ပယီၤသုးကရူၢ်လဲၤတ့ၢ်လီၤဒြိမ့ၣ်ပိၢ်လၢလ့က့ၣ်ကိၥ်တၢ်ဆါဟံၣ်
လါစဲးပထ့ဘၢၣ် ၆သီ, ၂၀၂၅နံၣ်, ခ့ၣ်အဲၣ်စံၣ်, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ဒူပျၥ်ယၥ်ကီၢ်ရ့ၣ်သုးက့(၆)ကီးတရံးကီၢ်ဆၣ်ရၤမတံဝ့ၢ်ကလံၤထံး,လ့က့ၣ်ကိၥ်တၢ်ဆါဟံၣ်အံၤပယီၤသုးကရူၢ်လဲၤတ့ၢ်လီၤဒြိမ့ၣ်ပိၢ်ဖဲမဟါလါစဲးပထ့ဘၢၣ်(၅)သီအနံၤအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဘၣ်ဃးဒီးပယီၤသုးကရူၢ်လဲၤတ့ၢ်လီၤဒြိမ့ၣ်ပိၢ်လၢလ့က့ၣ်ကိၥ်တၢ်ဆါဟံၣ်အဖီခိၣ်,ဟီၣ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. “လ့က့ၣ်ကိၥ်တၢ်အိၣ်သးဒုခဲအံၤတဂၢၢ်တကျၢၤဘၣ်.မနၤကဘၣ်ဖဲ(၁၁)နၣ်ရံၣ်ဘျဲၣ်အဆၢကတီၢ်ဟဲတ့ၢ်လီၤဒြိမ့ၣ်ပိၢ်လၢတၢ်ဆါဟံၣ်အဃိတၢ်သူၣ်ထီၣ်ဟးဂီၤဖျိးကွံၥ်ဝဲတက့န့ၣ်လီၤ.တၢ်ဟးဂုၤဟးဂီၤဒုအိၣ်နါက့ကိညၢ်ဒံးလၢပှၤကညီတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်စံးဝဲဒၣ်န့ၣ်လီၤ. အပူၤကွံၥ်လါစဲးပထ့ဘၢၣ်(၄)သီအနံၤပယီၤသုးကရူၢ်လဲၤတ့ၢ်လီၤဒြိမ့ၣ်ပိၢ်လၢကၠီးခဲးတၢ်ဆါဟံၣ်ဒီးကၠိဝံၤအလီၢ်ခံ,တနံၤဃီအတီၢ်ပူၤလ့က့ၣ်ကိၥ်တၢ်ဆါဟံၣ်အံၤတၢ်ပံးကွံၥ်ဝဲဒီးတၢ်ကကွၢ်ထွဲဝဲဒၣ်ထဲဂ့ၢ်ဝီအူပှၤဆါဒီးပှၤဆါလၢအရ့ဒိၣ်ကတၢၢ်တဖၣ်လီၤအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်ဘိးဘၣ်ရၤလီၤဝဲဒၣ်န့ၣ်လီၤ. တကးဒံးဘၣ်,ဒ်သိးတၢ်ဘၣ်ဒိဘၣ်ထံးသုတအိၣ်တဂ့ၤအဂီၢ်တၢ်မၢဝဲပှၤဟးထီၣ်ဆိကွံၥ်လၢတၢ်ဆါဟံၣ်ကရၢၢ်ပူၤအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ပယီၤသုးကရူၢ်တ့ၢ်လီၤဝဲဒြိမ့ၣ်ပိၢ်အဃိ,လ့က့ၣ်ကိၥ်ဟီၣ်ကဝီၤအပူၤတကီၢ်ခါအံၤကမျၢၢ်လီၢ်ကဝီၤဖိတနီၤစိၥ်ကွံၥ်အတၢ်ဖိတၢ်လံၤတၢ်လၢအရ့ဒိၣ်စံၣ်ထီၣ်ကွံၥ်ဝဲဒၣ်တနီၤလံအိၣ်ဝဲအသိး,တနီၤတစံၣ်ထီၣ်ဒံးဝဲဒၣ်ဘၣ်အိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ. ဒ်န့ၣ်အသိး,တကီၢ်ခါခဲအံၤပယီၤသုးကရူၢ်သူဒြိတ့ၢ်လီၤမ့ၢ်ပိၢ်မၤဝဲတၢ်ထီၣ်ဒုးအါထီၣ်ဝဲအဖီခိၣ်,ရၤမတံကလံၤထံးဟီၣ်ကဝီၤတၢ်လီၢ်လၢအဂၤတဖၣ်အပူၤကၠိ,တၢ်ဆါဟံၣ်တဖၣ်တၢ်ပံးကွံၥ်ဝဲဒၣ်ဒီး,လီၢ်ကဝီၤကမျၢၢ်တဖၣ်စ့ၢ်ကီးဘၣ်အိၣ်ဝဲလၢတၢ်ပလီၢ်ပဒီသးဒီးတၢ်ပျံၤတၢ်ဖုးပူၤလီၤအဂ့ၢ်,သ့ၣ်ညါဘၣ်န့ၣ်လီၤ.
ကမျၢၢ်တၢ်ပၥ်သးအဖီခိၣ်ကပၣ်ဃုၥ်လၢတၢ်ဃုထၢဒ်ကြၢးဝဲဘၣ်ဝဲအသိးအဂ့ၢ် BGFစံးဝဲ
လါစဲးပထ့ဘၢၣ် ၅သီ, ၂၀၂၅နံၣ်, ခ့ၣ်အဲးစံၣ်, တနံၣ်အံၤ(၂၀၂၅)နံၣ်လၢၥ်လါဒံၣ်စဲဘၢၣ်အပူၤသုးကီၣ်ကးတီခိၣ်ရိၣ်မဲကမၤဝဲတၢ်ဃုထၢအဂီၢ်,ဒိးသန့ၤထီၣ်သးလၢကမျၢၢ်တၢ်ပၥ်သူၣ်ပၥ်သးအဖီခိၣ်ကပၣ်ဃုၥ်ပၣ်ဂီၢ်ဝဲဒ်အကြၢးဝဲဘၣ်ဝဲအသိးအဂ့ၢ်,သုးခိးကီၢ်ဆၢ(BGF)ခိၣ်နၢ်တဖၣ်စံးဝဲဒၣ်န့ၣ်လီၤ. တၢ်ဃုထၢအံၤတဘၣ်ထွဲဒီးသုးဂ့ၢ်ဝီဘၣ်အဃိကမျၢၢ်ပၣ်ဃုၥ်ပၣ်ဂီၢ်လၢတၢ်ထၢနုၥ်တၢ်ဖးမ့အိၣ်,ဒ်သိးတၢ်တြီမၤတံၥ်တၥ်သုတအိၣ်တဂ့ၤအဂီၢ်ကဟံးန့ၢ်ဝဲတၢ်ဘံၣ်တၢ်ဘၢအဂ့ၢ်,(BGF)သုးဟီၣ်ကဝီၤ(၂)အခိၣ်သုးခိၣ်ကျၢၢ်ဖိစီၤတ့ၤဝ့စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. “တၢ်ဃုထၢတခါအံၤန့ၣ်တဘၣ်ဃးဒီးသုးဂ့ၢ်ဝီဘၣ်အဃိန့ၣ်ပကွၢ်လၢကမျၢၢ်လီၤ.ကမျၢၢ်သးမ့ဆူၣ်လၢကထၢနုၥ်မဲခီပလဲၤတြီအီၤတသ့ဘၣ်,ကမျၢၢ်တၢ်ဘၣ်သးမ့အိၣ်လၢအကဆွံမဲမနုၤမတၤခီန့ၣ်ပဆိၣ်မိၣ်လၢဒ်သိးသုတကဲထီၣ်တၢ်တြီမၤတံၥ်တၥ်တအိၣ်တဂ့ၤအဂီၢ်အိၣ်ဒၣ်ပကကွၢ်ထွဲအဝဲသ့ၣ်လၢတၢ်ဘံၣ်တၢ်ဘၢတကပၤလီၤ.တၢ်ဃုထၢအံၤပကမၤသကိးတၢ်ဒီးသုးကီၣ်ကးလၢအဂၤလီၤဆီခီတအိၣ်ဘၣ်.