ကၠဲးထိၣ်ကီၢ်ဆၣ်ပူၤ ကမျၢၢ်ပှၤမၤထူဖိလၢပယီၤသုးဖီၣ်က့ၤကိးဝဲတဖၣ်တၢ်ပျၢ်လီၤက့ၤဝဲ(၁၀)ဂၤ
လါစဲးပထ့ဘၢၣ် ၁၁ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် တကွံပူၤကရူၢ်အပူၤ လီၢ်ကဝီၤကမျၢၢ်ပှၤမၤထူဖိလၢပယီၤသုးဖီၣ် က့ၤကိးဝဲတဖၣ်အကျါ တၢ်ပျၢ်လီၤက့ၤဝဲ(၁၀)ဂၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါ အအိၣ်န့ၣ် လီၤ. ဖဲလါစဲးပထ့ဘၢၣ် ၉ သီ ဂီၤခီအဆၢကတီၢ် ပယီၤသုးနီၣ်ဂံၢ်လၢကအိၣ်(၁၀၀)ဃၣ်ဃၣ် နုၥ်လီၤဝဲလၢဖီညၣ်ထၣ်,တကွံပူၤသဝီ တၢ်ခူၣ်ဟီၣ်လၥ်တၢ်ထူးတၢ်တီၤထူပူၤတၢ်ဖံးတၢ်မၤလီၢ်တဖၣ်ဒီး ဖီၣ်က့ၤကိးဝဲလီၢ်ကဝီၤကမျၢၢ်ပှၤမၤထူဖိအဂၤ(၃၀)ဘျဲၣ်ဝံၤ ပှၤသးပှၢ်(၆)ဂၤဒီးဖိသၣ်လၢအသးနံၣ်တပှဲၤဒံးဘၣ်(၄)ဂၤ တၢ်ပျၢ်လီၤက့ၤဝဲ ဘၣ်ဆၣ်ဘၣ်က့ၤရ့ထီၣ်ဝဲဒီးစ့အကလီၢ်လၢအဆံ အဂ့ၢ်န့ၣ် သဝီပှၤဘၣ်မူဘၣ်ဒါတဖၣ်စံးဝဲန့ၣ်လီၤ. သဝီဖိလၢအိၣ်ဖဲန့ၣ်တဂၤစံးဝဲလၢ“ဖီၣ်ဝဲဒၣ်ပှၤကညီပၣ်ခဲလၢၥ်အဂၤ(၃၀)ဘျဲၣ်ညါ.ခဲအံၤအပျၢ်လီၤဝဲတလၢၤဒံးဘၣ်.ပျၢ်လီၤဝဲခဲအံၤန့ၣ်အဂၤ(၁၀).ပှၤအဂၤတဆံန့ၣ်ပှၤလၢအသး နံၣ်တပှဲၤဒံးဘၣ်န့ၣ်(၄)ဂၤ,ပှၤသးပှၢ်န့ၣ်(၆)ဂၤ မ့မ့ၢ်ပှၤသးပှၢ်တၢ်(၆)ဂၤအံၤန့ၣ်ပှၤ ဘၣ်က့ၤရ့ထီၣ်ဒီးစ့အကလီၢ်(၃၀)ကၠး.ပှၤလၢအအိၣ်တ့ၢ်တဖၣ်န့ၣ်ပှၤလူၤအီၤအဖၢမုၢ်လီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်ဖဲတနံၤအံၤန့ၣ်လီၤ. တကီၢ်ခါခဲအံၤကမျၢၢ်ပှၤမၤထူဖိလၢပယီၤသုးဖီၣ်ဝဲတဖၣ်အံၤတၢ်က့ၤအီၤဆူ ကၠဲးထိၣ်ဝ့ၢ် ပၢၤကီၢ်ဝဲၤလီၢ်ဒီး ဖဲန့ၣ်တဆီ တၢ်ဆှၢထီၣ် အီၤဆူ ကီၢ်ရ့ၣ်ဒီး(န့ၣ်ပၠံၣ်တီၣ်)အိၣ်ဝဲဒီး ဘၣ်ဆၣ်လီၤဆီဒၣ်တၢ်မ့မ့ကမျၢၢ်လၢတၢ်ဒုးဃၥ်အီၤဖဲကၠဲးထိၣ်အံၤတဖၣ် အဟံၣ်ဖိဃီဖိ လဲၤထံၣ်အီၤအိၣ်ဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢသ့ၣ်ညါထွဲတၢ်ဂ့ၢ်အံၤတဖၣ်စံးဝဲအသိး သ့ၣ်ညါဘၣ် န့ၣ်လီၤ. တကးဒံးဘၣ်ဖဲပယီၤသုးနုၥ်လီၤလၢတၢ်ခူၣ်ဟီၣ်လၥ်တၢ်ထူးတၢ်တီၤထူပူၤတၢ်မၤလီၢ် ဒီးဖီၣ်ဝဲကမျၢၢ်ပှၤမၤထူဖိ တဖၣ်အံၤ အဆၢကတီၢ်န့ၣ် ဖီၣ်က့ၤစိၥ်ဟံဃုၥ်ဝဲ (ဘဲးဖိ)သိလ့ၣ်ကွးဟီၣ်ခိၣ်, စဲးဖီကဟၣ်တၢ်ဖိတၢ်လံၤလၢအဂၤသ့ၣ်တဖၣ်အိၣ်ဝဲဒီး ဘၣ်ဆၣ် ခဲအံၤက့ၤဟ့ၣ်ကဒါဝဲလံအဂ့ၢ်န့ၣ် လီၢ်ကဝီၤကမျၢၢ်စံးဝဲန့ၣ်လီၤ. ဒူသဝီတၢ်မၤထူလီၢ်လၢပယီၤသုးနုၥ်လီၤဖီၣ်ဝဲခဲအံၤန့ၣ် တချုးသုးဟံန့ၢ်တၢ်စိတၢ်ကမီၤဒံးဘၣ်အခါမ့အိၣ်ဝဲလၢသုးမီၤစိရိၤအတၢ်ပၢ တၢ်ြပးပူၤဘၣ်ဆၣ် လီၢ်ခံဖဲန့ၣ်(ခ့ၣ်အဲၣ်ယူၣ်)လဲၤဟူးဂဲၤန့ၢ်ဝဲဒၣ်ဒီးတၢ်မၤထူလီၢ်အခိအသွဲတဖၣ်ခီဖျိသုးမီၤစိရိၤအံၤ ဒိးန့ၢ်ဘၣ်ဝဲ...
