ချၢၣ်လွံၢ်ထူၣ်ကီၢ်ရ့ၣ် ၃ သီအတီၢ်ပူၤ ကျိဖးဒိၣ်အဃိကမျၢၢ်ဘၣ်ဒိ(၂)ဂၤ, သီခါဖၠၣ်ဒီးကၠိတၢ်သူၣ်ထီၣ်ဟးဂီၤ(၂)ဖျၢၣ်
လါအီကူး ၂၇ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤအပူၤ လၢသၢသီအတီၢ်ပူၤ ခီဖျိလၢသုးမီၤစိရိၤအကျိဖးဒိၣ်တကးဒံးဘၣ် ဟးတ့ၢ်လီၤဝဲဒြိတဖၣ်ဆူဒူသဝီတၢ်ဖံးအီၣ်မၤအီၣ်လီၢ်ကျဲအဃိ ကမျၢၢ်ဘၣ်ဒိ(၂)ဂၤဒီး သီခါဖၠၣ်(၁)ဖျၢၣ်,ကၠိတၢ်သူၣ်ထီၣ်(၁)ဖျၢၣ် ဟးဂီၤဝဲအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ. ဒ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် မူကီၢ်ဆၣ်ပူၤ ဖဲအပူၤကွံၥ်လါအီကူး ၂၁ သီ ဂီၤခီ ၈း၀၀ နၣ်ရံၣ်အဆၢကတီၢ်န့ၣ် ပယီၤသုးခီၣ်ချ့သုးရ့ၣ်(ခမရ-၆၀)လၢအိၣ်လဲၣ်ပးအံၤတဖၣ် လဲၤတ့ၢ်လီၤဝဲဒြိဆူပရဲစံၣ်သဝီပူၤအဃိ ကၠိတၢ်သူၣ်ထီၣ်ဟးဂီၤတဖျၢၣ် အမဲၥ်ညါ တနံၤဃီဖဲဟါခီ(၂း၃၀)အဆၢကတီၢ် ပယီၤသုးခးလီၤကျိဖးဒိၣ်(၃)ဖျၢၣ်ဆူညီၣ်ပ့ၣ်သၣ်(ညောင်ပင်သာ) သဝီပူၤအဃိ ဟံၣ်ဟးဂီၤ(၅)ဖျၢၣ်ဒီး သီခါဖၠၣ်ဟးဂီၤ(၁)ဖျၢၣ်န့ၣ်လီၤ. ဒ်န့ၣ်အသိးမုၢ်ဆ့ၣ်ထီၣ်ဖဲလါအီကူး ၂၂ သီ ဂီၤခီ ၉ နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး ပယီၤသုးလၢအိၣ်ကွ့ခၠီဝး(ကွင်းချောင်း၀) အံၤတဖၣ် ခးလီၤဝဲဟီၣ်ဝ့ၣ်စၣ်ကျိချံ(၅)ဖျၢၣ်ဆူ ပရဲစံၣ်သဝီပူၤအဃိ ကျီၢ်ဘၣ်ဒိဝဲ(၁)ဒုအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ. လၢန့ၣ်အမဲၥ်ညါ ဖဲလါအီကူး ၂၃ သီ မုၢ်ဃ့ၢ်လီၤ ၂း၀၀ နၣ်ရံၣ်ဘျဲၣ်အဆၢကတီၢ် လၢၢ်ဒိၣ်ကီၢ်ဆၣ်ပူၤ ပယီၤသုးခီၣ်သုးရ့ၣ် (ခလရ-၂၆၄)ခးလီၤဝဲကျိဖးဒိၣ်တဖျၢၣ်ဆူ အ့ပရ့း(အင်းပရစ်)သဝီပူၤအဃိ ဘၣ်ဒိဝဲသဝီဖိ မီၤမၠိဝ့ထိ(၄၂)နံၣ်အံၤန့ၣ်လီၤ. တကးဒံးဘၣ်လၢ ဆီထံးကီၢ်ဆၣ်အပူၤစ့ၢ်ကီး တနံၤဃီဖဲလါအီကူး ၂၃ သီ...
ဒဲကဝီၤဖိတဖၣ်ကဟးထီၣ်ဖံးမၤတၢ်လၢဖိးသဲးစးအဂီၢ်,ကၠီၣ်တဲၣ်ပဒိၣ်ပၥ်ဂၢၢ်ပၥ်ကျၢၤ
လါအီကူၥ် ၂၇သီ, ၂၀၂၅နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်-ကီၢ်ပယီၤကီၢ်ဆၢဘၣ်ကီဘၣ်ခဲဒဲကဝီၤတဖၣ်အပူၤပှၤဘၣ်ကီဘၣ်ခဲဖိတဖၣ်အံၤကဟးထီၣ်ဖံးမၤဘၣ်တၢ်လၢတၢ်ချၢလၢဖိးမံသဲးစးအဂီၢ်,ကၠီၣ်တဲၣ်ပဒိၣ်ပၥ်ဂၢၢ်ပၥ်ကျၢၤဝဲဖဲလၢအပူၤကွံၥ်လါအီကူၥ်(၂၆)သီအနံၤအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ. ဒ်(ကၠီၣ်တဲၣ်ပှၤမၤတၢ်ဖိကိတိၥ်ဝဲၤကျိၤ)တီၣ်ဖျါထီၣ်ဝဲလၢတၢ်ကဟ့ၣ်ဝဲဘၣ်ကီဘၣ်ခဲဒဲကဝီၤဖိတဖၣ်ကဟးထီၣ်ဖံးမၤတၢ်လၢတၢ်ချၢလၢအဖိးမံသဲစးအသိးန့ၣ်,ထံလီၢ်ကီၢ်ပူၤကိတိၥ်ခိၣ်(Mr. Pham Tham Wai Chai)ဒီးပဒိၣ်ပပှၢ်ကရူၢ်ကရၢတဖၣ်အၢၣ်လီၤတူၢ်လိၥ်ပၥ်ဂၢၢ်ပၥ်ကျၢၤဝဲဒၣ်အဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ. လၢတၢ်န့ၣ်အဃိ,ဒ်သိးဘၣ်ကီဘၣ်ခဲဒဲကဝီၤတဖၣ်ကဟးထီၣ်မၤဘၣ်တၢ်လၢချၢအဂီၢ်အပူၤကွံၥ်လါယူၤလံ(၁၇)သီအနံၤအပူၤ,ကမျၢၢ်ပှၤဂ့ၢ်ဝီတၢ်ကရၢကရိ(၁၁)ဖုဆီၣ်တခူဆှၢထီၣ်တ့ၢ်ဝဲဒၣ်လံၥ်ဆူကၠီၣ်တဲၣ်ပဒိၣ်ပပှၢ်အိၣ်ဝဲဒၣ်အဃိ,ဘၣ်ဃးဒီးကၠီၣ်တဲၣ်ပဒိၣ်အတၢ်ပၥ်ဂၢၢ်ပၥ်ကျၢၤက့ၤဝဲအံၤအဖီခိၣ်,ကမျၢၢ်ပှၤဂ့ၢ်ဝီတၢ်ကရၢကရိအကျါတဖုလၢအမ့ၢ်(ကညီပိၥ်မုၣ်ကရၢ)အံၤ,အကရၢခိၣ်နီၢ်ကညီဖီအံၤစံးဝဲဒ်အံၤန့ၣ်လီၤ. “ပဆှၢထီၣ်လံၥ်ဝံၤအလီၢ်ခံန့ၣ်ပသ့ၣ်ညါထွဲလၢကၠီၣ်တဲၣ်ပဒိၣ်ပပှၢ်တဖၣ်န့ၣ်ထံၣ်ဃုၥ်ဝဲပတၢ်ဃ့ထီၣ်လီၤ.နါက့ခဲအံၤန့ၣ်ပဒိၣ်ခီဒုအၢၣ်လီၤတူၢ်လိၥ်ဝဲလံအဃိန့ၣ်,လၢကဆဲးမၤဝဲအကျိၤအကွၥ်ဒ်လဲၣ်ဒ်လဲၣ်ခီန့ၣ်ကဘၣ်တဲသကိးဝဲန့ၣ်လီၤ.ဒဲကဝီၤပူၤနါက့ခဲအံၤတၢ်ထၢပှၤမံၤပှၤသး,သးနံၣ်ဃုၥ်ဒီးအတၢ်သ့တၢ်ဘၣ်တဖၣ်အိၣ်ပၥ်စၢၤလံအဃိန့ၣ်ဆူညါန့ၣ်ကဟ့ၣ်ဝဲခွဲးယၥ်ဖံးမၤတၢ်အက့ၢ်အဂီၤဒ်လဲၣ်န့ၣ်တၢ်ကမၤလိၣ်ထီၣ်ဖးအီၤလီၤ.ပဆိမိၣ်ဒုဆူမဲၥ်ညါတယံၥ်န့ၢ်သၢလါဘၣ်ဒဲကဝီၤဖိတဖၣ်ကန့ၢ်ဖံးန့ၢ်မၤဘၣ်တၢ်လၢတၢ်ချၢလၢပူၤဖျဲးဒီးတၢ်ပျံၤတၢ်ဖုးတအိၣ်,လၢဖိးသဲးစးအပူၤအဂီၢ်အသူအသၣ်ကဖျါထီၣ်ဝဲလီၤ”အဂ့ၢ်စံးဝဲဒၣ်န့ၣ်လီၤ. ဘၣ်ကီဘၣ်ခဲဖိတဖၣ်ကဟးထီၣ်ဖံးမၤတၢ်လၢတၢ်ချၢအဂီၢ်တၢ်ဟ့ၣ်ခွဲးယၥ်ပၥ်ဂၢၢ်ပၥ်ကျၢၤဝဲအံၤ,မ့ၢ်တၢ်ဒုးအိၣ်ထီၣ်ကၠီၣ်တဲၣ်ထံကီၢ်တၢ်မုၥ်တၢ်ခုၣ်ဒီးမ့တၢ်မၤလီၤစှၤကွံၥ်ဝဲထံကီၢ်ဒီတဘ့ၣ်အတၢ်ဃၢတၢ်စုၥ်လၢတၢ်ဘၣ်ကွၢ်ထွဲကဟုကယၥ်ဝဲပှၤဘၣ်ကီဘၣ်ခဲဖိတဖၣ်အဂ့ၢ်န့ၣ်,ကၠီၣ်တဲၣ်ပဒိၣ်ပပှၢ်တဖၣ်စံးဝဲအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ. လၢန့ၣ်အမဲၥ်ညါ,တၢ်ဟ့ၣ်ခွဲးယၥ်ပျဲဝဲပှၤဘၣ်ကီဘၣ်ခဲဖိသ့ၣ်တဖၣ်ဟးထီၣ်မၤတၢ်မၤလၢတၢ်ချၢလၢအဖိးသဲစးအံၤ,မ့ၢ်တၢ်ကဲဘျူးလၢကီၢ်ကၠီၣ်တဲၣ်ဒီးထံဂုၤကီၢ်ဂၤအဘၢၣ်စၢၤတၢ်ရ့လိၥ်မုၥ်လိၥ်အဂ့ၢ်,ပၥ်ဖျါဃုၥ်ဝဲဒၣ်န့ၣ်လီၤ. တကးဒံးဘၣ်,ကမၤပှဲၤထီၣ်က့ၤဝဲကၠီၣ်တဲၣ်ကီၢ်ပူၤတၢ်လီၢ်တၢ်ကျဲလၢပှၤမၤတၢ်ဖိလီၤစှၤကွံၥ်ဝဲလီၢ်ကျဲသ့ၣ်တဖၣ်အဂီၢ်,ပှၤမၤတၢ်ဖိလၢကကိးဝဲသ့ၣ်တဖၣ်အံၤကမၤန့ၢ်ဝဲတၢ်အိၣ်ဆူၣ်အိၣ်ချ့တၢ်သမံသမိးဒီးတၢ်အိၣ်ဆူၣ်အိၣ်ချ့တၢ်အုၣ်ကီၤသးတၢ်လိၣ်ဘၣ်တဖၣ်ဒ်သိးသုးထီထီၣ်ဝဲပှၤမၤတၢ်ဖိတဖၣ်အတၢ်အိၣ်ဆူၣ်အိၣ်ချ့ပတီၢ်အဂီၢ်အဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဃုၥ်ဝဲဒၣ်န့ၣ်လီၤ. ကၠီၣ်တဲၣ်ပဒိၣ်အတၢ်ပၥ်ဖျါဒီးတၢ်ပၥ်ဂၢၢ်ပၥ်ကျၢၤဝဲတၢ်ဟ့ၣ်တၢ်ပျဲတၢ်ဖံးတၢ်မၤခွဲးယၥ်အဖီခိၣ်,မ့ၢ်တၢ်ဒုးအိၣ်ထီၣ်တၢ်သူၣ်ဆူၣ်သးဂဲၤလၢဒဲကဝီၤဖိတဖၣ်အဂီၢ်အဂ့ၢ်,အူးပၠၣ်ဒဲကဝီၤဖိတဂၤစံးဝဲဒ်အံၤန့ၣ်လီၤ. “မ့ကဲထီၣ်နီၢ်ကီၢ်ဒုမ့ၢ်တၢ်သးခုလၢဒဲကဝီၤဖိအဂီၢ်လီၤ.ပဆၢမုၢ်လၢ်လၢတၢ်ရဲၣ်တၢ်ကျဲၤအံၤကဟဲလၢအဆိအချ့လီၤ.ပတၢ်အိၣ်မူလၢဒဲကဝီၤအပူၤနးမး,ခဲအံၤခီဖျိကၠီၣ်တဲၣ်ပဒိၣ်တၢ်ရဲၣ်တၢ်ကျဲၤတကဲထီၣ်ဒံး,တစးထီၣ်ဒံးဘၣ်အဃိပှၤလဲၤဟးထီၣ်မၤတၢ်လၢတဖိးသဲးစးဖဲအဘူးဒီးဒဲကဝီၤအိၣ်ဒီဒူၣ်ညါ.အဃိန့ၣ်ပှၤမ့ဟ့ၣ်ပှၤတၢ်ခွဲးတၢ်ယၥ်လၢကဟးထီၣ်မၤတၢ်မၤဖိးသဲးစးသပှၢ်ကတၢၢ်ဒုပသူၣ်ဆူၣ်သးဂဲၤလီၤ”အဂ့ၢ်စံးဝဲဒၣ်န့ၣ်လီၤ. ကီၢ်ကၠီၣ်တဲၣ်-ကီၢ်ပယီၤကီၢ်ဆၢဒီတကျိၤအံၤဘၣ်ကီဘၣ်ခဲဒဲကဝီၤအိၣ်ဝဲခဲလၢၥ်(၉)ဘ့ၣ်အဂ့ၢ်,သ့ၣ်ညါဘၣ်န့ၣ်လီၤ. ဒီးဘၣ်ကီဘၣ်ခဲဒဲကဝီၤ(၉)ဘ့ၣ်အံၤအပူၤပှၤနီၢ်ဂံၢ်ခဲလၢၥ်အိၣ်ဝဲလၢအဂၤ(၁)ကလီၢ်ဘျဲၣ်ဘၣ်ဆၣ်,ကၠီၣ်တဲၣ်ပဒိၣ်အံၤရဲၣ်ကျဲၤဝဲလၢကကိးဝဲထဲပှၤလၢအဖံးမၤတၢ်ကဲအဂၤ(၄၂၀၀၀)အဂ့ၢ်,သ့ၣ်ညါဘၣ်ဒ်ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါတ့ၢ်ဝဲလၢအပူၤကွံၥ်အသိးန့ၣ်လီၤ.
တၢ်လဲၤကွံၥ်(DKBA)သုးခိၣ်ဘိၤဘံၣ်တြဲၤဒီးမ့ၣ်ပိၢ်ဝံၤ ခးလီၤကဒါကျိဆူဒူသဝီပူၤ
လါအီကူး ၂၆ သီ, ၂၀၂၅ နံၣ်, ခ့ၣ်အဲးစံၣ် ဘူးဒးကညီသုးမုၢ်ဒိၣ်(DKBA)တြဲၤလၢအိၣ်ဆီလီၤသးဖဲဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် နီဖးဒိၣ်ကရူၢ် ကၠီတလူၢ် သဝီဃၢၤအံၤ မဟါတၢ်လဲၤကွံၥ်ဝဲဒီးမ့ၣ်ပိၢ်ကဲထီၣ်ဝံၤ ဖဲတဂီၤအံၤ(DKBA)သုးသိလ့ၣ်ဟဲထီၣ်(၅)ခိၣ်ဝံၤခးလီၤဝဲတၢ်ဆူဘီနီၤကျိ ဝၢ်ခီတကပၤ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ. ဖဲတနံၤအံၤလါအီကူး ၂၆ သီ ဂီၤခီအဆၢကတီၢ်န့ၣ် (DKBA)သုးခိၣ်ဘိၤဘံၣ်အပှၤလၢအိၣ်ဃိၣ်ဖိတၢ်လီၢ်အံၤတဖၣ် ဟဲဒိးဝဲဒီး သိလ့ၣ်(၅)ခိၣ်လၢသုးဂံၢ်ဘါကအိၣ်အဂၤ(၅၀)ဃၣ်ဃၣ်အံၤ လဲၤဃီၤဝဲဆူထံဃီဝါသဝီချံသန့တၢ်လီၢ်ဝံၤ ခးလီၤဝဲမီထး, (7)ကျိ တစှၤန့ၢ် (၁၅)ဖျၢၣ်အံၤဆူ ဘီနီၤကျိဝၢ်ခီ သထူၣ်ကီၢ်ဆၣ်ပူၤတကပၤ အဂ့ၢ်န့ၣ်စံးဝဲန့ၣ်လီၤ. လၢ(DKBA)ခးလီၤတၢ်ဘျီဝဲၤအံၤ ကမျၢၢ်အတၢ်သူၣ်ထီၣ်ဒဲအထူၣ်ဘၣ်ဒိဘၣ်ထံးဝဲအိၣ်အမဲၥ်ညါ မၤဟးဂီၤကွံၥ်ဝဲကမျၢၢ်အထိ (၂)ဘ့ၣ် အဂ့ၢ်န့ၣ် သထူၣ်ကီၢ်ဆၣ် ပှၤဘၣ်မူဘၣ်ဒါတဂၤ စံးဝဲဒ်အံၤန့ၣ်လီၤ. အဝဲစံးဝဲလၢ“အဝဲသ့ၣ်ဟဲဖဲချံသန့န့ၣ်ကခီဃီၤလၢပအိၣ်(သထူၣ်ကီၢ်ဆၣ်)တကပၤနါက့ခီဝဲတဘူၣ်ဘၣ်အဃိခးစိဃီၤတၢ်န့ၣ်.ခးစိကျိန့ၣ်ဘၣ်ပှၤဒဲထူၣ်တတၢၣ်ခံတၢၣ်ညါ.ခးဝဲဝံၤဘျီအမၤဟးဂီၤပှၤထိ,ဒွဲၣ်ထီၣ်ကွံၥ်ပှၤထိမီၤနီၤ.အဝဲမၤကဒံကဒါဟဲထီၣ်မၤဟးဂီၤထိဘျီပတသ့ၣ်ညါတၢ်နီတမံၤဘၣ်.ခးလီၤကျိဝံၤပဆိမိၣ်လၢအဝဲသ့ၣ်မ့ခီဃီၤန့ၣ်ပကသဂၢၢ်အီၤမီၤ.အတခီဝဲစ့ၢ်ဘၣ်.ခးလီၤတၢ်ဝံၤဘျီက့ၤထုးကဒါသးန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တချုး(DKBA)သုးဟဲလီၤဒီးခးလီၤကျိဖဲတဂီၤညါအံၤကဲထီၣ်ဒံးဘၣ် ဖဲမဟါလါအီကူး ၂၅ သီ ဂီၤခီအဆၢကတီၢ်န့ၣ် ဟီၣ်ကဝီၤ (KNLA) သုးရ့ၣ် ၁ အပှၤလဲၤကွံၥ်ဝဲ(DKBA)အတြဲၤလၢအိၣ်ကၠီတလူၢ်သဝီဃၢၤအံၤအဃိ ဖဲန့ၣ်သံ(၃)ဂၤ,ဘၣ်ဒိ(၂)ဂၤဒီး တၢ်ကဲထီၣ်သးဖဲန့ၣ်ဝံၤမုၢ်ဆ့ၣ်ထီၣ်တၢ်ဘၣ်ဟဲကဲထီၣ်သးဒ်အံၤန့ၣ်လီၤ. တကးဒံးဘၣ်လၢန့ၣ်အမဲၥ်ညါဖဲ(DKBA)အပှၤဟဲလီၤဆူထံဃီဝါချံသန့အဆၢကတီၢ်န့ၣ် ကၠိလၢအိၣ်နီဖးဒိၣ်သဝီ, နိရါသဝီ,ဖှ့ဒူကူ, ထံဃီဝါသဝီပူၤတဖၣ်အံၤ (DKBA)မၢတၢ်ပံၥ်ကွံၥ်ဝဲခဲလၢၥ်ဒီး ပှၤသဝီဖိစ့ၢ်ကီးတပျဲဟးထီၣ်ဝဲလၢတၢ်ချၢဘၣ်အဂ့ၢ်န့ၣ် လီၢ်ကဝီၤပှၤ ဘၣ်မူဘၣ်ဒါ လၢအိၣ်ဘူးဖဲန့ၣ်တဂၤ စံးဝဲဒ်အံၤန့ၣ်လီၤ. “အဝဲသ့ၣ်န့ၣ်ဟဲလီၤဒီးကါန့ၣ်(၅)ခိၣ်.ပတယးအနီၣ်ဂံၢ်ကအိၣ်ဖဲ(၄၀)ဘျဲၣ်ဒ်န့ၣ်လီၤ.မ့မ့ၢ်လၢအခးလီၤကျိဖးဒိၣ်အတၢ်ပညိၣ်ဒုတသ့ၣ်ညါဘၣ်.ဖဲတဂီၤအံၤအဝဲသ့ၣ်ဟဲလီၤဘျီမၢပှၤပံၥ်ကွံၥ်ကၠိ,လဲၤဆူထံနံၤခိၣ်ဘျီခးလီၤကျိလီၤ.မ့မ့ၢ်လၢအဝဲသ့ၣ်ဟဲလီၤန့ၣ်အိၣ်လၢဃိၣ်ဖိအဃိဟဲလီၤဘၣ်ဝဲဖဲကၠီတလူၢ်ဆၢခိၣ်,ဝၣ်တရဲၢ်,နီဖးဒိၣ်,နိၣ်ချံး,ဖှ့ဒူကူ,နိရါသဝီဒီးထံဃီဝါသဝီတဖၣ်န့ၣ်လီၤ.ဘၣ်ဆၣ်မ့မ့ၢ်ကၠိလၢအပံးဝဲန့ၣ်ပံၥ်ဝဲထဲနီဖးဒိၣ်,ဖှ့ဒူကူ,နိရါဒီးထံဃီဝါသဝီ(၄)ဖျၢၣ်အံၤလီၤ.မ့ဝံၤပှၤသဝီဖိနါက့တပျဲဟးထီၣ်ဝဲလၢတၢ်ချၢလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဖၣ်စံးဝဲအသိးန့ၣ်...
ပယီၤသုးကရူၢ်တၢ်ဃုထၢအံၤကပၥ်အီၤဒ် ဒီကလုၥ်အမူဒါအဂ့ၢ် KNU ဆီၣ်တခူထီၣ်.
လါအီကူး ၂၆သီ, ၂၀၂၅ နံၣ်, ခ့ၣ်အဲးစံၣ်. ဖဲတနံၤလါအီကူး ၂၆သီအနံၤအံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ထုးထီၣ်ပၥ်ဖျါဝဲဒၣ်အလံၥ်တၢ်ပၥ်သးတဘ့ၣ်လၢအဘၣ်ဃးဒီး ပယီၤသုးကရူၢ်ကမၤဝဲတၢ်ဃုအဖီခိၣ်န့ၣ်လီၤ. လၢအလံၥ်တၢ်ပၥ်သးဝဲန့ၣ်အပူၤန့ၣ် ခါလၢကဟဲလါဒံၣ်စဲဘၢၣ်၂၈သီအနံၤန့ၣ် ပယီၤသုးကရူၢ်လၢဟံးန့ၢ်ဆူၣ်ထံကီၢ်တၢ်စိတၢ်ကမီၤလၢအဆီတလဲက့ၤအမံၤဆူ သုးခီမ့ရှၢၣ်အံၤကမၤဝဲဒၣ်တၢ်ဃုထၢ အဖီခိၣ် တၢ်ဃုထၢဝဲအံၤကကဲဘျုးဝဲဒၣ်ထဲလၢသုးမီၤစိရိၤအပှၤဒီးအပၣ်တံၣ်အဂီၢ်လီၤအဃိ ကညီဒီကလုၥ်,ကညီဖီၣ်စုကဝဲၤကရၢ,ကညီထံရူၢ်ကီၢ်သဲးကရၢဒီးထံရူၢ်ကီၢ်သဲးပၣ်တံၣ်ခဲလၢၥ်ဒီးကမျၢၢ်ထံဖိကီၢ်ဖိသ့ၣ်တဖၣ်ကပၥ်အီၤဒ်ဒီကလုၥ်မူဒါအသိးဒီးသုတပၣ်ဃုၥ်ပၣ်ဂီၢ်တဂ့ၤဒီး ကပၣ်ဃုၥ်ပၣ်ဂီၢ်လၢတၢ်ထီဒါတၢ်ဃုထၢအမူးဝဲအံၤလၢ အတမ့ၢ်တၢ်စုဆူၣ်ခီၣ်တကးအကျဲအဂ့ၢ် ခ့ၣ်အဲၣ်ယူၣ် ဆီၣ်တခူထီၣ်ဝဲဒၣ်န့ၣ်လီၤ. တကတီၢ်ဃီ တၢ်ဃုထၢဝဲအံၤန့ၣ် မ့ၢ်ဒၣ်လၢ မီၤစိရိၤ အသးသမူကထီရီၤအဂီၢ်,သုးမီၤစိရိၤဟံးန့ၢ်ဆူၣ်ထံကီၢ်တၢ်စိတၢ်ကမီၤအံၤကဖိးသဲစးအဂီၢ်ဒီးတၢ်ကမၤမူထီၣ်က့ၤ ၂၀၀၈တၢ်ဘျၢခိၣ်သ့ၣ်အဂီၢ်အဃိ ထံဖိကီၢ်ဖိကမျၢၢ်ဒီးထံရူၢ်ကီၢ်သဲးပၣ်တံၣ်လၢအပၣ်ဃုၥ်လၢတၢ်ဃုထၢဘျီဝဲအံၤသ့ၣ်တဖၣ်န့ၣ် ကကဲထီၣ်ဝဲ ပှၤလၢအပၥ်တ့ၢ်တၢ်စံၣ်စိၤတဲစိၤလၢ သူၣ်တ့ၢ်သ့ၣ်ထူၣ်လၢအစုၣ်အပျၢ်အိၣ်အဃိန့ၣ် တၢ်ကဘၣ်ဂုၥ်ကျဲးစၢးဟးဆှဲးအီၤအဂ့ၢ် ခ့ၣ်အဲၣ်ယူၣ် စံးဝဲဒၣ်န့ၣ်လီၤ. လၢန့ၣ်အမဲၥ်ညါ တကီၢ်ခါခဲအံၤန့ၣ် ဒ်သိး အဝဲသ့ၣ် ကဟံးန့ၢ်ပှၤလၢအထီဒါတၢ်ဃုထၢဝဲအံၤအရ့ကန့ၢ်အဂီၢ် ပယီၤသုးကရူၢ်ဒုးအိၣ်ထီၣ်ဝဲတၢ်ဘျၢသဲစးဒ်အမ့ၢ် တၢ်ဒီသဒၢ တၢ်မၤတံၥ်တၥ်မၤဟးဂီၤ တၢ်ဃုထၢအမူးတၢ်ဟူးတၢ်ဂဲၤသဲစးတၢ်ဘျၢဒီးထံဖိကီၢ်ဖိနီၢ်တဂၤ တၢ်ဘံၣ်တၢ်ဘၢသဲစးတၢ်ဘျၢသ့ၣ်တဖၣ်အဖီခိၣ် မ့ၢ်တၢ်မၤပျံၤမၤဖုးကမျၢၢ်ထံဖိကီၢ်ဖိဒီးဒုးကဲထီၣ်ဝဲဒၣ်တၢ်အိၣ်သးလၢ ထံဖိကီၢ်ဖိကမျၢၢ်သ့ၣ်တဖၣ် ကဘၣ်ဟ့ၣ်တၢ်ဖးလၢအထီဒါဒီးအနီၢ်ကစၢ်တၢ်ဘၣ်သးအဂ့ၢ် ခ့ၣ်အဲၣ်ယူၣ်ပၥ်ဖျါဝဲဒၣ်လၢ အလံၥ်တၢ်ပၥ်သးအပူၤန့ၣ်လီၤ. ဒ်န့ၣ်အသိး တၢ်ဃုထၢဝဲၤအံၤတမ့ၢ်လၢအတီအတြၢ်ဒီးကကဲဘျုးဝဲထဲ သုးမီၤစိရိၤအခိၣ်အနၢ်ဒီးအဒူၣ်ဖိထၢဖိ ပၣ်တံၣ်လၢအဆီၣ်ထွဲဟ့ၣ်ဂံၢ်ဟ့ၣ်ဘါအီၤတဖၣ်အဂီၢ်ဒီးလၢကလုၥ်ဒူၣ်ဒီးထံဖိကီၢ်ဖိကမျၢၢ်အဂီၢ်တမ့ၢ်လၢတၢ်ကဲဘျုးတအိၣ်ဘၣ်အဃိ ကမျၢၢ်ထံဖိကီၢ်ဖိ,ဖီၣ်ကစုကဝဲၤပၢၢ်ဆၢတၢ်ကရူၢ်ကရၢ,ထံရူၢ်ကီၢ်သဲးပၣ်တံၣ်,ပှၤဂ့ၢ်ဝီကရူၢ်ကရၢ,တၢ်ဘူၣ်တၢ်ဘါခိၣ်နၢ် လၢအအိၣ်လၢမုၢ်တြီၢ်ကရ့ၣ်ဟီၣ်ကဝီၤပူၤသ့ၣ်တဖၣ်လၢကျဲလိၤလိၤမ့ၢ်ဂ့ၤ လၢကျဲတရံးမ့ၢ်ဂ့ၤ တဘၣ်ပၥ်ဖှိၣ်မၤသကိးဒီးဆီၣ်ထွဲမၤစၢၤအီၤဘၣ်အဂ့ၢ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်ဘိးဘၣ်ရၤလီၤဝဲအလံၥ်တဘ့ၣ်ဖဲတနံၤအံၤလါအီးကူး ၂၆သီအနံၤအိၣ်ဝဲဒၣ်စ့ၢ်ကီးန့ၣ်လီၤ. ဒီးဒ်လံၥ်ဘိးဘၣ်ရၤလီၤအိၣ်ဝဲဒၣ်အသိး ပှၤလၢတဒိကနၣ်လူၤထွဲဝဲတဖၣ် တၢ်ကဟံးန့ၢ်အီၤဂ့ၢ်ဝီဒ်အမ့ၢ် - ၁.တၢ်ကိးထံၣ်လိၥ်ဟ့ၣ်တၢ်သ့ၣ်ညါနၢ်ပၢၢ်ဒီးဟ့ၣ်ပလီၢ်အီၤ ၂.ကကိးထီၣ်အီၤဒီးပၢၤဃၥ်အီၤလၢတၢ်လီၢ်လၢအကြၢးအဘၣ်တီၤတီၤ ၃.တၢ်ကဒုးဟးထီၣ်ကွံၥ်လီၤလၢမုၢ်တြီၢ်ကီၢ်ရ့ၣ်သုးက့(၅)ဟီၣ်ကဝီၤပူၤအဂ့ၢ် ခ့ၣ်အဲၣ်ယူၣ်...
သုးကီၣ်ကးမၤဝဲတၢ်ဟ့ၣ်တၢ်သ့ၣ်ညါနၢ်ပၢၢ်ဘၣ်ဃး(တၢ်ဖးစဲးဖီကဟၣ်)တၢ်မၤလိတပယူၥ်ဃီလၢဖၣ်အၣ်ဝ့ၢ်ပူၤ
လါအီကူၥ် ၂၆သီ, ၂၀၂၅နံၣ်, ခ့ၣ်အဲးစံၣ်, ကညီကီၢ်စဲၣ်ဖၣ်အၣ်ကီၢ်ရ့ၣ်,ဖၣ်အၣ်ဝ့ၢ်ဟီၣ်ကဝီၤအပူၤသုးကီၣ်ကးအစုတီၤဖီလၥ်ကီၢ်စဲၣ်ပှၤဘၣ်မူဘၣ်ဒါတဖၣ်အံၤမၤဝဲတၢ်ဟ့ၣ်တၢ်သ့ၣ်ညါနၢ်ပၢၢ်ဘၣ်ဃး(တၢ်ဖးစဲးဖီကဟၣ်)( မြန်မာအီလက်ထရောနစ်မဲပေးစက်) (MEVM) တၢ်သ့တၢ်ဘၣ်တပယူၥ်ဃီအဂ့ၢ်,ဝ့ၢ်လီၢ်ကဝီၤဖိတဖၣ်စံးဝဲဒၣ်န့ၣ်လီၤ. (၂၀၂၅)လါဒံၣ်စဲဘၢၣ်လၢၥ်အပူၤတၢ်ဃုထၢကကဲထီၣ်လိၣ်ထီၣ်အဂီၢ်,သုးကီၣ်ကးအံၤကိးဝဲဝ့ၢ်လီၢ်ကဝီၤကမျၢၢ်တဖၣ်လၢကလဲၤပၥ်ဖှိၣ်သးဒီးမၤလိသ့သးလၢ(MEVM)(တၢ်ဟ့ၣ်တၢ်ဖးစဲးဖီကဟၣ်)တၢ်သ့တၢ်ဘၣ်အဂ့ၢ်အကျိၤတဖၣ်အဂ့ၢ်,ပၥ်ဖျါဝဲလၢတၢ်ကိးတၢ်အိၣ်ဖှိၣ်အလံၥ်ကွဲမုၥ်အပူၤအဂ့ၢ်,သ့ၣ်ညါဘၣ်န့ၣ်လီၤ. ဘၣ်ဃးဒီးသုးကီၣ်ကးအတၢ်ဟ့ၣ်စဲးဖီကဟၣ်တၢ်သ့ၣ်ညါနၢ်ပၢၢ်အဖီခိၣ်,ဖၣ်အၣ်ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. “တနံၤအံၤအဝဲသ့ၣ်မၤတၢ်ဒုးသ့ၣ်ညါနၢ်ပၢၢ်ဘၣ်ဃးတၢ်ဟ့ၣ်တၢ်ဖးစဲးဖဲ(ခလီးနိး)သဝီသီခါဖၠၣ်န့ၣ်လီၤ.အိၣ်ဒၣ်မၤဒုးနၢ်ပၢၢ်ဝဲကမျၢၢ်သ့ၣ်တဖၣ်ဒီးမၢကမျၢၢ်တဖၣ်မၤလိသးလီၤ.မ့မ့ၢ်လၢသဝီဒုတဆှၢလံၥ်လဲၢ်ကိးဝဲဘၣ်,အိၣ်ဒၣ်ဒူသဝီခိၣ်နၢ်ပှၤဘၣ်မူဘၣ်ဒါတဖၣ်ဟးတဲကၠၢက့ၤကမျၢၢ်လၢကိၥ်ပူၤလီၤ.မၤဝဲတနံၤတစဲးတစဲးလီၤ.ဟံၣ်တဖျၢၣ်အပူၤ(၁၈)နံၣ်ဆူဖီခိၣ်တဖၣ်ဘၣ်လဲၤကိးဂၤလီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,လၢဖၣ်အၣ်ဝ့ၢ်ကဝီၤဒ့(၄)နီၢ်ဂံၢ်(၂)တီၤထီကၠိရွ့ၣ်ယတူၣ်ဘျီၣ်ပူၤစ့ၢ်ကီးဆှၢဃီၤဝဲလံၥ်တၢ်ကိးတၢ်အိၣ်ဖှိၣ်လၢကဝီၤဒ့(၄)ကမျၢၢ်သးနံၣ်(၁၈)နံၣ်ဆူအဖီခိၣ်တဖၣ်ကလဲၤပၥ်ဖှိၣ်သးဖဲတနံၤအံၤ(၈)နၣ်ရံၣ်တခီအိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤကမျၢၢ်တဖၣ်စံးဝဲဒၣ်အသိးန့ၣ်လီၤ. ဖၣ်အၣ်ဝ့ၢ်ကမျၢၢ်ပှၤသးအိၣ်ဟ့ၣ်ထီၣ်တၢ်ဖးတဖၣ်ကသ့ၣ်ညါနၢ်ပၢၢ်ဝဲဘၣ်ဃးဒီးတၢ်ဖးစဲးဖီကဟၣ်အဂ့ၢ်အကျိၤဒီးကမၤကွၢ်မၤလိသ့သးလၢတၢ်ဟ့ၣ်တၢ်ဖးအဂီၢ်,သုးကီၣ်ကးကရူၢ်ကရၢဘၣ်ထွဲတဖၣ်အံၤနီၤဖးလီၤဝဲဒၣ်ကရူၢ်(၈)ဖုအဂ့ၢ်,ပၥ်ဖျါဝဲဒၣ်လၢ(Kayin State Government)အတၢ်ဘိးဘၣ်ရၤလီၤအပူၤဖဲအပူၤကွံၥ်လါအီကူၥ်(၂၂)သီအနံၤန့ၣ်လီၤ. ဒီး(MEVM)(တၢ်ဟ့ၣ်တၢ်ဖးစဲးဖီကဟၣ်)အတၢ်သ့ၣ်ညါနၢ်ပၢၢ်တၢ်ရဲၣ်တၢ်ကျဲၤအံၤစးထီၣ်မၤဝဲဖဲလါအီကူၥ်(၂၂)သီဒီးတုၤဝဲလၢလါအီကူၥ်(၃၁)သီအနံၤလၢအသီ(၁၀)အတီၢ်အပူၤအသိး,ကမၤဝဲလၢဖၣ်အၣ်ဝ့ၢ်ကဝီၤဒ့(၉)ဘ့ၣ်အပူၤဃုၥ်ဒီးဒူသဝီကရူၢ်(၈၈)ကရူၢ်အပူၤအဂ့ၢ်,ပၥ်ဖျါတ့ၢ်စ့ၢ်ကီးဝဲဒၣ်န့ၣ်လီၤ. သုးကီၣ်ကးအံၤတနံၣ်အံၤလါဒံၣ်စဲဘၢၣ်(၂၈)သီအနံၤအပူၤ,ကစးထီၣ်မၤဝဲတၢ်ဃုထၢအကူၥ်(၁)တၢ်ရဲၣ်တၢ်ကျဲၤအဂ့ၢ်,အကီၢ်စၢဖှိၣ်တၢ်ဃုထၢခီၣ်မ့ရှၢၣ်ထုးထီၣ်ဘိးဘၣ်ရၤလီၤပၥ်ဖျါတ့ၢ်ဝဲဖဲလါအီကူၥ်(၁၈)သီအနံၤန့ၣ်လီၤ. ဒ်န့ၣ်အသိး,တကီၢ်ခါခဲအံၤဒ်သိးကမျၢၢ်တဖၣ်ကသ့ဟ့ၣ်တၢ်ဖးအဂီၢ်အိးထီၣ်ဝဲတၢ်ဟ့ၣ်တၢ်ဖးစဲးဖီကဟၣ်တၢ်သ့ၣ်ညါနၢ်ပၢၢ်,တၢ်သူတၢ်ဖးစဲးဖီကဟၣ်တၢ်မၤလိလၢကီၢ်ခီဒိၣ်ဒီးကီၢ်စဲၣ်တဖၣ်အပူၤအိၣ်ဝဲအသိး,ဟ့ၣ်လီၤဝဲတၢ်သ့ၣ်ညါနၢ်ပၢၢ်ဆူကမျၢၢ်တဖၣ်အအအိၣ်အိၣ်ဝဲအမဲၥ်ညါ,ဒ်သိးပှၤဖၢစၢ်ဖိ(ပှၤက့ၢ်ဂီၤတဂ့ၤ)တဖၣ်ဟ့ၣ်ထီၣ်တၢ်ဖးကသ့အဂီၢ်,မၤန့ၢ်ဝဲတၢ်သ့ၣ်ညါနၢ်ပၢၢ်တၢ်ရဲၣ်တၢ်ကျဲၤတဖၣ်အိၣ်ဝဲအဂ့ၢ်,ပၥ်ဖျါဝဲဒၣ်လၢ(မၠၤမၣ်အလ့)တၢ်ကစီၣ်အပူၤအိၣ်ဝဲဒၣ်န့ၣ်လီၤ.
DKBA အတြဲၤလၢအိၣ်ကၠီတလူၢ်သဝီဃၢၤအံၤ တၢ်လဲၤကွံၥ်ဝဲဒီးမ့ၣ်ပိၢ် သံ(၃)ဂၤ,ဘၣ်ဒိ(၂)ဂၤ
လါအီကူး ၂၅ သီ, ၂၀၂၅ နံၣ်, ခ့ၣ်အဲးစံၣ် ဖဲတနံၤအံၤဂီၤခီအဆၢကတီၢ်န့ၣ် ဘူးဒးကညီသုးမုၢ်ဒိၣ်(DKBA)အတြဲၤလၢအိၣ်ဆီလီၤသးဖဲခ့ၣ်အဲၣ်ယူၣ်-ကညီဒီကလုၥ် စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ဖၣ်အၣ်ကီၢ်ဆၣ် ကၠီတလူၢ်သဝီဃၢၤအံၤ တၢ်လဲၤကွံၥ်ဝဲဒီးမ့ၣ်ပိၢ်အဃိ သံ(၃)ဂၤ, ဘၣ်ဒိ(၂)ဂၤ အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံးဝဲန့ၣ်လီၤ. ဖဲတနံၤအံၤလါအီကူး ၂၅ သီ ဂီၤခီ ၇း၂၀ မံးနံးအဆၢကတီၢ်န့ၣ် (DKBA)သုးခိၣ်ဘိၤဘံၣ်အပှၤတြဲၤလၢအိၣ်ဆီလီၤသးဖဲ နီဖးဒိၣ် ကရူၢ် ကၠီတလူၢ်သဝီဃၢၤအံၤ ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၁ အပှၤလဲၤကွံၥ်ဝဲဒီးစုကွံၥ်မ့ၣ်ပိၢ် (၁)ဖျၢၣ် အဃိ တၢ်သံတၢ်ဘၣ်ဒိဘၣ်ထံးကဲထီၣ်ဝဲဒ်အံၤန့ၣ်လီၤ. ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲလၢ“ခဲအံၤပနၢ်ဟူလၢအသံ(၃)ဂၤ,ဘၣ်ဒိ(၂)ဂၤမီၤနီၤ. ပှၤလၢအဘၣ်ဒိခံဂၤန့ၣ်တမ့ၢ် အဘၣ်ဒိနးနးဘၣ်. ဘၣ်ဒိတစဲးတမွဲးဒ်န့ၣ်လီၤ” အဂ့ၢ်န့ၣ် စံးဝဲန့ၣ်လီၤ. (DKBA)တြဲၤလၢတၢ်လဲၤကွံၥ်ဝဲဒီးမ့ၣ်ပိၢ်အံၤ အိၣ်ဆီလီၤသးလၢသဝီဃၢၤအဃိကဲထီၣ်တၢ်ပျံၤတၢ်ဖုးလၢကမျၢၢ်အဂီၢ်အသိး လီၤဆီဒၣ်တၢ်သုးဟံန့ၢ်တၢ်စိတၢ်ကမီၤဝံၤလီၢ်ခံ ဟီၣ်ကဝီၤဖဲန့ၣ်ပူၤအမဲၥ်ညါလၢကြုၢ်တု-ကီးတရံးကျဲဒီး ကီးတရံး-မၠၣ်ဝတံၣ် အ့ရှါကျဲတကပၤန့ၣ် DKBA အတၢ်ပၥ်ဖှိၣ်မၤသကိးတၢ်ဒီးသုးမီၤစိရိၤအိၣ်ထီၣ်ဝဲဖျိဖျိဖျါဖျါအဖီခိၣ် ဘၣ်တၢ်လဲၤမၤဝဲဒ်အံၤ လီၤအဂ့ၢ်န့ၣ် သုးက့(၁) သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဝဲန့ၣ် လီၤ. “ဘၣ်မနုၤအဃိလၢပပှၤလဲၤကွံၥ်ဝဲဒီးစုကွံၥ်မ့ၣ်ပိၢ်လဲၣ်န့ၣ်အဝဲသ့ၣ်မၤသကိးတၢ်ဒီးပယီၤသုးလၢလဲၤထီၣ်ကီးတရံးမ့ၢ်ဂ့ၤ,လၢမၠၣ်ဝတံၣ်ကျဲမ့ၢ်ဂ့ၤန့ၣ်ပှၤကိးဂၤဒဲးသ့ၣ်ညါဝဲလီၤ.မ့ဝံၤပယီၤသုးထုးထီၣ်န့ၢ်အဝဲသ့ၣ်တၢ်အီၣ်တၢ်အီ,ကျိသ့ၣ်တဖၣ်ခဲလၢၥ်လီၤ.အအိၣ်ဖဲသဝီပူၤန့ၣ်ပှၤသဝီဖိပျံၤတၢ်.လၢညါန့ၣ်အဝဲသ့ၣ်အိၣ်လၢဝၣ်တရဲၢ်ကၠိမဲၥ်ညါန့ၣ်.ဖဲန့ၣ်ပပှၤလဲၤကွံၥ်အဝဲသ့ၣ်ဒီးဒြိကဲထီၣ်ဒံး.တၢ်လၢဘိၤဘံၣ်န့ၣ်ပကိးထံၣ်ပကိးတၢၣ်ပီၣ်တဲသကိးတၢ်နါက့တကနၣ်ဃုၥ်ပှၤနီဘျီဘၣ်.သီခါဒီးဘိၤဘံၣ်န့ၣ်သ့ကွံၥ်ပှၤဟီၣ်ခိၣ်ကပံၥ်,ပှၤကီၣ်ကျီးအိၣ်ဒီဒူၣ်ညါ.ပှၤတဲတဘူၣ်ဘၣ်ပှၤပျံၤဘၣ်အဝဲသ့ၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် (DKBA)သုးခိၣ်ဘိၤဘံၣ်အပှၤလၢအိၣ်ဆီသးဖဲကၠီတလူၢ်သဝီဃၢၤအံၤတဖၣ် ခိးထၢဃ့အီၣ်ဝဲစ့လၢ သိလ့ၣ်လ့ၢ်ထီၣ်လ့ၢ်လိၤတဖၣ်အအိၣ်ဒီး လၢတြဲၤအံၤအဃိကဲထီၣ်စ့ၢ်ကီးတၢ်နိးတၢ်ဘျး...
မဲၢ်ဆီးကျးဆါတၢ်လီၢ်ကီၢ်ပယီၤပှၤမၤတၢ်ဖိအ့ၣ်လိၥ်သးဝံၤအလီၢ်ခံ ကၠီၣ်တဲၣ်ဘၣ်မူဘၣ်ဒါနုၥ်လီၤသမံသမိးတၢ်ဒိၣ်ဒိၣ်မုၢ်မုၢ်
လါအီကူၥ် ၂၅ သီ, ၂၀၂၅ နံၣ်, ခ့ၣ်အဲးစံၣ် ကီၢ်ကၠီၣ်တဲၣ်,တး(ခ)ကီၢ်ရ့ၣ် မဲၢ်ဆီးဝ့ၢ်ပူၤ ကျးဆါတၢ်လီၢ်လၢပှၤကီၢ်ပယီၤဖိဆါတၢ်အါအါဂီၢ်ဂီၢ်အလီၢ်အံၤဖဲလါအီကူၥ် ၂၃, ၂၄ သီအနံၤန့ၣ် ကီၢ်ပယီၤပှၤမၤတၢ်ဖိကဒဲကဒဲတၢ်အ့ၣ်လိၥ်သး ကဲထီၣ်ဝဲဝံၤအလီၢ်ခံ ဖဲတဂီၤအံၤအဆၢကတီၢ်န့ၣ် ကၠီၣ်တဲၣ်အပှၤဘၣ်မူဘၣ်ဒါ နုၥ်လီၤသမံသမိးတၢ်ဒိၣ်ဒိၣ်မုၢ်မုၢ်အဂ့ၢ် သ့ၣ်ညါဘၣ်န့ၣ်လီၤ. လၢတၢ်န့ၣ်အဃိစးထီၣ်ဖဲတၢ်အ့ၣ်လိၥ်စိးက့ကဲထီၣ်လၢကီၢ်ပယီၤပှၤမၤတၢ်ဖိကဒဲကဒဲအဘၢၣ်စၢၤဝံၤလီၢ်ခံ ဖဲတနံၤအံၤလါအီကူး ၂၅ သီ ဂီၤခီအဆၢကတီၢ်န့ၣ် ကၠီၣ်တဲၣ်ပှၤဘၣ်မူဘၣ်ဒါဃုၥ်ဒီးပၢၤကီၢ်,တီမီ,ယိၤသုး သ့ၣ်တဖၣ်နုၥ်လီၤသမံသမိးတၢ်ဖဲဖၠါတၢ်ဆါ တၢ်ပှ့ၤ လီၢ်အခိၣ်အဃၢၤဒိၣ်ဒိၣ်မုၢ်မုၢ်ဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ်သ့ၣ်ညါဘၣ်န့ၣ်လီၤ. ဘၣ်ထွဲဒီးတၢ်ဂ့ၢ်အခီၣ်ထံးခီၣ်ဘိဟဲကဲထီၣ်အသးအဂ့ၢ်အကျိၤန့ၣ်ပှၤလၢအိၣ်ဘူးဖဲတၢ်ကဲထီၣ်သးအလီၢ်တဂၤစံးဝဲဒၣ်ဒ်အံၤန့ၣ်လီၤ. “တၢ်ဂ့ၢ်န့ၣ်ကဲထီၣ်သးလၢကျိၣ်စ့ဒ့ၣ်ကမၢ်တၢ်ဂ့ၢ်န့ၣ်လီၤ. ပှၤလၢဘၣ်န့ၢ်က့ၤစ့အအိၣ်တကပၤလဲၤဃ့က့ၤအစ့ဒီးခီဖျိပှၤ လၢဘၣ်ဟ့ၣ်လီၤစ့ဒ့ၣ်ကမၢ်အအိၣ်တကပၤတဟ့ၣ်လီၤဘၣ်အဃိတၢ်အ့ၣ်လိၥ်သးကဲထီၣ်ဝဲန့ၣ်လီၤ. စ့ဒ့ၣ်ကမၢ်လၢ ဘၣ်ဟ့ၣ် လီၤန့ၣ်ကမ့ၢ်ဝဲ(၁၀၀၀)ဘးမီၤနီၤ. အခဲအံၤန့ၣ်ဂၢၢ်ထီၣ်က့ၤဝဲလံန့ၣ်လီၤ. အခဲအံၤဖဲန့ၣ်န့ၣ်ကၠီၣ်တဲၣ်ပၢၤကီၢ်ဒီး ပှၤဘၣ်မူဘၣ်ဒါအဂၤအိၣ်ဒံးဝဲဖဲန့ၣ်လီၤ. တကးဒံဘၣ်ဒ်ကၠီၣ်တဲၣ်တၢ်ကစီၣ်သန့တနီၤတၢ်ပၥ်ဖျါပူၤအသိးန့ၣ် ပှၤကီၢ်ပယီၤဖိလၢအ့ၣ်လိၥ်သးဃုၥ်ဒီးပှၤလၢပၣ်ဃုၥ်ပၣ်ဂီၢ်ခဲ လၢၥ်(၆)ဂၤ လၢအအ့ၣ်လိၥ်သးဖဲမဟါတဟါအခါသ့ၣ်တဖၣ်အံၤဘၣ်တၢ်ဆှၢအဝဲသ့ၣ်ဆူမဲၢ်ဆီးဝ့ၢ်ပၢကီၢ်အရူလံဒီး ကတီၢ်အံၤကၠီၣ်တဲၣ်ပှၤဘၣ်မူဘၣ်ဒါတကပၤသမံသမိးဝဲဒီးတၢ်ကဆဲးဟံးန့ၢ်အဝဲသ့ၣ်အရ့ဒ်တၢ်ဘျၢသဲးစးအိၣ်ဝဲအသိးအဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးဖဲကၠီၣ်တဲၣ်ပှၤဘၣ်မူဘၣ်ဒါနုၥ်လီၤသမံသမိးတၢ်ဖဲတဂီၤအံၤအခါန့ၣ် ကီၢ်ပယီၤပှၤဆါတၢ်ဖိလၢအဆါတၢ်အလံၥ်အလဲၢ် တအိၣ်ဘၣ် တဖၣ်တၢ်သ့ကွံၥ်အဝဲသ့ၣ်တၢ်ဖိတၢ်လံၤ,တၢ်ဖီၣ်က့ၤကိးဝဲအိၣ်အဂ့ၢ်န့ၣ် တၢ်ကစီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
ကၠဲးထိၣ်ကီၢ်ဆၣ်ပူၤ ကဘီယူၤလဲၤတ့ၢ်လီၤမ့ၣ်ပိၢ်လၢသီခါဖၠၣ် သီခါသံ(၂)ပါ,ဘၣ်ဒိ(၄)ပါ
လါအီကူး ၂၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်ပူၤ ဖဲတဂီၤအံၤအဆၢကတီၢ် သုးမီၤစိရိၤအဘီယူၤပညိၣ်လဲၤတ့ၢ်လီၤ မ့ၣ်ပိၢ်လၢသီခါဖၠၣ်အဃိ သီခါသံ(၂)ပါဒီးဘၣ်ဒိ(၄)ပါအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ. ဖဲတနံၤအံၤလါအီကူး ၂၄ သီ ဂီၤခီ ၁၀း၃၀ ဃၣ်ဃၣ်အဆၢကတီၢ် လၢတကွံပူၤကရူၢ် ခၠါမၠ့ၣ်သဝီအပူၤ တၢ်ဒုးကဲထီၣ်တအိၣ် သုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ်(၁)ဖျၢၣ်ဆူ သီခါဖၠၣ်တၢ်သူၣ်ထီၣ်ဖီခိၣ်ကဲထီၣ်ဝဲန့ၣ်လီၤ. ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤ ဘၣ်ဝဲဖဲသီခါတဖၣ်အံၤအိၣ်ဖှိၣ်အီၣ်စိအကတီၢ်အဃိ တၢ်သံတၢ်ဘၣ်ဒိဘၣ်ထံးဘၣ် ဟဲအိၣ်ထီၣ်ဒ်အံၤလီၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါ တဂၤစံးဝဲဒ်အံၤန့ၣ်လီၤ. အဝဲစံးဝဲလၢ“သီခါ(၆)ပါန့ၣ်ဘၣ်လၢအအီၣ်စိအဃိဘၣ်ဝဲခဲလၢၥ်န့ၣ်.