နါက့တၢ်ဃုထၢအံၤတၢ်ကမၤအီၤဒၣ်လၢခူပူၤဝ့ၢ်ပူၤလၢသုးကီၣ်ကးဖီၣ်ဝဲတုၤတၢ်လီၢ်တၢ်ကျဲတဖၣ်န့ၣ်လီၤမ့မ့ၢ်လၢဖီၣ်ဝဲတတုၤတၢ်လီၢ်သ့ၣ်တဖၣ်ခီမၤဝဲတသ့ဘၣ်”အဂ့ၢ်စံးဝဲဒၣ်န့ၣ်လီၤ. သုးကီၣ်ကးအတၢ်ဃုထၢအံၤမ့ၢ်ဝဲတၢ်လၢအကဆှၢဝဲခါဆူညါထံရူၢ်ဒံၣ်မိၣ်ကရံၣ်စံၣ်သနူအဃိ,ကဒုးအိၣ်ထီၣ်ကမျၢၢ်တၢ်ဘံၣ်တၢ်ဘၢတၢ်မုၥ်တၢ်ခုၣ်တၢ်အိၣ်မူအိၣ်ဂဲၤအဂီၢ်နၢ်ပၢၢ်ဒီးတူၢ်လိၥ်ဝဲလၢအရ့ဒိၣ်ဝဲအဂ့ၢ်,သုးခိးကီၢ်ဆၢ(BGF)ထုးထီၣ်ပၥ်ဖျါဝဲလံၥ်တဘ့ၣ်ဖဲတနံၤအံၤလါစဲးပထ့ဘၢၣ်(၅)သီအနံၤန့ၣ်လီၤ. တကးဒံးဘၣ်,တၢ်ဃုထၢဘျီဝဲအံၤတနီၤဖးဝဲတၢ်အဒူၣ်အဆၢလၢထံရူၢ်ကီၢ်သဲးပၣ်တံၣ်တဖၣ်အဖီခိၣ်ဘၣ်ဒီးမ့မ့ၢ်တခီလၢတၢ်ထဲသိးတုၤသိးအပူၤကမၤစၢၤဝဲပှၤဟ့ၣ်တၢ်ဖး,မၤတၢ်ဃုထၢတဖၣ်လၢတၢ်ဒီသဒၢဝဲတၢ်ဘံၣ်တၢ်ဘၢအဂီၢ်အမဲၥ်ညါ,ဘၣ်ဃးဒီးတၢ်ဃုထၢအံၤ(BGF)ကရူၢ်ကရၢတူၢ်လိၥ်ဆီၣ်ထွဲဝဲလၢလၢပှဲၤပှဲၤအသိး,ဒ်သိးကမ့ၢ်ဝဲတၢ်ဃုထၢလၢပှၤကိးဂၤဒဲးပၣ်ဃုၥ်ပၣ်ဂီၢ်သ့ဝဲအဂီၢ်,ကဟံးဝဲတၢ်ဘံၣ်တၢ်ဘၢလၢကညီကီၢ်စဲၣ်ဟီၣ်ကဝီၤတဖၣ်အပူၤအဂ့ၢ်,ပၥ်ဖျါစ့ၢ်ကီးဝဲဒၣ်လၢလံၥ်ထုးထီၣ်ပၥ်ဖျါအပူၤန့ၣ်လီၤ. သုးကီၣ်ကးအံၤကမၤဝဲတၢ်ဃုထၢအဂီၢ်နီၤဖးလီၤဝဲအကူၥ်တဖၣ်အိၣ်ဝဲဒီးအဆိကတၢၢ်တၢ်ဃုထၢအကူၥ်(၁)အံၤကစးထီၣ်မၤဝဲဖဲ(၂၀၂၅)နံၣ်လါဒံၣ်စဲဘၢၣ်(၂၈)သီအနံၤအပူၤအဂ့ၢ်,ဘိးဘၣ်ရၤလီၤတ့ၢ်ဝဲဖဲအပူၤကွံၥ်လါအီကူၥ်(၁၈)သီအနံၤန့ၣ်လီၤ. ဒ်န့ၣ်အသိး,တၢ်ဘိးဘၣ်ရၤလီၤဝံၤအလီၢ်ခံစးထီၣ်မၤဝဲတၢ်မၤတၢ်ဟ့ၣ်တၢ်သ့ၣ်ညါနၢ်ပၢၢ်လၢအဘၣ်ဃးဒီး(တၢ်ဖးစဲးဖီကဟၣ်)(မြန်မာအီလက်ထရောနစ်မဲပေးစက်)(MEVM)တၢ်သ့တၢ်ဘၣ်လၢအတၢ်ပၢဟီၣ်ကဝီၤခူပူၤဝ့ၢ်ပူၤတဖၣ်အိၣ်ဝဲဒီး,အပူၤကွံၥ်လါအီကူၥ်(၂၆)သီအနံၤအပူၤစးထီၣ်မၤက့ၤဝဲလၢကညီကီၢ်စဲၣ်ဖၣ်အၣ်ကီၢ်ရ့ၣ်,ဖၣ်အၣ်ဝ့ၢ်ဟီၣ်ကဝီၤအပူၤတဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. တကတီၢ်ဃီ,သုးကီၣ်ကးအတၢ်ဃုထၢအံၤမ့ၢ်ဒၣ်တၢ်အ(ယီၤ)အဘျၣ်လၢတၢ်မၤထီထီၣ်မီၤစိရိၤအသးသမူထီရီၤအဂီၢ်,တၢ်ဟံးန့ၢ်ဆူၣ်တၢ်စိတၢ်ကမီၤအံၤကဖိးသဲစးအဂီၢ်ဒီး,တၢ်ကမၤမူထီၣ်က့ၤ(၂၀၀၈)တၢ်ဘျၢခိၣ်သ့ၣ်အဂီၢ်အဂ့ၢ်,(KNU)ခိၣ်နၢ်ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. လၢတၢ်န့ၣ်အဃိ,ဘၣ်ဃးဒီးသုးကီၣ်ကးအတၢ်ဃုထၢဘျီဝဲအံၤအဖီခိၣ်,ကညီဒီတကလုၥ်,ဖီၣ်စုကဝဲၤကရူၢ်ကရၢ,ကညီထံရူၢ်ကီၢ်သဲးကရၢ,ထံရူၢ်ကီၢ်သဲးပၣ်တံၣ်ခဲလၢၥ်ဒီးကမျၢၢ်ထံဖိကီၢ်ဖိသ့ၣ်တဖၣ်ကပၥ်ဝဲဒ်ဒီကလုၥ်မူဒါဒီးတဘၣ်ပၣ်ဃုၥ်ပၣ်ဂီၢ်ဘၣ်အမဲၥ်ညါကဘၣ်ပၣ်ဃုၥ်ဝဲလၢတၢ်ထီဒါတၢ်ဃုထၢတၢ်ရဲၣ်တၢ်ကျဲၤလၢတအိၣ်ဒီးတၢ်စုဆူၣ်ခီၣ်တကးအကျဲတဂ့ၤအဂ့ၢ်,(KNU)ဆီၣ်တခူဘိးဘၣ်ရၤလီၤတ့ၢ်ဝဲဖဲအပူၤကွံၥ်လါအီကူၥ်(၂၆)သီအနံၤအိၣ်ဝဲဒၣ်န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်တလါအတီၢ်ပူၤပယီၤသုးသူဒြိဒီးခးကျိဖးဒိၣ်(၁၂၀)ဘျီ,ကမျၢၢ်သံဘၣ်ဒိ(၈)ဂၤ
လါစဲးပထ့ဘၢၣ် ၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢချၢၣ်လွံၢ်ထူၣ်ကီၢ်ရ့ၣ်(သုးက့-၃)တၢ်ပၢဟီၣ်ကဝီၤအပူၤအပူၤကွံၥ်လါအီကူၥ်ဒီ တလါအတီၢ်ပူၤပယီၤသုးမီၤစိရိၤဟူးဂဲၤမၤဝဲတၢ်ဟးတ့ၢ်လီၤဒြိမ့ၣ်ပိၢ်ဒီးခးလီၤဝဲကျိဖးဒိၣ်ခဲလၢၥ်အိၣ်ဝဲအဘျီ(၁၂၀)ဒီးကမျၢၢ်သံဘၣ်ဒိခဲလၢၥ်အိၣ်ဝဲ(၈)ဂၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤ. စးထီၣ်လၢလါအီကူၥ်(၁)သီအနံၤတုၤလီၤလၢ(၃၁)သီအနံၤန့ၣ်ပယီၤသုးမီၤစိရိၤမၤဝဲကလံၤကျါတၢ်ဟူးတၢ်ဂဲၤလၢအမ့ၢ်ဒြိမ့ၢ်ဂ့ၤ,ကဘီယူၤမ့ၢ်ဂ့ၤ,ဒီးအိၣ်လၢအသုးကလၢၤအပူၤခးလီၤကျိဖးဒိၣ်မ့ၢ်ဂ့ၤတၢ်သ့ၣ်တဖၣ်အံၤအဃိကမျၢၢ်ဘၣ်သံကွံၥ်ဝဲ(၁)ဂၤဒီးဘၣ်ဒိဝဲ(၇)ဂၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်နဲၣ်ရွဲၣ်သဃဲၤပဒိၣ်စီၤနဲၤထူဘၠဲစံးဝဲဒ်အံၤန့ၣ်လီၤ. “မ့ၢ်ဘၣ်ကွၢ်လါအီကူၥ်ဒီတလါအတီၢ်ပူၤဒုၣ်ဒါတၢ်ဟူးတၢ်ဂဲၤလၢကဘီယူၤအိၣ်ဝဲ(၁)ဘျီ,တ့ၢ်လီၤဝဲကျိဖးဒိၣ်ချံ(၂)ဖျၢၣ်လီၤ. မ့မ့ၢ်လၢဒြိန့ၣ်ဟဲတ့ၢ်လီၤဝဲအဘျီ(၂၀),တ့ၢ်လီၤဝဲမ့ၣ်ပိၢ်(၃၄)ဖျၢၣ်န့ၣ်လီၤ. ဒီးခးလီၤဝဲကျိဖးဒိၣ်အိၣ်ဝဲအဘျီ(၁၀၀), ခးလီၤဝဲကျိဖးဒိၣ်ခဲလၢၥ်(၂၁၈)ဖျၢၣ်လီၤ. မ့ၢ်ကွၢ်က့ၤဖဲန့ၣ်ကမျၢၢ်သံ(၁)ဂၤ, ဘၣ်ဒိ(၇)ဂၤန့ၣ်လီၤ. ” အဂ့ၢ်န့ၣ်စံးဘၣ်ခ့ၣ် အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်မဲၥ်ညါဒ်ကီၢ်ရ့ၣ်တၢ်မၤနီၣ်မၤဃါပူၤအသိးန့ၣ်ဖဲလါအီကူၥ်အတီၢ်ပူၤပယီသုးမီၤစိရိၤဖီၣ်ဝဲကမျၢၢ်အိၣ်ဝဲလၢအဂၤ(၃၀)ဘျဲၣ်ဆူအဖီခိၣ်ဒီးမၤဒၢၣ်မၤဆါဝဲ, ဃ့အီၣ်ဝဲကျိၣ်စ့ဒီးဟံးန့ၢ်ကွံၥ်ဝဲကမျၢၢ်တၢ်ဖိတၢ်လံၤတကးဒံးဘၣ်ကမျၢၢ်လၢအ ဖီၣ်ဝဲသ့ၣ်တဖၣ်အကျါတနီၤပျၢ်လီၤက့ၤဝဲအသိးတနီၤတၢ်ဆဲးကျိးလီၤမၢ်ကွံၥ်အိၣ်ဝဲအဂ့ၢ်ပၥ်ဖျါဝဲဒၣ်န့ၣ်လီၤ. တကးဒံးဘၣ်လၢတလါအတီၢ်ပူၤခီဖျိလၢပယီၤသုးအဒြိ,ကျိဖးဒိၣ်ဒီးကလံၤကကျါကဘီယူၤအဃိချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤအပူၤတၢ်မၤလိတီၤဖုၣ်ကၠိ(၁)ဖျၢၣ်, သီခါဖၠၣ်တၢ်သူၣ်ထီၣ်(၃)ဖျၢၣ်ဃုၥ်ဒီးကမျၢၢ်ဟံၣ်(၁၁)ဖျၢၣ် သ့ၣ်တဖၣ် ဘၣ်ဟးဂီၤကွံၥ်စ့ၢ်ကီးဝဲဒၣ်န့ၣ်လီၤ. ဒ်န့ၣ်အသိးပယီၤသုးမီၤစိရိၤဟူးဂဲၤမၤဝဲတၢ်ခးလီၤကျိဖးဒိၣ်ဒီးကလံၤကျါတၢ်တ့ၢ်လီၤမ့ၣ်ပိၢ်သ့ၣ်တဖၣ်အံၤမ့ၢ်ဘၣ်ကွၢ်က့ၤဝဲလါအီကူၥ်တလါအံၤအတီၢ်ပူၤန့ၣ်မုၢ်နၤခီမ့ၢ်ဂ့ၤ,မုၢ်ဆါခီမ့ၢ်ဂ့ၤ,ကိးနံၤဒဲးဃၣ်ဃၣ်န့ၣ်ဟူးဂဲၤမၤဝဲဒၣ်ဒီးမ့ၢ်တတ့ၢ်လီၤမ့ၣ်ပိၢ်တတီၤ,တ့ၢ်လီၤတတီၤအဂ့ၢ်ကီၢ်ရ့ၣ်အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
သုးကီၣ်ကးတ့ၢ်လီၤကၤမံးကၤစံၣ်ဒြိ(၂)ဘ့ၣ်လၢကၠီးခဲးတၢ်ဆါဟံၣ်လီၢ်လံၤ
လါစဲးပထ့ဘၢၣ် ၄သီ, ၂၀၂၅နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,ရၤမတံဝ့ၢ်ကလံၤထံးဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)တၢ်ပၢဟီၣ်ကဝီၤကၠီးခဲးတၢ်ဆါဟံၣ်လီၢ်လံၤအပူၤသုးကီၣ်ကးကရူၢ်တ့ၢ်လီၤဝဲကၤမံးကၤစံၣ်ဒြိ(၂)ဘ့ၣ်ဖဲတနံၤအံၤလါစဲးပထ့ဘၢၣ်(၄)သီ(၈)နၣ်ရံၣ်အဆၢကတီၢ်အဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. သုးကီၣ်ကးအကၤမံးကၤစံၣ်ဒြိ(၂)ဘ့ၣ်လီၤတဲၥ်ပိၢ်ဖးထီၣ်ဝဲအဃိကၠီးခဲးတၢ်ဆါဟံၣ်လီၢ်လံၤတၢ်ခိၣ်ဒုး,တၢ်ဒူၣ်တဖၣ်ဟးဂီၤဝဲဒၣ်ဘၣ်ဆၣ်,ပှၤကညီတၢ်တၢ်ဘၣ်ဒိဘၣ်ထံးတအိၣ်ဝဲဘၣ်အဂ့ၢ်,(DKBA)သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤစွ့ၤဝၣ် စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. “တ့ၢ်လီၤဝဲ(၂)ဖျၢၣ်အဆိကတၢၢ်တဖျၢၣ်န့ၣ်သုးက့ခိၣ်စဲကၠီၣ်လၣ်လဲၤကွၢ်တဲဝဲလီၤတဲၥ်လၢကၠိဃၢၤမ့မ့ၢ်ခံဖျၢၣ်တဖျၢၣ်ဒုလီၤတဲၥ်တီတီတၢ်ဆါဟံၣ်ပူၤ,ဘၣ်တီတီတၢ်ဆါဟံၣ်လီၤ.နါက့ခီပှၤကညီတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်စံးဝဲဒၣ်န့ၣ်လီၤ. ကၠီးခဲးတၢ်ဆါဟံၣ်လီၢ်လံၤလၢကၤမံးကၤစံၣ်ဒြိလီၤတဲၥ်ဟီၣ်ကဝီၤအပူၤအံၤအိၣ်ဝဲဒီးဂံၢ်ခီၣ်ထံးတီၤဖုၣ်ကၠိတဖျၢၣ်န့ၣ်လီၤ.လၢတၢ်န့ၣ်အဃိသုးကီၣ်ကးတ့ၢ်လီၤဒြိမ့ၢ်ပိၢ်အဖီခိၣ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ဒြိလီၤတဲၥ်ဖဲကၠိကပၤန့ၣ်လီၤ.အကလုၢ်သီၣ်ဖးဒိၣ်ညါ,ကဘၣ်မ့ၢ်အဝဲသ့ၣ်အဲၣ်ဒိးမၤဝဲလၢကၠိလီၤ.