၣ်သးတဖၣ် တၢ်တီၣ်ထီၣ်အ၀ဲသ့ၣ် ကွီၢ်မ့ၣ် နီၣ်ဂံၢ် ၅၀၅(က)ဒီး တၢ်ဖီၣ်ဒုးဃာ်၀ဲဖဲမၠၣ်၀တံၣ်ပၢၤကီၢ်၀ဲၤလီၢ်ယံၤ၀ဲ(၇)လါဃၣ်ဃၣ်န့ၣ်လီၤႉ ဖဲတနံၤညါအံၤ ကီၢ်ဆၣ်စံၣ်ညီၣ်ကွီၢ်ဘျီၣ်အံၤထူးသံကွံာ်၀ဲတၢ်မူးတၢ်ရၢ်ဒီး ၦၤလၢအဘၣ်ထီၣ်တၢ်မူးတၢ်ရၢ်(၅၈)ဂၤအကျါပျၢ်လီၤက့ၤ၀ဲ(၂၀)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ “တနံၤအံၤတၢ်ပျၢ်လီၤကွံာ်၀ဲပိာ်ခွါ(၁၅)ဂၤဒီးမိာ်မုၣ်(၅)ဂၤ ခဲလၢာ်အဂၤ(၂၀)မီၤနီၤႉ ဒ်ကီၢ်စၢဖှိၣ်အပတီၢ်ဆှၢဃီၤ၀ဲမံၤစရီအသိးန့ၣ်ပပျၢ်လီၤ၀ဲလီၤႉ တၢ်ပျၢ်ဖျဲးထီၣ်ကွံာ်တဘျီညါအံၤန့ၣ်ပၣ်၀ဲအဂၤ(၂၀) အိၣ်တ့ၢ်ဒံးလၢဃိာ်ပူၤစ့ၢ်ကီးအိၣ်လီၤႉ အ၀ဲသ့ၣ်ခီဒုန့ၣ်တၢ်ပျၢ်ဖျဲးကွံာ်အမံၤစရီမ့ပၣ်နီၢ်တဘျီမးပျၢ်လီၤအခွဲးကအိၣ်လီၤ”အဂ့ၢ်န့ၣ် ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ ဖဲလါဖ့ၤဘြူၤအါရံၤ ၁ သီ သုးဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံ မၠၣ်၀တံၣ်၀့ၢ် ၦၤလၢတၢ်တီၣ်ထီၣ်ဃာ်အီၤ ကွီၢ်မ့ၣ် နီၣ်ဂံၢ် ၅၀၅(က) တၢ်မူးတၢ်ရၢ်အိၣ်၀ဲအဂၤ(၁၀၀)ဘျဲၣ်ဒီး ဖဲန့ၣ်အကျါဖဲအပူၤကွံာ်ခံလါဘျဲၣ်အခါန့ၣ် တၢ်ပျၢ်လီၤကွံာ်၀ဲ ၃၅ ဂၤလံအသိး ဖဲတနံၤအံၤတၢ်ပျၢ်လီ၀ဲကဒီးအဂၤ(၂၀)န့ၣ်လီၤႉ တကီၢ်ခါခဲအံၤ မၠၣ်၀တံၣ်ပၢၤကီၢ်၀ဲၤလီၢ် ၦၤလၢတၢ်အိးထီၣ်ဃာ်အီၤလၢ ကွီၢ်မ့ၣ် နီၣ်ဂံၢ် ၅၀၅(က) လၢအအိၣ်လၢဃိာ်ပူၤလၢအဘၣ်ထီၣ်တၢ်မူးတၢ်ရၢ်အိၣ်တ့ၢ်ဒံး၀ဲ(၃၈)ဂၤအသိး ဟးစံၣ်အိၣ်ခူသူၣ်အိၣ်၀ဲအဂၤ(၃၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါ(လါအီးကထိဘၢၣ် ၁၈)သီအနံၤ ပယီၤသုးဘိးဘၣ်ရၤလီၤ၀ဲလၢ...
တၢ်ဒုးကဲထီၣ်ဖဲမုၢ်သဲးပယီၤသုးသံ(၇)ဂၤႇဘၣ်ဒိ(၅)ဂၤဒီး သံအကျါပၣ်ဃုာ်၀ဲသုးခိၣ်ဒိၣ်ဖိတဂၤ
လါအီးကထိဘၢၣ် ၁၈ သီႇ ၂၀၂၁ နံၣ်ႇ ခ့ၣ်အဲးစံၣ် ချၢၣ်လွံၣ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ ဖဲလါအီးကထိဘၢၣ် ၁၄ သီအနံၤန့ၣ် ကညီဒီကလုာ်ဂၢၤသးကရၢ(KNDO)ဒီးပယီၤသုးတဖၣ်အဘၢၣ်စၢၤတၢ်ခးလိာ်သးကဲထီၣ်၀ဲဒီး ဖဲန့ၣ် ပယီၤသုးတကပၤသံ၀ဲ(၇)ဂၤ ႇဘၣ်ဒိ၀ဲ(၅)ဂၤဒီး သံအကျါန့ၣ်ပၣ်ဃုာ်၀ဲသုးခိၣ်ဒိၣ်ဖိတဂၤအဂ့ၢ် ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤ ထုးထီၣ်ပာ်ဖျါ၀ဲဖဲတနံၤအံၤ(လါအီးကထိဘၢၣ် ၁၈)သီအနံၤန့ၣ်လီၤႉ လၢၢ်ဒိၣ်ကီၢ်ဆၣ် မုၢ်သဲးသ၀ီ သ၀ီဟးထီၣ်န့ၣ် (KNDO)သုးရ့ၣ်(၃)လၢအဟံးဃာ်တၢ်ဘံၣ်တၢ်ဘၢအံၤဒီးပယီၤသုးခီၣ်ချ့သုးရ့ၣ်(ခမရ-၅၅၉)ဒီး(ခမရ- ၅၉၀)တဖၣ်အဘၢၣ်စၢၤ တၢ်ဒုးကဲထီၣ်၀ဲ(၃)ဘျီဒီးဖဲန့ၣ်ပယီၤသုးတကပၤဘၣ်ဒိဘၣ်ထံးသံ၀ဲအိၣ်အဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ ပယီၤသုးလၢအနီၣ်ဂံၢ်ကအိၣ်၀ဲ(၁၆၀)ဂၤဃၣ်ဃၣ်လၢကလဲၤထီၣ်ဆူ KNU သုးက့(၅)တကပၤအဂီၢ် ဟဲတုၤ၀ဲဒၣ်ဖဲချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် မုၢ်သဲးသ၀ီပူၤဖဲလါအီးကထိဘၢၣ် ၁၃ သီအနံၤအဂ့ၢ်န့ၣ် KNU တၢ်ဘိးဘၣ်ရၤလီၤတၢ်ကစီၣ်အပူၤပာ်ဖျါ၀ဲန့ၣ်လီၤႉ
ပယီၤသုးဖီၣ်၀ဲလီၢ်က၀ီၤဖိလၢကနဲၣ်ပၠးကျဲအဂီၢ်
လါအီးကထိဘၢၣ် ၁၈ သီႇ ၂၀၂၁ နံၣ်ႇ ခ့ၣ်အဲးစံၣ် ပယီၤသုးလၢအနုာ်လီၤဟူးဂဲၤဖဲကညီကီၢ်စဲၣ် ကီးတရံး၀့ၢ် ကလံၤထံးတဖၣ် ဖဲမဟါ(လါအီးကထိဘၢၣ် ၁၇)သီအနံၤန့ၣ် ဖီၣ်၀ဲလီၢ်က၀ီၤဖိတဂၤလၢကနဲၣ်ပၠး၀ဲကျဲအဂီၢ်ဒီး ဖဲတနံၤအံၤဂီၤခီအဆၢကတီၢ်ပျၢ်လီၤက့ၤ၀ဲလံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ ဖဲမဟါ(လါအီးကထိဘၢၣ် ၁၇)သီအနံၤ ပယီၤသုးခီၣ်ချ့သုးရ့ၣ်(ခမရ-၅၅၆)ဒီး(၅၆၀)သုးရ့ၣ်လၢအနီၣ်ဂံၢ်ကအိၣ်၀ဲအဂၤ(၆၀)ဃၣ်ဃၣ်အံၤ ဖဲအ၀ဲသ့ၣ်အိၣ်လၢ၀့ၢ်လီၢ်လံၤဒီးဟဲက့ၤ၀ဲလၢ၀့ၢ်သီဟဲက့ၤဟး၀ဲဒီးခီၣ်အခါ ဖီၣ်မၢ၀ဲလီၢ်က၀ီၤဖိလၢအကွၢ်ကျီၢ်တဂၤအံၤလၢကနဲၣ်ပၠးန့ၢ်အ၀ဲသ့ၣ်ကျဲအဂီၢ်အဂ့ၢ်န့ၣ် ၦၤလၢအဘူးဒီး(KNLA)တဂၤစံး၀ဲန့ၣ်လီၤႉ ၦၤလၢအဘူးဒီး(KNLA)တဂၤစံး၀ဲလၢ“ပယီိၤသုးဖီၣ်အီၤဖဲမဟါဟါခီအဆၢကတီၢ်လီၤႉ တၢ်ဖီၣ်အီိၤဖဲအလဲၤကွၢ်ကျီၢ်အခါမီၤနီၤႉ ကးဘၢ၀ဲအမဲာ်သၣ်ခဲလၢာ်လီၤႉ ဖီၣ်ဃာ်၀ဲဒီတနၤညါလီၤႉ ပယီၤသုးအံၤမံဒံး၀ဲဖဲသ၀ီသီမံၣ်ကစ့ၤသီခါဖၠၣ်တနၤဒံးလီၤႉ ဟဲက့ၤတုၤ၀ဲဖဲသ၀ီသီခါဖၠၣ်ဖဲတဂီၤညါအံၤလီၤႉ ဖဲအတုၤသ၀ီပူၤ ဂီၤခီ ၇ နၣ်ရံၣ်အခါန့ၣ် ပျၢ်လီၤက့ၤ၀ဲၦၤလၢအဖီၣ်ဃာ်၀ဲတဂၤန့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲတနံၤအံၤန့ၣ်လီၤႉ ပယီၤသုးလၢအကဟဲက့ၤနုာ်လီၤလၢသ၀ီသီတဖၣ်အံၤ ဖဲအ၀ဲသ့ၣ်ကနုာ်လီၤလၢသ၀ီပူၤအဆၢကတီၢ် တၢ်ဘၣ်သဂၢၢ်ခးလိာ်သးကဲထီၣ်၀ဲဒီး(KNLA)သုးအမံးနံး(၂၀)ဃၣ်ဃၣ်ဒံးအဂ့ၢ်န့ၣ် ၦၤလၢအဘူးဒီး(KNLA)တဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၁၃)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ-၅၅၆)ဒီး(ခမရ-၅၆၀)တဖၣ်အံၤ ဖဲအပူၤကွံာ်(လါအီးကထိဘၢၣ် ၁၆)သီအနံၤစ့ၢ်ကီး တၢ်ခးလိာ်သးကဲထီၣ်ဒံး၀ဲဒီး KNLA သုးက့(၆) သုးရ့ၣ်(၁၈)ႇ(၁၇)သုးပာ်ဖှိၣ်တဖၣ်ဒံးန့ၣ်လီၤႉ တၢ်ဒုးကဲထီၣ်ဘျီ၀ဲန့ၣ်အပူၤ ပယီၤသုးတကပၤသံ(၄)ဂၤဒီးဘၣ်ဒိ၀ဲ(၄)ဂၤအဂ့ၢ်န့ၣ် သ့ၣ်ညါဘၣ်လၢ(KNLA)အအိၣ်န့ၣ်လီၤႉ ခီဖျိပယီၤသုးတဖၣ်ဟဲက့ၤဆီလီၤသးဖဲကီးတရံး ကလံၤထံး သ၀ီသီပူၤအဃိ လီၢ်က၀ီၤဖိတဖၣ်ဘၣ်ယိၣ်၀ဲလၢပယီၤသုးအံၤကခးလီၤနါစိၤကျိဖးဒိၣ်ဒီး တၢ်လီၢ်လၢအဘူးဒီးပယီၤသုးဆီလီၤသးအိၣ်တၢ်လီၢ်အံၤန့ၣ် လီၢ်က၀ီၤဖိတဖၣ်သုးလီၢ်သုးကျဲလဲၤဃ့ၢ်အိၣ်၀ဲဆူအဘူးတံၢ်အဟံၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲတနံၤအံၤမုၢ်ဃ့ၢ်လီၤ ၁ နၣ်ရံၣ်တခီအဆၢကတီၢ်စ့ၢ်ကီး ပယီၤသုးလၢအဆီလီၤသးဖဲသ၀ီသီအံၤဒီးဟီၣ်က၀ီၤ(KNLA)သုးတဖၣ်အဘၢၣ်စၢၤ ခးလိာ်သးဒီးကျိဖိကျိဖးဒိၣ်တဖၣ်ကဲထီၣ်သးဒံးအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
KNU ဃ့ထီၣ်လၢပယီၤသုးမုၢ်ဒိၣ်ကဟးထီၣ်ကွံာ်လၢတၢ်နုာ်လီၤပၣ်ဃုာ်လၢထံရူၢ်ကီၢ်သဲးအတၢ်ဖံးတၢ်မၤအပူၤ
