တၢ်ကြဲၢ်ကီၢ်ဆၣ်ပူၤ တၢ်လဲၤခး(BGF)အဃိ သံ ၄ ဂၤ
လါအီးကထိဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲမဟါ(လါအီးကထိဘၢၣ် ၇)သီ ဟါခီအဆၢကတီၢ် တၢ်လဲၤခး၀ဲသုးခိးကီၢ်ဆၢ(BGF)သုးလၢအအိၣ်ဖဲ ကညီကီၢ်စဲၣ်ႇ တၢ်ကြဲၢ်ကီၢ်ဆၣ် နိၣ်မၠၣ်လွဲဒီးကီၢ်အံးစဲၤသ၀ီအဘၢၣ်စၢၤဒီး သံ၀ဲ(၄)ဂၤအဂ့ၢ်န့ၣ် BGF တကပၤစံး၀ဲန့ၣ်လီၤႉ ဖဲမဟါမုၢ်နၤခီ ၁၁ နၣ်ရံၣ်အဆၢကတီၢ်န့ၣ် ၦၤဖီၣ်စုက၀ဲၤကရူၢ်တဒူၣ်ဟဲခး၀ဲဒၣ်လီၤအဂ့ၢ်န့ၣ် သုးခိးကီၢ်ဆၢ (BGF) နီၣ်ဂံၢ်(၂)သုးဟီၣ်က၀ီၤ ဒုးယၤခိၣ် သုးခိၣ်ဒိၣ်ဖိ စီၤတ့ၤ၀့ ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“ဟဲခး၀ဲဖဲမုၢ်နၤခီမီၤနီၤႉ အ၀ဲသ့ၣ်န့ၣ်အိၣ်လၢသ၀ီပူၤအိၣ်၀ဲဒီးအဟံၣ်ဖိဃီဖိမီၤနီၤႉ အမါသံႇအ၀ၤနါက့သံႇအဖိစ့ၢ်ကီးသံလီၤႉ သံ၀ဲခဲလၢာ်(၄)ဂၤလီၤႉ ခဲအံၤပဟးဃုသ့ၣ်ညါအဖၢမုၢ်လီၤ”အဂ့ၢ်န့ၣ် စံး၀ဲန့ၣ်လီၤႉ ဖဲတၢ်လဲၤခး(BGF)သုးတဖၣ်၀ံၤအလီၢ်ခံ ဖဲတနံၤအံၤ(လါအီးကထိဘၢၣ် ၈)သီ ဂီၤခီအဆၢကတီၢ်န့ၣ် (BGF)သိလ့ၣ် ၉ ခိၣ် ဟဲသမံသမိးတၢ်လၢနိၣ်မၠၣ်လွဲသ၀ီပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣလီၤႉ (BGF)သုးရ့ၣ်လၢတၢ်လဲၤခး၀ဲအံၤ မ့ၢ်၀ဲဒၣ်သုးရ့ၣ်(၁၀၁၉)အစုဒုၣ်တီၤအဖီလာ်သုးရ့ၣ်လီၤအဂ့ၢ်န့ၣ် BGF ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ကီၢ်ပယီၤရီဘၢၣ်အၦ့ၤထီၣ်ဘၣ်ဆၣ်ခီဖျိစ့ၦ့ၤလီၤအဃိ ၦၤသူၣ်ရီဘၢၣ်ဖိတဖၣ်သဂၢၢ်ဘၣ်ဒံး၀ဲတၢ်ကီတၢ်ခဲ
လါစဲးပထ့ဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ် တကီၢ်ခါခဲအံၤကီၢ်ပယီၤရီဘၢၣ်အဘ့ၣ်ဘျ့(RSS3)တပီၣ်န့ၣ် အၦ့ၤထီၣ်တုၤ၀ဲလၢ(၁၀၀၀)ကၠးလံဘၣ်ဆၣ် ခီဖျိရီဘၢၣ်အတၢ်ဖိတၢ်လံၤလၢတၢ်သူ၀ဲတဖၣ်အၦ့ၤထီၣ်ဒီးစ့ပယီၤအၦ့ၤလီၤအဃိ ဒွးတကဲးဘၣ်အဂ့ၢ်န့ၣ် ၦၤသူၣ်ရီဘၢၣ်ဖိတဖၣ်စံး၀ဲန့ၣ်လီၤႉ ဖဲအပူၤကွံာ်နံၣ်အခါ ရီဘၢၣ်အဘ့ၣ်တီၣ်တပီၣ်န့ၣ်အၦ့ၤထီၣ်တုၤလၢ(၅၀၀)ကၠး တုၤလၢတနံၣ်အံၤ(၈၃၀)ကၠးဒီး အပူၤကွံာ်နံၣ်အခါ အဘ့ၣ်ဘျ့(RSS3)အၦ့ၤအိၣ်၀ဲ(၇၄၀)ကၠးခိၣ်ဃၢၤဒီး တနံၣ်အံၤအၦ့ၤထီၣ်တုၤလၢ(၁ႇ၂၅၀)ကၠးဘၣ်ဆၣ် ရီဘၢၣ်အတၢ်ဖိတၢ်လံၤလၢတၢ်သူ၀ဲတဖၣ် ဘၣ်ၦ့ၤလၢစ့ပယီၤအဃိ ၦၤမၤအီၣ်ရီဘၢၣ်ကျီးဖိတနီၤထံၣ်ဘၣ်၀ဲတၢ်ကီတၢ်ခဲအဖၢမုၢ်ဒံးလီၤအဂ့ၢ်န့ၣ်် သ့ၣ်ညါဘၣ်လၢၦၤၦ့ၤရီဘၢၣ်ဖိတဖၣ်အအိၣ်န့ၣ်လီၤႉ ကၠးအ့စ့ၣ်ကၠံကီၢ်ဆၣ် ၦၤမၤအီၣ်ရီဘၢၣ်ကျီး အူနဲၣ် စံး၀ဲ“ရီဘၢၣ်အၦ့ၤထီၣ်(၁၀၀)(၂၀၀)ဘၣ်ဆၣ် ခီဖျိစ့ပယီၤအၦ့ၤလီၤအဃိရီဘၢၣ်တၢ်ဖိတၢ်လံၤလၢတၢ်သူ၀ဲသ့ၣ်တဖၣ်အၦ့ၤထီၣ်၀ဲ(၂)စးညါန့ၣ်လီၤႉ အပူၤကွံာ်လၢညါဟီၣ်စီ(မၠ့ၣ်အီစၣ်)တထၢၣ်န့ၣ်(၂၆ႇ၀၀၀)ကၠး ခဲအံၤအၦ့ၤထီၣ်တုၤလၢ(၆၂ႇ၀၀၀)ကၠးလီၤႉ တုၤလၢခဲအံၤခီဖျိတၢ်စူၤတကတၢၢ်ဒံးဘၣ်အဃိ ၦၤအါဒၣ်တက့ၢ်န့ၣ်တစးထီၣ်ဘၣ်အတၢ်ဖံးတၢ်မၤဒံးဘၣ်ႉ လၢတၢ်ကထုးထီၣ်ရီဘၢၣ်အဂီၢ် ခီဖျိစဲးဖီၣ်ကဟၣ်တၢ်ဖိတၢ်လံၤလၢအဂၤတဖၣ်အၦ့ၤထီၣ်အဃိ တဘၣ်ဂီၢ်၀ဲဘၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကီၢ်ပယီၤရီဘၢၣ်(၇၀)မျးကယၤလၢတၢ်ဆှၢဟးထီၣ်၀ဲအံၤ ဘၣ်တၢ်ဆှၢအီၤဆူတရူးထံကီၢ်ဒီး ထံကီၢ်လၢအထုးထီၣ်ရီဘၢၣ်တၢ်ဖိတၢ်လံၤတဖၣ်အါဒၣ်တက့ၢ်န့ၣ် ခီဖျိခိ၀ံၣ်တၢ်ဆါအဃိ တၢ်ကးတံၢ်ကွံာ်၀ဲရီဘၢၣ်စဲးဖီကဟၣ်တၢ်မၤလီၢ်၀ံၤအလီၢ်ခံ စ့အၦ့ၤတဂၢၢ်တကျၢၤ၀ဲဟဲကဲထီၣ်သးန့ၣ်လီၤႉ ဖဲတနံၣ်အံၤရီဘၢၣ်အဆၢကတီၢ်စးထီၣ်န့ၣ် ရီဘၢၣ်အၦ့ၤထီၣ်ဘၣ်ဆၣ် စ့အလုၢ်အၦ့ၤတဂၢၢ်တကျၢၤဒံး၀ဲဘၣ်အဂ့ၢ်န့ၣ် သ့ၣ်ညါဘၣ်လၢၦၤၦ့ၤရီဘၢၣ်ဖိတဖၣ်အအိၣ်န့ၣ်လီၤႉ “ခိ၀ံၣ်ကဲထီၣ်သး၀ံၤခီဖျိတၢ်မၤလီၢ်တဖၣ်က့ၤတရံးကဒါလံအဃိ ရီဘၢၣ်အတၢ်ဖိတၢ်လံၤတဖၣ်ဒုအၦ့ၤထီၣ်မီၤနီၤႉ ခဲအံၤ(RSS3)တပီၣ်န့ၣ်(၁ႇ၂၀၀)ကၠးမီၤနီၤႉ စ့အလုၢ်အၦ့ၤတဂၢၢ်တကျၢၤဒံးဘၣ်ႉ အၦ့ၤဂ့ၤဒုပတဲသ့မီၤနီၤႉ ရီဘၢၣ်တၢ်ဖိတၢ်လံၤလၢတၢ်သူ၀ဲတဖၣ်အဂီၢ်ခီဖျိအၦ့ၤထီၣ်ခံစးညါအဃိဘၣ်က့ၤဒွးဒံးမီၤနီၤ”အဂ့ၢ်န့ၣ် ကီၢ်ပယီၤ တၢ်ထုးထီၣ်ရီဘၢၣ်တၢ်ဖံးတၢ်မၤကရူၢ်ခိၣ် အူခဲၤမၠ့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကီၢ်ပယီၤရီဘၢၣ်တၢ်ဖိတၢ်လံၤလၢတၢ်ထုးထီၣ်၀ဲတဖၣ် တၢ်ဆှၢ၀ဲဆူတရူးထံကီၢ်ဒီး လၢန့ၣ်အမဲာ်ညါတၢ်ဆှၢစ့ၢ်ကီးအီၤလၢအ့ဒံၣ်ယၣ်ႇမလ့ရှါႇစ့ၣ်ကပူၣ်ႇကိရံယါႇယပၣ်ထံကီၢ်ဒီး အပူၤကွံာ်နံၣ်န့ၣ်တၢ်ဆှၢ၀ဲရီဘၢၣ်လၢအဖိးသဲစးအိၣ်၀ဲအတၣ်(တကလီၢ်ဘျဲၣ်)ညါအဂ့ၢ်န့ၣ် သ့ၣ်ညါဘၣ်လၢတၢ်ထုးထီၣ်ရီဘၢၣ်တၢ်ဖံးတၢ်မၤလီၢ်တဖၣ်အအိၣ်န့ၣ်လီၤႉ
လၢကအိၣ်ခိးကွၢ်(KNU)တၢ်ဟူးတၢ်ဂဲၤအဂီၢ် (BGF)မၢလီၢ်က၀ီၤဖိတဖၣ်ဒုးအိၣ်ထီၣ်သ၀ီသးၦၢ်တစိၢ်တလီၢ်
လါအီးကထိဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ် ဒ်သိးတၢ်ကအိၣ်ခိးကွၢ်ဟုၣ်ကွၢ်စူၣ် ကညီဒီကလုာ်စၢဖှိၣ်ကရၢ -KNU သုးက့(၁) စုဒုၣ်တီၤအဖီလာ်သုးတၢ်ဟူးတၢ်ဂဲၤဒီးကဟ့ၣ်တၢ်ကစီၣ်အဂီၢ် သုးခိးကီၢ်ဆၢ(BGF) နဲၣ်လီၤတၢ်ကလုၢ်ဆူသ၀ီ(၄)ဖျၢၣ် လီၢ်က၀ီၤသ၀ီဖိတဖၣ်လၢအကဒုးအိၣ်ထီၣ်သ၀ီသးၦၢ်တစိၢ်တလီၢ်အဂ့ၢ်န့ၣ် သ့ၣ်ညါဘၣ်လၢ KNU သုးက့(၁)ၦၤဘၣ်မူဘၣ်ဒါအအိၣ်န့ၣ်လီၤႉ KNU သုးက့(၁)ဟီၣ်က၀ီၤ ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ် တကီၤဘိသ၀ီကရူၢ်အပူၤ ဖဲအပူၤကွံာ်လါအီးကထိဘၢၣ် ၃ သီအနံၤ (BGF)သုးရ့ၣ်(၁၀၁၄)သုးဒ့(၂)ခိၣ် သုးခိၣ်တ့ၤ၀့ ကိး၀ဲ ကၠိၣ်ပ့ၤစ့ၣ်ႇမၠဲၤႇကိတါကၠံဒီးမံပိသ၀ီ သ၀ီၦၤဘၣ်မူဘၣ်ဒါတဖၣ်တၢ်အိၣ်ဖှိၣ်ဒီး နဲၣ်လီၤ၀ဲတၢ်ကလုၢ်လၢကဃုထၢတီၣ်ထီၣ်သ၀ီသးၦၢ်တစိၢ်တလီၢ်အဂ့ၢ်န့ၣ် KNU ဖၣ်အၣ်ကီၢ်ဆၣ် တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤဒ့ ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်သ၀ီ(၄)ဖျၢၣ်န့ၣ် တၢ်မၢအကဲ(တလါ)သးၦၢ် (၁၅)သီသးၦၢ်မီၤနီၤႉ မ့ထံၣ်ကီၢ်သူလ့ၤအၦၤတဖၣ်ဟးထီၣ်က့ၤလီၤန့ၣ်မၢဆဲးကျိးအ၀ဲသ့ၣ်အဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်နဲၣ်လီၤတၢ်ကလုၢ်လၢကဘၣ်ကဲသ၀ီသးၦၢ်ဒ်သိးဒီးဘၣ်ဟ့ၣ်(BGF)တၢ်ကစီၣ်အဖီခိၣ်အံၤ လီၢ်က၀ီၤသ၀ီဖိတဖၣ်ယိၣ်၀ဲလၢ(KNU)တကပၤတၢ်ထံၣ်ကမၣ်ကဟဲအိၣ်ထီၣ်၀ဲအသိး (BGF)တကပၤစ့ၢ်ကီးပာ်ဂံၢ်ပာ်ဘါ၀ဲဒၣ်စုက၀ဲၤဒီးမၢဆူၣ်သ၀ီဖိလၢကတီၣ်ထီၣ်သ၀ီသးၦၢ်အဖီခိၣ် ခီဖျိပျံၤဘၣ်၀ဲအဃိဘၣ်တီၣ်ထီၣ်သးၦၢ်လၢအတပၣ်၀ဲဒီးအ၀ဲသ့ၣ်တၢ်ပာ်သးဘၣ်အဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ လၢတၢ်ကဃုထၢတီၣ်ထီၣ်သ၀ီသးၦၢ်အံၤအဂီၢ် BGF နဲၣ်လီၤတၢ်ကလုၢ်လၢတၢ်ကဘၣ်တီၣ်ထီၣ် သ၀ီသးၦၢ်လၢသ၀ီတဖျၢၣ်စုာ်စုာ်အပူၤဒီး ဖဲန့ၣ် ကၠိၣ်ပ့ၤစ့ၣ်သ၀ီန့ၣ် တလါ သးၦၢ်(၂)ဂၤႇ...
သုးက့(၆)ဘ့ၣ်အပူၤ လၢတလါအတီၢ်ပူၤတၢ်ဒုးကဲထီၣ်(၂၆၇)ဘျီႇ ပယီၤသုးသံ(၂၃၄)ဂၤအဂ့ၢ် KNU ထုးထီၣ်ပာ်ဖျါ
လါအီးကထိဘၢၣ် ၇ သီႇ ၂၀၂၁ နံၣ်ႇ ခ့ၣ်အဲးစံၣ် KNU- ကညီဒီကလုာ်စၢဖှိၣ်ကရၢ သုးက့(၆)ဘ့ၣ်အပူၤ ဖဲအပူၤကွံာ်လါစဲးပထ့ဘၢၣ်တလါအတီၢ်ပူၤန့ၣ် KNLA သုးဒီးပယီၤသုးတဖၣ်အဘၢၣ်စၢၤတၢ်ခးလိာ်သးကဲထီၣ်ပာ်ဖှိၣ်အိၣ်၀ဲ(၂၆၇)ဘျီဒီး ဖဲန့ၣ်ပယီၤသုးတကပၤသံ၀ဲ(၂၃၄)ဂၤအဂ့ၢ်န့ၣ် KNU တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤ ထုးထီၣ်ပာ်ဖျါ၀ဲဖဲလါအီးကထိဘၢၣ် ၄ သီအနံၤန့ၣ်လီၤႉ ဒ်(KNU)တၢ်ပာ်ဖျါအသိး ဖဲသုးက့(၁)န့ၣ်တၢ်ဒုးကဲထီၣ်၀ဲ(၂၇)ဘျီႇ သုးက့(၂)တၢ်ဒုးကဲထီၣ်(၂)ဘျီႇ သုးက့(၃)တၢ်ဒုးကဲထီၣ်(၁၄)ဘျီႇ သုးက့(၄)တၢ်ဒုးကဲထီၣ်(၅)ဘျီႇ သုးက့(၅)တၢ်ဒုးကဲထီၣ်(၂၁၃)ဘျီဒီး သုးက့(၆)တၢ်ဒုးကဲထီၣ်(၆)ဘျီအဂ့ၢ်န့ၣ် ပာ်ဖျါဃာ်၀ဲန့ၣ်လီၤႉ ဖဲတၢ်ဒုးကဲထီၣ်သ့ၣ်တဖၣ်န့ၣ် ပယီၤသုးတကပၤသံ(၂၃၄)ဂၤဒီး ဘၣ်ဒိ၀ဲ(၂၆၅)ဂၤအသိး မ့မ့ၢ်(KNU)တကပၤသံ(၅)ဂၤဒီး ဘၣ်ဒိ၀ဲ(၁၀)ဂၤအဂ့ၢ်န့ၣ် KNU တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤ ထုးထီၣ်ပာ်ဖျါ၀ဲန့ၣ်လီၤႉ ခီဖျိပယီၤသုးတကပၤဟဲထီၣ်တလၢဟီၣ်က၀ီၤတၢ်ပာ်ပနီၣ်ဒီးမၤအါထီၣ်သုးဂံၢ်ဘါလၢ(KNU) ဟီၣ်က၀ီၤပူၤအဃိ တၢ်ဒုးဘၣ်ဟဲဆူၣ်ထီၣ်၀ဲလီၤအဂ့ၢ်န့ၣ် KNU ထံဂုၤကီၢ်ဂၤ၀ဲၤကျိၤမူဒါခိၣ် ပဒိၣ်စီၤတီနံ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “လၢလီၢ်ခၢၣ်သးထီဘိကမံးတံာ်တၢ်ဆၢတဲာ်အိၣ်စ့ၢ်ကီးလၢ ဟီၣ်က၀ီၤမ့တလၢကွံာ်န့ၣ်ဘၣ်ခးလီၤန့ၣ်အိၣ်ပာ်စၢၤလံႇတလိၣ်ပတဲတၢ်နီတမံၤလၢၤဘၣ်ႉ ခီဖျိအ၀ဲသ့ၣ်လဲၤ တလၢက့ၤတလၢအဃိန့ၣ်တၢ်ခးလိာ်သးဟဲအါထီၣ်လီၤႉ မ့အိၣ်ဒၣ်၀ဲလၢအလီၢ်ဒၣ်၀ဲဒီးမ့တမၤအါထီၣ်အသုးအ တၢ်ဟူးတၢ်ဂဲၤမ့တအါထီၣ်တၢ်သ့ၣ်တဖၣ်အံၤမ့အိၣ်ခီန့ၣ် ခးလိာ်သးန့ၣ်တမ့ၢ်ကအိၣ်ထဲန့ၣ်ညါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ KNU တၢ်ပၢဟီၣ်က၀ီၤအပူၤ သုးက့အိၣ်၀ဲ(၇)ဘ့ၣ်အကျါ စးထီၣ်လၢသုးက့(၁)ဟီၣ်က၀ီၤတုၤလၢသုးက့(၆)ဟီၣ်က၀ီၤအပူၤန့ၣ် သုးတၢ်သဘံၣ်သဘုၣ်ဟဲအိၣ်ထီၣ်ဒီးတၢ်ဒုးကဲထီၣ်၀ဲဒၣ်န့ၣ်လီၤႉ ဒ်ကိးလါဒဲးတၢ်မၤနီၣ်စရီအသိး သုးက့(၇)ဟီၣ်က၀ီၤအပူၤတၢ်ခးလိာ်သးကဲထီၣ်တအိၣ်၀ဲဘၣ် ဆၣ်ဆၣ်ပယီၤသုးဒီးကညီကီၢ်စဲၣ် သုးခိးကီၢ်ဆၢ(BGF)သုးပာ်ဖှိၣ်တဖၣ်ဟူးဂဲၤ၀ဲအိၣ်အဂ့ၢ်န့ၣ် KNU...