အတၢ်တလိၤဘၣ်အဃိလီၤတဲၥ်က့ၤလၢတၢ်ဆါဟံၣ်လီၤ”အဂ့ၢ်စံးဝဲဒၣ်န့ၣ်လီၤ. သုးကီၣ်ကးမၤတၢ်တ့ၢ်လီၤဒြိဒ်အံၤအဃိ,ကၠီးခဲးလီၢ်ကဝီၤကမျၢၢ်တဖၣ်ဘၣ်အိၣ်ဝဲလၢတၢ်ပျံၤတၢ်ဖုးတၢ်လီၤဘၣ်ယိၣ်အပူၤအမဲၥ်ညါ,တၢ်ဘၣ်ပံးဃၥ်ဝဲကၠိသ့ၣ်တဖၣ်တစိၢ်တလီၢ်စ့ၢ်ကီးအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,တကီၢ်ခါခဲအံၤသုးကီၣ်ကးအံၤသူဒြိတ့ၢ်လီၤမ့ၢ်ပိၢ်မၤဝဲတၢ်ထီၣ်ဒုးအါထီၣ်ဝဲအဖီခိၣ်ရၤမတံကလံၤထံးဟီၣ်ကဝီၤတဖၣ်အပူၤတၢ်ပံးကွံၥ်ဝဲကၠိ,တၢ်ဆါဟံၣ်တဖၣ်အိၣ်ဝဲအဂ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. “ခဲအံၤပှၤပျံၤတၢ်ပှၤဘၣ်ယိၣ်တၢ်မီၤစးထီၣ်လၢလ့က့ၣ်ကိၥ်,မဲၢ်ဝါခံကၠိ,ဖလူကၠိဧါတၢ်ဆါဟံၣ်ဧါပှၤပံးကွံၥ်ခဲလၢၥ်လီၤ.တၢ်အိၣ်သးခဲအံၤတဲလီၤတံၢ်တသ့ဘၣ်မီၤ.မနၤကၢၥ်န့ၣ်ပနၢ်ဟူလၢနိၣ်ဖိ,တက့န့ၣ်ပယီၤတုၤထီၣ်လၢသီခါဖၠၣ်လံမီၤ.ပှၤဘၣ်ယိၣ်စ့ၢ်ကီးလၢမဲၢ်ကနဲတက့န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. တကတီၢ်ဃီ,အပူၤကွံၥ်လါစဲးပထ့ဘၢၣ်(၃)သီအနံၤအပူၤ,သုးကီၣ်ကးအံၤလဲၤတ့ၢ်လီၤဝဲကၤမံးကၤစံၣ်ဒြိလၢခ့ၣ်အဲၣ်ယူၣ်သုးက့(၇)တၢ်တြဲၢ်ကီၢ်ဆၣ်,နီၣ်တၢၢ်ခံသဝီတီၤခၢၣ်သးကၠိပူၤအိၣ်ဝဲအဃိ,ကမျၢၢ်လီၢ်ကဝီၤဖိတဖၣ်ဘၣ်အိၣ်ဝဲလၢတၢ်ပျံၤတၢ်ဖုးအပူၤဒီးနီၢ်တၢၤခံကၠိအမဲၥ်ညါဟီၣ်ကဝီၤအပူၤကၠိလၢအဂၤတဖၣ်စ့ၢ်ကီးတၢ်ဘၣ်ပတုၥ်ဃၥ်ဝဲတစိၢ်တလီၢ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
တၢ်လီၢ်လၢပယီၤသုးတ့ၢ်လီၤဒြိမ့ၣ်ပိၢ်ဖဲကၠဲးမယီအံၤတမ့ၢ်(DKBA)အတၢ်လီၢ်ဘၣ်အဂ့ၢ် DKBA ရှဲလဲ
လါစဲးပထ့ဘၢၣ် ၄သီ, ၂၀၂၅နံၣ်, ခ့ၣ်အဲးစံၣ်, မိၢ်ကီၢ်စဲၣ်,ကၠဲးမယီကီၢ်ဆၣ်(ကီးဒိကီးမနီ)ကျဲဖးဒ့တၢ်အိၣ်ခိးတြဲၤအပူၤ,တၢ်လီၢ်လၢပယီၤသုးတ့ၢ်လီၤဝဲကၤမံးကၤစံၣ်ဒြိမ့ၣ်ပိၢ်အံၤတမ့ၢ်(DKBA)အတၢ်လီၢ်တၢ်ကျဲဘၣ်အဂ့ၢ်,ဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. အပူၤကွံၥ်လါစဲးပထ့ဘၢၣ်(၂)သီအနံၤဟါခီအပူၤသုးကီၣ်ကးအံၤလဲၤတ့ၢ်လီၤဝဲဒြိမ့ၢ်ပိၢ်လၢကၠဲးမယီတၢ်အိၣ်ခိးတြဲၤအလီၢ်တကပၤအိၣ်ဝဲအဖီခိၣ်,တၢ်အိၣ်တြဲၤအလီၢ်အံၤမ့ၢ်ဝဲ(သုးခိၣ်အဲၣ်စ့ဝါ)အတၢ်ဘံၣ်တၢ်ဘၢတၢ်သမံသမိးတြဲၤအလီၢ်အဂ့ၢ်,တီနီၢ်မုၢ်နုၥ်(DKBA)သုးဟီၣ်ကဝီၤနီၢ်ဂံၢ်(၂)ဒုးယၤခိၣ်သုးခိၣ်ဒိၣ်စိ စီၤ A One စံးဝဲဒ်အံၤန့ၣ်လီၤ. “တၢ်တခါန့ၣ်တမ့ၢ်ပ(DKBA)တြဲၤဘၣ်.မ့ၢ်ဒၣ်သုးခိၣ်အဲၣ်စ့ဝါအတၢ်သမံသမိးတၢ်ဘံၣ်တၢ်ဘၢတြဲၤလီၤ.ကျဲတဘိန့ၣ်တဘၣ်ဃး(DKBA)ဘၣ်.ဘၣ်ဃးဝဲဒၣ်လၢ(သုးခိၣ်အဲၣ်စ့ဝါ)အသုးကျိၤတၢ်ဘံၣ်တၢ်ဘၢတြဲၤတၢ်သမံသမိးလီၢ်လၢတၢ်ကဟးထီၣ်လၢကၠဲးမယီခိၣ်ထိးလီၤ”အဂ့ၢ်စံးဝဲဒၣ်န့ၣ်လီၤ. ကၠဲးမယီတၢ်သမံသမိးတြဲၤအပူၤတၢ်လဲၤတ့ၢ်လီၤဝဲဒြိ(၄)ဘ့ၣ်အဃိ,ဘၣ်ဝဲဃိၣ်သၢဖျၢၣ်(ကၠဲၤတခိ)သိလ့ၣ်လၢတီဆှၢဝဲကမျၢၢ်ပှၤဟးထီၣ်က့ၤလီၤတခိၣ်အဂ့ၢ်,သ့ၣ်ညါဘၣ်န့ၣ်လီၤ. ဒီးသိလ့ၣ်အံၤအပူၤကမျၢၢ်လီၢ်ကဝီၤဖိပၣ်ဝဲ(၁၁)ဂၤအကျါဘၣ်ဒိဘၣ်ထံးဝဲ(၆)ဂၤအမဲၥ်ညါ,ပိၥ်မုၣ်မိၢ်ဒၢဒီးပိၥ်ခွါတဖၣ်ဘၣ်သံဝဲအဂ့ၢ်,သ့ၣ်ညါဘၣ်စ့ၢ်ကီးန့ၣ်လီၤ. တကတီၢ်ဃီ,မ့ၢ်ပိၢ်လီၤတဲၥ်ဟီၣ်ကဝီၤအပူၤဘၣ်ဟးဂီၤဝဲဟံၣ်သိလ့ၣ်ဒီးသိလ့ၣ်ယီၢ်တဖၣ်အသိး,မ့မ့ၢ်တၢ်ပၢၢ်ဆၢသုးပၥ်ဖှိၣ်ပှၤအိၣ်ခိးတြဲၤတဖၣ်တခီခီဖျိပလဲၥ်သးချူးဆၢချူးကတီၢ်အဃိတၢ်ဘၣ်ဒိဘၣ်ထံးတအိၣ်ဝဲဘၣ်အဂ့ၢ်,မိၢ်ကီၢ်စဲၣ်ဂံၢ်ခီၣ်ထံးတၢ်ကစီၣ်သန့တဖၣ်ပၥ်ဖျါစ့ၢ်ကီးဝဲဒၣ်န့ၣ်လီၤ. ဒ်န့ၣ်အသိး,ကၠဲးမယီ,ခၠီနခွးတၢ်လီၢ်တဖၣ်အံၤအပူၤကွံၥ်(၂၀၂၃)နံၣ်အပူၤ တၢ်ဒုးကဲထီၣ်အဆၢကတီၢ်တၢ်ဖ့ၣ်ဆၢအိၣ်ဝဲလၢခံခီခံကပၤဒီး,သုးကီၣ်ကးခးလီၤဝဲတၢ်အဖီခိၣ်ဘၣ်ဒိဘၣ်ထံးဝဲကမျၢၢ်အိၣ်ဝဲဒၣ်န့ၣ်လီၤ. လၢတၢ်န့ၣ်အဃိဒ်သိးကပူၤဖျဲးဒီးတၢ်ဘၣ်ဒိဘၣ်ထံးအဂီၢ်တၢ်ပၢၢ်ဆၢသုးပၥ်ဖှိၣ်ထုးထီၣ်လံၥ်ဟ့ၣ်ပလီၢ်ဝဲလၢကၠဲးမယီ,မူၣ်ဒိၤကျဲဒီတကျိၤအပူၤတၢ်လိၣ်မ့တအိၣ်တၢ်တဘၣ်ဟးထီၣ်က့ၤလီၤဝဲဒၣ်ဘၣ်ဒီးတၢ်ဟးထီၣ်က့ၤလီၤအဆၢကတီၢ်ဒၣ်လဲၥ်တၢ်ဟ့ၣ်ပလီၢ်အိၣ်တပယူၥ်ဃီအဂ့ၢ်,သ့ၣ်ညါဘၣ်န့ၣ်လီၤ.
ကရ့ၣ်နံၣ်ကီၢ်စဲၣ် ၈ လါအတီၢ်ပူၤ ကဘီယူၤဒီးကျိဖးဒိၣ်အဃိ ကမျၢၢ်သံ ၁၀၆ ဂၤ
လါစဲးပထ့ဘၢၣ် ၄ သီ, ၂၀၂၅ နံၣ်, ခ့ၣ်အဲးစံၣ် ကရ့ၣ်နံၣ်ကီၢ်စဲၣ်ဒီးကယါဟီၣ်ကဝီၤအပူၤ ခီဖျိလၢသုးမီၤစိရိၤအကဘီယူၤဒီးကျိဖးဒိၣ်အံၤအဃိ တနံၣ်အံၤလါယူနူၤအါရံၤတုၤလါအီကူး လၢ(၈)လါ အတီၢ်ပူၤ ကမျၢၢ်သံပၥ်ဖှိၣ်အိၣ်ဝဲ(၁၀၆)ဂၤအဂ့ၢ်န့ၣ် Progressive Karenni People Force-PKPF ထုးထီၣ်ပၥ်ဖျါဝဲ အသိး သ့ၣ်ညါဘၣ်န့ၣ်လီၤ. လံၥ်(PKPF)လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် လၢတၢ်(၈)လါအတီၢ်ပူၤအံၤ ပယီၤသုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ်အိၣ်ဝဲ (၃၂၀)ဘျီဒီး လၢကရ့ၣ်နံၣ် ဖါဆီ,ဒံၤမီၣ်စိၤ,ဖရူၤစိၤဟီၣ်ကဝီၤတဖၣ်အပူၤန့ၣ် တၢ်ဒုးကဲထီၣ်ဝဲ(၁၃၄)ဘျီအဂ့ၢ်န့ၣ် စံးဝဲန့ၣ်လီၤ. တကးဒံးဘၣ်ဖဲတလါအံၤထီၣ်လါစဲးပထ့ဘၢၣ် ၁ သီအနံၤန့ၣ်စ့ၢ်ကီး သုးမီၤစိရိၤအကဘီယူၤလဲၤတ့ၢ်လီၤကဒီးဝဲမ့ၣ်ပိၢ်အဂ့ၢ်န့ၣ် ပှၤလၢအမၤစၢၤ ပှၤဃ့ၢ်မှံဟးဖျိးတဂၤ စံးဝဲန့ၣ်လီၤ. အဝဲစံးဝဲလၢ“ဖဲလါထီၣ် ၁ သီ ဂီၤခီ ၈ နၣ်ရံၣ်ဘျဲၣ်အခါန့ၣ် သုးမိၤစိရိၤ(Jet Fighter)ကဘီယူၤလဲၤတ့ၢ်လီၤမ့ၣ်ပိၢ်လၢဒံၤမီၣ်စိၤ တကပၤန့ၣ်. ကသ့ၣ်ညါဘၣ်လၢကမျၢၢ်ပှၤလီၢ်အိၣ်ကဒုဖိပိၥ်မုၣ်ဘၣ်ဒိတဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါဖဲအပူၤကွံၥ်လါအီကူးအတီၢ်ပူၤန့ၣ်စ့ၢ်ကီး လၢမီၤခၠံ(မော်ချီး)ဟီၣ်ကဝီၤအပူၤ ခီဖျိပယီၤသုးကဘီယူၤ လဲၤတ့ၢ်လီၤ မ့ၣ်ပိၢ်အဃိ လီၢ်ကဝီမကမျၢၢ်သံတစှၤန့ၢ်အဂၤ(၃၀)ကဲထီၣ်ဒံးဝဲဒီး ဒ်န့ၣ်အသိးတၢ်ဆါဟံၣ်ဃုၥ်ဒီးဟံၣ်တၢ်သူၣ်ထီၣ်တဖၣ် ဟးဂီၤလီၤပှီၢ် ဝဲအါမးဒံးန့ၣ်လီၤ. ဒ်န့ၣ်အသိးလၢ(၈)လါအတီၢ်ပူၤအံၤ ခီဖျိလၢကဘီယူၤ,ပယီၤသုးခးလီၤကျိဖးဒိၣ်,သူဝဲဒြိအံၤအဃိ လီၢ်ကဝီၤကမျၢၢ်အဟံၣ်(၃၂၄)ဖျၢၣ်, တၢ်ဆါဟံၣ်(၃)ဖျၢၣ်,ကၠိ(၄)ဖျၢၣ်,တၢ်ဘူၣ်တၢ်ဘါတၢ်သူၣ်ထီၣ်(၄)ဖျၢၣ်ဟးဂီၤဝဲအဂ့ၢ်န့ၣ် Progressive Karenni People Force-PKPF လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ. တကီၢ်ခါခဲအံၤလၢကရ့ၣ်နံၣ်ကီၢ်စဲၣ် ဒံၤမီၣ်စိၤ(ဒီးမော့ဆို)ဒီးဖရူၤစိၤ(ဖရူဆို)ကီၢ်ဆၣ်သ့ၣ်တဖၣ်အပူၤန့ၣ်...
(သုးက့-၃)တၢ်ဒုးကဲထီၣ်ဒီးပယီၤသုးလၢဟဲထီၣ်တဖၣ်,ပယီၤသုးသံ(၆)ဂၤအကျါပၣ်ဃုၥ်သုးရ့ၣ်ခိၣ်ခံ
လါစဲးပထ့ဘၢၣ် ၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်(သုးက့-၃), မူကီၢ်ဆၣ်ဟီၣ်ကဝီၤအပူၤ ပယီၤသုးကျိၤလၢဟဲထီၣ်သ့ၣ်တဖၣ်အံၤခီဖျိ တၢ်ဒုးကဲထီၣ်ဝဲဒၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၈)ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်အဃိပယီၤသုးတကပၤသံ(၆)ဂၤအကျါပၣ်ဃုၥ်သုးရ့ၣ်ခိၣ်ခံတဂၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ. ဖဲလါစဲးပထ့ဘၢၣ်(၂)သီအနံၤန့ၣ်ပယီၤသုးကျိၤလၢဟဲထီၣ်ဝဲဒၣ်ဖဲ လဲၣ်ပးသဝီ ဒီးပယီၤမၠဲးယ့သဝီအဘၢၣ်စၢၤသ့ၣ်တ ဖၣ်တၢ်ဒုးကဲထီၣ်ဝဲဒၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဃိပယီၤသုးသံ(၆)ဂၤအကျါပၣ်ဃုၥ်သုးရ့ၣ်ခိၣ်ခံတဂၤ,သုးဒ့ခိၣ်တဂၤအသိးဘၣ်ဒိစ့ၢ်ကီးဝဲ(၁၆)ဂၤအဂ့ၢ်ကီၢ်ရ့ၣ်ပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ. လၢန့ၣ်အမဲၥ်ညါပယီၤသုးကျိၤအံၤဂုၤလီၤက့ၤဝဲအခံဒီးတၢ်လဲၤမၤန့ၢ်အဝဲသ့ၣ် MA1 ကျိ (5) ခိၣ်, MA3 ကျိ (၂) ခိၣ်, RPG (၁) ခိၣ် ဃုၥ်ဒီးအချံ(၃)ဖျၢၣ်, 60MM အချံ (၁) ဖျၢၣ်, ဒီးသုးတၢ်ဖိတၢ်လံၤတနီၤအဂ့ၢ်ဒ်ကီၢ်ရ့ၣ်အပှၤဘၣ်မူဘၣ် ဒါတၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. ဒ်န့ၣ်အသိးဒ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဝဲအသိးန့ၣ်တကီၢ်ခါခဲအံၤလၢလၢၢ်ဒိၣ်ကီၢ်ဆၣ်ဟီၣ်ကဝီၤအပူၤပယီၤသုးမီၤစိရိၤတၢ်ဟူးတၢ်ဂဲၤလၢခီၣ်တကပၤတအိၣ်ဒံးဘၣ်ဘၣ်ဆၣ်မ့မ့ၢ်လၢဒြိတၢ်ဟူးတၢ်ဂဲၤတကပၤအါထီၣ်ဝဲဒၣ်အဂ့ၢ်န့ၣ်စံးဝဲဒ်အံၤန့ၣ်လီၤ. “မ့ၢ်မ့ၢ်လၢလၢၢ်ဒိၣ်ကီၢ်ဆၣ်ဟီၣ်ကဝီၤတကပၤန့ၣ်ပယီၤသုးကမၤဝဲတၢ်ဟူးတၢ်ဂဲၤဒိၣ်ဒိၣ်မုၢ်မုၢ်တအိၣ်ဒံးဘၣ်. အဝဲသ့ၣ်အဂံၢ်အဘါစ့ၢ်ကီးကတဲလၢအါထီၣ်န့ၣ်တဲတသ့ဘၣ်. အခဲအံၤန့ၣ်ထိၣ်ဂၢၢ်ဒံးဝဲအသးလီၤ. မ့ၢ်ဘၣ် တၢ်ဟူးတၢ်ဂဲၤလၢဒြိတကပၤန့ၣ်ဟဲအါထီၣ်ဝဲဒၣ်န့ၣ်လီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. မ့ၢ်ဘၣ်ကွၢ်က့ၤဝဲဖဲချၢၣ်လွံၢ်ထူၣ်ကီၢ်ရ့ၣ်,မူကီၢ်ဆၣ်ကဝီၤအပူၤဖဲလါအီကူၥ်(၃၁)သီအနံၤန့ၣ်ပယီၤသုးမီၤစိရိ(ခမရ- ရွ့ၣ်ဝၣ်သုးရ့ၣ်)အံၤခးလီၤဝဲဟၣ်ဝ့ၤစၢ်(ကျိဖးဒိၣ်)ဆူ(ယ့ၤလဲ)သဝီပူၤဒီးသဝီခိၣ်ဃၢၤအဃိကမျၢၢ်ဘၣ် ဒိဝဲ(၇)ဂၤဒီးပှၤလၢဘၣ်ဒိအါဒၣ်တက့ၢ်မ့ၢ်ဝဲပှၤသးပှၢ်လၢအသးနံၣ်အိၣ်အနံၣ်(၄၀)ဘျဲၣ်ဆူအဖီခိၣ်သ့ၣ်တဖၣ်န့ၣ်လီၤ. ဖဲတနံၤဃီဃီလၢလၢၢ်ဒိၣ်ကီၢ်ဆၣ်ဟီၣ်ကဝီၤအပူၤစ့ၢ်ကီးန့ၣ်သုးမီၤစိရိၤအသုးလၢအမ့ၢ်(ခလရ-၂၆၄)လၢအ အိၣ်ဖဲ(ကၠီၣ်တကါ)သ့ၣ်တဖၣ်လဲၤတ့ၢ်လီၤဝဲဒြိမ့ၣ်ပိၢ်လၢ(ကၠ့ကွ့)သဝီပူၤအဃိဘၣ်ဟးဂီၤကွ့ၥ်ဝဲကမျၢၢ်ဟံၣ် (၃)ဖျၢၣ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်ထုးထီၣ်ပၥ်ဖျါဝဲဖဲလါစဲးပထ့ဘၢၣ်(၃)သီမဟါအနံၤန့ၣ်လီၤ.
တီနီၢ်ကစၢၢ်ကျဲလီၢ်လံၤ ယီၢ်ကုးတၢ်ဒုး ပယီၤသုးတၢ်ဘၣ်ဒိးဘၣ်ထံးအါဒီး သုးကျိၤလီၤပြံပြါ
လါစဲးပထ့ဘၢၣ် ၄သီ, ၂၀၂၅နံၣ်, ခ့ၣ်အဲးစံၣ်. ရၤမတံ-ကီးတရံး တီနီၢ်ကစၢၢ်ကျဲလီၢ်လံၤ ယီၢ်ကုးသဝီဃၢၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကမျၢၢ်တၢ်ဒီသဒၢသုး(PDF)သ့ၣ်တဖၣ်ခိးခးဝဲဒၣ် ပယီၤသုးအသုးကျိၤလၢအဟဲထီၣ်သ့ၣ်တဖၣ်အဃိ ပယီၤသုးတၢ်ဘၣ်ဒိဘၣ်ထံးအါဒီးသုးကျိၤလီၤပြံလီၤပြါဝဲဒၣ်အဂ့ၢ် သ့ၣ်ညါဘၣ်လၢ ပှၤဟ့ၣ်ဂံၢ်ခီၣ်ထံးတၢ်ကစီၣ် အအိၣ်န့ၣ်လီၤ. ပယီၤသုးကရူၢ်အပှၤသ့ၣ်တဖၣ်အံၤ စးထီၣ်လၢလါစဲးပထ့ဘၢၣ် ၁သီနံၤအခါလံၤလံၤ ဟဲထီၣ်ဝဲဒၣ် ကီးတရံး-ရၤမတံကျဲလီၢ်လံၤ သုးကျိၤ(၃)ဘိ,ခးဃုၥ်ဝဲဒီးကျိဖးဒိၣ် ဒီး တၢ်ပၢၢ်ဆၢသုးပၥ်ဖှိၣ်ခိးခးအဝဲသ့ၣ်ဖဲ ယီၢ်ကုး,လဲၤစ့,မံၣ်ကၠီအ့ သဝီသ့ၣ်တဖၣ်အဃၢၤအဂ့ၢ် သ့ၣ်ညါဘၣ်လၢလီၢ်ကဝီၤတၢ်ပၢၢ်ဆၢသုးပၥ်ဖှိၣ်အပှၤဘၣ်မူဘၣ်ဒါအအိၣ်န့ၣ်လီၤ. ဘၣ်ဃးဒီးတကီၢ်ခါခဲအံၤပယီၤသုးတၢ်ဟူးတၢ်ဂဲၤဒီးတၢ်ဒုးတၢ်ယၤတၢ်အိၣ်သးန့ၣ် တၢ်ပၢၢ်ဆၢသုးပၥ်ဖှိၣ်ဘီၣ်သိၣ်ဝါသုးကျိၤခိၣ် သုးခိၣ်စီၤကၠီၤသဲၣ်စံးဝဲလၢ“တၢ်ဒုးန့ၣ်ကဲထီၣ်ကိးမုၢ်နံၤဒဲးလီၤ.တၢ်အိၣ်သးဂ့ၤဒံးလီၤ.ဒုၣ်ဒါန့ၣ်ဟဲထီၣ်တဘျုးကျိၤန့ၣ်လီၤ.ဟဲထီၣ်တၢ်လီၢ်ကိးတီၤဒဲးလီၤ. ကျဲမုၢ်သီ,ကျဲမုၢ်လီၢ်လံၤ တၢ်လီၢ်ကိးတီၤဒဲးန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ဖဲတနံၤအံၤလါစဲးပထ့ဘၢၣ်(၃) ပယီၤသုးကျိၤလၢက့ၤဂုၤလီၤက့ၤအခံလၢယီၢ်ကုးသဝီသ့ၣ်တဖၣ်န့ၣ် လၢကဟဲထီၣ်ဟူးဂဲၤလၢအသီတဘျီကဒီးအဂီၢ်အိၣ်ကတဲၤကတီၤထီၣ်ပၥ်သးအသိး လၢ(လဲၣ်ဝၣ်)ကျိဖးဒိၣ်လူၢ်စ့ၢ်ကီးခးလီၤစၢၤအဝဲသ့ၣ်ဒီးကျိဖးဒိၣ်ဖဲ ယီၢ်ကုးဒီးလဲၤစ့ သဝီသ့ၣ်တဖၣ်အိၣ်အိၣ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ. စးထီၣ်လၢလါစဲးပထ့ဘၢၣ်(၁)အနံၤအခါလံၤလံၤ ပယီၤသုးပၢဆှၢသုးဂ့ၢ်ဝီဝဲၤလီၢ်ခိၣ်သ့ၣ် (ကစခ-၁၂)ရဲၣ်ကျဲၤဝဲဒီး စးထီၣ်ဟဲထီၣ်ဝဲဒၣ်လၢ အ့ရှၣ်ကျဲမုၢ်သီ, တီနီၢ်ကစၢၢ်ကျဲလီၢ်လံၤဒီးလၢနိၣ်ဖိထံမူထၣ်တကပၤစ့ၢ်ကီးဟဲထီၣ်ဝဲဒီးခီၣ်ပှၤကညီနီၣ်ဂံၢ်(၅၀၀)ဘျဲၣ်ဒီး ခးလီၤဝဲဒၣ်ကျိဖးဒိၣ်(၁၂၀ MM)အသိး ခးဃုၥ်ဝဲဒီး မံၣ်စဲ(Missile) ကျိဖးဒိၣ်သ့ၣ်တဖၣ်အိၣ်ဝဲတယူၥ်ဃီဆူဒူသဝီဟီၣ်ကဝီၤသ့ၣ်တဖၣ်အိၣ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ.
တၢ်ဒုးကဲထီၣ်ဒီး KNLA ဒုးယၤဟီၣ်ကဝီၤဒိၣ်နီၣ်ဂံၢ်(၂)ဖီၣ်မူဒံးန့ၢ်ပယီၤသုး(၄)ဂၤ
လါစဲးပထ့ဘၢၣ် ၄သီ, ၂၀၂၅နံၣ်, ခ့ၣ်အဲးစံၣ်. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ KNLAဒုးယၤဟီၣ်ကဝီၤဒိၣ်နီၣ်ဂံၢ်(၂)ဟီၣ်ကဝီၤ ဝၣ်ကူၢ်ဒီးကၠီၣ်တမဲတီၣ် ဟီၣ်ကဝီၤ ဖဲတနံၤဂီၤ လါစဲးပထ့ဘၢၣ်(၂)သီအနံၤန့ၣ် ခီဖျိတၢ်ဒုးကဲထီၣ်ဝဲလၢ KNLA ဒုးယၤဟီၣ်ကဝီၤဒိၣ် နီၣ်ဂံၢ်(၂)ဒီးပယီၤသုးမီၤစရိၤအပှၤအဘၢၣ်စၢၤအဃိ KNLA ဒုးယၤဟီၣ်ကဝီၤဒိၣ် နီၣ်ဂံၢ်(၂)ဖီၣ်မူဒံးန့ၢ်ဝဲဒၣ်ပယီၤသုး(၄)ဂၤဃုၥ်ဒီးတၢ်စုကဝဲၤအဂ့ၢ် သ့ၣ်ညါဘၣ်လၢ KNLA ဒုးယၤဟီၣ်ကဝီၤဒိၣ် နီၣ်ဂံၢ်(၂) အပှၤဘၣ်မူဘၣ်ဒါအအိၣ်န့ၣ်လီၤ. ပယီၤသုးကျိၤဝဲအံၤန့ၣ် အိၣ်ဝဲဒၣ်လၢ ဝၣ်ကူၢ်ဒ်သိးကလဲၤထီၣ်ဝဲဆူဝ့ၢ်တၢ်အဲၣ်အဂီၢ်ဒီး ဖဲတုၤဝဲဖဲ ဝၣ်ကူၢ်ဒီး ကၠီၣ်မဲတီၣ်အဘၢၣ်စၢၤအဆၢကတီၢ် တၢ်ခိးအဝဲသ့ၣ်ဒီးဒြိ ဒီးစုဘျၢ အဃိပယီၤသုးသ့ၣ်တဖၣ်စံၣ်မုၢ်ြပံပြါဒီးဘၣ်တၢ်ဖီၣ်န့ၢ်အီၤဒ်အံၤလီၤအဂ့ၢ် KNLAဒုးယၤဟီၣ်ကဝီၤဒိၣ်နီၣ်ဂံၢ်(၂)အပူၤ သုးရ့ၣ်အကျါတဘ့ၣ်လၢအမ့ၢ် သုးရ့ၣ်(၂၇)ခိၣ် သုးခိၣ်ဒိၣ်ဂီၢ်ဂ့ၢ်စီၤမူဂ့ၤ စံးဘၣ်ဝဲဒၣ် ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ပဖီၣ်န့ၢ်ပယီၤသုးန့ၣ်(၄)ဂၤ.အသုးကျိၤန့ၣ်အိၣ်လၢဝၣ်ကူၢ် ကဟဲထီၣ်လၢကၠီၣ်မဲတီၣ်ဒီးဆူဝ့ၢ်တၢ်အဲၣ်န့ၣ်လီၤ.တၢ်ဒုးကဲထီၣ်,ပလဲၤတ့ၢ်လီၤအဝဲသ့ၣ်ဒီးဒြိ,ခးအီၤဒီးစုဘျၢအဃိပယီၤသုးန့ၣ်လီၤပြံလီၤပြါဒီးဘၣ်တၢ်ဖီၣ်မူဒံးန့ၢ်အီၤဒ်အံၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. တကတီၢ်ဃီ ပယီၤသုးလၢတၢ်ဖီၣ်မူဒံးန့ၢ်အီၤသ့ၣ်တဖၣ်အံၤန့ၣ် ဒ်တၢ်ကရၢကရိပၥ်လီၤဝဲတၢ်သိၣ်တၢ်သီတၢ်ဘျၢအိၣ်ဝဲအသိးန့ၣ် ပကဘၣ်ဆှၢထီၣ်အီၤဆူတၢ်ဖီခိၣ်တဆီဘၣ်တဆီအဂ့ၢ် သုးခိၣ်ဒိၣ်ဂီၢ်ဂ့ၢ်စီၤမူဂ့ၤတဲအါထီၣ်ဝဲဒၣ်စ့ၢ်ကီးန့ၣ်လီၤ. ပယီၤသုးလၢတၢ်ဖီၣ်မူဒံးန့ၢ်အီၤ(၄)ဂၤအံၤန့ၣ် တၢ်မၤန့ၢ်ဃုၥ်ဝဲဒီးတၢ်စုကဝဲၤဒ်အမ့ၢ် ကျိ MA-1(၄)ခိၣ်, ကျိဆၣ်ဒၢ(၈)ဘ့ၣ်ဒီးအချံ(၆၀၀)ဃၣ်ဃၣ်အဂ့ၢ် သ့ၣ်ညါဘၣ်လၢ (KNLA) အပှၤဘၣ်မူဘၣ်ဒါအအိၣ်န့ၣ်လီၤ. လၢန့ၣ်အမဲၥ်ညါ ဒ်သုးက့(၆)အ့ရှၢၣ်ကျဲမုၢ်ပယီၤသုးမၤဆူၣ်ထီၣ်ဝဲဒၣ်တၢ်ထီၣ်ဒုးအသိးန့ၣ် လၢသုးက့(၄)ကီၢ်ဆၢဖှိၣ် နီၣ်ဂံၢ်(၈)ကျဲမုၢ် မလွဲတီၣ်တကပၤန့ၣ်ပယီၤသုးဟဲမၤအါထီၣ်သုးကျိၤတဘိဒီးလၢ ဝ့ၢ်တၢ်အဲၣ် ဆူ ထံခံတကပၤန့ၣ် တကီၢ်ခါခဲအံၤန့ၣ် ပယီၤသုးကျိၤဟဲထီၣ်ဝဲဒၣ်သုးကျိၤ(၃)ဘိအဂ့ၢ်KNLA ပှၤဘၣ်မူဘၣ်ဒါစံးဝဲဒၣ်န့ၣ်လီၤ. KNLAဒုးယၤဟီၣ်ကဝီၤဒိၣ်နီၣ်ဂံၢ်(၂)အံၤန့ၣ် ပၣ်ဃုၥ်ဝဲဒၣ် KNLA...