လါအီးကထိဘၢၣ် ၁၅ သီႇ ၂၀၂၁ နံၣ်ႇ ခ့ၣ်အဲးစံၣ် ဒ်သိးတၢ်ကၢၤက့ၤဂၢၤက့ၤကီၢ်ပယီၤအသုးမုၢ်ဒိၣ်အသူးသ့ၣ်လၤကပီၤအဂီၢ် သုးမုၢ်ဒိၣ်ကဟးထီၣ်ကွံာ်လၢတၢ်နုာ်လီၤ ပၣ်ဃုာ်သးလၢထံရူၢ်ကီၢ်သဲးတၢ်ဖံးတၢ်မၤအပူၤအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဃ့ထီၣ်၀ဲဖဲတနံၤအံၤ(လါအီးကထိဘၢၣ် ၁၅)သီလၢအလီၤဘၣ်၀ဲတၢ်ဆဲးလီၤထံကီၢ်ဒီဘ့ၣ်တၢ်ပတုာ်တၢ်ခး(NCA)ၦဲၤထီၣ်(၆)နံၣ်တနံၣ်န့ၣ်လီၤႉ ခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ် ပဒိၣ်စီၤတၢ်ဒိၣ်မူ စံး၀ဲ“ပယီၤသုးမုၢ်ဒိၣ်ခဲအံၤတဖၣ်န့ၣ် ကမျၢၢ်ထံဖိကီၢ်ဖိိတဖၣ်သးဘၣ်အၢ၀ဲလၢၤလံလီၤႉ လၢတၢ်ကဘှီဘၣ်က့ၤသုးအံၤအဂီၢ်န့ၣ် သုးခိၣ်သုးနၢ်လၢအအိၣ်လၢသုးမုၢ်ဒိၣ်အပူၤတဖၣ်မ့တပၣ်ဃုာ်ဘၣ်န့ၣ် တၢ်ကဘှီဘၣ်က့ၤအဂီၢ်ကီခဲ၀ဲန့ၣ်လီၤႉ သုးခိၣ်သုးနၢ်လၢကဟံးန့ၢ်တၢ်ဘံၣ်တၢ်ဘၢလၢကမျၢၢ်အဖီခိၣ်ႇကအိၣ်ဆၢထၢၣ်လၢကမျၢၢ်အဂီၢ်အိၣ်သ့၀ဲအသိး သုးမုၢ်ဒိၣ်အံၤအတၢ်ဃါဃုာ်သးလၢထံရူၢ်ကီၢ်သဲးတအိၣ်ဘၣ်ႇတၢ်ကြၢးသူၣ်ထီၣ်သုးမုၢ်ဒိၣ်တဖုလၢက အဒီသဒၢကမျၢၢ်ထံဖိကီၢ်ဖိအသးသမူန့ၣ် အဲၣ်ဒိးစံး၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲလၢတၢ်ဒုးလိၣ်ထီၣ်ဖးထီၣ်(NCA)တၢ်မၤရဲၣ်ကျဲၤအပူၤန့ၣ် ခ့ၣ်အဲၣ်ယူၣ်အိၣ်ဆၢထၢၣ်၀ဲဂၢၢ်ဂၢၢ်ကျၢၤကျၢၤဒီး ခီပတာ်မၤနၢၤကွံာ်၀ဲတၢ်လၢအတၤတၢ်ဒီးအီၤတဖၣ် ခီဖျိဖံးသကိးမၤသကိးတၢ်ဒီးၦၤလၢဒုးလိၣ်ထီၣ်ဖးထီၣ်တၢ်မၤရဲၣ်ကျဲၤတဖၣ်ႇ ဒီးလၢ(၂၀၂၀)အလီၢ်ခံတၢ်ကသူူၣ်ထီၣ်တၢ်မုာ်တၢ်ခုၣ်လၢအိၣ်စံာ်အိၣ်ကျၢၤ၀ဲအဂီၢ် တၢ်သူၣ်ထီၣ်ဖဲၣ်ဒရဲၣ်ဒံၣ်မိၣ်ကရ့ၣ်စံၣ်အကျိၤအကျဲအတၢ်မၤရဲၣ်ကျဲၤ(၃)ပတီၢ်လၢတၢ်ကဘၣ်လဲၤအီၤတပတီၢ်၀ံၤတပတီၢ်န့ၣ်ဒိးန့ၢ်တ့ၢ်၀ဲတၢ်အၢၣ်လီၤဘၣ်ဆၣ် စးထီၣ်ဖဲလါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤကဲထီၣ်၀ံၤ တၢ်လုၢ်သ့ၣ်ခါပတာ်ကွံာ်(NCA)ဂံၢ်ခီၣ်ထံးတၢ်ဘျၢတဖၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ပဒိၣ်စီၤတၢ်ဒိၣ်မူစံးအါထီၣ်၀ဲလၢ“ဘၣ်ထွဲဒီးသုးဟံးန့ၢ်ကွံာ်တၢ်စိတၢ်ကမီၤအံၤ လၢ(NCA)ဂံၢ်ခီၣ်ထံးတၢ်သိၣ်တၢ်သီအပူၤန့ၣ်ပၣ်ဃုာ်၀ဲလၢ တၢ်တဘၣ်သူသုးဂံၢ်ဘါဘၣ်ႇ တၢ်ဂ့ၢ်လၢတၢ်ကဘၣ်ထိၣ်ဃူဃုအစၢတဖၣ်ႇလီၢ်ခံကတၢၢ်ဃုာ်ဒီးတၢ်သူၣ်ထီၣ်ဖဲၣ်ဒရၢၣ်ကီၢ်စၢဖှိၣ်မီၤနီၤႉ တၢ်သ့ၣ်တဖၣ်အံၤခဲလၢာ်န့ၣ် လီၤဂာ်ဒ်သိးဒီးအလုၢ်သ့ၣ်ခါပတာ်၀ဲခဲလၢာ်လီၤမီၤနီၤႉ တၢ်လၢ(NCA)န့ၣ်် ပၣ်ဃုာ်၀ဲသၢဖုသၢကပၤန့ၣ်ပတဲသ့မီၤနီၤႉ ပဒိၣ်ပၣ်ႇသုးပၣ်ႇကလုာ်ဒူၣ်ပၣ်၀ဲလီၤႉ ခဲအံၤပဒိၣ်စ့ၢ်ကီးတအိၣ်လၢၤဘၣ် အိၣ်တ့ၢ်က့ၤထဲသုးလီၤႉ ပကသူၣ်ထီၣ်ထံကီၢ်လၢတၢ်အိၣ်သးခဲအံၤအဖီလာ်တန့ၢ်ဘၣ်မီၤနီၤႉ သုးဟံးန့ၢ်ကွံာ်တၢ်စိ တၢ်ကမီၤအံၤမ့ၢ်တၢ်လုၢ်သ့ၣ်ခါပတာ်ကွံာ်၀ဲ(NCA)ဂံၢ်ခီၣ်ထံးတၢ်သိၣ်တၢ်သီခဲလၢာ်လီၤန့ၣ်ပတဲသ့လီၤ”အဂ့ၢ်န့ၣ် စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါ တၢ်လၢပိာ်ထွဲထီၣ်၀ဲသုးတၢ်ဟံးန့ၢ်ဆူၣ်တၢ်စိတၢ်ကမီၤတဖၣ်န့ၣ် မ့ၢ်တၢ်ဆီၣ်တံၢ်မၤနၢၤ ထံဖိကီၢ်ဖိကမျၢၢ်လၢထံကီၢ်ဒီတဘ့ၣ်အပူၤလၢကျဲအကလုာ်ကလုာ်ဒီးတူၢ်ဘၣ်ခီၣ်ဘၣ်၀ဲၦၤဂ့ၢ်၀ီမုၢ်ကျိၤ၀ဲၤကွာ်အကလုာ်ကလုာ်ဘူးထီၣ်လၢထံကီၢ်န့ၣ်ကဟးဂီၤကွံာ်အပတီၢ်န့ၣ်လီၤႉ...
ကမျၢၢ်တၢ်ကရၢကရိ(၅၀)ဘျဲၣ်ဃ့ထီၣ်၀ဲလၢတၢ်တဘၣ်ဒုးထီၣ်သုးမီၤစိရိၤအခိၣ်မ့အီၣ်လဲၣ်လၢ အၣ်စံၣ်ယၣ် တၢ်အိၣ်ဖှိၣ်တဂ့ၤ
လါအီးကထိဘၢၣ် ၁၄ သီႇ ၂၀၂၁ နံၣ်ႇ ခ့ၣ်အဲးစံၣ် လၢကဟဲတလါအံၤ(လါအီးကထိဘၢၣ် ၂၅)သီအနံၤ တၢ်ကမၤ၀ဲအၣ်စံၣ်ယၣ်ခိၣ်နၢ်ဒိၣ်ထီတၢ်အိၣ်ဖှိၣ်အပူၤ ဒ်သိးတၢ် တဒုးထီၣ်သုးမီၤစိရိၤအခိၣ်မ့အီၣ်လဲၣ်လၢတၢ်အိၣ်ဖှိၣ်အံၤတဂ့ၤအဂီၢ် ဂံၢ်ခီၣ်ထံးကမျၢၢ်တၢ်ကရၢကရိ(၅၂)ဒူၣ် ဃ့ထီၣ်ဒီးဆှၢထီၣ်လံာ်ဆူအၣ်စံၣ်ယၣ်ခိၣ်နၢ်တဖၣ်အအိၣ်ဖဲလါမဟါ(လါအီးကထိဘၢၣ် ၁၃)သီအနံၤန့ၣ်လီၤႉ ဖဲအပူၤကွံာ်(လါအ့ဖြ့ၣ် ၂၄)သီအနံၤ အၣ်စံၣ်ယၣ်ခိၣ်နၢ်တၢ်အိၣ်ဖှိၣ်အပူၤ တၢ်သးလီၤပလိာ်(၅)ထံၣ်လၢတၢ်ကဘှါရှဲ ကီၢ်ပယီၤတၢ်ဃံးတၢ်စ့ၤအံၤန့ၣ် တကီၢ်ခါခဲအံၤပယီၤသုးခိၣ်သုးနၢ်တဖၣ်တဟံးထီၣ်ဖီၣ်ထီၣ်မၤဖျါထီၣ်အမိၢ်လံၤမိၢ်ၦၢ် ဘၣ်ဒီးဆဲးမၤကမၣ်၀ဲတၢ်စုဆူၣ်ခီၣ်တကးတဖၣ်ဒံးအဃိ ဒ်သိးအၣ်စံၣ်ယၣ်သုတသ့ၣ်ညါပာ်ပနီၣ်အီၤတဂ့ၤအဂီၢ် ဘၣ်တၢ်ဆှၢထီၣ်လံာ်ဃ့ထီၣ်၀ဲလီၤအဂ့ၢ်န့ၣ် တၢ်ကရၢကရိတဖၣ်စံး၀ဲန့ၣ်လီၤႉ တၢ်ကရၢကရိ(၅၂)ဒူၣ်အကျါလၢအပၣ်ဃုာ်၀ဲဒီးကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢစီၤနၢၤဒၣ်ဆူစံး၀ဲလၢ“ ပယီၤသုးခိၣ်မ့အီၣ်လဲၣ်အံၤ တူၢ်လိာ်သးလီၤပလိာ်၀ဲအၣ်စံၣ်ယၣ်တၢ်သးလီၤပလိာ်(၅)ထံၣ်အံၤဘၣ်ဆၣ် တမၤဖျါ ထီၣ်တၢ်အမိၢ်လံၤမိၢ်ၦၢ်တအိၣ်နီတမံၤဘၣ်ႉ တလူၤပိာ်မၤထွဲ၀ဲအၣ်စံၣ်ယၣ်တၢ်သိၣ်တၢ်သီတဖၣ်ဘၣ်အသိး ကမျၢၢ်ထံဖိကီၢ်ဖိသ့ၣ်တဖၣ်တူၢ်ဘၣ်သဂၢၢ်ဘၣ်၀ဲတၢ်ကီတၢ်ခဲဒိၣ်ထီၣ်ရုၢ်ရုၢ်မီၤနီၤႉ လီၤဆီဒၣ်တၢ်တၢ်ဒိးန့ၢ်ဘၣ်၀ဲဒၣ် ၦၤဂ့ၢ်၀ီတၢ်တိစၢၤမၤစၢၤဒီးတၢ်မၤဘၣ်ဒိၦၤဂ့ၢ်၀ီခွဲးယာ်မ့ၢ်ဂ့ၤန့ၣ်ပထံၣ်ဘၣ်ဒီးအါထီၣ်၀ဲဒၣ်ကွ့ၢ်ကွ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်(လါအ့ဖြ့ၣ် ၂၄)သီအနံၤ တၢ်မၤ၀ဲအၣ်စံၣ်ယၣ်ခိၣ်နၢ်တၢ်အိၣ်ဖှိၣ်အပူၤန့ၣ် ဒ်သိးတၢ်ကဘှါရှဲ၀ဲကီၢ်ပယီၤ ထံရူၢ်ကီၢ်သဲးတၢ်သဘံၣ်သဘုၣ်အဂီၢ် တၢ်ပာ်လီၤ၀ဲဒၣ်တၢ်သးလီၤပလိာ်(၅)ထံၣ်လၢအမ့ၢ် တၢ်ကဘၣ်ပတုာ်ကွံာ်တၢ်စုဆူၣ်ခီၣ်တကးတဘျီဃီႇတၢ်ကဘၣ်မၤတၢ်ထံၣ်လိာ်အိၣ်သကိးႇတၢ်ထိၣ်ဃူထိၣ်ဖိးလၢအၣ်စံၣ်ယၣ်ကရူၢ်ဒိၣ်တီခိၣ်ရိၣ်မဲ၀ဲတဖၣ်ဒီးတၢ်ကဟ့ၣ်ၦၤဂ့ၢ်၀ီတၢ်တိစၢၤမၤစၢၤတဖၣ်ပာ်ဃုာ်၀ဲန့ၣ်လီၤႉ ဒ်န့ၣ်အသိးအ့ၣ်ဒိၣ်နံၣ်ရှါဒီးမလ့ရှါထံဂုၤကီၢ်ဂၤကိတိာ်၀ဲၤကျိၤတဖၣ်စ့ၢ်ကီးစံးတ့ၢ်ဃာ်၀ဲလၢ ပယီၤသုးအံၤမ့ၢ်တလူၤပိာ်မၤထွဲ၀ဲအၣ်စံၣ်ယၣ်တၢ်သးလီၤပလိာ်ဘၣ်န့ၣ် အၣ်စံၣ်ယၣ််ခိၣ်နၢ်ဒိၣ်ထီတၢ်အိၣ်ဖှိၣ်လၢအကဟဲ၀ဲအံၤ တၢ်တဘၣ်ဒုးဟဲထီၣ်၀ဲဘၣ်အဖီခိၣ် တၢ်ကရိကရၢ(၅၂)ဒူၣ်အံၤတူၢ်လိာ်သဂၢၢ်၀ဲဒီးထံကီၢ်ကရူၢ်ဖိတဖၣ်စ့ၢ်ကီးကမၤ၀ဲဒ်န့ၣ်အဂီၢ် အ၀ဲသ့ၣ်လံာ်ဆှၢထီၣ်အပူၤဆီၣ်တခူစံး၀ဲန့ၣ်လီၤႉ လၢန့ၣ်အမဲာ်ညါအၣ်စံၣ်ယၣ်တၢ်သးလီၤပလိာ်(၅)ထံၣ်လၢပယီၤသုးခိၣ်သုးနၢ်ကမၤဖျါထီၣ်၀ဲအံၤန့ၣ် စးထီၣ်ဖဲလါအ့ဖြ့ၣ် ၂၅ သီတုၤလၢလါစဲးပထ့ဘၢၣ်လၢၤတစု ပယီၤသုးအံၤမၤ၀ဲတၢ်ထီၣ်ဒုးလၢထံဖိကီၢ်ဖိ ကမျၢၢ်တဖၣ်အဖီခိၣ်အိၣ်၀ဲအဘျီလၢအကထိညါလံအသိး