တလါအတီၢ်ပူၤတၢ်ဖီၣ်ချုးန့ၢ်ၦၤနုာ်လီၤခူသူၣ်လၢကီၢ်ကၠီၣ်တဲၣ်ပူၤလၢအတဖိးသဲစး(၄၀၀)ဘျဲၣ်
လါအီးကထိဘၢၣ် ၆ သီႇ ၂၀၂၁ နံၣ်ႇ ခ့ၣ်အဲးစံၣ် စးထီၣ်ဖဲလါစဲးပထ့ၢၣ် ၁ သီတုၤလၢလါအီးကထိဘၢၣ် ၄ သီ လၢတလါဘျဲၣ်အတီၢ်ပူၤ တၢ်ဖီၣ်ချုးန့ၢ်ၦၤနုာ်လီၤခူသူၣ်လၢကီၢ်ကၠီၣ်တဲၣ်ပူၤလၢအတဖိးသဲစးအဂၤ(၄၀၀)ဘျဲၣ်အဂ့ၢ်န့ၣ် ကီၢ်ကၠီၣ်တဲၣ်အတၢ်ထုးထီၣ်ပာ်ဖျါတၢ်ကစီၣ်အသိး သ့ၣ်ညါဘၣ်န့ၣ်လီၤႉ ဒ်ကီၢ်ကၠီၣ်တဲၣ်အတၢ်ထုးထီၣ်ပာ်ဖျါတၢ်ကစီၣ်အသိးန့ၣ် ဖဲတလါအံၤလါအီးကထိဘၢၣ် ၁ သီအနံၤ တးခ်ကီၢ်ရ့ၣ်် မဲၢ်ဆီးလီၢ်က၀ီၤအပူၤတၢ်ဖီၣ်ချုးန့ၢ်၀ဲဖိသၣ်တဂၤဃုာ်ဒီးပိာ်မုၣ်ပိာ်ခွါ(၃၉)ဂၤႇ ဖဲလါအီးကထိဘၢၣ် ၃ သီအနံၤ လၢမဲၢ်ဆီးဟီၣ်က၀ီၤအပူၤတၢ်ဖီၣ်ချုးန့ၢ်၀ဲပိာ်ခွါပိာ်မုၣ်(၂၀)ဂၤဒီး မ့မ့ၢ်ကံၣ်မဲကီၢ်ရ့ၣ်အပူၤ တၢ်ဖီၣ်ချုးန့ၣ်ၦၤကီၢ်ပယီၤဖိလၢအတဖိးသဲစး(၁၅)ဂၤလၢဖၤသ၀ီဃၢၤကရၢၢ်ပူၤတၢ်လီၢ်တတီၤဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါ လၢကီၢ်ကၠီၣ်တဲၣ်ဒီးတနီသရံၣ်ကီၢ်ခီဒိၣ်ကီၢ်ဆၢ ပကၠိၣ်ခံၤယံၤခၤကီၢ်ရ့ၣ်အပူၤစ့ၢ်ကီး ဖဲလါအီးကထိဘၢၣ် ၃ သီဒီး ၄ သီအနံၤ တၢ်ဖီၣ်ချုးန့ၢ်ၦၤကီၢ်ပယီၤဖိလၢအနုာ်လီၤခူသူၣ်လၢကီၢ်ကၠီၣ်တဲၣ်ပူၤ ၅၈ ဂၤႇ ၦၤနဲၣ်ကျဲဖိ ၂ ဂၤဒီးသိလ့ၣ်တခိၣ်န့ၣ်လီၤႉ လၢတၢ်န့ၣ်အဃိဖဲအပူၤကွံာ် လါစဲးပထ့ဘၢၣ်တုၤဖဲတလါအံၤလါအီးကထိဘၢၣ် ၄ သီအနံၤ တၢ်ဖီၣ်ချုးန့ၢ်ၦၤကီၢ်ပယီၤဖိလၢအနုာ်လီၤခူသူၣ်လၢကီၢ်ကၠီၣ်တဲၣ်ကီၢ်ဆၢပူၤအိၣ်၀ဲအဂၤ(၄၀၀)ဘျဲၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ ဖဲစှၤလါအတီၢ်ပူၤ ၦၤကီၢ်ပယီၤဖိတဖၣ်နုာ်လီၤခူသူၣ်လၢကီၢ်ကၠီၣ်တဲၣ်ပူၤဟဲအါထီၣ်၀ဲအံၤ ခီဖျိတၢ်ကစီၣ်ရၤလီၤသးလၢ ၦၤလၢအိၣ်ကီၢ်ကၠီၣ်တဲၣ်ပူၤလၢအတအိၣ်ဒီးလံာ်လဲၢ်သ့ၣ်တဖၣ်အံၤ ကီၢ်ကၠီၣ်တဲၣ်ပဒိၣ် ကထုးထီၣ်န့ၢ်၀ဲလံာ်အုၣ်သး(ပါယီၤကး)ဒီး ၦၤစိာ်ဆၢၦၤကညီ(ကဲၤရံၤ)တဖၣ်အတၢ်ကွဲန့ၢ်လွဲန့ၢ်အဃိလီၤအဂ့ၢ်န့ၣ် (JACBA)ၦၤပၢၤလီၢ်ဆ့ၣ်နီၤ အူမိကၠိ စံး၀ဲန့ၣ်လီၤႉ “ဖဲစှၤသီအတီၢ်ပူၤအံၤ ၦၤကီၢ်ပယီၤဖိလၢဟဲနုာ်လီၤခူသူၣ်လၢကီၢ်ကၠီၣ်တဲၣ်ပူၤလၢအတဖိသဲစးသ့ၣ်တဖၣ် ဟဲအါထီၣ်၀ဲအသိး တၢ်ဖီၣ်ချုး၀ဲကိးမုၢ်နံၤဒဲးဃၣ်ဃၣ်ညါလီၤႉ အ၀ဲသ့ၣ်ဟဲနုာ်လီၤခူသူၣ်အါအါဂီၢ်ဂီၢ်ဒ်အံၤ ခီဖျိတၢ်ကစီၣ်ရၤလီၤသးလၢကီၢ်ကၠီၣ်တဲၣ်ပူၤတၢ်ကမၤန့ၢ်၀ဲၦၤကီၢ်ပယီၤဖိအလံာ်အလဲၢ်ဒီး...
