Facebook ပူၤတၢ်စးထီၣ်သူဒီးကွဲးဖး၀ဲကညီကျိၥ်ဃုၥ်ဒီးကလုၥ်ဒူၣ်ကျိၥ်လၢအဂၤကန့ၢ်ခဲလၢၥ်
လါယူၤ ၂၆ သီ, ၂၀၂၅ နံၣ်, ခ့ၣ်အဲးစံၣ် အပူၤကွံၥ်ကညီကျိၥ်ဃုၥ်ဒီးကီၢ်ပယီၤကလုၥ်ဒူၣ်ကျိၥ်လံၥ်မဲၥ်ဖျၢၣ်လၢတၢ်ဖးအီၤတန့ၢ်ခဲလၢၥ်ဘၣ်အံၤတဖၣ်လၢကဟဲခဲမုၢ်ဆ့ၣ် လါယူၤ ၂၆ သီ အနံၤအံၤ တၢ်စးထီၣ်သူဒီးကဟဲအိၣ်ဖျါထီၣ်သးလၢအဂ့ၢ်အ၀ီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ကီၢ်ပယီၤပူၤကညီကလုၥ်ဃုၥ်ဒီးယိၤဒိၣ်,တလၢၤ,ရၢၣ်ခၢၣ်ကလုၥ်ဒူၣ်လၢအဂၤတဖၣ်အပူၤကွံၥ်ဖဲတၢ်ကွဲးလံၥ်ကွဲးလဲၢ် တီၣ်ထီၣ် ဆူ(facebook)ပူၤအခါန့ၣ် တၢ်သူ၀ဲ(Zawgyi font),( Unicode font)အိၣ်ဘၣ်ဆၣ် လံၥ်မဲၥ်ဖျၢၣ်သ့ၣ် တဖၣ် ဟဲအိၣ် ဖျါထီၣ်သးတဘၣ်ဘျီးဘၣ်ဒါ,တၢ်ဖး၀ဲတသ့ခဲလၢၥ်ဘၣ်န့ၣ်ပကထံၣ်ဘၣ်၀ဲလီၤ. အဃိစးထီၣ်ဖဲအပူၤကွံၥ်(၂၀၂၄)လါယူၤလံ ၁၀ သီန့ၣ် ဒ်သိးတၢ်သူဒီးကွဲးကညီကျိၥ်လၢခီဖၠူထၢၣ်ဒီးလီတဲစိပူၤ ကသ့ညီအဂီၢ်န့ၣ် ခ့ၣ်အဲၣ်ယူၣ်-ကညီဒီ ကလုၥ်စၢဖှိၣ်ကရၢ (IT)ပှၤသ့ပှၤဘၣ်ကရူၢ်စးထီၣ်ရၤလီၤဒုးသ့ၣ်ညါ၀ဲကညီကျိၥ်(Unicode) အံၤန့ၣ်လီၤ. တကးဒံးဘၣ်ဒ်သိးကညီကလုၥ်အကျိၥ်ကဒိၣ်ထီၣ်ထီထီၣ်,တၢ်ကွဲးအီၤဖးအီၤ ကလဲၤသးဘၣ်လိၥ်ဖိးဒ့,လံၥ်မဲၥ်ဖျၢၣ်ကဖျါထီၣ် ဘၣ်ဂ့ၢ်ဘၣ်၀ီအဂီၢ်န့ၣ် ဖဲ(၂၀၂၄)လါအီကူးအခါန့ၣ်စ့ၢ်ကီး တၢ်ဆှၢထီၣ်၀ဲတၢ်ဂ့ၢ်တၢ်ကျိၤဆူ(facebook Team)အအိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိး(face Team)ခီပနံၣ်ကတူၢ်လိၥ်ဘှါဆှဲ၀ဲလံၥ်မဲၥ်ဖျၢၣ်တၢ်ဂ့ၢ်ကီသ့ၣ်တဖၣ်အံၤအဂီၢ် ဖဲတနံၣ်အံၤ(၂၀၂၅) လါဖ့ၤဘြူၤအါရံၤအခါန့ၣ် တၢ်မၤ၀ဲတၢ်ဆဲးလီၤတၢ်ပတုၥ်သူက့ၤ(Zawgyi)ဒီးဆီၣ်ထွဲက့ၤ(Unicode) Campaign တၢ်ရဲၣ် တၢ်ကျဲၤလၢ(အီၤလါ)ပူၤအိၣ်ထီၣ် ၀ဲန့ၣ်လီၤ. Campaign တၢ်ရဲၣ်တၢ်ကျဲၤအိၣ်ထီၣ်၀ံၤဖဲတလါအံၤလါယူၤ ၁၃ သီအနံၤန့ၣ် (Meta)ခီပနံၣ်ထုးထီၣ်ဒုးသ့ၣ်ညါဘိးဘၣ်ရၤ လီၤ၀ဲလၢစးထီၣ်ကဟဲလါယူၤ ၂၆ သီ အနံၤန့ၣ် ကီၢ်ပယီၤအပူၤ(facebook)ဒီး(Messenger)အံၤ တၢ်ကစးထီၣ် ပတုၥ်ကွံၥ် ၀ဲတၢ်သူ(Zawgyi font)ဒီးမ့မ့ၢ်တခီ တၢ်ကသူက့ၤထဲဒၣ်လၢ(Unicode)တခါဧိၤလီၤအဂ့ၢ်န့ၣ်...
မဲၢ်လးဒဲကဝီၤပှၤဘၣ် ခၣ်သံၣ်ညိး(ကိၥ်ယူၢ်ဆါ) တၢ်ဆါဟဲအါထီၣ်တုၤအဂၤ(၅၀၀)ဘျဲၣ်
လါယူၤ ၂၅ သီ, ၂၀၂၅ နံၣ်, ခ့ၣ်အဲးစံၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢကညီဘၣ်ကီဘၣ်ခဲဒဲကဝီၤတဖျၢၣ်လၢအမ့ၢ်မဲၢ်လးဘၣ်ကီဘၣ်ခဲဒဲကဝီၤအပူၤအံၤတကီၢ်ခါတၢ်စူၤခါ အဆၢကတီၢ်ခဲအံၤန့ၣ်ပှၤဘၣ်ဝဲ ခၣ်သံၣ်ညိး(ကိၥ်ယူၢ်ဆါ) တၢ်ဆါဟဲအါထီၣ်ဝဲတုၤလၢအဂၤ(၅၀၀)ဘျဲၣ်လံအဂ့ၢ်မဲၢ်လးဒဲကဝီၤပှၤ ဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ခၣ်သံၣ်ညိး(ကိၥ်ယူၢ်ဆါ)တၢ်ဆါအံၤဟဲစးထီၣ်ကဲထီၣ်အသးဖဲတၢ်စူၤလီၤသီအဆၢကတီၢ်ဒီးတၢ်ဆါအံၤစးထီၣ်ကဲထီၣ်အသးသီသီအခါအတၢ်ပနီၣ်မ့ၢ်ဝဲတၢ်ဘၣ်သမုၢ်,တၢ်ကိၢ်ထီၣ်,ကိၥ်ယူၥ်ဆါဒီးခၣ်သံၣ်ကညိးဝဲတၢ်ပနီၣ်သ့ၣ်တဖၣ်ကဲထီၣ်ဝဲဒၣ်န့ၣ်လီၤ. တကီၢ်ခါခဲ အံၤန့ၣ်ပှၤလၢဟဲထီၣ်တၢ်ဆါဟံၣ်အါကတၢၢ်န့ၣ်မ့ၢ်ဝဲပှၤလၢတူၢ်ဘၣ်တၢ်ဆါသ့ၣ်တဖၣ်အံၤအဂ့ၢ်မဲၢ်လးဒဲကဝီၤနဲၣ်ရွဲၣ်စီၤဆါဒ့စံးဝဲဒ်အံၤန့ၣ်လီၤ. "စးထီၣ်ကဲထီၣ်အသးဖဲတၢ်စူၤလီၤသီသီဒီးအဂၤန့ၣ်မ့ၢ်လၢအီၣ်ဘၣ်ဝဲဒၣ်ထံချံၣ်,တၢ်ချံၣ်အဃိန့ၣ်လီၤ. တၢ်ဆါအံၤစးထီၣ်သးသီသီလၢတၢ်ဘၣ် သမုၢ်, တၢ်ကူး, တၢ်ကခၠဲ ဒီးမ့ၢ်ဝံၤအလီၢ်ခံန့ၣ်ဟဲကဲထီၣ်သးလၢတၢ်ကိၢ်ထီၣ်န့ၣ်လီၤ. တၢ်ကိၢ်ထီၣ်မ့ၢ်ဝံၤန့ၣ်ခၣ်သံၣ်ညိၣ်ဟဲကဲထီၣ် သးလီၤ. အခဲအံၤန့ၣ်ပှၤဟဲထီၣ်တၢ်ဆါဟံၣ်ဒုအါလၢခၣ်သံၣ်ညိၣ်န့ၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါမ့ၢ်ဘၣ်ကွၢ်က့ၤဝဲမဲၢ်လးဒဲကဝီၤအပူၤပှၤဘၣ်တၢ်ဆါဒ်သိးအံၤကဲထီၣ်အသးအိၣ်ဝဲကိးနံၣ်ဃၣ်ဃၣ်ဘၣ်ဆၣ်မ့ၢ်ဘၣ်ထိၣ်သတြီၤက့ၤနံၣ်လၢအပူၤကွံၥ်ဒီးတနံၣ်ညါအံၤန့ၣ်,တနံၣ်အံၤဟဲကဲထီၣ်အသးအါကတၢၢ်ဒီးပှၤလၢဘၣ်တၢ်ဆါသ့ၣ်တဖၣ်အါဒၣ်တက့ၢ်န့ၣ်မ့ၢ်ဝဲပှၤဖိသၣ်လၢအသးနံၣ်အိၣ်(၅)ဒီး(၁၃)နံၣ်အဘၢၣ်စၢၤန့ၣ်လီၤ. ဒီးခၣ်သံၣ်ညိး(ကိၥ်ယူၢ်ဆါ)တၢ်ဆါအံၤမ့ၢ်တၢ်ဆါလၢအဘၣ်ကူဘၣ်ဂၥ်လိၥ်သးသ့အဂ့ၢ်သရၣ်စီၤဆါဒ့စံးအါထီၣ်ဝဲဒၣ်န့ၣ်လီၤ. ဒ်မဲၢ်လးဒဲကဝီၤတၢ်မၤနီၣ်စရီပူၤအိၣ်ဝဲအသိးန့ၣ်တကီၢ်ခါခဲအံၤခီဖျိလၢ ခၣ်သံၣ်ညိး(ကိၥ်ယူၢ်ဆါ)တၢ်ဆါအံၤအဃိပှၤဒဲကဝီၤဖိလၢဟဲ ဒုးနဲၣ်အသးလၢတၢ်ဆါဟံၣ်အိၣ်ထီၣ်ဝဲတုၤလၢ(၅၀၅)ဂၤအမဲၥ်ညါပှၤလၢဘၣ်တၢ်ညၣ်ဂိၢ်အိၣ်ဝဲ(၃၇)ဂၤဒီးပှၤဘၣ်တၢ်ညၣ်ဂိၢ်သွံၣ်ဟးထီၣ်ခဲလၢၥ်အိၣ်ဝဲ(၁၁)ဂၤအဂ့ၢ်သ့ၣ်ညါဘၣ်လၢဒဲကဝီၤပှၤဘၣ်မူဘၣ်ဒါအိၣ်န့ၣ်လီၤ. မ့ၢ်လၢတၢ်စူၤခါကတီၢ်အံၤန့ၣ်တၢ်ဆူးတၢ်ဆါသ့ၣ်တဖၣ်ကဲထီၣ်အသးအါဝဲဒၣ်အဖီခိၣ်ဒဲကဝီၤအပူၤပှၤဘၣ်မူဘၣ်ဒါတကပၤမ့ၢ်ဂ့ၤ,ဆူၣ်ချ့ပှၤမၤတၢ်ဖိတကပၤမ့ၢ်ဂ့ၤမၤဝဲတၢ်ဒုးသ့ၣ်ညါလီၤတၢ်လၢဒဲကဝီၤအပူၤအိၣ်ဝဲအသိးဟးလီၤဟ့ၣ်တၢ်သိၣ်လိမ့ၢ်ဂ့ၤ,ဟးခးန့ၢ်ဝဲကသံၣ်လၢကဝီၤဒ့အပူၤမ့ၢ်ဂ့ၤအိၣ်ဝဲအဂ့ၢ်ဒဲကဝီၤပှၤဘၣ်မူဘၣ်ဒါသ့ၣ်တဖၣ်စံးဝဲန့ၣ်လီၤ.