လၢကထီၣ်န့ၢ်က့ၤ(ထမင်းမစား)သုးကလၢၤအဂီၢ် ပယီၤသုးလၢဟဲထီၣ်တဖၣ်တၢ်ဒုးကဲထီၣ် သံဘၣ်ဒိတစှၤန့ၢ် ၁၅ ဂၤ
လါစဲးပထ့ဘၢၣ် ၁၁ သီ, ၂၀၂၅ နံၣ်, ခ့ၣ်အဲးစံၣ် မီမစါ(ထမင်းမစား)သုးကလၢၤလၢအိၣ်ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)လၢၢ်မုၢ်လါကီၢ်ဆၣ်အပူၤ လၢဟီၣ်ကဝီၤ (KNLA)သုးပၥ်ဖှိၣ် ထီၣ်န့ၢ်ဝဲဖဲအပူၤကွံၥ်စှၤသီအခါအံၤန့ၣ် လၢကထီၣ်မၤန့ၢ်က့ၤဝဲအဂီၢ်ပယီၤသုးလၢဟဲထီၣ်တဖၣ် တၢ်ဒုးဆဲးကဲ ထီၣ်ဝဲဒီးတၢ်ပၢၢ်ဆၢ သုးပၥ်ဖှိၣ်ကရူၢ်အဃိ ပယီၤသုးသံဘၣ်ဒိတစှၤန့ၢ်(၁၅)ဂၤအဂ့ၢ်န့ၣ် ကီၢ်ရ့ၣ်ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ. ဒ်ဘျံးဒဝဲၢ်ကီၢ်ရ့ၣ်တၢ်ကစီၣ်ပၥ်ဖျါဝဲအသိးန့ၣ် တၢ်ထီၣ်န့ၢ်မီမစါ(ထမင်းမစား)သုးကလၢၤဝံၤ ဖဲမုၢ်ဆ့ၣ်ထီၣ်လါစဲးပထ့ဘၢၣ် ၉ သီ ဟါခီ ၄း၀၀ နၣ်ရံၣ် အဆၢကတီၢ်န့ၣ် ပယီၤသုးအံၤလၢကထီၣ်ဟံန့ၢ်က့ၤသုးကလၢၤအံၤအဂီၢ် အသုးလၢအဟဲထီၣ်တဖၣ်အံၤဒီး (KNLA), (KNDO)သုးရ့ၣ်-၇ အပှၤ, ပလီၢ် ကမျၢၢ်တၢ်ဒီသဒၢသုးကရူၢ်သုးပၥ်ဖှိၣ်အဘၢၣ်စၢၤတၢ်ဒုးကဲထီၣ်ဝဲန့ၣ်လီၤ. လၢတၢ်န့ၣ်အဃိလၢတၢ်ခးလိၥ်သးကဲထီၣ်ဘျီဝဲအံၤအပူၤန့ၣ် ခီဖျိပယီၤသုးတကပၤသံဘၣ်ဒိဘၣ်ထံးတစှၤန့ၢ်(၁၅)ဂၤညါအဃိ ဖဲမဟါလါစဲးပထ့ဘၢၣ် ၁၀ သီအနံၤန့ၣ် ပယီၤသုးတဖၣ်အံၤဘၣ်ဂုၤကဒါက့ၤလီၢ်ခံအဂ့ၢ်န့ၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ် စံးဝဲန့ၣ်လီၤ. (ထမင်းမစား)ပယီၤသုးကလၢၤအံၤ ဖဲအပူၤကွံၥ်လါစဲးပထ့ဘၢၣ် ၈ သီ ဂီၤခီ ၇း၀၀ နၣ်ရံၣ်အဆၢကတီၢ်န့ၣ် ဟီၣ်ကဝီၤ ကညီဒီ ကလုၥ် တၢ်ထူၣ်ဖျဲးသုးမုၢ်ဒိၣ်(KNLA) ,ကညီဒီကလုၥ်ဂၢၤသးကရၢ(KNDO) သုးရ့ၣ်-၇ သုးက့(၂),သုးဒ့(၅), ပလီၢ်ကမျၢၢ် တၢ်ဒီသဒၢသုးပၥ်ဖှိၣ်ကရူၢ်တဖၣ်အံၤထီၣ်ဒုးဖျိးကွံၥ်ဝဲဒၣ်ဒီး မၤန့ၢ်ဃုၥ်ဝဲကျိချံပှၥ်သၣ်,စဲးဖီကဟၣ်ဃုၥ်ဒီးသုးတၢ်ဖိတၢ်လံၤလၢ အဂၤ...
သုးက့ ၁ ဟီၣ်ကဝီၤ တလါအတီၢ်ပူၤတၢ်ဒုးကဲထီၣ် ၁၉ ဘျီ, ပယီၤသုးသံ ၂၂ ဂၤ, ဘၣ်ဒိ ၃၉ ဂၤ
လါစဲးပထ့ဘၢၣ် ၁၀ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤအပူၤ လါအီကူး ၁ သီတုၤ ၃၁ သီ လၢတလါအတီၢ် ပူၤ ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးကဲထီၣ်ဝဲ(၁၉)ဘျီဒီး ဖဲန့ၣ် ပယီၤသုး တကပၤသံ(၂၂)ဂၤ,ဘၣ်ဒိ(၃၉)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤ. လၢတၢ်ဒုးကဲထီၣ်(၁၉)ဘျီအံၤအကျါန့ၣ် တၢ်လဲၤခးစဲးပြဲးကဲထီၣ်(၈)ဘျီ,တၢ်ခိးထုးပယီၤသုး(၄)ဘျီ, တၢ်ဘၣ်သဂၢၢ်ခးလိၥ်သး ကဲထီၣ် (၃)ဘျီ,တၢ်လဲၤကွံၥ်ပယီၤသုးဒီးစုကွံၥ်မ့ၣ်ပိၢ်,ဒြိ(၃)ဘျီဒီးပယီၤသုးထွဲဘၣ်မ့ၣ်ထုးမ့ၣ်ပိၢ်(၁)ဘျီကဲထီၣ်ဝဲအဃိ ပယီၤသုးသံ ဘၣ်ဒိဘၣ်ထံးဘၣ်ဟဲအိၣ်ထီၣ်ဝဲဒ်အံၤလီၤ. ဒ်ခ့ၣ်အဲၣ်ယူၣ်တၢ်မၤနီၣ်စရီပူၤပၥ်ဖျါဝဲအသိးန့ၣ် လၢဒုၣ်ဒါသံဘၣ်ဒိဘၣ်ထံး(၆၁)ဂၤအကျါပၣ်ဃုၥ်စ့ၢ်ကီးဝဲ ဟီၣ်ကဝီၤ ဘူးဒးကညီသုးမုၢ်ဒိၣ်- DKBA သုခိၣ်ဘိၤဘံၣ်အပှၤ(၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးလၢတၢ်ခိးထုးပယီၤသုးသိလ့ၣ်ဒီးမ့ၣ်ပိၢ်အတီၢ်ပူၤန့ၣ် ပယီၤသုးအသိလ့ၣ်ဟးဂီၤ(၃)ခိၣ်ဒီး လၢန့ၣ်အမဲၥ်ညါ (KNLA) အပှၤမၤန့ၢ်ဝဲပယီၤသုး MA ကျိချံ (၈၀၀)ဖျၢၣ်,ဆ့ကၤဒီသဒၢကျိချံ(၆)ခါ,စုကွံၥ်မ့ၣ်ပိၢ်(၂)ဖျၢၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ် စရီအပူၤ ပၥ်ဖျါဝဲန့ၣ်လီၤ. တကးဒံးဘၣ်လၢတလါအတီၢ်ပူၤအံၤ တၢ်ဒုးကဲထီၣ်အိၣ်ဂ့ၤ,တအိၣ်ဂ့ၤပယီၤသုးခးလီၤဝဲကျိဖးဒိၣ်လၢကမျၢၢ်အိၣ်ဆိးလီၢ်ကျဲ, တၢ်ဖံး အီၣ်မၤအီၣ်လီၢ်ကျဲ(၄)ဘျီဒီး ကဘီယူၤစ့ၢ်ကီးလဲၤခးလီၤတၢ်အိၣ်ဝဲ(၂)ဘျီအဃိ ကမျၢၢ်သံဝဲ(၃)ဂၤအကျါပၣ်ဃုၥ်ဝဲ သီခါ(၂)ပါဒီး ဘၣ်ဒိ(၇)ဂၤအကျါပၣ်ဃုၥ်စ့ၢ်ကီးဝဲသီခါ(၅)ပါ န့ၣ်လီၤ. လၢန့ၣ်အမဲၥ်ညါခီဖျိလၢကျိဖးဒိၣ်ဒီးကဘီယူၤအံၤအဃိ ကမျၢၢ်အဟံၣ်တၢ်သူၣ်ထီၣ်(၃)ဖျၢၣ်ဒီး သီခါဖၠၣ် တၢ်သူၣ်ထီၣ်(၂)ဖျၢၣ်, သိလ့ၣ်ဟးဂီၤ(၃)ခိၣ်, စဲးကၢး(၃)ခိၣ် ဟးဂီၤဘၣ်ဒိဘၣ်ထံးဝဲအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤ. (သုးက့...
လၢကဟဲလါအီးကထိဘၢၣ်(၁)သီအနံၤန့ၣ်ပှၤဒဲကဝီၤဖိသ့ၣ်တဖၣ်ကန့ၢ်စးထီၣ်မၤဘၣ်တၢ်
လါစဲးပထ့ဘၢၣ် ၁၀ သီ, ၂၀၂၅ နံၣ်, ခ့ၣ်အဲးစံၣ် ကီၢ်ပယီၤ-ကီၢ်ကၠီတဲၣ်ကီၢ်ဆၢ ဘၣ်ကီဘၣ်ခဲဒဲကဝီၤသ့ၣ်တဖၣ်အပူၤလၢကဟဲလါအီးကထိဘၢၣ်ထီၣ်(၁)သီ အနံၤန့ၣ်ကီၢ်ကၠီၣ်တဲၣ်အၢၣ်လီၤတူၢ်လိၥ်ဝဲဒၣ်လၢပှၤဒဲကဝီၤဖိသ့ၣ်တဖၣ်ကန့ၢ်စးထီၣ်မၤဘၣ်တၢ်မၤလၢအဖိးသဲးစးအဂ့ၢ်န့ၣ်ကီၢ်ကၠီၣ်တဲၣ်ထံလီၢ်ကီၢ်ပူၤဂ့ၢ်ဝီကိတိၥ်ခိၣ်ခံ(Theerarat Samrejvanich)စံးလီၤဝဲန့ၣ်လီၤ. ဘၣ်ထွဲဒီးပှၤဒဲကဝီၤဖိသ့ၣ်တဖၣ်ကန့ၢ်ဟးထီၣ်မၤဘၣ်တၢ်လၢဒဲကဝီၤချၢလၢအဖိးမံဒီးသဲးစးတၢ်ဘျၢအံၤအဂီၢ်ထံဆၢကီၢ်ဆၢကမျၢၢ်ပှၤဂ့ၢ်ဝီတၢ်ကရၢကရိ(၁၁)ဖုပၥ်ဖှိၣ်ထီၣ်သးတီၣ်ဖျါထီၣ်ဝဲလံၥ်ဆူကီၢ်ကၠီၣ်တဲၣ်ဘျီၣ် ဒိၣ်ပဒိၣ်ပပှၢ်အိၣ်ဝံၤအလီၢ်ခံဖဲလါအီကူၥ် ၂၆ သီအနံၤန့ၣ်ကၠီၣ်တဲၣ်ပဒိၣ်ထုးထီၣ်ဘိးဘၣ်ရၤလီၤက့ၤဝဲလၢကဟ့ၣ် တၢ်ခွဲးတၢ်ယၥ်ပှၤဒဲကဝီၤဖိတၢ်ဃ့ထီၣ်အံၤအဂ့ၢ်သ့ၣ်ညါဘၣ်န့ၣ်လီၤ. အဃိဘၣ်ကီဘၣ်ခဲဒဲကဝီၤ(၉)ဖျၢၣ်လၢအိၣ်သူၣ်လီၤအသးဖဲကီၢ်ကၠီၣ်တဲၣ်(မဲၢ်ဟီၤဆီး, တး(ခ),ကၣ်ခၠၣ်နၣ် ဘူၣ်ရံၣ်, ရၣ်ခၠၣ်ဘူရံၣ် ကီၢ်ရ့ၣ်သ့ၣ်တဖၣ်အပူၤအံၤလၢကဟဲလါအီးကထိဘၢၣ်ထီၣ်(၁)သီအနံၤန့ၣ်ကန့ၢ်စး ထီၣ်မၤဘၣ်တၢ်မၤလၢကီၢ်ကၠီၣ်တဲၣ်အပူၤလၢအဖိးမံဒီးသဲစးအဂ့ၢ်ဖဲမဟါ(၉)သီအနံၤန့ၣ်ထံလီၢ်ကီၢ်ပူၤဂ့ၢ်ဝီကိတိၥ်ခိၣ်ခံ(Theerarat Samrejvanich)စံးဘၣ်(Khaosod)တၢ်ကစီၣ်သန့န့ၣ်လီၤ. ဒ်န့ၣ်အသိးဖဲလါအီကူး(၃၀)သီအနံၤန့ၣ်ကီၢ်ကၠီၣ်တဲၣ်(စံၣ်စးကဲး-Si Sa Ket)ကီၢ်ရ့ၣ်တၢ်မၤကစၢ်ဟဲထံၣ်လိၥ်အိၣ်သ ကိးတၢ်ဒီး(KRC)ပှၤဘၣ်မူဘၣ်ဒါခီဖျိလိၣ်ဘၣ်ဝဲဒၣ်ပှၤမၤတၢ်ဖိ(၃၂၀၀၀)ဘျဲၣ် လၢကလဲၤဖံးမၤတၢ်လၢကထံပိၥ်ကျီးဒီး လါမယါကျီးပူၤအဂီၢ်အဂ့ၢ်(KRC)နဲၣ်ရွဲၣ်သရၣ်စီၤပှဲၤစ့ စံးဘၣ်တ့ၢ်ခ့ၣ်အဲးစံၣ်-ကညီတၢ်ကစီၣ်အိၣ်ဝဲဒၣ်န့ၣ်လီၤ. ဘၣ်ဆၣ်သနါက့ဘၣ်ထွဲဒီးတၢ်ကပျဲပှၤဒဲကဝီၤဖိသ့ၣ်တဖၣ်ကလဲၤဖံးလဲၤမၤတၢ်မၤလၢဖိးမံဒီးသဲစးတၢ်ဘျၢအံၤန့ၣ်မ့ၢ်တၢ်ကလဲၤအီၤအပတီၢ်ဒ်လဲၣ်ဒီးတၢ်ကမၤအီၤအကျိၤအကျဲဒ်လဲၣ်ခီန့ၣ်ကၠီၣ်တဲၣ်တကပၤပၥ်ဖျါထီၣ်ဝဲလၢလၢပှဲၤပှဲၤ,လီၤတံၢ်လီၤဆဲးတအိၣ်နီမံၤဒံးဘၣ်အဂ့ၢ်သ့ၣ်ညါဘၣ်န့ၣ်လီၤ. ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢဘၣ်ကီဘၣ်ခဲဒဲကဝီၤအိၣ်ဝဲ(၉)ဘ့ၣ်လၢအမ့ၢ် မဲၢ်လး, မဲၢ်ရၤမိၤ, မဲၢ်လၤအူး, အူးပၠၣ်, နိၣ်ဖိ, ဘါဒိၣ်ယါ, ထါမဟ့ၣ် ဒီး ကရ့ၣ်နံၣ်ဒဲကဝီၤနီၣ်ဂံၢ်(၁), နီၣ်ဂံၢ်(၂)သ့ၣ်တဖၣ်ဒီးပှၤဒဲကဝီၤဖိနီၣ်ဂံၢ်ခဲလၢၥ်အိၣ်ဝဲ(၁၀၇၀၀၀) ဘျဲၣ်န့ၣ်လီၤ.
တၢ်ကူၣ်လဲၤမၤကၤကလဲၤသးဘျ့ဘျ့ဆှီဆှီအဂီၢ်ကၠီၣ်တဲၣ်မီၣ်သီထံၣ်လိၥ်ကတိၤသကိးတၢ်ဒီးကီၢ်ပယီၤ
လါစဲးပထ့ဘၢၣ် ၁၀သီ, ၂၀၂၅နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်-ကီၢ်ပယီၤထံကီၢ်(၂)ဘ့ၣ်အဘၢၣ်စၢၤကီၢ်ဆၢတၢ်ကူၣ်လဲၤမၤကၤ,တၢ်ဝံစိၥ်တီဆှၢကလဲၤအသးဘျ့ဘျ့ဆှီဆှီအဂီၢ်ကၠီၣ်တဲၣ်မီၢ်သီထံၣ်လိၥ်ကတိၤသကိးဝဲတၢ်ဒီးကီၢ်ပယီၤအဂ့ၢ်,သုးမီၤစိရိၤတၢ်ကစီၣ်သန့ဒီးကၠီၣ်တဲၣ်တၢ်ကစီၣ်သန့တဖၣ်ရၤလီၤပၥ်ဖျါဝဲဒၣ်ဖဲမဟါလါစဲးပထ့ဘၢၣ်(၉)သီအနံၤန့ၣ်လီၤ. တၢ်ဝံစိၥ်တီဆှၢဒီးတၢ်ကူၣ်လဲၤမၤကၤကဘၣ်ဘျီးဘၣ်ဒါအဂီၢ်ကၠီၣ်တဲၣ်ကီၢ်ပယီၤဂ့ၢ်ဝီအမီၢ်သီ(Mr.mongkolvisitstump)အံၤအပူၤကွံၥ်လါစဲးပထ့ဘၢၣ်(၈)သီအနံၤအပူၤလဲၤထံၣ်လိၥ်တ့ၢ်ဝဲအသးဒီးကီၢ်ပယီၤဘီမုၢ်စၢဖှိၣ်ကရၢကိတိၥ်ခိၣ်(အူသါဆွ့ၤ)လၢန့ၣ်ပၠ့ၣ်ဒီၣ်အပူၤအဂ့ၢ်,သုးမီၤစိရိၤတၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ. တၢ်ထံၣ်လိၥ်အိၣ်သကိးအံၤမ့ၢ်ဒ်သိးထံကီၢ်(၂)ဘ့ၣ်အဘၢၣ်စၢၤတၢ်ရ့လိၥ်မုၥ်လိၥ်ကအိၣ်ဂၢၢ်အိၣ်ကျၢၤ,တၢ်မၤသကိးတၢ်အဂံၢ်ကဆူၣ်ထီၣ်ဒီးကသုးထီထီၣ်ဝဲခံခီခံကပၤအတၢ်ဘၣ်ဘျူးတၢ်ပၣ်ဃုၥ်မၤသကိးတၢ်အဂီၢ်အသိး,တၢ်ထံၣ်လိၥ်သးအပူၤတၢၣ်ပီၣ်တဲသကိးဝဲလီၤဆီဒၣ်တၢ်,တၢ်ဘျၢလီၤပနံၥ်တၢ်ကၤအဂ့ၢ်အကျိၤဒီးဟ့ၣ်ခီဟ့ၣ်နီၤဝဲခံခီခံကပၤထံကီၢ်ခံဘ့ၣ်အဘၢၣ်စၢၤတၢ်ဝံစိၥ်တီဆှၢပနံၥ်တၢ်ကၤတၢ်ဟးထီၣ်က့ၤလီၤကျဲအဂ့ၢ်အကျိၤတဖၣ်အဂ့ၢ်,သုးမီၤစိရိၤတၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ. ဒ်န့ၣ်အသိး,ပယီၤသုးကရူၢ်မၤနၢၤဝဲကီၢ်သူလ့ၤသုးမုၢ်ဒိၣ်တဖၣ်ဖဲအ့ရှၢၣ်ကျဲမုၢ်ဝံၤအလီၢ်ခံကၠီၣ်တဲၣ်မီၢ်သီ(Mr.MongkolVisitstump)အတၢ်ထံၣ်လိၥ်သးဒီး(အူသါဆွ့ၤ)ဘျီဝဲအံၤမ့ၢ်ဝဲဒ်သိးတၢ်ကအိးထီၣ်က့ၤဝဲအ့ရှၢၣ်ကျဲမုၢ်ဖးဒိၣ်အဂီၢ်အသိး,အဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်စ့ၢ်ကီးန့ၣ်လီၤ. ဘၣ်ဃးဒီးကၠီၣ်တဲၣ်ဒီးပယီၤသုးကရူၢ်အတၢ်ထံၣ်လိၥ်သးအဖီခိၣ်,ကညီတၢ်မုၥ်တၢ်ခုၣ်ကီၣ်ကးကရၢ(KNLA/PC)ပှၤကတိၤတၢ်ပၢသုးခိၣ်ဒိၣ်စိစီၤကၠီၣ်ညိၣ်ပဲၥ်ထံနီၤဖးစံးဝဲဒ်အံၤန့ၣ်လီၤ. “ကၠီၣ်တဲၣ်ကီၢ်ဒီးကီၢ်ပယီၤအမုၢ်ကျိၤဝဲၤကွၥ်,တၢ်ကူၣ်လဲၤမၤကၤအံၤအလုၢ်အပှ့ၤဒိၣ်ဝဲလီၤ.အဃိန့ၣ်တၢ်ထံၣ်လိၥ်သးအံၤပနၢ်ပၢၢ်လၢကၠီၣ်တဲၣ်တကပၤနါက့ဒ်သိးတၢ်ဘၣ်ဘျူးကအိၣ်ထီၣ်က့ၤလၢခံခီခံကပၤအဂီၢ်မ့ၢ်အသုတၢ်ဂုၥ်ကျဲးစၢးတခါန့ၣ်လီၤ.တမံၤဂ့ၤတမၠိဂ့ၤခီန့ၣ်လၢတၢ်ကအိးထီၣ်အ့ရှၢၣ်ကျဲခီန့ၣ်,ပဆိမိၣ်ဒုတၢ်ကီတၢ်ခဲတဖၣ်တၢ်ဘှါရှဲအီၤတဝံၤဒံးဘၣ်အဃိလၢတၢ်လဲၤတၢ်က့ၤတၢ်ဘံၣ်တၢ်ဘၢ,ကဂၢၢ်ကကျၢၤလီၤတံၢ်လီၤဆဲးအဂီၢ်တၢ်ကဘၣ်မၤအီၤကအိၣ်ဒံးဝဲတဆီတဆီဒံးန့ၣ်လီၤ”အဂ့ၢ်စံးဝဲဒၣ်န့ၣ်လီၤ. အ့ရှၢၣ်ကျဲမုၢ်အံၤသုးကီၣ်ကးဟံန့ၢ်ဆူၣ်ကွံၥ်ဝဲထံကီၢ်တၢ်စိကမီၤအလီၢ်ခံ(၂၀၂၁)နံၣ်လါဒံၣ်စဲဘၢၣ်အပူၤ,တၢ်ဒုးစးထီၣ်ကဲထီၣ်ဝဲလၢလ့က့ၣ်ကိၥ်အဆၢကတီၢ်ပယီၤသုးကရူၢ်အံၤသူဝဲကျဲအံၤလၢသုးဂ့ၢ်ဝီတကပၤအါထီၣ်ဝဲဒီးဒွဲၣ်အူအီၣ်တၢ်,ခိးခးဝဲကမျၢၢ်သိလ့ၣ်လၢအလ့ၢ်ထီၣ်လ့ၢ်လိၤတဖၣ်အိၣ်ဝဲခဲအံၤခဲအံၤအဃိ,(၂၀၂၃)နံၣ်လါအီကူးအပူၤတၢ်ကးတံၥ်ကွံၥ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒီးခီဖျိတၢ်ကးတံၥ်ဃၥ်ဝဲအ့ရှၢၣ်ကျဲအံၤယံၥ်အဃိဒိဘၣ်ဝဲခံခီခံကပၤအမုၢ်ကျိၤဝဲၤကွၥ်တၢ်ဖံးအီၣ်မၤအီၣ်အဖီခိၣ်,လၢတၢ်ကအိးထီၣ်က့ၤဝဲကျဲအံၤအဂီၢ်(၂၀၂၄)နံၣ်လါစဲးပထ့ဘၢၣ်အပူၤကညီဖီၣ်စုကဝဲၤကရူၢ်ကရၢဒ်အမ့ၢ်,ကညီတၢ်ထူၣ်ဖျဲးသုးမုၢ်ဒိၣ်(KNLA),သုးက့(၆),သုးက့(၇)ပှၤဘၣ်မူဘၣ်ဒါ,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA),ကညီတၢ်မုၥ်တၢ်ခုၣ်ကီၣ်ကးကရၢ,(PC)ဃုၥ်ဒီးသုးခိးကီၢ်ဆၢ(BGF)ခိၣ်နၢ်ဒိၣ်ထီပှၤဘၣ်မူဘၣ်ဒါတဖၣ်မၤဝဲတၢ်ထံၣ်လိၥ်တဲသကိးဝဲတၢ်အိၣ်ဝဲအသိး,ကၠီၣ်တဲၣ်ကီၢ်ပယီၤအမီၣ်သီ(Mr.MongkolVisitstump)စ့ၢ်ကီးထံၣ်လိၥ်ကတိၤတ့ၢ်ဝဲတၢ်ဒီးသုးကီၣ်ကးအစုတီၤဖီလၥ်ကညီကီၢ်စဲၣ်ကိၥ်တိၤဝဲၤကျိၤခိၣ်(အူစီမၠ့ၣ်အူ)အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
တၢ်ခးသံ ဘံလ့ဝ့ၢ်သုးမီၤစိရိၤအကဝီၤဒ့သးပှၢ် အူဆါနဲၤ
လါစဲးပထ့ဘၢၣ် ၉ သီ, ၂၀၂၅ နံၣ်, ခ့ၣ်အဲးစံၣ် အူဆါနဲၤ လၢအမ့ၢ်ဝဲဘံလ့ဝ့ၢ် (ဘိုးလကြီး)ကဝီၤဒ့သးပှၢ်အံၤ ခီဖျိမၤနၢၤအီၣ်ဃီၣ်ဝဲကမျၢၢ်တဖၣ်အိၣ်အဃိ ဖဲအပူၤကွံၥ်စှၤသီ အခါတၢ်လဲၤခးသံ ကွံၥ်အီၤလၢအံလူၢ်သဝီဃၢၤ (အထပ်သား)သ့ၣ်တၢ်မၤလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ. အူဆါနဲၤ အံၤ မ့ၢ်ဝဲဘံလ့ဝ့ၢ် ကဝီၤဒ့သးပှၢ်ဒီး (လူမှုကယ်ဆယ်ရေး)ကရၢခိၣ်အမဲၥ်ညါ လၢခ့ၣ်အဲၣ်ယူၣ် ကၠဲးထိၣ်ကီၢ်ဆၣ် အံလူၢ်သဝီ (ကံကောင်းခြင်းရတနာ) တၢ်မၤလီၢ်န့ၣ်မ့ၢ်စ့ၢ်ကီးဝဲသုးမီၤစိရိၤအသုးကသံၣ်သရၣ်တဂၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ. လၢတၢ်န့ၣ်အဃိဖဲလါစဲးပထ့ဘၢၣ် ၆ သီ ဟါခီ ၉း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ဖဲအအိၣ်လၢ(အထပ်သား)သ့ၣ်တၢ်မၤလီၢ် အံၤအဆၢ ကတီၢ် ဖီၣ်စုကဝဲၤကရူၢ်လဲၤဒီးခးသံကွံၥ်အီၤဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ် လီၢ်ကဝီၤကမျၢၢ်တဂၤ စံးဘၣ် ခ့ၣ်အဲးစံၣ်- ကညီတၢ်ကစီၣ်ဒ်အံၤန့ၣ်လီၤ. “ပှၤလဲၤခးအီၤန့ၣ်ဖဲ ၆ သီ မုၢ်နၤခီ ၈း၄၀ မံးအခါန့ၣ်. ပှၤလဲၤခးအီၤဖဲအံလူၢ်ဖိ (အထပ်သား)သ့ၣ်ဘၣ်တၢ်မၤလီၢ်န့ၣ်. အဝဲန့ၣ်အကဲ ဝဲပယီၤသုးအကသံၣ်သရၣ်(ဆေးမှူး)တဂၤ. အဟဲဆဲးကသံၣ်ဖဲအံလူၢ်သဝီဃၢၤတၢ်မၤလီၢ်န့ၣ်. ပှဲၤလဲၤတကျိၥ်ပဲတြီဘျီ အက့ၤအသံကွၢ်ဝဲမတဂၤလဲၣ်,ပှၤက့ၤစံးဆၢအီၤလၢပှၤဆါဖိဝံၤ အဟဲထီၣ်ဘျီပှၤခးသံကွံၥ်အီၤဖဲန့ၣ်လီၤ. အဝဲန့ၣ်အအိၣ် ဖဲတၢ်မၤလီၢ်န့ၣ်လီၤ. အဝဲန့ၣ်အိၣ်ဒီးအကျိ,မၤတရီတပါပှၤပိၥ်မုၣ်,မၤနၢၤအီၣ်ပှၤမၤတၢ်ဖိဒီး ပှၤပိၥ်ခွါလၢအကွၢ်ဝဲ တမုၥ်ဘၣ်တဖၣ် န့ၣ်နီဟးထီၣ်ဝဲလၢတၢ်မၤလီၢ်.မ့ဘၣ်တဲအဝဲန့ၣ်အကဲဝဲသုးကီၣ်ကးအတၢ်မဲၥ်ချံ,ဟ့ၣ်ပယီၤသုးတၢ်ကစီၣ်မီၤနီၤ”အဂ့ၢ်န့ၣ် စံးဝဲန့ၣ် လီၤ. လၢန့ၣ်အမဲၥ်ညါဖဲတၢ်လဲၤခးသံအီၤအခါန့ၣ်...
ကီၢ်အမဲရၤကၤဖီၣ်ဃံး (BGF)သုးခိၣ်ခၠံၣ်သူၣ် အခီပနံၣ်ဃုၥ်ဒီးအပှၤမၤသကိးတၢ်နီၤ
လါစဲးပထ့ဘၢၣ် ၉သီ, ၂၀၂၅နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကညီကီၢ်စဲၣ် စွ့ၣ်ကိၣ်ကိၤဟီၣ်ကဝီၤပူၤ အိၣ်လဲၣ်တၢ်လံၣ်အီၣ်ကျိၣ်စ့တၢ်ဖံးတၢ်မၤဒီးပှၤလၢအဘၣ်ထွဲဘၣ်ဃး ခဲလၢၥ် Target (၉)ခါဖီၣ်ဃံးဝဲဒၣ် ကီၢ်အမဲရကၤ ကျိၣ်စ့ဝဲၤကျိၤကိတိၥ် ဘိးဘၣ်ရၤလီၤဝဲဖဲ လါစဲးပထ့ဘၢၣ်(၈)အနံၤအဆၢကတီၢ်န့ၣ်လီၤ. ကီၢ်အမဲၥ်ရကၤ Target(၉)ခါန့ၣ်မ့ၢ်ဝဲဒၣ်ပှၤကညီ(၃)ဂၤဒီးခီပနံၣ်(၆)ခါအဂ့ၢ်သ့ၣ်ညါဘၣ်န့ၣ်လီၤ.ပှၤကညီ(၃)ဂၤလၢအပၣ်ဃုၥ်လၢ ကီၢ်အမဲရကၤတၢ်ဖီၣ်ဃံးစရီပူၤသ့ၣ်တဖၣ်န့ၣ်မ့ၢ်ဝဲ (BGF)မ့တမ့ၢ်(KNA)သုးခိၣ်ကျၢၢ်ဖိစၤတ့ၤဝ့,စီၤမ့မ့အူဒီး သုးခိၣ်ခၠံၣ်သူၣ်အသကိးလၢမၤသကိးတၢ်ဒီးအီၤတကီၢ်ခါခဲအံၤဘၣ်လီၤလၢကီၢ်ကၠီၣ်တဲၣ်တၢ်ဒုးဃုၥ်ပူၤလၢအမ့ၢ် SHE ZHIJIANGသ့ၣ်တဖၣ်အဂ့ၢ် ပၥ်ဖျါဝဲလၢကီၢ်အမဲရကၤအလံၥ်တၢ်တၢ်ပၥ်ဖျါအပူၤန့ၣ်လီၤ. ဒ်န့ၣ်အသိးခီပနံၣ်လၢ အပၣ်ဃုၥ်လၢကီၢ်အမဲရကၤ အတၢ်ဖီၣ်ဃံးစရီအပူၤသ့ၣ်တဖၣ်န့ၣ်မ့ၢ်ဝဲ Myanmar Yatia international Holding Group Co.LTD.(Myanmar Yatai), ခၠံၣ်လ့မၠဲၣ် တၢ်ခူၣ်စၢၢ်ထးဒီးစဲးဖီကဟၣ်ခီပနံၣ်,ခၠံၣ်လ့မၠဲၣ်တိၣ်ယိတၣ်ခီပနံၣ်,ခၠံၣ်လ့မၠဲၣ်ခီပနံၣ်, စွ့ၤမၠ့ၣ်သီၤယ့ တၢ်ထုးထီၣ်စဲးဖီကဟၣ်ခီပနံၣ်,ဒီး Yatai International Holding Group limted သ့ၣ်တဖၣ် ပၣ်ဃုၥ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ. ရၤမတံဝ့ၢ်ဟီၣ်ကဝီၤ,စွ့ၣ်ကိၣ်ကိၤပူၤ Yatia new city လၢသုးခိၣ်ခၠံၣ်သူဒီးအသကိး She Zhijiang သူၣ်ထီၣ်ဘှီထီၣ်ဝဲအံၤန့ၣ်မ့ၢ်ဝဲဒၣ်တၢ်လံၣ်အီၣ်ကျိၣ်စ့အလီၢ်ဖးဒိၣ်တခါဒီးအပူၤကွံၥ်(၈)နံၣ်န့ၣ် မ့ၢ်ဝဲဒၣ်သဝီဖိတဖျၢၣ်လၢသူမွဲကျိကၢၢ်နံၤဒီးအခဲအံၤန့ၣ်အဝဲသ့ၣ်ဆီတလဲက့ၤဝဲဒၣ်ဆူ တၢ်တၤကျိၣ်တၤစ့လီၢ်,တၢ်ရၤလီၤတၢ်မူၤတၢ်ဘှီးလီၢ်,တၢ်ဆါလီၤအီၣ်သးလီၢ်ဒီးတၢ်လံၣ်အီၣ်ကျိၣ်စ့လၢဟီၣ်ခိၣ်ဒီဖျၢၣ် အလီၢ်တခါအဂ့ၢ် ကီၢ်အမဲရၤကၤစံးဝဲဒၣ်န့ၣ်လီၤ. ဒ်လါစဲးပထ့ဘၢ(၈)သီအနံၤ ကီၢ်အမဲရၤ ကျိၣ်စ့ဝဲကျိၤကိတိၥ်အတၢ်ပၥ်ဖျါအိၣ်ဝဲအသိးန့ၣ် ခီဖျိ အ့ရှၢၣ်မုၢ်ထီၣ်အလံၤထံး တၢ်လံၣ်အီၣ်လီအီၣ်ကျိၣ်စ့တၢ်ဖံးတၢ်မၤအဃိ ကီၢ်အမဲရကၤထံဖိကီၢ်ဖိဘၣ်ဃးကွံၥ်ဝဲကျိၣ်စ့အစှၤကတၢၢ် ဒီလၣ်အကကွဲၢ်(၁၀)အိၣ်ဝဲဒၣ်အဖီၣ်ခိၣ်...
ကဆဲးကတိၤန့ၢ်ခဲးသကိးတၢ်လၢဖိသၣ်တဖၣ်တၢ်ကူၣ်ဘၣ်ကူၣ်သ့အဂီၢ်အဂ့ၢ်,(KHRG)ဆီၣ်တခူထီၣ်
လါစဲးပထ့ဘၢၣ် ၉သီ, ၂၀၂၅နံၣ်, ခ့ၣ်အဲးစံၣ်, လီၢ်ကဝီၤကရူၢ်ကရၢပှၤဟူးဂဲၤလၢဖိဒံဖိသၣ်ဂ့ၢ်ဝီတဖၣ်ကဆဲးကတိၤန့ၢ်ခဲးဝဲတၢ်လၢဖိဒံဖိသၣ်တဖၣ်အတၢ်ကူၣ်ဘၣ်ကူၣ်သ့အဂီၢ်အဂ့ၢ်,ကညီပှၤဂ့ၢ်ဝီခွဲးကရူၢ်(KHRG)ဆီၣ်တခူစံးဝဲဖဲ(ဟီၣ်ခိၣ်ဒီဖျၢၣ်တၢ်ဒီသဒၢတၢ်ထီၣ်ဒုးတၢ်ကူၣ်ဘၣ်ကူၣ်သ့)မုၢ်နံၤလၢအလီၤဘၣ်ဝဲဖဲတနံၤအံၤလါစဲးပထ့ဘၢၣ်(၉)သီအနံၤန့ၣ်လီၤ. ပယီၤသုးဟံးန့ၢ်ဆူၣ်ကွံၥ်ဝဲတၢ်စိတၢ်ကမီၤဒီတကတီၢ်အပူၤ,မၤဝဲကဘီယူၤတၢ်ထီၣ်ဒုး,သူဒြိပညိၣ်တ့ၢ်လီၤဝဲမ့ၣ်ပိၢ်တဖၣ်လၢဖိဒံဖိသၣ်တၢ်မၤလိကၠိတဖၣ်အပူၤအဃိ,ကၠိဖိဒီးကၠိသရၣ်သရၣ်မုၣ်တဖၣ်ဘၣ်ဒိဘၣ်ထံးသံအိၣ်ဝဲဒၣ်အါမးဒီးကၠိတဖၣ်ဟးဂုၤဟးဂီၤကွံၥ်ဝဲအသိး,ကၠိဖိတနီၤတဒိးန့ၢ်မၤလိဘၣ်ဝဲတၢ်လၢၤဘၣ်အမဲၥ်ညါတနီၤဘၣ်မၤလိက့ၤဝဲတၢ်လၢတၢ်ပျံၤတၢ်ဖုးပူၤအိၣ်ဝဲဒၣ်အဂ့ၢ်,(KHRG)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. တၢ်ထီၣ်ဒုးအပူၤဒ်သိးဖိဒံဖိသၣ်တဖၣ်ကန့ၢ်မၤလိဘၣ်ဝဲတၢ်ပှဲၤဒီးတၢ်ဘံၣ်တၢ်ဘၢအဂီၢ်,အဲၣ်ဒိးဝဲလၢလီၢ်ကဝီၤကရူၢ်ကရၢတဖၣ်ကဆဲးကတိၤန့ၢ်ခဲးဒံးဝဲတၢ်လၢဖိသၣ်တဖၣ်အတၢ်ကူၣ်ဘၣ်ကူၣ်သ့အဂီၢ်အဂ့ၢ်,(KHRG)(advocacy)ပှၤကတိၤန့ၢ်ခဲးတၢ်မူဒါခိၣ်နီၢ်ဖီလါဆီၣ်တခူစံးဝဲဖဲတနံၤအံၤ(ဟီၣ်ခိၣ်ဒီဖျၢၣ်တၢ်ဒီသဒၢဝဲတၢ်ထီၣ်ဒုးတၢ်ကူၣ်ဘၣ်ကူၣ်သ့)မုၢ်နံၤဒ်အံၤန့ၣ်လီၤ. “ပအဲၣ်ဒိးလၢလီၢ်ကဝီၤတၢ်ကရၢကရိပှၤဟူးဂဲၤလၢဖိဒံဖိသၣ်တၢ်ကူၣ်ဘၣ်ကူၣ်သ့ဒီးတၢ်အိၣ်ဆူၣ်အိၣ်ချ့ခွဲးယၥ်တဖၣ်ကဆဲးကတိၤန့ၢ်ခဲးဒံးဝဲတၢ်လၢဖိဒံဖိသၣ်တဖၣ်အဂီၢ်,ဒ်သိးဖိဒံဖိသၣ်တဖၣ်အံၤမ့ဘၣ်ဃ့ၢ်မှံဟးဖျိးဘၣ်ဆၣ်ကဒိးန့ၢ်ဖံးလိမၤဘၣ်ဒံးဝဲတၢ်တကးဘၣ်,တၢ်ကဃုန့ၢ်ဝဲတၢ်ဆီၣ်ထွဲမၤစၢၤတၢ်လၢအလိၣ်ဘၣ်ဝဲသ့ၣ်တဖၣ်ဒီးကဟ့ၣ်တၢ်ကဟုကယၥ်လၢနီၢ်ခိ,နီၢ်သးဃုၥ်ဒီးတၢ်အိၣ်ဆူၣ်အိၣ်ချ့အတၢ်အံးထွဲကွၢ်ထွဲသ့ၣ်တဖၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ဖိဒံဖိသၣ်တဖၣ်ကဒိးန့ၢ်မၤလိဘၣ်တၢ်အဂီၢ်အဲၣ်ဒိးဝဲလၢထံဂုၤကီၢ်ဂၤပှၤဘၣ်မူဘၣ်ဒါတဖၣ်ကဃုထံၣ်ဝဲဖိဒံဖိသၣ်တဖၣ်အတၢ်လိၣ်ဘၣ်နီၢ်နီၢ်ဒီးမၤသကိးတၢ်ဒီးလီၢ်ကဝီၤတၢ်ကရၢကရိတဖၣ်လၢတၢ်ဆီၣ်ထွဲမၤစၢၤဖိသၣ်တဖၣ်အဂီၢ်အဂ့ၢ်,အဝဲစံးအါထီၣ်ဝဲဒၣ်စ့ၢ်ကီးန့ၣ်လီၤ. (၂၀၂၁)တုၤလၢ(၂၀၂၅)နံၣ်လါစဲးပထ့ဘၢၣ်အပူၤ,ကညီကီၢ်စဲၣ်ဟီၣ်ကဝီၤပူၤသုးကီၣ်ကးမၤဝဲတၢ်ထီၣ်ဒုးလၢကၠိတဖၣ်အပူၤအါထီၣ်ဝဲကွ့ၢ်ကွ့ၢ်ဒီးကၠိတၢ်သူၣ်ထီၣ်,ကၠိဖိ,ကၠိသရၣ်သရၣ်မုၣ်တဖၣ်ဘၣ်ဒိဘၣ်ထံးဝဲအဖီခိၣ်,သုးမီၤစိရိၤအံၤမၤထီဒါဝဲဟီၣ်ခိၣ်ဒီဖျၢၣ်ပှၤဂ့ၢ်ဝီတၢ်ဘျၢသဲးစးအဂ့ၢ်(ဟီၣ်ခိၣ်ဒီဖျၢၣ်တၢ်ဒီသဒၢဝဲတၢ်ထီၣ်ဒုးတၢ်ကူၣ်ဘၣ်ကူၣ်သ့)မုၢ်နံၤလံၥ်ဘိးဘၣ်ပၥ်ဖျါအပူၤ(KHRG)ထုးထီၣ်ပၥ်ဖျါဝဲဒၣ်စ့ၢ်ကီးန့ၣ်လီၤ. လၢတၢ်န့ၣ်အဃိ,သုးမီၤစိရိၤအတၢ်မၤထီဒါအံၤတၢ်ကဘၣ်မၤကပတုၥ်ကွံၥ်ဝဲအဂ့ၢ်,(KHRG)ပၥ်ဖျါစ့ၢ်ကီးဝဲဒၣ်န့ၣ်လီၤ. သုးမီၤစိရိကရူၢ်အံၤမ့ၢ်ဝဲပှၤသ့ၣ်တဖၣ်လၢအဒုးအိၣ်ထီၣ်ကီၢ်ပယီၤထံကီၢ်ပှၤဟီၣ်ခိၣ်ဖိခွဲးယၥ်တၢ်ဂ့ၢ်ကီအဃိ,ထံဂုၤကီၢ်ဂၤပဒိၣ်ပပှၢ်ပှၤဘၣ်မူဘၣ်ဒါတဖၣ်သုတမၤသကိးတၢ်ဒီးဆီၣ်ထွဲဝဲအီၤတဂ့ၤအဂ့ၢ်,(KHRG)ပှၤဘၣ်မူဘၣ်ဒါတဖၣ်ဃ့ထီၣ်ဝဲဒၣ်န့ၣ်လီၤ. ဒ်န့ၣ်အသိး,ဆီၣ်တခူထီၣ်ဝဲထံဂုၤကီၢ်ဂၤလၢပဒိၣ်ပပှၢ်ပှၤဘၣ်မူဘၣ်ဒါလၢ,ကဟံးထီၣ်ဖီၣ်ထီၣ်ဝဲသုးမီၤရိၤတဖုအံၤအဂ့ၢ်ဝီလၢထံဂုၤကီၢ်ဂၤပတီၢ်တၢ်ဟံးထီၣ်ဂ့ၢ်ဝီသဲးစးတၢ်န့ၢ်ပၢအဖီလၥ်လၢကျဲတဘိဂ့ၤတဘိဂ့ၤသ့ဝဲအပူၤအဂ့ၢ်,(KHRG)ပှၤဘၣ်မူဘၣ်ဒါတဖၣ်ကတိၤပၥ်ဖျါဝဲဒၣ်န့ၣ်လီၤ.