ဒူသ၀ီတၢ်ဘံၣ်တၢ်ဘၢအဂီၢ်(BGF)မၢလူၢ်ပျဲၢ်ကီၢ်ဆၣ် လီၢ်က၀ီၤဖိတနီၤ ထီၣ်သုးတၢ်သိၣ်လိ
လါအီးကထိဘၢၣ် ၅ သီႇ ၂၀၂၁ နံၣ်ႇ ခ့ၣ်အဲးစံၣ် ပယီၤသုးစုဒုၣ်တီၤအဖီလာ်သုးခိးကီၢ်ဆၢ(BGF)ဟဲဟ့ၣ်တၢ်ဆီၣ်သနံးမၢ၀ဲသ၀ီလၢအိၣ်လူၢ်ပျဲၢ်ကီၢ်ဆၣ်ပူၤ လီၢ်က၀ီၤဖိတနီၤလၢကထီၣ်သုးတၢ်သိၣ်လိလၢ ဒူသ၀ီတၢ်ဘံၣ်တၢ်ဘၢအဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်ဟီၣ်က၀ီၤတၢ်ကစီၣ်တဖၣ်စံး၀ဲအသိးန့ၣ် BGF သုးရ့ၣ်(၁၀၁၁)ၦၤဘၣ်မူဘၣ်ဒါလၢအအိၣ် လူၢ်ပျဲၢ်ကီၢ်ဆၣ်အပူၤတဖၣ် ဖဲစှၤသီအတီၢ်ပူၤအံၤ ကိးထံၣ်၀ဲလီၢ်က၀ီၤဒူသ၀ီၦၤဘၣ်မူဘၣ်ဒါလၢအအိၣ်ဖဲလီၢ်က၀ီၤ၀ဲန့ၣ်တဖၣ်ဒီး လၢဒူသ၀ီတၢ်ဘံၣ်တၢ်ဘၢအဂီၢ် လီၢ်က၀ီၤဖိတဖၣ်ကဘၣ်ထီၣ်၀ဲသုးတၢ်သိၣ်လိႇမၢထၢၦၤနီၣ်ဂံၢ်စရီဒီးဆှၢထီၣ်လၢအ၀ဲသ့ၣ်အအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “အ၀ဲသ့ၣ်ဟဲလၢသ၀ီမီၤနီၤႉ အ၀ဲသ့ၣ်ဟဲတဲ၀ဲလၢ အဲၣ်ဒိးလၢကထီၣ်သုးတၢ်သိၣ်လိမီၤနီၤႉ တဲ၀ဲ လၢဒူသ၀ီတၢ်ဘံၣ်တၢ်ဘၢအဂီၢ်လီၤႉ ဖဲသုသ၀ီအံၤတၢ်မ့ကဲထီၣ်သးတမံၤမံၤန့ၣ် သုဟးတၢၣ်ၦၤမ့တအိၣ်ဘၣ်န့ၣ် သုလဲၤတၢၣ်ဖဲမုကၢၤဘံၣ်ဘၢကရူၢ်သ့မီၤနီၤ”အဂ့ၢ်န့ၣ် ၦၤလၢအဘူးဒီးလီၢ်က၀ီၤဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ထွဲဒီးသုးတၢ်သိၣ်လိ၀ဲအံၤ တဲ၀ဲဒၣ်လၢပိာ်ခွါမ့ၢ်ဂ့ၤႇပိာ်မုၣ်မ့ၢ်ဂ့ၤ ၦၤကိးဂၤဒဲးဟဲထီၣ်သ့၀ဲဒီး တၢ်သိၣ်လိတၢ်ဆၢကတီၢ်ကယံၤ၀ဲတလါဒီး ထီၣ်တၢ်သိၣ်လိမ့၀ံၤန့ၣ် ကက့ၤဆီၣ်ထွဲမၤစၢၤကဒါ၀ဲတၢ်အီၣ်တၢ်အီဒီးတၢ်ကူတၢ်ကၤတဖၣ်န့ၣ်လီၤႉ ဘၣ်ဆၣ်သနးက့ လီၢ်က၀ီၤဖိတဖၣ်တအဲၣ်ဒိးထီၣ်၀ဲတၢ်သိၣ်လိအံၤဘၣ်အဂ့ၢ်န့ၣ် ၦၤလၢအဘူးဖဲန့ၣ်တဂၤစံးအါထီၣ်၀ဲန့ၣ်လီၤႉ လီၢ်က၀ီၤဖိလၢအဂၤတဂၤစ့ၢ်ကီးစံး၀ဲ“အဆိကတၢၢ်မၢပဆှၢထီၣ်ဆိၦၤကညီႇခီဖျိသ၀ီဖိတဖၣ်တလဲၤဘၣ်အဃိ အ၀ဲသ့ၣ်ဃ့ထီၣ်၀ဲလၢကမၤ၀ဲလၢတၢ်ဖီၣ်မဲသနူမီၤနီၤႇဘၣ်ဆၣ်သ၀ီၦၤဘၣ်မူဘၣ်ဒါတဖၣ်တဲ၀ဲလၢတဘၣ်မၤဒ်န့ၣ်ဘၣ်ႉ ကကွၢ်ကျဲၤ၀ဲမီၤနီၤႉ လၢတၢ်အိၣ်သးအဖီခိၣ်ၦၤဟ့ၣ်မံၤစရီအိၣ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါ(BGF)ၦၤဘၣ်မူဘၣ်ဒါတဖၣ် မၢ၀ဲလီၢ်က၀ီၤဖိတဖၣ်ထီၣ်သုးတၢ်သိၣ်လိအမဲာ်ညါ သ၀ီဖိလၢအတမၤဘၣ်ဒံးခိၣ်ဂီၤ(မၣ်ပိၤတ့ၣ်)ဘၣ်သ့ၣ်တဖၣ် မၢမၤ၀ဲမၣ်ပိၤတ့ၤဒီး ဒူသ၀ီတနီၤ လၢသ၀ီသးၦၢ်လီၤဟိအလီၢ်န့ၣ်မၢတၢ်က့ၤဃုထၢတီၣ်ထီၣ်ကဒါက့ၤဟဲတဲ၀ဲအိၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ဘၣ်ထွဲဒီးတၢ်မၢလီၢ်က၀ီၤဖိတဖၣ်ထီၣ်သုးတၢ်သိၣ်လိတၢ်ဂ့ၢ်အံၤ ခ့ၣ်အဲးစံၣ်ဂုာ်ကျဲးစၢးဆဲးကျိး၀ဲသုးခိးကီၢ်ဆၢ(BGF)ၦၤဘၣ်မူဘၣ်ဒါတဖၣ်ဘၣ်ဆၣ် ဆဲးကျိးတန့ၢ်ဘၣ်န့ၣ်လီၤႉ
တၢ်ခးသံ(BGF)သုးဖိခံဂၤဖဲအလဲၤၦ့ၤအီ(Beer)အဆၢကတီၢ်