ကမျၢၢ်ထံဖိကီၢ်ဖိလၢအကထိဘၣ်ဃ့ၢ်မှံဟးဖျိး၀ဲ အါအါဂီၢ်ဂီၢ်အဂ့ၢ်န့ၣ် ပာ်ဖျါ၀ဲလၢလံာ်ပူၤန့ၣ်လီၤႉ ပယီၤသုးခိၣ်သုးနၢ်တဖၣ်အံၤ ဆဲးသမၢ၀ဲတၢ်ထံၣ်လိာ်ထိၣ်ဃူထံရူၢ်ကီၢ်သဲးအသိး ဖဲအ၀ဲသ့ၣ်သူ၀ဲတၢ်စုဆူူၣ်ခီၣ်တကးလၢကမျၢၢ်ထံဖိကီၢ်ဖိသ့ၣ်တဖၣ်အဖီခိၣ်အတီၢ်ပူၤစ့ၢ်ကီး ဂုာ်ကျဲးစၢးမၤ၀ဲဒ်သိးကဖိးမံလိာ်သးဒီးသဲစးဘၣ်ဆၣ် တကီၢ်ခါခဲအံၤခီဖျိထီဒါ၀ဲအၣ်စံၣ်ယၣ်တဲာ်တဲာ်ဖျုဖျုအဃိ အၣ်စံၣ်ယၣ်အံၤစ့ၢ်ကီးကဘၣ်မၤပယီၤသုးတဲာ်တဲာ်ဖျုဖျုအဆၢကတီၢ်ဘၣ်၀ဲလံအဂ့ၢ်န့ၣ် တၢ်ကရၢကရိ(၅၀)ဘျဲၣ်အံၤ ဆီၣ်တခူထီၣ်၀ဲန့ၣ်လီၤႉ တကီၢ်ခါခဲအံၤ ဒ်သိးတၢ်ကမၤဖျါထီၣ်အၣ်စံၣ်ယၣ်တၢ်သးလီၤပလိာ်တဖၣ်အံၤအမိၢ်လံၤမိၢ်ၦၢ်အဂီၢ် တၢ်တီၣ်ထီၣ်အၣ်စံၣ်ယၣ်ခၢၣ်စးလီၤဆီအိၣ်၀ဲဘၣ်ဆၣ်...
တၢ်ဖီၣ်ချုးန့ၢ်ၦၤ(၄)ဂၤလၢအမၤသံ(BGF)
လါအီးကထိဘၢၣ် ၁၄ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲအပူၤကွံာ်(လါအီးကထိဘၢၣ် ၇)သီဟါခီအဆၢကတီၢ် ဘၣ်ထွဲဒီးတၢ်လဲၤမၤသံ(BGF)သုးလၢအအိၣ်ဖဲကညီကီၢ်စဲၣ် တၢ်ကြဲၢ်ကီၢ်ဆၣ် နီၤမၠၣ်လွဲသ၀ီဒီးကီၣ်အံးစဲးသ၀ီအဘၢၣ်စၢၤအံၤ တကီၢ်ခါခဲအံၤဟီၣ်က၀ီၤ BGF သုးရ့ၣ်(၁၀၁၄)ဖီၣ်ချုးန့ၢ်၀ဲ ၦၤမၤသံတၢ်ဖိ(၄)ဂၤအံၤလံဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ ခီဖျိမၤသံ၀ဲ(BGF)သုးတဖၣ်အမဲာ်ညါ ဟံဃုာ်စ့ၢ်ကီးဒီးအ၀ဲသ့ၣ်စုက၀ဲၤတနီၤအဃိ ၦၤလၢအမၤကမၣ် တၢ်သ့ၣ်တဖၣ်(BGF)ဟးလူၤဖီၣ်အ၀ဲသ့ၣ်ဒီး တၢ်ဖီၣ်ချုးန့ၢ်၀ဲစီၤဖၣ်ကၠိလၢအဘၣ်တၢ်ထုးထီၣ်ကွံာ်အီၤလၢ(KNU/KNLA-PC)တၢ်မုာ်တၢ်ခုၣ်ကီၣ်ကးကရူၢ်ဃုာ်ဒီးၦၤလၢအဂၤ(၃)ဂၤန့ၣ်လီၤႉ တကီၢ်ခါခဲအံၤၦၤလၢတၢ်ဖီၣ်ချုး၀ဲ(၄)ဂၤအကျါ (၃)ဂၤန့ၣ်သံ၀ဲလံအသိး အခိၣ်တဂၤလၢအမ့ၢ်စီၤဖၣ်ကၠိအံၤစ့ၢ်ကီး အခီၣ်ကၢ်တကပၤႇအစုကၢ်တကပၤဒီးတၢ်ဖီၣ်ဒုးဃာ်အီၤလံအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“ဖဲၦၤဖီၣ်ချုးအ၀ဲသ့ၣ်အခါန့ၣ်ပၣ်ဃုာ်၀ဲဒီးပိာ်မုၣ်တဂၤႉ ခီဖျိပိာ်မုၣ်၀ဲအံၤ တပၣ်ဃုာ်လၢတၢ်မူးတၢ်ရၢ်ပူၤဘၣ်အဃိ ၦၤပျၢ်က့ၤအီၤလီၤႉ ဖဲန့ၣ်အခိၣ်ဒိၣ်န့ၣ်ဖၣ်ကၠိမီၤနီၤႉ အ၀ဲသ့ၣ်န့ၣ် အိၣ်ဃာ်ဒီးကသံၣ်မူၤဘှီးတၢ်ဂ့ၢ်လီၤႉ (BGF)ခိၣ်လၢဘၣ်တၢ်မၤသံအီၤအံၤ ခီဖျိတၢ်စံၣ်ညီၣ်ဃာ်အ၀ဲသ့ၣ်အိၣ်အဃိ သူၣ်တမံသးတမုာ်၀ဲဘၣ်ဒီးလဲၤမၤသံ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ (BGF)သုးခိၣ်လၢတၢ်လဲၤခးသံကွံာ်၀ဲဖဲအပူၤကွံာ်စှၤသီတဂၤအံၤ အပူၤကွံာ်န့ၣ်မ့ၢ်ၦၤတဂၤလၢအလီၤဘၣ်တၢ်ကမၣ်လၢဖၣ်အၣ်တီၣ်ကလ့ဃိာ်ပူၤလၢကသံၣ်မူၤဘှီးတၢ်မူးတၢ်ရၢ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ တၢ်မၤသံလိာ်သးကဲထီၣ်တၢ်ဂ့ၢ်အံၤ တမ့ၢ်လၢကရူၢ်ကရၢတဖုဒီးတဖုအဘၢၣ်စၢၤကဲထီၣ်တၢ်ဂ့ၢ်ဘၣ်ဒီး ခီဖျိမ့ၢ်၀ဲဒၣ်တဂၤဒီးတဂၤတၢ်သူၣ်တမံသးတမုာ်လိာ်သးကဲထီၣ်လီၤအဃိ တကီၢ်ခါခဲအံၤ ၦၤမၤကမၣ်တၢ်ဖိသ့ၣ်တဖၣ်တၢ်ဖီၣ်န့ၢ်၀ဲလံအဂ့ၢ်န့ၣ် BGF နီၣ်ဂံၢ်(၂)သုးဟီၣ်က၀ီၤ ဒုးယၤခိၣ် သုးခိၣ်ဒိၣ်ဖိ စီၤတ့ၤ၀့ စံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“ဒ်သိးပသ့ၣ်ညါန့ၣ် ၦၤလၢအလဲၤမၤသံတၢ်တဖၣ်တၢ်ဖီၣ်န့ၢ်လံႉ ဖဲတၢ်လဲၤဖီၣ်၀ဲအခါန့ၣ်ခီဖျိအ၀ဲသ့ၣ်တဒိးဖီၣ်သးဘၣ်ဒီးစံၣ်၀ဲအဃိခးဘၣ်၀ဲ(၂)ဂၤဒီးသံ၀ဲလီၤႉ ဘၣ်ဃးဒီးတၢ်မၤသံမၤ၀ီန့ၣ်စ့ၢ်ကီး မ့ၢ်၀ဲဒၣ်တဂၤဒီးတဂၤတၢ်သူၣ်တမံသးတမုာ်လိာ်သးဘၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ ဖဲတၢ်တဖီၣ်ချုးန့ၢ်ဒံးၦၤမၤကမၣ်တၢ်ဖိတဖၣ်ဒံးဘၣ်အခါ...
တၢ်ဒုးဆဲးကဲထီၣ်လၢကညီသုးပာ်ဖှိၣ်ဒီးပယီၤသုးအဘၢၣ်စၢၤ ခံခီခံကပၤတၢ်ဘၣ်ဒိဘၣ်ထံးအိၣ်
လါအီးကထိဘၢၣ် ၁၃ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် ကီးတရံး ကလံၤထံးတကပၤ ဖဲတနံၤအံၤ(လါအီးကထိဘၢၣ် ၁၃)သီအနံၤ တၢ်ဒုးဆဲးကဲထီၣ်လၢကညီသုးပာ်ဖှိၣ်ဒီး ပယီၤသုးတဖၣ်အဘၢၣ်စၢၤဒီး ဖဲန့ၣ်ခံခီခံကပၤတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤတၢ်ကစီၣ်အအိၣ်န့ၣ်လီၤႉ ဖဲတနံၤအံၤဂီၤခီ ၁၁ နၣ်ရံၣ်အဆၢကတီၢ် ပယီၤသုးလၢအအိၣ်ဖဲကီးတရံး၀့ၢ် လဲၤ၀ၣ်ဖယါကိအံၤ ခးလီၤ၀ဲကျိဖးဒိၣ်လၢကမဲၤကိသ၀ီတကပၤ၀ံၤအလီၢ်ခံ တၢ်ခးလိာ်သးဟဲကဲထီၣ်၀ဲဒီး ဟီၣ်က၀ီၤကညီသုးပာ်ဖှိၣ်တဖၣ်အဂ့ၢ်န့ၣ် ၦၤလၢအဘူးဒီးကညီဖီၣ်စုက၀ဲၤကရူၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲတဂီၤအံၤ ၁၁ နၣ်ရံၣ်ဃၣ်ဃၣ်န့ၣ် အ၀ဲသ့ၣ်ခး၀ဲဒီးကျိဖးဒိၣ်မီၤနီၤႉ KNLA ဗ)တကပၤဘၣ်ဒိတဂၤ ဘၣ်အစုတၢ်ဘၣ်ယိၣ်ဒုတအိၣ်ဘၣ်ႉ မ့မ့ၢ်အ၀ဲသ့ၣ်တကပၤန့ၣ်သံ(၂)ဂၤလီၤႉ တၢ်အိၣ်သးခဲအံၤဒုခံခီခံကပၤအိၣ်ခိးကွၢ်စူၣ်လိာ်သးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ခးလိာ်သးကဲထီၣ်အံၤ မ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၆) သုးရ့ၣ်(၁၈)ႇDKBA ထုးဖးကရူၢ်ဒီး ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၁၂)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ-၂၃၀)လၢအအိၣ်ဆီလီၤသးဖဲကီးတရံးအံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်(လါအီးကထိဘၢၣ် ၁၁ႇ၁၂)သီအနံၤစ့ၢ်ကီး ဖဲကီးတရံး ကလံၤထံး ကီးနွဲၢ်သ၀ီဒီးသ၀ီသီတကပၤန့ၣ် ပယီၤသုးခီၣ်ချ့သုးရ့ၣ်(ခမရ-၅၅၆)ဒီး KNLA သုးက့(၆) သုးရ့ၣ်(၁၈)ႇ(DKBA)ထုးဖးကရူၢ်တဖၣ်အဘၢၣ်စၢၤ တၢ်ဒုးကဲထီၣ်ဆဲးတဲး၀ဲခံသီဒံးညါန့ၣ်လီၤႉ တၢ်ခးလိာ်သးကဲထီၣ်ဘျီ၀ဲန့ၣ် ပယီၤသုးတကပၤသံဘၣ်ဒိဘၣ်ထံး၀ဲအဂၤ(၂၀)ဘျဲၣ်အဂ့ၢ်န့ၣ် ၦၤလၢအဘူးဒီးကညိီဖီၣ်စုက၀ဲၤကရူၢ်စံး၀ဲဘၣ်ဆၣ် ခ့ၣ်အဲးစံၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတအိၣ်ဒံးဘၣ်န့ၣ်လီၤႉ လၢန့ၣ်အမဲာ်ညါခီဖျိပယီၤသုးခးနါစိၤကျိဖးဒိၣ်အဃိ ဟံၣ်ဃီတနီၤဟးဂူာ်ဟးဂီၤ၀ဲအိၣ်ဒီး လီၢ်က၀ီၤဖိလၢအအိၣ်ဘူးဒီးတၢ်ဒုးကဲထီၣ်အလီၢ်တဖၣ်စ့ၢ်ကီး ဘၣ်သုးလီၢ်သုးကျဲလဲၤစံၣ်အိၣ်၀ဲလၢအဘူးအတံၢ်အဟံၣ်အိၣ်၀ဲအသိး ၦၤလၢအနုာ်လီၤစံၣ်အိၣ်ခူသူၣ်လၢဟံၣ်ဖီလာ်တၢ်ပူၤစ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ တကီၢ်ခါခဲအံၤ...