တလါအံၤလါယူၤအတီၢ်ပူၤပယီၤသုးဖိ(၃)ဂၤဟဲက့ၤပၥ်လီၤစုကဝဲၤလၢ(သုးက့-၄)အစုပူၤ
လါယူၤ ၂၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်(သုးက့-၄)ဟီၣ်ကဝီၤအပူၤတလါအံၤလါယူၤအတီၢ်ပူၤပယီၤ သုးဖိဟဲက့ၤပၥ်လီၤတၢ်စုကဝဲၤခဲလၢၥ်အိၣ်ဝဲ(၃)ဂၤအဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဝဲဖဲမဟါလါယူၤ (၂၄)သီအနံၤန့ၣ်လီၤ. ပယီၤသုးဖိလၢအဟဲက့ၤပၥ်လီၤစုကဝဲၤဖဲ(သုးက့-၄)အစုပူၤ(၃)ဂၤအကျါ(၂)ဂၤန့ၣ်ဖဲလါယူၤ(၆)သီအနံၤန့ၣ်ဟဲဃ့ၢ် ဖျိးထီၣ်ဝဲဒၣ်ဆူ(သုးက့-၄)လၢၢ်ဒိၣ်စိကီၢ်ဆၣ်,သုးရ့ၣ်(၁၀)အစုပူၤဒီးပှၤခံဂၤလၢၤအံၤတၢ်စုကဝဲၤတပၣ်ဃုၥ်နီတမံၤဘၣ် အဂ့ၢ်ဒ်လံၥ်တၢ်ပၥ်ဖျါအပူၤသ့ၣ်ညါဘၣ်န့ၣ်လီၤ. ဒီးမ့မ့ၢ်ပယီၤသုးဖိလၢအဂၤတဂၤခီန့ၣ်ဟဲက့ၤပၥ်လီၤတၢ်စုကဝဲၤဖဲလါယူၤ(၂၁)သီအနံၤဖဲလၢၢ်မုၢ်လါကီၢ်ဆၣ်,ကညီဒီကလုၥ်ဂၢၤသးကရၢသုးရ့ၣ်(၇)အစုပူၤဒီးလၢန့ၣ်အမဲၥ်ညါပယီၤသုးဖိတဂၤအံၤဖဲဟဲက့ၤပၥ်လီၤတၢ်စုကဝဲၤအခါဟဲက့ၤစိၥ်ဃုၥ်ဝဲဒီးMA3ကျိ(၁)ခိၣ်, ကျိဆၣ်ဒၢ(၄)ဘ့ၣ်, ကျိချံ(၁၂၀)ဖျၢၣ်သ့ၣ်တဖၣ်န့ၣ်လီၤ. ပယီၤသုးဖိ(၃)ဂၤအံၤတၢ်တူၢ်လိၥ်အီၤ,တၢ်ဟ့ၣ်လၤကပီၤအဝဲသ့ၣ်ကျိၣ်စ့တဆံးတက့ၢ်အသိးပှၤ(၃)ဂၤအံၤတၢ်တဟံန့ၢ်အဝဲသ့ၣ်အရ့ဘၣ်,ခီဖျိအဝဲသ့ၣ်မ့ၢ်ပှၤလၢတအဲၣ်ဒိးကဲသုးဘၣ်ဒီးမ့ၢ်ဒၣ်လၢပယီၤသုးမၢဆူၣ်ကဲဆူၣ်အဝဲသ့ၣ်သုးအဃိလီၤအဂ့ၢ်ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲန့ၣ်လီၤ. "ပှၤသၢဂၤအံၤတၢ်တဟံန့ၢ်ဂ့ၢ်ဝီနီမံၤဘၣ်. အိၣ်ဒၣ်လၢတၢ်တူၢ်လိၥ်အီၤဒီးတၢ်ဟ့ၣ်မၤစၢၤအဝဲသ့ၣ်လၢကျိၣ်စ့တဆံးတ က့ၢ်မီၤနီၤ. ဘၣ်မနုၤအဃိလဲၣ်န့ၣ်အဝဲသ့ၣ်တအဲၣ်ဒိးကဲဝဲပယီၤသုးဘၣ်. မ့ၢ်လၢပယီၤသုးထၢဆူၣ်အဝဲသ့ၣ်သုးအဃိအ ဝဲသ့ၣ်ဃ့ၢ်ဖျိးဝဲဒၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါဒ်ကီၢ်ရ့ၣ်အပှၤဘၣ်မူဘၣ်ဒါစံးဝဲအသိးန့ၣ်ပှၤသုးဖိလၢအဲၣ်ဒိးဃ့ၢ်ပူၤဖျဲးထီၣ်သးဘၣ်ဆၣ်ဃ့ၢ်ပူၤဖျဲးသးတညီသ့ၣ်တဖၣ်အိၣ်ဒံးဝဲအါမးအဂ့ၢ်ပဒိၣ်စီၤအဲၣ်နၤစံးအါထီၣ်ဝဲဒၣ်န့ၣ်လီၤ. ဒ်န့ၣ်အသိးပယီၤသုးဖိ(၃)ဂၤအံၤမ့ၢ်ဝဲပှၤသးစၢ်လၢအသးနံၣ်အိၣ်ဒံးဒၣ်ထဲအနံၣ်(၂၀)တဂၤ,(၂၁)နံၣ်တဂၤဒီး(၂၂)နံၣ်တဂၤသ့ၣ်တဖၣ်အသိးပှၤသ့ၣ်တဖၣ်အံၤဘၣ်တၢ်ဖီၣ်န့ၢ်ဆူၣ်အီၤလၢပယီၤသုးကီၣ်ကးဒီးပယီၤသုးမၢဆူၣ်အဝဲသ့ၣ်ကဲသုးဝံၤဆှၢထီၣ်ဝဲဒၣ်ဆူတၢ်မဲၥ်ညါဒ်အံၤလီၤအဂ့ၢ်ဒ်လံၥ်တၢ်ပၥ်ဖျါပူၤအသိးပၥ်ဖျါဝဲန့ၣ်လီၤ.