လါအီးကထိဘၢၣ် ၅ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါအီးကထိဘၢၣ် ၅)သီ မုၢ်ထူၣ်အဆၢကတီၢ် လၢကညီကီၢ်စဲၣ် ကၠးအ့စ့ၣ်ကၠံကီၢ်ဆၣ် ကျ့းသ၀ီအပူၤ တၢ်ခးသံ၀ဲသုးခိးကီၢ်ဆၢ(BGF)သုးဖိခံဂၤလၢအလဲၤၦ့ၤအီဘံၣ်ယၣ်(Beer)အဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးဖိခံဂၤအံၤမ့ၢ်၀ဲ(BGF)သုးဖိလၢအအိၣ်ဆီလီၤသးဖဲကျ့းသ၀ီဃၢၤဒီး ဖဲတနံၤအံၤမုၢ်ထူၣ် ၁၂ နၣ်ရံၣ်အဆၢကတီၢ် ဖဲအ၀ဲသ့ၣ်လဲၤၦ့ၤအီဘံၣ်ယၣ်လၢသ၀ီပူၤအခါ ၦၤစိာ်စုက၀ဲၤဖိခံဂၤခးသံအ၀ဲသ့ၣ်ဘူးဘူးဖိဒီးကျိဖုၣ်ဖိအဂ့ၢ်န့ၣ် လီၢ်က၀ီၤသ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ “သ၀ီဖိတဖၣ်တဲ၀ဲလၢဖဲ ၁၂ နၣ်ရံၣ်ဃၣ်ဃၣ်န့ၣ် အ၀ဲသ့ၣ်ခံဂၤန့ၣ်ဟဲၦ့ၤအီဘံၣ်ယၣ်ႇတကူသိး၀ဲသုးကူသုး ကၤဘၣ်ႉ ခး၀ဲဒီးကျိဖုၣ်ဘူးဘူးဖိလီၤႉ ခး၀ဲတဂၤန့ၣ်လွံၢ်ထံၣ်စုာ်စုာ်ဒီးသံ၀ဲတဘျီဃီန့ၣ်လီၤႉ ၦၤလၢအဟဲခး တၢ်န့ၣ်တဖၣ်စ့ၢ်ကီးဟဲကူသိး၀ဲဒီးကမျၢၢ်ကူကၤလီၤႉ ခး၀ဲ၀ံၤစံၣ်ထီၣ်၀ဲလၢသ၀ီချၢလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဟီၣ်က၀ီၤၦၤဘၣ်မူဘၣ်ဒါတဖၣ်စံး၀ဲလၢ BGF သုးဖိခံဂၤလၢဘၣ်တၢ်ခးသံ၀ဲအံၤ မ့ၢ်၀ဲနီၣ်ဂံၢ်(၁၀၂၃)သုးရ့ၣ်လၢအအိၣ်ဆီလီၤသးဖဲကၠဲးဒိ၀့ၢ်လီၤႉ တၢ်ကဲထီၣ်သး၀ံၤစှၤမံးနံးအတီၢ်ပူၤ ပယီၤသုးဒီး(BGF)သုးတဖၣ်နုာ်လီၤ၀ဲဒၣ်လၢတၢ်ကဲထီၣ်သးအလီၢ်ခးသီၣ်ထီၣ်ကျိဒီး က့ၤစိာ်၀ဲဒၣ်သုးဖိလၢအသံခံဂၤအစိၣ်အဂ့ၢ်န့ၣ် ၦၤလၢအထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ ဖဲကျ့းသ၀ီဃၢၤန့ၣ် ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၁၃)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ–၅၅၇)ဒီးသုးခိးကီၢ်ဆၢ -BGF သုးရ့ၣ်(၁၀၁၄)လၢအအိၣ်ဆီလီၤသးလၢကၠဲးဒိတဖၣ် အိၣ်ဆီလီၤသးန့ၣ်လီၤႉ
ပယီၤသုးနုာ်လီၤလၢ(KNU)တၢ်ပၢဟီၣ်က၀ီၤအပူၤႇ ကိးသမံသမိး၀ဲလီၢ်က၀ီၤဖိတနီၤ
လါအီးကထိဘၢၣ် ၄ သီႇ ၂၀၂၁ နံၣ်ႇ ခ့ၣ်အဲးစံၣ် ပယီၤသုးတဖၣ်နုာ်လီၤလၢကညီဒီကလုာ်စၢဖှိၣ်ကရၢ -KNU သုးက့(၄)တၢ်ပၢဟီၣ်က၀ီၤ ပလီကီၢ်ဆၣ် သၤယၤကိသ၀ီပူၤဒီးသိလ့ၣ်ခံခိၣ်ဒီး ကိးသမံသမိး၀ဲလီၢ်က၀ီၤသ၀ီဖိတနီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲတနံၤအံၤလါအီးကထိဘၢၣ် ၄ သီႇ ဂီၤခီ ၅ နၣ်ရံၣ်အဆၢကတီၢ် ပယီၤသုးတဖၣ်ဟဲတုၤ၀ဲလၢသၤယၤကိသ၀ီဒီး နုာ်လီၤအိၣ်ဆိး၀ဲဖဲသီခါဖၠၣ်ကရၢၢ်ပူၤဒီး စံး၀ဲလၢကဆဲးန့ၢ်၀ဲလီၢ်က၀ီၤဖိတဖၣ်ခိ၀ံၣ်ကသံၣ်ဒီသဒၢအဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ “အ၀ဲသ့ၣ်တဲ၀ဲလၢကဆဲးန့ၢ်၀ဲခိ၀ံၣ်ကသံၣ်ဒီသဒၢဒီးနုာ်လီၤ၀ဲလီၤႉ သုးသိလ့ၣ်ခံခိၣ်ဟဲထီၣ်၀ဲဖဲသၤယၤကိကျဲလိၤလိၤလီၤႉ ဖီၣ်၀ဲသ၀ီဖိ(၃)ဂၤ မ့ၢ်၀ဲဒၣ်ယ့ၤရှ့ၤဒီးသၤယၤကိသ၀ီဖိလီၤႉ တၢ်အံၤစ့ၢ်ကီးခီဖျိတၢ်မဲာ်ချံအဃိလီၤႉ အ၀ဲသ့ၣ်သံကွၢ်၀ဲ(PDF)အိၣ်တၢ်လီၢ်ဖဲလဲၣ်ႇမ့ၢ်အဘူးလိာ်သးဒီး(KNU)ဒ်လဲၣ်သ့ၣ်တဖၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဒ်န့ၣ်အသိးလၢပ၀ိၣ်ကိသ၀ီတကပၤစ့ၢ်ကီးပယီၤသုးသိလ့ၣ်ဟဲထီၣ်၀ဲ(၃)ခိၣ်ဒီး ခီဖျိဟဲထီၣ်၀ဲတၢ်လီၢ်အံၤမ့ၢ်၀ဲ(ခ့ၣ်အဲၣ်ယူၣ်)ဟီၣ်က၀ီၤပူၤအဃိ တၢ်ဒုးကဲထီၣ်သ့၀ဲဒီးလီၢ်က၀ီၤသ၀ီဖိတနီၤစ့ၢ်ကီးဟးစံၣ်အိၣ်ခူသူၣ်ဆိပာ်အသးလံအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ “ဒိးသန့ၤထီၣ်သးလၢတၢ်အိၣ်သးဖီခိၣ်ဒီးတၢ်ဒုးကကဲထီၣ်ဒုအါ၀ဲလီၤႉ မ့မ့ၢ်(ခ့ၣ်အဲၣ်ယူၣ်)တကပၤခီန့ၣ်တဲ၀ဲလၢခီဖျိသ၀ီပူၤအဃိတအဲၣ်ဒိးခး၀ဲဘၣ်ႉ တဲ၀ဲလၢတအဲၣ်ဒိးလၢသ၀ီဖိတဖၣ်ကဘၣ်ကီဘၣ်ခဲဘၣ်မီၤနီၤႉ ဘၣ်ဆၣ်မ့ၢ်ဟဲထီၣ်တလၢ၀ဲဒုတၢ်ဒုးကကဲထီၣ်အါ၀ဲလီၤ”အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ပယီၤသုးလၢအနုာ်လီၤတလၢ၀ဲ(ခ့ၣ်အဲၣ်ယူၣ်)တၢ်ပၢဟီၣ်က၀ီၤအပူၤတဖၣ်အံၤ မ့ၢ်၀ဲခီၣ်ချ့သုးရ့ၣ်(ခလရ–၂၈၅)သုးရ့ၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
NCA တဟးဂီၤဘၣ်အိၣ်ဒံး၀ဲအဂ့ၢ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ်ခိၣ်စံး၀ဲ
လါအီးကထိဘၢၣ် ၄ သီႇ ၂၀၂၁ နံၣ်ႇ ခ့ၣ်အဲးစံၣ် ထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ်(NCA)အံၤ တုၤလၢခဲအံၤတစုတဟးဂီၤ၀ဲဘၣ်အိၣ်ဒံး၀ဲဒီး တၢ်ကရၢကရိတဒူၣ်မးတမၤဟးဂီၤဒံး၀ဲလံာ်ဃံးဃာ်အံၤဘၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်ခိၣ် ပဒိၣ်စီၤစွ့ၣ်မီ စံး၀ဲန့ၣ်လီၤႉ ဖဲတနံၣ်အံၤ(လါအီးကထိဘၢၣ် ၁၅)သီအနံၤ လၢအလီၤဘၣ်၀ဲတၢ်ဆဲးလီၤထံကီၢ်ဒီဘ့ၣ် တၢ်ပတုာ်တၢ်ခးအလံာ်ဃံးဃာ်(NCA)ၦဲၤထီၣ် ၆ နံၣ် နံၣ်ဆဲးဆၢအံၤအဂီၢ် ဖဲတနံၤအံၤ(လါအီးကထိဘၢၣ် ၄)သီအနံၤ KNU ဒူပျာ်ယာ်ကီၢ်ရ့ၣ်ခိၣ် ထုးထီၣ်၀ဲလံာ်ဟ့ၣ်သဆၣ်ထီၣ်သိၣ်ဒူ ၦၤမၤသကိးတၢ်လံာ်တဘ့ၣ်အပူၤပာ်ဖျါ၀ဲန့ၣ်လီၤႉ ကရူၢ်ကရၢလၢအဆဲးလီၤ(NCA)လံာ်ဃံးဃံာ်တဖၣ်အံၤ တကပၤဒီးတကပၤတဒူၣ်ဒီး တဒူၣ်ဒ်အအၢၣ်လီၤအီလီၤတ့ၢ်ဃာ်တၢ်အၢၣ်လီၤအသိး ကဆဲးဖံးမၤအိၣ်ဆၢ ထၢၣ်ဂၢၢ်ဂၢၢ်ကျၢၤ ကျၢၤအဂီၢ်လိၣ်၀ဲအဂ့ၢ်ဒီး ကဆဲးဖံးမၤဒ်(NCA) တၢ်ဖံးတၢ်မၤအတၢ်နဲၣ်ကျဲ အသိးအဂီၢ်အဂ့ၢ်န့ၣ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ်ခိၣ် ပဒိၣ်စီၤစွ့ၣ်မီ ဟ့ၣ်သဆၣ်ထီၣ်၀ဲန့ၣ်လီၤႉ ဖဲတနံၣ်အံၤ(လါဖ့ၤဘြူၤအါရံၤ ၁)သီအနံၤ ပယီၤသုးဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤလၢ ကမျၢၢ်ပဒိၣ်အအိၣ်၀ံၤအလီၢ်ခံ ခီဖျိပယီၤသုးအံၤမၤ၀ဲတၢ်ထီၣ်ဒုး လဲၤတလၢတၢ်ပာ်ပနီၣ်တၢ်လီၢ်လၢကလုာ်ဒူၣ်လၢအဆဲးလီၤတၢ် ပတုာ်တၢ်ခးတဖၣ်အဟီၣ်က၀ီၤပူၤအဃိ ကလုာ်ဒူၣ်ဖီၣ်စုက၀ဲၤကရူၢ်တဖၣ်ဒီးပဒိၣ်တဖၣ်အဘၢၣ်စၢၤ (NCA)လံာ်ဃံးဃာ်လၢအဆဲးလီၤတ့ၢ်ဃာ်၀ဲအံၤဟးဂီၤကွံာ်၀ဲလံအဂ့ၢ်န့ၣ် တၢ်ပဲာ်ထံနီၤဖးတဖၣ်ဟဲအိၣ်ထီၣ်၀ဲလီၤႉ ဖဲအပူၤကွံာ်(၂၀၁၅)နံၣ် လါအီးကထိဘၢၣ် ၁၅ သီအနံၤ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဃုာ်ဒီး ကလုာ်ဒူၣ်ဖီၣ်စုက၀ဲၤတၢ်ပၢၢ်ဆၢကရူၢ်လၢအဂၤ(၇)ဒူၣ်ဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ် (NCA)အံၤလၢအူသ့ၣ်စ့ၣ်တီခိၣ်ရိၣ်မဲပဒိၣ်တဖၣ်အစိၤခါန့ၣ်လီၤႉ ခီဖျိနာ်၀ဲလၢတၢ်သူၣ်ထီၣ်ဖဲၣ်ဒရၢၣ်ကီၢ်စၢဖှိၣ်အံၤမ့န့ၢ်မးထံကီၢ်အံၤကမုာ်ကခုၣ်လီၤအဃိ ဖဲတၢ်ဆဲးလီၤ၀ဲ(NCA)လံာ်ဃံးဃာ်အဆၢကတီၢ်...
ခီဖျိပယီၤသုးသမံသမိးမၤဃံးထီၣ်တၢ်ဘံၣ်တၢ်ဘၢလၢမၠၣ်၀တံၣ်ကလံၤထံးတကပၤအဃိ လီၢ်က၀ီၤဖိတဖၣ်ဟးထီၣ်က့ၤလီၤကီခဲထီၣ်
လါအီကထိဘၢၣ် ၃ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါစဲးပထ့ဘၢၣ် ၃)သီ ဂီၤခီအဆၢကတီၢ် လၢကညီကီၢ်စဲၣ် မၠၣ်၀တံၣ်ကလံၤထံး သ၀ီတဖၣ်လၢအမ့ၢ် ပဟံၣ်ကျီးႇထံမဲး၀ါခံႇလ့က့ၣ်ကီာ်ႇဖလူဖးဒိၣ်ႇဖလူဖိႇသ့ၣ်ဘီဘိသ၀ီႇ ၀ီၤလ့ၤလီၢ်က၀ီၤဒီတကျိၤ သ၀ီဖိတဖၣ်ဖဲအ၀ဲသ့ၣ်လဲၤလၢမၠၣ်၀တံၣ်အခါ ခီဖျိပယီၤသုးတဖၣ်မၤဃံးထီၣ်တၢ်ဘံၣ်တၢ်ဘၢသမံသမိးတၢ်အဃိ လီၢ်က၀ီၤဖိတဖၣ်ဟးထီၣ်က့ၤလီၤကီခဲထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးခိၣ်ချ့သုးရ့ၣ်(ခမရ–၅၆၀)သုးဂံၢ်ဘါကအိၣ်အဂၤ(၃၀)ဃၣ်ဃၣ်အံၤ အိၣ်ခိးသမံသမိးလီၢ်က၀ီၤဖိ အသိလ့ၣ်ဖဲမဲၢ်ထီးသလ့ကျဲဖးဒ့န့ၣ်လီၤႉ “ဖဲတနံၤအံၤဖဲဂီၤခီ ၉ နၣ်ရံၣ်န့ၣ် လၢတၢ်ကလဲၤမဲၢ်ထီးသလ့သ၀ီဒီပဟံၣ်ကျီးႇလ့က့ၣ်ကီာ်သ၀ီကျဲဖးဒ့န့ၣ် ကယဲၢ်မ့ၢ်သိလ့ၣ်ဒီးသိလ့ၣ်ယီၢ်ဟဲတဖၣ်န့ၣ်သမံသမိး၀ဲခဲလၢာ်လီၤႉ သံကွၢ်၀ဲလၢနအိၣ်ဟဲဖဲလဲၣ်ႇ နကလဲၤဖဲလဲၣ်ႇနအိၣ််သ၀ီဖဲလဲၣ်တဖၣ်လီၤႉ မ့ၢ်လီၢ်က၀ီၤဖိမ့ၢ်ဧါႇတမ့ၢ်ဧါန့ၣ်သမံသမိး၀ဲလီၤႉ ပလဲၤလၢမၠၣ်၀တံၣ်တဘူၣ်လၢၤဘၣ်ဒီးပဟဲက့ၤကဒါလၢသ၀ီလီၤႉ ဖဲစှၤသီအတီၢ်ပူၤခီဖျိပယီၤသုးကျိၤတဖၣ် ဟဲလၢလ့က့ၣ်ကီာ်ႇဖလူႇမ့လဲၣ်ပၤသ၀ီတကပၤတလီၢ်လီၢ်အဃိ ဘၣ်ယိၣ်လၢတၢ်ဒုးကဟဲကဲထီၣ်လီၤ”အဂ့ၢ်န့ၣ် ပဟံၣ်ကျီးသ၀ီဖိ စီၤဒံပ့ၤ စံး၀ဲန့ၣ်လီၤႉ KNU–ကညီဒီကလုာ်စၢဖှိၣ်ကရၢ သုးက့(၆)ဟီၣ်က၀ီၤအပူၤ ဖဲပယီၤသုးကျိၤတဖၣ် ဟဲသမံသမိးတၢ်လၢသ၀ီပူၤအိၣ်၀ဲတလီၢ်လီၢ်အဆၢကတီၢ် တၢ်အိၣ်သးအံၤအိၣ်လၢတၢ်ဒုးကဟဲကဲထီၣ်ဒီး ဟီၣ်က၀ီၤကညီဖီၣ်စုက၀ဲၤကရူၢ်တဖၣ်သ့၀ဲအဃိ လီၢ်က၀ီၤဖိတဖၣ်လၢတၢ်လုၢ်အီၣ်နီၢ်ခိသးသမူဒီး တၢ်လဲၤထီၣ်က့ၤလီၤအဂီၢ် တၢ်ကီတၢ်ခဲဟဲအိၣ်ထီၣ်၀ဲဒၣ်န့ၣ်လီၤႉ