ပယီၤသုးသူအါထီၣ်ကျိဖးဒိၣ်လၢ KNU သုးက့(၅)ဟီၣ်က၀ီၤအပူၤ
လါအီးကထိဘၢၣ် ၁၂ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် သုးက့(၅)ဟီၣ်က၀ီၤအပူၤ ပယီၤသုးရ့ၣ်(၂)ရ့ၣ်လၢအဟူးဂဲၤ၀ဲလၢလီၢ်ခံသ့ၣ်တဖၣ်အံၤ ခးလီၤကျိဖးဒိၣ်ဆူဒူသ၀ီတၢ်မၤအီၣ်လီၢ်ကျဲတဖၣ်အပူၤ ဟဲအါထီၣ်၀ဲအဂ့ၢ်န့ၣ် မုၢ်တြီၢ်ကီၢ်ရ့ၣ် ၦၤဘၣ်မူဘၣ်ဒါစံး၀ဲန့ၣ်လီၤႉ တကီၢ်ခါခဲအံၤ ပယီၤသုးလၢအဟဲနုာ်လီၤဆူဖၣ်ပူၣ်-ကမၤမိၣ်ဟီၣ်က၀ီၤပူၤတဖၣ်မ့ၢ်၀ဲ ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၈)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ-၄၀၄)ဒီး (ခမရ-၄၀၆)သုးရ့ၣ်တဖၣ်ဒီး အ၀ဲသ့ၣ်ပာ်ဖှိၣ်မၤသကိးတၢ်ဒီးဟီၣ်က၀ီၤ(BGF) သုးရ့ၣ်(၁၀၁၄)တဖၣ်စ့ၢ်ကီးအသိး ပယီၤသုးတဖၣ်ဟူးဂဲၤဟးထီၣ်က့ၤလီၤ လီၤလီၤဆီဆီစ့ၢ်ကီးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“(စကခ-၈)ႇ(ခမရ-၄၀၄)ဒီး(၄၀၆)သုးရ့ၣ်လၢအဟဲထီၣ်ခဲအံၤသ့ၣ်တဖၣ် အတၢ်ဟူးတၢ်ဂဲၤန့ၣ် လီၤဆီန့ၢ်၀ဲဒၣ်အပူၤကွံာ်သုးရ့ၣ်သ့ၣ်တဖၣ်မီၤနီၤႉ မ့ၢ်၀ံၤဘျီဖီၣ်၀ဲပီၣ်တၣ်ဒီးမၢၦၤ၀ံန့ၢ်အတၢ်ဖိတၢ်လံၤလီၤႉ ပကွၢ်န့ၣ် သုးရ့ၣ်လၢအဟဲထီၣ်ခဲအံၤသ့ၣ်တဖၣ် ခီဖျိတသ့ၣ်ညါဟီၣ်က၀ီၤတၢ်အိၣ်သးဘၣ်အဃိ လၢတၢ်ဒီသဒၢလီၤက့ၤအကစၢ်သးအဂီၢ်န့ၣ် ဟးခးလီၤနါစိၤကျိဖးဒိၣ်လီၤမီၤနီၤႉ ခဲအံၤအ၀ဲသ့ၣ်အတၢ်ဟူးတၢ်ဂဲၤတဖၣ်ဟဲအါထီၣ်ရုၢ်ရုၢ်လီၤႉ တၢ်ဘၣ်သဂၢၢ်ခးလိာ်သးစ့ၢ်ကီးဟဲအါထီၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲလါအီးကထိဘၢၣ် ၂ သီအနံၤန့ၣ် ပယီၤသုးဒီး(BGF)သုးပာ်ဖှိၣ်တဖၣ် ခးလီၤ၀ဲကျိဖိကျိဖးဒိၣ်(၅)ဖျၢၣ်ဆူ ဖီထံခုၣ်သ၀ီဒီးလၢၢ်ဒ့သ၀ီ လီၢ်က၀ီၤဖိတၢ်မၤအီၣ်လီၢ်ကျဲတဖၣ်အပူၤန့ၣ်လီၤႉ လၢန့ၣ်အမဲာ်ညါဖဲလါအီးကထိဘၢၣ် ၄ သီအနံၤ ပယီၤသုးလၢအဟူးဂဲၤဖဲဖၣ်ပူၣ်ဟီၣ်က၀ီၤအပူၤတဖၣ် ခီဖျိခးလီၤ၀ဲကျိဖးဒိၣ်တဖၣ်ဆူ၀့ၤမိၤသ၀ီပူၤအဃိ ဘၣ်၀ဲဒၣ်သီခါဖၠၣ်ဒီးဟံၣ်(၁၂)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါဖဲ(လါအီးကထိဘၢၣ် ၇)သီအနံၤစ့ၢ်ကီး မဲးပြံးသ၀ီဖိအချံလၢကလဲၤဆှၢ၀ဲၦၤမိၢ်ဒၢလၢကလဲၤအိၣ်ဖျဲၣ်ဖိအံၤစ့ၢ်ကီးန့ၣ် BGF သုးရ့ၣ်(၁၀၁၄)အံၤတဟ့ၣ်လဲၤ၀ဲချံအံၤဘၣ်ဒီး ခးပျံၤ၀ဲဒီးကျိအထံၣ်အါမးအဂ့ၢ်န့ၣ်...