အယူၥ်ကွံၥ်န့ၣ်(၂)ပါ,အဘၣ်ဒိန့ၣ်(၄)ပါ. ခဲအံၤသီခါလၢအဘၣ် ဒိတဖၣ်ခီဖျိဘၣ်ဒိနးတၢ်ဘၣ်ယိၣ်အိၣ်အဃိ ပှၤလဲၤလီၤဆှၢအီၤဆူကၠဲးထိၣ်တၢ်ဆါဟံၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီ တၢ်ကစီၣ်န့ၣ်လီၤ. တကးဒံးဘၣ်ခီဖျိလၢကဘီယူၤအံၤအဃိ သီခါဖၠၣ်တၢ်သူၣ်ထီၣ်လီၤပှီၢ်ဟးဂီၤကွံၥ်ဝဲဒိၣ်ဒိၣ်မုၢ်မုၢ်(၁)ဖျၢၣ်ဒီး သိလ့ၣ်ဟးဂီၤတခိၣ် အဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါတဂၤဃီဝဲန့ၣ်စံးအါထီၣ်ဝဲန့ၣ်လီၤ. ဒ်န့ၣ်အသိးကၠဲးထိၣ်ကီၢ်ဆၣ်အပူၤ ဖဲအပူၤကွံၥ်တလါအံၤလါအီကူးထီၣ် ၉ သီအနံၤစ့ၢ်ကီး တၢ်ဒုးကဲထီၣ်တအိၣ် ကဘီယူၤလဲၤတ့ၢ်လီၤမ့ၣ်ပိၢ်လၢ ဖှ့ဖူကၢ်ကရူၢ် ပနွဲၢ်ပူၤသဝီအဃိ ကမျၢၢ်သံ(၁)ဂၤ ဒီး ဘၣ်ဒိ(၅)ဂၤကဲထီၣ်ဒံးဝဲန့ၣ်လီၤ. ဒူသထူၣ်ကီၢ်ရ့ၣ် ကီၢ်ဆၣ်(၅)ဘ့ၣ်အကျါလီၤဆီဒၣ်တၢ်ကၠဲးထိၣ်ကီၢ်ဆၣ်ဒူသဝီအပူၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ပယီၤသုးအံၤ ညီနုၢ်ခးလီၤဝဲကျိဖးဒိၣ်ဆူဒူသဝီ,တၢ်ဖံးအီၣ်မၤအီၣ်လီၢ်ကျဲတလီၢ်လီၢ်တကးဒံးဘၣ် ကဘီယူၤလဲၤတ့ၢ်လီၤမ့ၣ်ပိၢ်တလီၢ်လီၢ်အဃိ ကမျၢၢ်သံဘၣ်ဒိဘၣ်ထံးကဲထီၣ်ခဲအံၤခဲအံၤန့ၣ်လီၤ.
ဖၣ်အၣ်ကီၢ်ဆၣ်ပူၤ လၢကတ့ထီၣ်သီခါဖၠၣ်အဂီၢ် တၢ်ထၢဟံၣ်တဖျၢၣ်(၇၀၀,၀၀၀)ကၠးလၢသဝီ ၇ ဖျၢၣ်အပူၤ
လါအီကူး ၂၁ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် နီဖးဒိၣ်ကရူၢ် ဒူသဝီ(၇)ဖျၢၣ်အပူၤ လၢတၢ်ကတ့ထီၣ်သီခါဖၠၣ် တၢ်ထၢစ့ဟံၣ်တဖျၢၣ်(၇၀၀,၀၀၀)ကၠးအဂ့ၢ်န့ၣ် လီၢ်ကဝီၤကမျၢၢ်လၢအိၣ်ဖဲန့ၣ်တဖၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢဝၣ်တရဲၢ်သဝီပူၤ သီခါဖၠၣ်တၢ်သူၣ်ထီၣ်လီၢ်လံၤလၢအိၣ်ပၥ်အံၤ လၢတၢ်ကရိၢ်လီၤတ့ထီၣ်က့ၤလၢသီအဂီၢ် သီခါဖးဒိၣ် (အူအိးတရး)လၢအီၣ်ဖၠၣ်ဖဲန့ၣ်ဃ့ဝဲစ့ဟံၣ်တဖျၢၣ်န့ၣ်(၇၀၀,၀၀၀)ကၠးဒီး လီၤဆီဒၣ်တၢ်ကမျၢၢ်လၢအဒံၣ်အဖိလဲၤဖံးလဲၤမၤတၢ်လၢ ယိၤကီၢ်,မလ့ရှါထံဂုၤကီၢ်ဂၤတဖၣ်န့ၣ် ဃ့ဝဲတုၤလၢ(၁,၅၀၀,၀၀၀)ကၠးခိၣ်ဃၢၤညါအဂ့ၢ်န့ၣ် သ့ၣ်ညါဘၣ်န့ၣ်လီၤ. သီခါဖၠၣ်လၢတၢ်ကသူၣ်ထီၣ်ဝဲအံၤ တမ့ၢ်လၢအဟးဂီၤလီၤပှီၢ်တအိၣ်ဝဲဘၣ်အသိး တၢ်ထၢစ့အံၤတမ့ၢ်တၢ်ဆၢကတီၢ်လၢအကြၢး ဝဲဘၣ်ဒီးတကီၢ်ခါခဲအံၤကမျၢၢ်ထံဖိကီၢ်ဖိစ့ၢ်ကီးသဂၢၢ်ဘၣ်ဝဲတၢ်ဒုးတၢ်ယၤ,တၢ်လုၢ်အီၣ်နီၢ်ခိသးသမူတၢ်ဂ့ၢ်ကီလၢ ကျဲအကပၤ ကပၤအဃိ ပှၤအါဒၣ်တက့ၢ်တတူၢ်လိၥ်ဝဲတၢ်ဂ့ၢ်အံၤဘၣ်အဂ့ၢ်န့ၣ် လီၢ်ကဝီၤကမျၢၢ်လၢအိၣ်ဖဲန့ၣ်တဖၣ်စံးဝဲန့ၣ်လီၤ. ဘၣ်ဃးတၢ်ဂ့ၢ်အံၤကမျၢၢ်လၢသဂၢၢ်ဘၣ်တၢ်ကဲထီၣ်သးအံၤတဂၤစံးဝဲလၢ“အကတ့ထီၣ်ဖၠၣ်တဖျၢၣ်န့ၣ်အတဟးဂီၤဘၣ်,အဂ့ၤခဲလၢၥ်လီၤ. နကဟးထၢစ့ဟံၣ်တဖျၢၣ်လၢ(၇၀၀,၀၀၀)/အကလီၢ်တဆံ(၁,၀၀၀,၀၀၀)ညါန့ၣ်ပှၤဟ့ၣ်ကန့ၢ် ဝဲလဲၣ်ခဲအံၤဘၣ်လၢ တၢ်ဃံးတၢ်စ့ၤအကတီၢ်. တနီၤပှၤဘၣ်ဆါလီၤမဲးတဲးလဲး,ထိးအိၣ်ဒီဒူၣ်..ဘၣ်မနုၤဘၣ်ကရီတ့ဂ့ၢ်ဂီၢ်အူဖၠၣ်တဖျၢၣ်န့ၣ်လဲၣ် .သ့ၣ်ညါဝဲ လၢကထၢစ့ကတ့ထီၣ်ဖၠၣ်.မ့အဲၣ်ဒိးတ့န့ၣ်တ့တဂၤန့ၣ်တဘၣ်လိၣ်ဟးထၢစ့လၢသဝီဖိအအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ. ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ဒူသဝီ(၇)ဖျၢၣ်လၢအိၣ်နီဖးဒိၣ်ကရူၢ်ပူၤလၢတၢ်ထၢဝဲစ့သ့ၣ်တဖၣ်န့ၣ်မ့ၢ်ဝဲ ဝၣ်တရဲၢ် သဝီဖးဒိၣ်,သဝီဖိဃုၥ်ဒီး နီဖးဒိၣ်သဝီ, နိရါသဝီ, ဖှ့ဒူကူသဝီ,ထံဃီဝါသဝီသ့ၣ်တဖၣ်အံၤဒီး သဝီသ့ၣ်တဖၣ်အံၤဟံၣ်ခိၣ်ပၥ်ဖှိၣ်အိၣ်ဝဲ အဖျၢၣ်(၁၀၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံးဘၣ်(အူအိးတရး)သီခါလၢအထၢစ့အံၤ မ့ၢ်ပှၤသ့တဖၣ်လၢအတၢ်ရ့လိၥ်သးအိၣ် ဒီးသုးမီၤစိရိၤစုဒုၣ်စုတီၤဖီလၥ်ဖီၣ် စုကဝဲၤကရူၢ်ကရၢတဖၣ်အိၣ်အဃိ ကမျၢၢ်လၢအိၣ်ဖဲန့ၣ် တဖၣ်တဲနါစိၤတၢ်တဘူၣ်,ဘၣ်ပျံၤဘၣ် အဝဲသ့ၣ်အဂ့ၢ်န့ၣ် သဝီဖိလၢအဂၤတဂၤ စံးဝဲန့ၣ်လီၤ. “ဖၠၣ်န့ၣ်သီခါမးတဘၣ်ဟးဒိးအီၣ်စိဘၣ်,ပှၤလဲၤဆှၢအီၣ်မးတလၢၤဘၣ်.အဝဲသ့ၣ်ထွ့ၢ်ထီၣ်ဝဲလၢကတ့ထီၣ်ဖၠၣ်.