သုးမီၤစိရိၤအကဘီယူၤလဲၤတ့ၢ်ခးလီၤတၢ်လၢ(သုးက့ ၅)လ့ပူၤဒၢ စၢၤသွဲၣ်သီကၠိကရၢၢ်ပူၤ
လါစဲးပထ့ဘၢၣ် ၈ သီ, ၂၀၂၅ နံၣ်, ခ့ၣ်အဲးစံၣ် ဖဲမဟါလါစဲးပထ့ဘၢၣ် ၇ သီအနံၤန့ၣ် သုးမီၤစိရိၤအကဘီယူၤလဲၤခးလီၤတၢ်လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) လူၤသီကီၢ်ဆၣ် စၢၤသွဲၣ်သီကၠိကရၢၢ်ပူၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါ အအိၣ် န့ၣ်လီၤ. ဖဲမဟါ ဂီၤခီ ၉း၃၀ ဃၣ်ဃၣ်အဆၢကတီၢ် သုးမီၤစိရိၤ(Jet Fighter)ကဘီယူၤလဲၤတ့ၢ်လီၤဝဲမ့ၣ်ပိၢ်(၂)ဖျၢၣ်လၢလ့ပူၤဒၢ စၢၤသွဲၣ်သီကၠိကရၢၢ်ပူၤ အဃိ ကၠိတၢ်ဖီအီၣ်လီၢ်(၁)ဖျၢၣ်ဒီးတၢ်ပၥ်ကီၤတၢ်ဖိတၢ်လံၤတၢ်သူၣ်ထီၣ်လီၢ်(၁)ဖျၢၣ်ဟးဂီၤကွံၥ်ဝဲအဂ့ၢ်န့ၣ် (သုးက့ ၅) ပှၤကတိၤ တၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ. အဝဲစံးဝဲလၢ“ဖဲတနံၤညါအံၤ ၇ သီ ဂီၤခီကဘၣ်ဖဲ ၉း၃၀ ခိၣ်ဃၢၤအခါန့ၣ် ပယီၤသုးကဘီယူၤဟဲခးလီၤဝဲတၢ်လၢလ့ပူၤဒၢတၢ်လီၢ် ကၠိကရၢၢ်ပူၤ. ဖဲန့ၣ်ကၠိအတၢ်ဖီအီၣ်လီၢ်န့ၣ်ဟးဂီၤ.မ့ဝံၤဘၣ်ဝဲဒီးကၠိပှၤပၥ်တၢ်ဖိတၢ်လံၤလီၢ်မီၤနီၤ .မ့တၢ်ဖီအီၣ်တၢ်လီၢ် တဖျၢၣ်န့ၣ်ဒုဟးဂီၤလၢၤ. အခးဝဲန့ၣ်(၂)ဖျၢၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤန့ၣ်လီၤ. ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤခီဖျိဘၣ်လၢအိၣ်ဘှံးနံၤ ကၠိတထီၣ်ဘၣ်အဃိ ပှၤကညီ တၢ်သံတၢ်ဘၣ်ဒိဘၣ်ထံးတအိၣ်ဝဲ ဘၣ်အသိး ကၠိအံၤတၢ်တမၤလိမၤဒိးစ့ၢ်ကီးတၢ်လၢအပူၤလၢၤဘၣ်အဂ့ၢ်န့ၣ် သုးက့ ၅ ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲ န့ၣ်လီၤ. “ကၠိတဖျၢၣ်အံၤအပူၤကွံၥ်န့ၣ်ကဘီယူၤဟဲခးတၢ်အိၣ်တဘျုးဘျီလံ.အဃိန့ၣ်ပှၤဆီတလဲအလီၢ်လၢတၢ်လီၢ်အဂၤ.အိၣ်ဒၣ်ပှၤပၥ်တ့ၢ်က့ၤလၢတၢ်ဖိတၢ်လံၤဒီးတၢ်အီၣ်တၢ်အီဒ်န့ၣ်လီၤ.မ့မ့ၢ်ပှၤကၠိဖိန့ၣ်ပှၤသိၣ်လိက့ၤတၢ်လီၢ်လၢအဂၤ.အဃိန့ၣ်တၢ်ဘၣ်ဒိဘၣ်ထံးတအိၣ်ဘၣ်မ့မ့ၢ်ပှၤကညီန့ၣ်”အဂ့ၢ်န့ၣ် စံးဝဲန့ၣ်လီၤ. ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ကၠိလၢကဘီယူၤလဲၤတ့ၢ်လီၤဝဲမ့ၣ်ပိၢ်ဖဲမဟါအနံၤအံၤ အိၣ်တဘူးတယံၤဝဲဒီး ဒ့ၣ်ဘူးနိၣ်...
ဆီၣ်ထွဲသကိးကညီပိၥ်မုၣ်သ့ၣ်တဖၣ်ဒ်သိးကနုၥ်လီၤမၤသကိးတၢ်အါထီၣ်ဒီး KNPFအဂ့ၢ် KWO ဆီၣ်သခူထီၣ်
လါစဲးပထ့ဘၢၣ် ၈သီ, ၂၀၂၅နံၣ်, ခ့ၣ်အဲးစံၣ်, ကညီဒီကလုၥ်ပၢၤကီၢ်သုး(KNPF)တၢ်ဖံးတၢ်မၤအပူၤ,ပိၥ်မုၣ်တဖၣ်နုၥ်လီၤမၤသကိးတၢ်ကအါထီၣ်ဝဲအဂီၢ်ကဆီၣ်ထွဲသကိးဝဲကညီပိၥ်မုၣ်ပိၥ်မၢၤသ့ၣ်တဖၣ်အဂ့ၢ်ကညီပိၥ်မုၣ်ကရၢ(KWO)ဆီၣ်တခူဘိးဘၣ်ရၤလီၤပၥ်ဖျါဝဲလၢ(ကညီဒီကလုၥ်ပၢၤကီၢ်သုး)(KNPF)မုၢ်နံၤအလံၥ်ဟ့ၣ်ယုၢ်အပူၤကလီၤဘၣ်ဝဲဖဲလါစဲးပထ့ဘၢၣ်(၉)သီအနံၤအပူၤန့ၣ်လီၤ. ကညီဒီကလုၥ်ပၢၤကီၢ်သုးအံၤအမူအဒါအိၣ်ဝဲလၢကဘၣ်ကဟုကယၥ်ဒီးဒီသဒၢဝဲထံဖိကီၢ်ဖိကမျၢၢ်တဖၣ်အသိး,လီၤဆီဒၣ်ကဘၣ်ဟံးန့ၢ်ဝဲတၢ်ဘံၣ်တၢ်ဘၢလၢပိၥ်မုၣ်ပိၥ်မၢၤဒီးဖိဒံဖိသၣ်တဖၣ်အဂီၢ်အဃိ,ဒ်သိးတၢ်သုတဆီၣ်တံၢ်မၤနၢၤဒီးဟံးန့ၢ်တၢ်ဘျူးတၢ်ဖှိၣ်လၢပိၥ်မုၣ်ပိၥ်မၢၤဒီးဖိဒံဖိသၣ်အဖီခိၣ်တဂ့ၤအဂီၢ်,ပၢၤကီၢ်တၢ်ဖံးတၢ်မၤအပူၤလိၣ်ဘၣ်အါထီၣ်ဝဲပိၥ်မုၣ်ပိၥ်မၢၤအတၢ်ပၣ်ဃုၥ်ပၣ်ဂီၢ်အဂ့ၢ်,(KNPF)မုၢ်နံၤလံၥ်ဟ့ၣ်ယုၢ်အပူၤကညီပိၥ်မုၣ်ကရၢပၥ်ဖျါဝဲဒၣ်န့ၣ်လီၤ. လၢတၢ်န့ၣ်အဃိ,ပိၥ်မုၣ်တဖၣ်ကကဲထီၣ်ဘၣ်ပၢၤကီၢ်အဂီၢ်တၢ်ကဟ့ၣ်ဂံၢ်ဟ့ၣ်ဘါဝဲဆီၣ်ထွဲဝဲအဂ့ၢ်,ကညီပိၥ်မုၣ်ကရၢခိၣ်နီၢ်ကညီဖီဆီၣ်တခူစံးဝဲဒၣ်ဒ်အံၤန့ၣ်လီၤ. “ပၢၤကီၢ်ဒုန့ၣ်,ဒူဖိသဝီဖိတဖၣ်ကဒိးန့ၢ်ဘၣ်တၢ်ဘံၣ်တၢ်ဘၢအဂီၢ်အမူအဒါအိၣ်ဝဲဒိၣ်ဒိၣ်မုၢ်မုၢ်လၢထံလီၢ်ကီၢ်ပူၤတကပၤလီၤ.ပက့ၤကွၢ်ကဒါက့ၤန့ၣ်ပၢၤကီၢ်တၢ်ဖံးတၢ်မၤအပူၤပိၥ်မုၣ်ပိၥ်မၢၤတဖၣ်အတၢ်ပၥ်ဃုၥ်ပၣ်ဂီၢ်အိၣ်စှၤဒံးလီၤ.ဒ်သိးလၢတၢ်ဒီသဒၢပိၥ်မုၣ်မ့ၢ်ဂ့ၤ,တၢ်သမံသမိးကွၢ်တၢ်မူးတၢ်ရၢ်လၢဟဲထီၣ်တဖၣ်န့ၣ်မ့ၢ်ဂ့ၤပလိၣ်ဘၣ်အါထီၣ်ဝဲပိၥ်မုၣ်တဖၣ်အတၢ်မၤသကိးမီၤနီၤ.အဃိန့ၣ်ပအဲၣ်ဒိးတဲလၢပိၥ်မုၣ်တဖၣ်န့ၣ်တၢ်ကဟ့ၣ်ဂံၢ်ဟ့ၣ်ဘါအီၤလၢကကဲထီၣ်ဘၣ်ပၢၤကီၢ်ဒ်သိးကမၤစၢၤအါထီၣ်ဘၣ်ပပှၤတဝၢလီၤဆီဒၣ်တၢ်ပိၥ်မုၣ်ဒီးဖိသၣ်တဖၣ်ကအါထီၣ်အဂီၢ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ခ့ခါဆၢကတီၢ်ခဲအံၤအရ့ဒိၣ်လၢကညီဒီကလုၥ်ပၢၤကီၢ်သုးတဖၣ်ကမၤဂ့ၤထီၣ်အတၢ်သ့တၢ်ဘၣ်,အကံၢ်အစီ,ဂံၢ်ဘါတၢ်အိၣ်ယၢၤတဖၣ်အဂ့ၢ်,လံၥ်ဟ့ၣ်ယုၢ်အပူၤပၥ်ဖျါစ့ၢ်ကီးဝဲဒၣ်န့ၣ်လီၤ. တကးဒံးဘၣ်,တၢ်ဖံးတၢ်မၤအပူၤတၢ်ကမၤအါထီၣ်ကံၢ်စီ,ဂံၢ်ဘါ,တၢ်အိၣ်ယၢၤတဖၣ်အဂီၢ်ဟ့ၣ်ဂံၢ်ဟ့ၣ်ဘါဒီးကွဲမုၥ်ဝဲပှၤတဝၢသူၣ်စၢ်သးဘီၣ်တဖၣ်လၢကသးစၢၢ်ဆၢလၢပၢၤကီၢ်တၢ်ဖံးတၢ်မၤအပူၤအဂ့ၢ်,ကညီပိၥ်မုၣ်ကရၢခိၣ်နီၢ်ကညီဖီစံးအါထီၣ်စ့ၢ်ကီးဝဲဒၣ်န့ၣ်လီၤ. တကတီၢ်ဃီ,ကမၤလိၣ်ထီၣ်ဖးထီၣ်ဒီးမၤဃံးဃီၣ်ဒီၣ်ကီၢ်သူလ့ၤသဲးစးတၢ်ဘျၢတဖၣ်ဒီးဒ်သိးသဲးစးတၢ်ဒိၣ်စိကအိၣ်ဝဲလၢကီၢ်သူလ့ၤအပူၤအဂီၢ်,အရ့ဒိၣ်စ့ၢ်ကီးဝဲလၢတၢ်ကမၤလီၤမၢ်ကွံၥ်တၢ်အီၣ်ခိၣ်ဖးလၥ်ဆှိး,တၢ်တၤကျိၣ်တၤစ့,တၢ်မၤမုၢ်ကျိၤဝဲၤကွၥ်လၢတဖိးသဲးစးတဖၣ်စ့ၢ်ကီးအဂ့ၢ်,ပၥ်ဖျါဝဲဒၣ်လၢလံၥ်ဟ့ၣ်ယုၢ်အပူၤန့ၣ်လီၤ. ကညီဒီကလုၥ်ပၢၤကီၢ်သုးအံၤဘၣ်တၢ်ဒုးအိၣ်ထီၣ်ဝဲဖဲ(၁၉၉၁)နံၣ်လါစဲးပထ့ဘၢၣ်(၉)သီအနံၤဒီး,တၢ်ဒုးအိၣ်ထီၣ်ဝဲကညီဒီကလုၥ်ပၢၤကီၢ်သုးအံၤအတၢ်ပညိၣ်မ့ၢ်ဝဲဒ်သိးသဲးစးတၢ်ဒိၣ်စိကအိၣ်,လီၢ်ကဝီၤကအိၣ်မုၥ်အိၣ်ခုၣ်ဒီးတၢ်ကမၤလီၤမၢ်ကွံၥ်ကသံၣ်မူၤဘှီးလၢပှၤကညီတဝၢဒီးထံလီၢ်ကီၢ်ပူၤအဂီၢ်အဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,ဒ်ကညီဒီကလုၥ်ပၢၤကီၢ်သုးအတၢ်သူၣ်ထီၣ်ဆီလီၤတၢ်ကွဲးပၥ်လီၤအီၤတဖၣ်အံၤသုတလီၤမၢ်တတဂ့ၤအဂီၢ်,အလီၢ်အိၣ်ဝဲလၢပှၤကိးဂၤဒဲးကမၤသကိးတၢ်လၢတၢ်သူၣ်ဆူၣ်သးဆူၣ်ဒီးမၤဂၢၢ်မၤကျၢၤထီၣ်က့ၤတၢ်တိၥ်တၢ်မုၢ်လၢ်တမံၤဃီလၢတၢ်သးတဖျၢၣ်ဃီအပူၤအဂ့ၢ်,ကညီပိၥ်မုၣ်ကရၢဟ့ၣ်ဂံၢ်ဟ့ၣ်ဘါဒီးဒုးသ့ၣ်နီၣ်ပၥ်ဖျါဝဲဒၣ်လၢလံၥ်ဟ့ၣ်ယုၢ်အပူၤစ့ၢ်ကီးန့ၣ်လီၤ.