ဖဲကီးတရံး ကလံၤထံး တၢ်ဒုးကဲထီၣ်ကဒီးလၢကညီသုးပာ်ဖှိၣ်ဒီးပယီၤသုးအဘၢၣ်စၢၤ
လါအီးကထိဘၢၣ် ၁၂ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါအီးကထိဘၢၣ် ၁၂)သီအနံၤ ကညီသုးပာ်ဖှိၣ်ဒီးပယီၤသုးတဖၣ်အဘၢၣ်စၢၤ တၢ်ခးလိာ်သးကဲထီၣ်ကဒီးဖဲကညီကီၢ်စဲၣ် ကီးတရံး ကလံၤထံး လၢသ၀ီသီတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲခ့ၣ်အဲၣ်ယူၣ်တၢ်ပၢဟီၣ်က၀ီၤ ကီးတရံး ကလံၤထံး သ၀ီသီခိၣ်ထိးန့ၣ် ပယီၤသုးခီၣ်ချ့သုးရ့ၣ်(ခမရú၅၅၆)လၢအဟဲနုာ်လီၤတလၢ၀ဲဟီၣ်က၀ီၤအံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၆) သုးရ့ၣ်(၁၈)ဒီး (DKBA)ထုးဖးကရူၢ်တဖၣ် အိၣ်ခိးခး၀ဲဒၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“တၢ်ခးလိာ်သးစးထီၣ်ကဲထီၣ်ဖဲ ၁၁ နၣ်ရံၣ်အခါလီၤႉ ခဲအံၤကျိဖးဒိၣ်ကျိဖိခးတပယူာ်ဃီလီၤႉ အ၀ဲသ့ၣ်န့ၣ်ဟဲ၀ဲဖဲသ၀ီသီတကပၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤလီၢ်က၀ီၤဖိလၢအအိၣ်ဘူးဒီးတၢ်ခးလိာ်သးကဲထီၣ်အလီၢ်တဖၣ် သုးလီၢ်သုးကျဲလဲၤဃ့ၢ်အိၣ်၀ဲဆူအဘူးတံၢ်အဟံၣ်အဃီအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲမဟါ(လါအီးကထိဘၢၣ် ၁၁)သီအနံၤစ့ၢ်ကီး ကညီသုးပာ်ဖှိၣ်ဒီးပယီၤသုးတဖၣ်အဘၢၣ်စၢၤတၢ်ခးလိာ်သးကဲထီၣ်ဒံး၀ဲဖဲကီးတရံး၀့ၢ် ကလံၤထံး ကီးနွဲၢ်သ၀ီကပၤဒီး ဖဲန့ၣ်ပယီၤသုးတကပၤသံ(၅)ဂၤဒီး ဘၣ်ဒိဘၣ်ထံးအဂၤ(၂၀)ဃၣ်ဃၣ်အဂ့ၢ်န့ၣ် ၦၤလၢအဘူးဒီးကညီဖီၣ်စုက၀ဲၤကရူၢ်တဖၣ်စံး၀ဲန့ၣ်လီၤႉ
ကီးတရံး၀့ၢ် ကီးနွဲၢ်သ၀ီကပၤ ကညီသုးပာ်ဖှိၣ်ဒီးပယီၤသုးတၢ်ခးလိာ်သးကဲထီၣ်ႇပယီၤသုးသံ ၂ ဂၤ
လါအီးကထိဘၢၣ် ၁၁ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါအီးကထိဘၢၣ် ၁၁)သီ ဂီၤခီအဆၢကတီၢ် ဖဲကီးတရံး၀့ၢ် ကီးနွဲၢ်သ၀ီကပၤ ကညီသုးပာ်ဖှိၣ်ကရူၢ်ဒီးပယီၤသုးတဖၣ်အဘၢၣ်စၢၤတၢ်ခးလိာ်သးကဲထီၣ်ယံၤ၀ဲ(၃၀)မံးနံးဃၣ်ဃၣ်ဒီး ဖဲန့ၣ်ပယီၤသုးတကပၤသံ၀ဲ(၂)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲတနံၤအံၤဂီၤခီအဆၢကတီၢ် ပယီၤသုးဂံၢ်ဘါအဂၤ(၇၀)ဃၣ်ဃၣ်လၢအအိၣ်ဖဲကီးနွဲၢ်သ၀ီကလဲၤထီၣ်ဆူ၀့ၢ်လီၢ်လံၤအခါ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၆) သုးရ့ၣ်(၁၈)ဒီး (DKBA)ထုုးဖးကရူၢ်သုးပာ်ဖှိၣ်တဖၣ် အိၣ်ခိးခး၀ဲဒၣ်လီၤအဂ့ၢ်န့ၣ် ၦၤလၢအဘူးဒီး(KNLA)တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ခးလိာ်သးဖဲတနံၤအံၤ(၈)နၣ်ရံၣ်တခီအဆၢကတီၢ်မီၤနီၤႉ ပယီၤသုးအံၤအိၣ်၀ဲလၢကီးနွဲၢ်သ၀ီကလဲၤ၀ဲလၢ၀့ၢ်လီၢ်လံၤမီၤနီၤႉ ဟဲထီၣ်တလၢတၢ်လီၢ်အဃိလၢန့ၣ်တကပၤခး၀ဲမီၤနီၤႉ ဒ်ပသ့ၣ်ညါခဲအံၤန့ၣ် ပယီၤသုးသံ(၂)ဂၤႇဘၣ်ဒိဘၣ်ထံးခီဒုပတနၢ်ဟူဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ခးလိာ်သးကဲထီၣ်ဖဲတဂီၤညါအံၤတၢ်ဂ့ၢ်န့ၣ် ခီဖျိပယီၤသုးဒိးန့ၢ်ဘၣ်တၢ်ကစီၣ်လၢ(DKBA)ထုးဖးကရူၢ်ဒီး(PDF)ကရူၢ်တဖၣ်ဟဲတုၤ၀ဲဖဲကီးတရံး၀့ၢ် ကလံၤထံး ကီးနွဲၢ်သ၀ီတကပၤဒီး ဖဲပယီၤသုးမၤရှဲလဲဟီၣ်က၀ီၤအဆၢကတီၢ်တၢ်ခးလိာ်သးဟဲကဲထီၣ်၀ဲဒီး မ့မ့ၢ်တၢ်ဘၣ်ဒိဘၣ်ထံးတၢ်အိၣ်သးခီဒုတသ့ၣ်ညါဒံးဘၣ်အဂ့ၢ်န့ၣ် ၦၤလၢအဘူးဒီးပယီၤသုးတဖၣ်စံး၀ဲန့ၣ်လီၤႉ တၢ်ခးလိာ်သးကဲထီၣ်ဘျီ၀ဲအံၤအပူၤ ပယီၤသုးခီၣ်ချ့သုးရ့ၣ်(ခမရ-၅၅၆)ဒီး သုးခိးကီၢ်ဆၢ(BGF)သုး တဖၣ်ပၣ်ဃုာ်၀ဲအသိး ခီၣ်ချ့သုးရ့ၣ်(ခမရ-၉၇)လၢအအိၣ်ဆီလီၤသး ဖဲကီးတရံးအံၤစ့ၢ်ကီးခး စၢၤ၀ဲဒၣ်ကျိဖးဒိၣ်တဖၣ်အဂ့ၢ်န့ၣ် ၦၤလၢအဘူးဒီးပယီၤသုးတဂၤ စံးအါထီၣ်၀ဲန့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“တၢ်ခးလိာ်သးကဲထီၣ်ကယံၤ၀ဲတခီနၣ်ရံၣ်မီၤနီၤႉ ဖဲဂီၤခီ ၉ နၣ်ရံၣ်န့ၣ်တနၣ်ဟူကျိသီၣ်လၢၤဘၣ်ႉ ဆၣ်ဆၣ်ခီဖျိပယီၤသုးတကပၤမၤ၀ဲသုးတၢ်ဟူးတၢ်ဂဲၤအိၣ်အဃိ ဘၣ်ယိၣ်လၢတၢ်ဒုးကဆူၣ်ထီၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ဖဲကီးတရံး၀့ၢ် ကလံၤထံးတကပၤန့ၣ် တၢ်ခးလိာ်သးကဲထီၣ်ဒီးပယီၤသုးအိၣ်၀ဲတလီၢ်လီၢ်ဒီး တုၤလၢတကီၢ်ခါခဲအံၤတစုလၢဟီၣ်က၀ီၤတၢ်ဒိၣ်စိအဂီၢ် ပယီၤသုးမၤ၀ဲသုးတၢ်ဟူးတၢ်ဂဲၤတဘိယူၢ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤႉ