လါဖ့ၤဘြူၤအါရံၤ ၂၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ သုးမီၤစိရိၤအသုးဖိသီဟဲက့ၤဟ့ၣ်လီၤကဒီးသး ၁၀ ဂၤ အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲတနံၤအံၤလါဖ့ၤဘြူၤအါရံၤ ၂၁ သီ အနံၤ န့ၣ်လီၤ.
ဖဲလါဖ့ၤဘြူၤအါရံၤ ၁၇ သီအနံၤန့ၣ် သုးမီၤစိရိၤအသုးဖိသီလၢအမ့ၢ် မီၤခၠ့ၣ်ဝ့ဖၠိ(၂၄)နံၣ်, ခၠ့ၣ်မီၤမီၤ (၂၇)နံၣ်, သဲၣ်လွ့ၤအူ (၂၈)နံၣ်, သဲၣ်လွ့ၤစိ(၃၄)နံၣ် ၄ ဂၤအံၤ ဟဲက့ၤဟ့ၣ်လီၤအသးဆူဟီၣ်ကဝီၤကညီ ဒီကလုၥ်ဂၢၤသးကရၢ(KNDO) သုးရ့ၣ်-၃ အအိၣ်န့ၣ်လီၤ.
သုးဖိသီလၢအဟဲက့ၤဟ့ၣ်လီၤသး(၄)ဂၤအံၤမ့ၢ်ပှၤသ့ၣ်တဖၣ်လၢဖျိထီၣ်ဝဲ(၁၃)ဝီဒီး(၁၅)ဝီသုးတၢ်မၤလိသ့ၣ်တဖၣ်ဒီး အဝဲသ့ၣ်အံၤ ဖဲအလီၤဘၣ်မူဒါလၢခီၣ်ချ့သုးရ့ၣ်(ခမရ-၄၃၉)သုးရ့ၣ်အံၤအခါဃ့ၢ်ဖျိးထီၣ်ဝံၤဘၣ်ဟဲက့ၤပၥ်လီၤစုကဝဲၤဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်န့ၣ်အသိးသုးဖိသီ(၄)ဂၤအံၤအမဲၥ်ညါ ဖဲမဟါလါဖ့ၤဘြူၤအါရံၤ ၂၀ သီအနံၤစ့ၢ်ကီး သုးဖိသီလၢအဖျိထီၣ်ဝဲ(၁၆)ဝီသုးတၢ်မၤလိ အံၤ(၆)ဂၤ ဖဲအဝဲသ့ၣ်လီၤမူဒါဖဲခီၣ်ချ့သုးရ့ၣ်(ခမရ-၅၉၈)သုးရ့ၣ်အဆၢကတီၢ်ဃ့ၢ်ဖျိးထီၣ်ဟဲက့ၤပၥ်လီၤစုကဝဲၤ လၢကညီဒီကလုၥ် တၢ်ထူၣ်ဖျဲး သုးမုၢ်ဒိၣ်(KNLA) သုးရ့ၣ်-၉ အအိၣ်စ့ၢ်ကီးန့ၣ်လီၤ.
သုးဖိသီလၢအဟဲက့ၤပၥ်လီၤစုကဝဲၤလၢသုးရ့ၣ်-၉ အအိၣ်(၆)ဂၤအံၤမ့ၢ်ဝဲ တ့ၤမီၤမၠၣ်(၃၀)နံၣ်, ကၠီၤလ့ထဲၣ်(၃၁)နံၣ်, သါထ့အီၤ(၃၂)နံၣ်, ဖိသါ(၃၂)နံၣ်, ယဲကၠီၤသူၤဝ့(၃၄)နံၣ် ဒီး မၠိဝ့စီၣ်(၄၈)နံၣ် သ့ၣ်တဖၣ်အံၤန့ၣ်လီၤ.
ဒ်ခ့ၣ်အဲၣ်ယူၣ်စံးဝဲအသိးန့ၣ် သုးမီၤစိရိၤအသုးဖိသီလၢအဟဲက့ၤပၥ်လီၤစုကဝဲၤလၢဘျီဝဲအံၤကိးဂၤဒဲးန့ၣ် နုၥ်လီၤသုးလၢ အတအိၣ် ဒီး နီၢ်ကစၢ်တၢ်ဘၣ်သးဘၣ် မ့မ့ၢ်တခီဘၣ်တၢ်ဖီၣ်န့ၢ်ဆူၣ်အဝဲသ့ၣ်ဝံၤဒုးထီၣ်ဆူၣ်အဝဲသ့ၣ်လၢသုးတၢ်မၤလိန့ၣ်လီၤ.
ဒ်န့ၣ်အသိးလၢၢ်ဒိၣ်ကီၢ်ဆၣ်ပူၤဖဲအပူၤကွံၥ်လါဖ့ၤဘြူၤအါရံၤ ၁၂ သီအနံၤစ့ၢ်ကီး ပယီၤသုးခီၣ်သုးရ့ၣ်(၆၀/၃၅၁/၄၃၉/၅၉၈) သုးရ့ၣ် ဒီးခီၣ်ချ့သုးရ့ၣ်(ခမရ-၅၃)သုးရ့ၣ်ပူၤ သုးဖိသီလၢအသးနံၣ်အိၣ်(၂၃)နံၣ်ဒီး(၄၁)နံၣ်အဘၢၣ်စၢၤ (၉)ဂၤ ဟဲက့ၤဟ့ၣ်လီၤ သးဆူကညီဒီကလုၥ်ဂၤသးကရၢ(KNDO) သုးရ့ၣ်-၃ အအိၣ် ဒံးန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤ ထဲဒၣ်လၢၢ်ဒိၣ်ကီၢ်ဆၣ်တဘ့ၣ်အပူၤ စးထီၣ်ဖဲတလါအံၤလါဖ့ၤဘြူၤအါရံၤ ၄ သီ တုၤဖဲမဟါ ၂၀ သီအနံၤန့ၣ် သုးမီၤစိရိၤအသုးဖိသီဟဲက့ၤဟ့ၣ်လီၤသးလၢ(KNDO)ဒီး(KNLA)သုးရ့ၣ်အအိၣ် ပၥ်ဖှိၣ်အိၣ်(၂၀)ဂၤ လံအဂ့ၢ်န့ၣ် ကီၢ်ရ့ၣ်တၢ်မၤစရီပူၤအသိးသ့ၣ်ညါဘၣ်န့ၣ်လီၤ.