Airbus ပတုၥ်ကွံၥ်တၢ်ဘျၢလီၤကျိၣ်စ့လၢ AVIC အအိၣ်အဖီခိၣ် Burma Campaign UKတူၢ်လိၥ်
လါယူၤ ၂၅, ၂၀၂၅နံၣ်, ခ့ၣ်အဲးစံၣ် ကီၢ်စၢဖှိၣ်ယူရပၤပူၤ ကဘီယူၤ ခီပနံၣ်အဒိၣ်ကတၢၢ်တဖျၢၣ်လၢအမ့ၢ် Airbus ခီပနံၣ်အံၤပတုၥ်ကွံၥ်ဝဲတၢ်ဘျၢလီၤကျိၣ်စ့လၢ တရူးသုးပဒိၣ်ပၢ တၢ်တ့ထီၣ်ကဘီယူၤ AVIC အခီပနံၣ်အဂ့ၢ် Justice for Myanmar ထုးထီၣ်ပၥ်ဖျါဝဲဖဲအပူၤကွံၥ်လါယူၤ(၁၉)သီအနံၤန့ၣ်လီၤ. ကီၢ်ယူရပၤ Airbus ခီပနံၣ်အံၤမ့ၢ်ခီပနံၣ်အဒိၣ်ကတၢၢ်တဖျၢၣ်လၢတၢ်ထုးထီၣ်ဝဲကဘီယူၤဒီးအခဲအံၤ ပတုၥ်ကွံၥ်ဝဲတၢ်ဘျၢလီၤကျိၣ်စ့ လၢ တရူးတၢ်ထုးထီၣ်ကဘီယူၤခီပနံၣ်လၢအမ့ၢ် AVIC လၢအကဲထီၣ်တၢ်မၤစၢၤလၢကီၢ်ပယီၤသုးကီၣ်ကးအဂီၢ်ဒ်အံၤအဖီခိၣ်န့ၣ်မ့ၢ်ဝဲတၢ်လၢအဂ့ၤတခါဒီးတူၢ်လိၥ်ဝဲဒၣ် Burma Campaign UKအပှၤနဲၣ်တၢ် သရၣ်မုၣ်နၣ်စိၣ်ယါဖါ စံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“တၢ်ဝဲအံၤပထံၣ်လၢအမ့ၢ်တၢ်လၢအဂ့ၤန့ၣ်လီၤ.Airbus အံၤမ့ၢ်ဝဲဒၣ် ကဘီယူၤအခီပနံၣ်အဒိၣ်ကတၢၢ်လၢကီၢ်ယူရပၤအပူၤန့ၣ်လီၤ.လၢတရူးခီပနံၣ် AVIC အဂီၢ်န့ၣ် Airbus အံၤမ့ၢ်ဝဲပှၤမၤသကိးမုၢ်ကျိၤဝဲကွၥ်ဖးဒိၣ်တခါန့ၣ်လီၤ.အဃိန့ၣ်ခဲအံၤကဲထီၣ်ဝဲဒၣ်တၢ်လီၤဟိလီၤဖျဲၣ်ဖးဒိၣ်တခါလၢ AVIC ခီပနံၣ်အဂီၢ်န့ၣ်လီၤ.AVIC ခီပနံၣ်ဝဲအံၤခီန့ၣ် မၤစၢၤဝဲဒၣ်ကီၢ်ပယီၤသုးမီၤစိရိၤ(စကစ)လၢ ဆါန့ၢ်ဝဲဒၣ် ကဘီယူၤဒုးသုးမ့ၢ်ဂ့ၤ,ကဘီယူၤအက့အခီတၢ်ပီးတၢ်လီသ့ၣ်တဖၣ်မ့ၢ်ဂ့ၤ,တၢ်မၤစၢၤဆီၣ်ထွဲလၢတၢ်ဟ့ၣ်တၢ်သိၣ်လိသ့ၣ်တဖၣ်မ့ၢ်ဂ့ၤန့ၣ်အိၣ်တဘျုးမံၤန့ၣ်လီၤ.”အဂ့ၢ် စံးဝဲဒၣ်န့ၣ်လီၤ. လၢန့ၣ်အမဲၥ်ညါ တၢ်အံၤကဲထီၣ်ဝဲဒၣ်တၢ်ဒိတၢ်တဲၥ်ဒီးတၢ်ဟ့ၣ်ပလီၢ်တခါလၢ ခီပနံၣ်လၢအဂၤသ့ၣ်တဖၣ် သုတမၤသကိးတၢ်ဒီးတရူးအခီပနံၣ်လၢအဆီၣ်ထွဲမၤစၢၤ ကီၢ်ပယီၤသုးမီၤစိရိၤအၢအၢသီသီတဖုအံၤအဂီၢ်တဂ့ၤအဂ့ၢ် သရၣ်မုၣ်နၣ်စိၣ်ယါဖါတဲအါထီၣ်ဝဲဒၣ်စ့ၢ်ကီးန့ၣ်လီၤ. တရူးခီပနံၣ် AVIC လၢ Airbus ပတုၥ်ကွံၥ်တၢ်ဘျၢလီၤကျိၣ်စ့ဒီးအီၤခဲအံၤန့ၣ် ထုးထီၣ်ဝဲဒၣ် K-8 ကဘီယူၤဒီး Y-12 ကဘီယူၤသ့ၣ်တဖၣ် ဒီးကဘီယူၤခံကလုၥ်အံၤ န့ၣ်ပယီၤသုးကီၣ်ကးသူဝဲဒၣ်တၢ်ထီၣ်ဒုးလၢလီၢ်ကဝီၤကမျၢၢ်အိၣ်ဆိးတၢ်လီၢ်လၢကီၢ်ဒီတဘ့ၣ်အပူၤအဂ့ၢ်Burma...