ဖၠၣ်န့ၣ်အဂ့ၤခဲလၢၥ်လီၤ.လၢသဝီပူၤန့ၣ်ပှၤဘၣ်ကီဘၣ်ခဲလၢတၢ်ဒုးတၢ်ယၤန့ၣ်တကျိၤ,လၢအီၣ်တအိၣ်အီတအိၣ်ဘၣ်န့ၣ်တကျိၤ,လၢဒ့ၣ် ထီၣ်ကမၢ် ထီၣ်တကျိၤ.လၢမ့အီၤလဲၤနါက့မၤတကပၤ,လၢအဝဲသ့ၣ်ခီဒီးမၤဒ်အံၤဘျီပှၤသဝီဖိဘၣ်တၢ်ကီတၢ်ခဲ.ပှၤဝဲပှၤဆိကမိၣ်လၢတၢ်ဒုးမ့ကဲထီၣ်န့ၣ်မ့ၢ်ပှၤကဘၣ်ဃ့ၢ်ဖဲလဲၣ်,ပှၤကဘၣ်အီၣ်အီဒ်လဲၣ်ပှၤဆိမိၣ်တၢ်တဖၣ်န့ၣ်လီၤ.မ့မ့ၢ်အဝဲသ့ၣ်ခီဂုၥ်ကရီတ့လၢဃိၣ်တ့လၢဝၣ်ကမၤမနုၤလဲၣ်.မ့ဟဲထီၣ်တမံၤမံၤန့ၣ်ပှၤတဲစိးအဝဲသ့ၣ်တဘူၣ်ဘၣ်.အဝဲသ့ၣ်မၤဝဲဒ်သိး(အာဏာရှင် )ဒ်န့ၣ်မီၤနီၤ”အဂ့ၢ်န့ၣ် စံးဝဲန့ၣ်လီၤ. ဒ်န့ၣ်အသိးတကီၢ်ခါခဲအံၤကမျၢၢ်တနီၤလၢတၢ်ပျံၤတၢ်ဖုး,တၢ်တသ့တဘၣ်အပူၤဟ့ၣ်လီၤစ့အိၣ်တနီၤလံဒီး...
KNLA သုးက့-၄ ခိးခးပယီၤသုးကျိၤဒီးမၤန့ၢ်တၢ်စုကဝဲၤဒီးကျိချံပှၥ်သၣ်အါအါဂီၢ်ဂီၢ်
လါအီကူၥ် ၂၁ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်(သုးက့-၄)တၢ်ပၢဟီၣ်ကဝီၤ,ကစၢၢ်ဒိၣ်ကီၢ်ဆၣ်အ ပူၤဖဲလါအီကူၥ် ၁၈, ၁၉, ၂၀ သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဃုၥ်ဒီးတၢ်ပၢၢ်ဆၢသုးပၥ်ဖှိၣ်ခိးခးဝဲပယီၤမီၤစိရိၤသုးကျိၤလၢဟဲထီၣ်တဖၣ်အဃိတၢ်မၤန့ၢ်ဝဲပယီၤသုးတၢ်စုကဝဲၤဒီးကျိချံပှၥ်သၣ်အါအါဂီၢ်ဂီၢ်အဂ့ၢ်ကီၢ်ဆၣ်ပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးကျိၤလၢကဟဲထီၣ်ဝဲဒၣ်ဆူဝ့ၢ်တၢ်အဲၣ်ဒီးကၠီၣ်မဲဒီၣ်သ့ၣ်တဖၣ်အံၤလၢ(၃)သီအတီၢ်ပူၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢသုးပၥ်ဖှိၣ်ခိးခးဝဲပယီၤသုးဖဲ(ဘဲးမတဲး)တဘျီဒီးနုၥ်လီၤခးဝဲဖဲ(ကၠီၣ်မဲဒီၣ်)တဘျီအဃိတၢ်မၤန့ၢ်ဝဲပယီၤသုးတၢ်စုကဝဲၤအမဲၥ်ညါပယီၤသုးအပှၤသံအဂၤ(၂၀)ဃၣ်ဃၣ်ဒီးတၢ်ဖီၣ်မူဒံးန့ၢ်ဝဲ(၃)ဂၤအဂ့ၢ်ကစၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးအသုးကျိၤလၢဟဲထီၣ်ဃုၥ်ဒီးသိလ့ၣ်သ့ၣ်တဖၣ် KNLA သုးရ့ၣ် ၁၀, သုးရ့ၣ် ၁၂ ဒီးတၢ်ပၢၢ်ဆၢသုး ပၥ်ဖှိၣ်တကပၤခးဟးဂီၤကွံၥ်ဝဲဒၣ်သိလ့ၣ်ခဲလၢၥ်(၈)ခိၣ်ဒီးအကျါခံခိၣ်န့ၣ်တၢ်မၤန့ၢ်ကွံၥ်ဝဲတၢ်ဖိတၢ်လံၤသ့ၣ်တဖၣ်ဝံၤတၢ်ဒွဲၣ်အီၣ်ကွံၥ်ဝဲဒၣ်အဂ့ၢ်သ့ၣ်ညါဘၣ်လၢကီၢ်ဆၣ်တၢ်ပၥ်ဖျါပူၤအသိးန့ၣ်လီၤ. တကီၢ်ခါခဲအံၤပယီၤသုးကျိၤအံၤဂုၥ်လီၤက့ၤအခံအဂ့ၢ်ကစၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါစံးဝဲလၢ “အခဲအံၤ န့ၣ်ပယီၤသုးဂုၤက့ၤဝဲအခံလံန့ၣ်လီၤ. မ့ၢ်အဝဲသ့ၣ်တုၤလီၤက့ၤဝဲဖဲလဲၣ်န့ၣ်ပမၤတန့ၢ်ဒံးဘၣ်န့ၣ်လီၤ.” အဂ့ၢ်စံး ဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တၢ်မၤန့ၢ်ပယီၤသုးမီၤစိရိၤတၢ်စုကဝဲၤသ့ၣ်တဖၣ်န့ၣ်မ့ၢ်ဝဲ MA1(၅)ခိၣ်, G3(၁)ခိၣ်, 120MMအချံ(၁၅) ဖျၢၣ်, 60MMချံ(၃၇)ဖျၢၣ်, RPG7အချံ(၁၇)ဖျၢၣ်, MAကျိဆၣ်ဒၢအဘ့ၣ်(၁၀)ဒီးချံ(၄၀၅၀)ဖျၢၣ်, ညၣ်မဲၥ်7.52ချံ (၁၅၀)ဖျၢၣ်, G3ကျိဆၣ်ဒၢ(၄)ဘ့ၣ်, Jammerစဲး(၁)ဖျၢၣ်, တၢ်အီၣ်(၁၃)ထၢၣ်သ့ၣ်တဖၣ်အံၤန့ၣ်လီၤ. လၢန့ၣ်အမဲၥ်ညါတၢ်လီၢ်လၢပယီၤသုးကျိၤလၢဟဲထီၣ်သ့ၣ်တဖၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိတၢ်ပၢၢ်ဆၢသုးပၥ်ဖှိၣ်အဘၢၣ်စၢၤတၢ်ဒုးကဲထီၣ်အလီၢ်သ့ၣ်တဖၣ်န့ၣ်ပယီၤသုးမီၤစိရိၤမၤဝဲကလံၤကျါကဘီယူၤတၢ်ဟဲတ့ၢ်လီၤဝဲမ့ၣ်ပိၢ်အိၣ်ဝဲ(၇)ဘျီစ့ၢ်ကီးအဂ့ၢ်ဒ်ဘျံးဒဝဲၢ်ကီၢ်ရ့ၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. တၢ်သ့ၣ်ညါဘၣ်လၢပယီၤသုးကျိၤအံၤဖဲအပူၤကွံၥ်လါအီကူၥ်(၁၅)သီအနံၤန့ၣ်လၢဒဝဲၢ်ဝ့ၢ်တဆီဃုၥ်ဒီးသိလ့ၣ်(၁၄)ခိၣ်ဟဲထီၣ်ဝဲဒ်သိးကဆှၢထီၣ်တၢ်အီၣ်ဒီးကျိချံပှၥ်သၣ်ဆူအပှၤဝ့ၢ်တၢ်အဲၣ်ဒီးကၠီၣ်မဲတီၣ်အအိၣ်အဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအိၣ်န့ၣ်လီၤ.