DKBAစံၣ်ညီၣ်ပှၤတီခိၣ်ရိၣ်မဲတၢ်ဖီၣ်ကမဲ အခိၣ်လၢ တၢ်မၤဃၢဒီးလီၤဃိၥ်ပူၤ
လါစဲးပထ့ဘၢၣ် ၉သီ, ၂၀၂၅နံၣ်, ခ့ၣ်အဲးစံၣ်, ကညီကီၢ်စဲၣ်ရၤမတံဝ့ၢ်ပူၤ,အပူၤကွံၥ်လါယူၤအပူၤ,တၢ်ဖီၣ်ကမဲဝဲဝ့ၢ်လီၢ်ကဝီၤကမျၢၢ်ပှၤမၤအီၣ်မုၢ်ကျိၤဝဲၤကွၥ်တၢ်မၤအခိၣ်တဂၤကဲထီၣ်တ့ၢ်ဝဲအသးအဖီခိၣ်,ပှၤတီခိၣ်ရိၣ်မဲတၢ်ဖီၣ်ကမဲတၢ်ကရူၢ်ကရၢအခိၣ်အံၤ,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ဖီၣ်ချူးက့ၤဝဲဒီးစံၣ်ညီၣ်ဝဲလၢတၢ်မၤဃၢဒီးကလီၤဘၣ်ဃိၥ်ပူၤအဂ့ၢ်,(DKBA)ထုးထီၣ်ပၥ်ဖျါဝဲဒၣ်ဖဲမဟါလါစဲးပထ့ဘၢၣ်(၂)သီအနံၤန့ၣ်လီၤ. ပှၤတီခိၣ်ရိၣ်မဲတၢ်ဖီၣ်ကမဲမုၢ်ကျိၤဝဲၤကွၥ်တၢ်မၤအခိၣ်(ယဲၣ်ထဲၣ်)ကိး(ကိၤကိၤယဲမၠ့ၣ်)အံၤ,မ့ၢ်(DKBA)လီၢ်ခၢၣ်သးဝဲၤကျိၤတၢ်ကူၣ်လဲၤမၤကၤဘၣ်ထွဲအကျါတဂၤဒီး,ခီဖျိတလူၤပိၥ်ထွဲဝဲကရူၢ်ကရၢတၢ်သိၣ်တၢ်သီဒီးမၤကမၣ်ဝဲတၢ်အဃိ,တၢ်လူၤဖီၣ်ဒီးစံၣ်ညီၣ်ဝဲအီၤအဂ့ၢ်,(DKBA)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဘၣ်ဃးဒီးစံၣ်ညီၣ်ဝဲ(ယဲၣ်ထဲၣ်)ကိး(ကိၤကိၤယဲမၠ့ၣ်)အဂ့ၢ်အကျိၤလၢပှဲၤန့ၣ်,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)လီၢ်ခၢၣ်သးသုးဂ့ၢ်ဝီဝဲၤကျိၤ,အဝဲၤကျိၤခိၣ်(သုးခိၣ်ဒိၣ်ဂီၢ်ဂ့ၢ်)စီၤဖါဘျဲၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. “ပှၤတဂၤအံၤန့ၣ်အနီၢ်ကစၢ်ဒၣ်ဝဲအဝဲၤကျိၤဝဲၤဒ့လၢဝ့ၢ်ပူၤအပှၤဒၣ်ဝဲဖီၣ်ချူးက့ၤအီၤန့ၢ်လီၤ.ပှၤဖီၣ်ချူးဝံၤအလီၢ်ခံတၢ်ဆှၢထီၣ်အီၤဆူပလီၢ်ခၢၣ်သး,ဒီးလီၢ်ခၢၣ်သးခိၣ်နၢ်တခီနဲၣ်လီၤက့ၤဝဲလၢတၢ်ကဟံးထီၣ်အရ့မီၤနီၤ.ဒ်န့ၣ်အသိးခိၣ်နၢ်တဖၣ်နါက့ထံၣ်လိၥ်အိၣ်ဖှိၣ်သးဒီးလီၢ်ခၢၣ်သးကမံးတံၥ်ဝံၤမးဆၢတဲၥ်က့ၤဝဲဒၣ်လၢတၢ်ကဟံးထီၣ်အရ့လၢ,တၢ်မၤဃၢဒီးဃိၣ်န့ၣ်(၁)နံၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,(ယဲထဲၣ်)ကိး(ကိၤကိၤယဲမၠ့ၣ်)အံၤတၢ်မၤဃၢဒီးဃိၥ်တနံၣ်ပှဲၤထီၣ်အလီၢ်ခံဆဲးအိၣ်ဝဲလၢ(DKBA)ကရူၢ်ကရၢပူၤသ့တသ့တၢ်ကဘၣ်ကွၢ်ထံဆိမိၣ်ဆၢတဲၥ်ဝဲအဂ့ၢ်,အဝဲစံးအါထီၣ်ဝဲဒၣ်စ့ၢ်ကီးန့ၣ်လီၤ. (ယဲထဲၣ်)ကိး(ကိၤကိၤယဲမၠ့ၣ်)အံၤဖီၣ်ကမဲဂုၤန့ၢ်ဆူၣ်ဝဲတၢ်သူၣ်ထီၣ်ဘှီထီၣ်တၢ်ပီးတၢ်လီမုၢ်ကျိၤဝဲၤကွၥ်တၢ်မၤအခိၣ်(ဟၤကၠံၤအူမၠၣ်ကိၤ)ဝံၤအလီၢ်ခံ,ထူၣ်ဖျဲးဝဲယံၥ်လၢဒီတလါအဂ့ၢ်,သ့ၣ်ညါဘၣ်န့ၣ်လီၤ. ခီဖျိထူၣ်ဖျဲးဝဲအဃိအပူၤကွံၥ်လါယူၤလံ(၂၀)သီအနံၤအပူၤ(DKBA)မၤတ့ၢ်ဝဲတၢ်မၤရှဲလဲတၢ်ကစီၣ်တၢ်ရဲၣ်တၢ်ကျဲၤလၢကဃုဖီၣ်ဝဲဒီးပၥ်ဖျါက့ၤတၢ်မူးတုၤအန့ၢ်အိၣ်ဝဲန့ၣ်လီၤ. ဒ်န့ၣ်အသိး,ယဲထဲၣ်(ကိး)ကိၤကိၤယဲမၠ့ၣ်အံၤ,မ့ၢ်ဝဲ(DKBA)ကရူၢ်ကရၢဖိအသီတဂၤအသိး,အိၣ်ဒံးဝဲဒၣ်ဖဲကရူၢ်ကရၢအတၢ်မၤကွၢ်(၃)လါအဖၢမုၢ်ဒံးအဆၢကတီၢ်,ခီဖျိတဒိကနၣ်လူၤပိၥ်မၤထွဲဝဲတၢ်သိၣ်တၢ်သီတၢ်ဘျၢဘၣ်အဃိအဝဲၤကျိၤခိၣ်(သုးခိၣ်ဒိၣ်ဖိ)စီၤထိၣ်ဖိလၢအထုးထီၣ်န့ၢ်ဝဲအီၤကတီၢ်ဘၢၣ်စၢၤ(DKBA)(ကး)တဂၤအံၤစ့ၢ်ကီး,တၢ်ပတုၥ်ဆိဝဲအီၤလၢ(တၢ်ကူၣ်လဲၤမၤကၤ)မူဒါတၢ်ဖံးတၢ်မၤ(၆)လါအိၣ်ဝဲဂ့ၢ်,(DKBA)ခိၣ်နၢ်တဖၣ်ပၥ်ဖျါတ့ၢ်ဝဲလၢတၢ်မၤတၢ်ကတိၤရှဲလဲတၢ်ရဲၣ်တၢ်ကျဲၤအပူၤဖဲလါယူၤလံ(၂၀)သီနံၤန့ၣ်လီၤ.