KNU ဟီၣ်က၀ီၤ(၆)လါအတီၢ်ပူၤ ကဘီယူၤအဃိ ကၠိဟးဂီၤ(၁၃)ဖျၢၣ်,ကၠိဖိသံဘၣ်ဒိဘၣ်ထံး(၅၂)ဂၤ
လါယူၤ ၂၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢဟီၣ်က၀ီၤအပူၤ တနံၣ်အံၤ(၂၀၂၅-၂၆)တၢ်မၤလိနံၣ်လၢ ၆ လါအတီၢ်ပူၤ သုးမီၤစိရိၤ ကဘီယူၤအဃိ ပှၤကၠိဖိသံဘၣ်ဒိဘၣ်ထံးပၥ်ဖှိၣ်ခဲလၢၥ်အိၣ်၀ဲ(၅၂)ဂၤဒီးကၠိတၢ်သူၣ်ထီၣ်ဟးဂီၤ၀ဲ(၁၃)ဖျၢၣ်အဂ့ၢ်န့ၣ် လီၢ်ခၢၣ်သး ကညီကူၣ်သ့ဆဲးလၤ၀ဲၤကျိၤ (KECD) ပှၤဘၣ်မူဘၣ်ဒါ စံး၀ဲန့ၣ်လီၤ. စးထီၣ်ဖဲတနံၣ်အံၤ(၂၀၂၅)လါယနူၤအါရံၤတုၤလၢလါယူၤလၢ(၆)လါအတီၢ်ပူၤ (KECD)ကၠိလၢအိၣ်ခ့ၣ်အဲၣ်ယူၣ်တၢ်ပၢ ဟီၣ်က၀ီၤ အပူၤတဖၣ် ခီဖျိသုးမီၤစိရိၤအံၤသူ၀ဲကဘီယူၤပညိၣ်ခးလီၤ၀ဲကၠိ,ဟံၣ်ဒွဲတၢ်သူၣ်ထီၣ်လၢတၢ်လီၢ်(၂၃)တီၤအဃိ ကၠိဘၣ်ဒိဘၣ်ထံး ဟးဂီၤ၀ဲ(၁၃)ဖျၢၣ်ဒီးပှၤကၠိဖိသံ၀ဲ(၈)ဂၤ,ဘၣ်ဒိ(၄၄)ဂၤအကျါပၣ်ဃုၥ်၀ဲကၠိသရၣ်မုၣ်(၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးဒီးတၢ်ဂ့ၢ်အံၤ လီၢ်ခၢၣ်သး(KECD)နဲၣ်ရွဲၣ် ပဒိၣ်စီၤအဲၣ်ကလုၥ် စံး၀ဲလၢ“(၂၀၂၅-၂၆)ကူၣ်သ့နံၣ်အံၤဒုတၢ်ဒုးအိၣ်ဂ့ၤ တအိၣ် ဂ့ၤလီၤဆီဒၣ်တၢ်လၢကၠိ,တၢ်ဘူၣ်တၢ်ဘါတၢ်သူၣ်ထီၣ်မ့ၢ်ဂ့ၤန့ၣ်သုးမီၤစိရိၤအံၤပညိၣ်၀ဲလိၤလိၤလီၤ.ဘၣ်မနုၤအဃိလဲၣ် န့ၣ်စးထီၣ် (၂၀၂၅)လါယနူၤအါရံၤတုၤလါယူၤအံၤန့ၣ်ကဘီယူၤဟဲကွံၥ်လီၤတၢ်အိၣ်၀ဲ(၂၃)ဘျီမ့ဘၣ်တဲန့ၣ်တၢ်လီၢ်(၂၃)တီၤမီၤနီၤ.ဖဲန့ၣ်ကၠိဘၣ်ဒိ(၁၃)ဖျၢၣ်,ပှၤကၠိဖိသံ(၈)ဂၤ,ဘၣ်ဒိ(၄၄)ဂၤအကျါန့ၣ်ပၣ်ဃုၥ်သရၣ်မုၣ်(၅)ဂၤ.မ့၀ံၤအ၀ဲသ့ၣ်ခးလီၤတၢ်အံၤအါဒၣ်တက့ၢ်လၢပှၤမၤလိတၢ်ဆၢကတီၢ်ဘၣ်ဖဲလါယနူၤအါရံၤ-လါဖ့ၤဘြူၤအါရံၤဖဲန့ၣ်ခါကၠိတပျၢ်ဒံးဘၣ်.ဒီးခဲအံၤလါမ့ၤတုၤလါယူၤကၠိ ကစးထီၣ်ထီၣ် ကဒါန့ၣ်အ၀ဲသ့ၣ်မၤ၀ဲအါမးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. အပူၤကွံၥ်တၢ်မၤလိနံၣ်အခါန့ၣ်ဟီၣ်က၀ီၤပူၤတၢ်ဒုးတၢ်ယၤကဲထီၣ်မ့အိၣ်မးသုးမီၤစိရိၤအံၤဟးခးလီၤတၢ်ဒီးကဘီယူၤ ဘၣ်ဆၣ် လီၢ်ခံစးထီၣ်ဖဲ(၂၀၂၃)တုၤခဲအံၤန့ၣ်တၢ်ဒုးကဲထီၣ်တအိၣ်ဘၣ်ဆၣ်အ၀ဲသ့ၣ်သူအါထီၣ်၀ဲကဘီယူၤပညိၣ်၀ဲကၠိ,တၢ်ဘူၣ်တၢ်ဘါတၢ်သူၣ်ထီၣ်ဟဲအိၣ်ထီၣ်၀ဲဖျိဖျိဖျါဖျါအဃိ သီခါဃုၥ်ဒီးပှၤကၠိဖိသံဘၣ်ဒိဘၣ်ထံးအိၣ်၀ဲအါမးအဂ့ၢ်န့ၣ် ကူၣ်သ့ပှၤဘၣ်မူ ဘၣ်ဒါတဖၣ် စံး၀ဲန့ၣ်လီၤ. တကီၢ်ခါခဲအံၤခ့ၣ်အဲၣ်ယူၣ်ဟီၣ်က၀ီၤတနီၤအပူၤတၢ်ပၢၢ်ဆၢသုးပၥ်ဖှိၣ်ထီၣ်န့ၢ်၀ဲပယီၤသုးကလၢၤအိၣ်၀ဲအဖီခိၣ် ကၠိတနီၤတၢ်က့ၤ အိးထီၣ်ကဒါ၀ဲလံဘၣ်ဆၣ် ဟီၣ်က၀ီၤတနီၤအပူၤတုၤလၢခဲအံၤတၢ်ဒုးတၢ်ယၤအမဲၥ်ညါကျိဖးဒိၣ်,ကဘီယူၤတၢ်လီၤ ဘၣ်ယိၣ်အိၣ် ဒံးအဃိ တၢ်အိးထီၣ်ကၠိတဘူၣ်ဒံးဘၣ်, ဘၣ်မၤလိဒံးတၢ်လၢတၢ်ဘံၣ်တၢ်ဘၢတၢ်ပူၤဖျဲးလီၢ်အဖၢမုၢ်အဂ့ၢ်န့ၣ် ပဒိၣ် စီၤအဲၣ်ကလုၥ် စံးအါထီၣ်၀ဲန့ၣ်လီၤ. “ဒိးသန့ၤထီၣ်သးလၢဟီၣ်က၀ီၤတၢ်လီၢ်တနီၤန့ၣ်ခီဖျိသုးမီၤစိရိၤအတၢ်ဟူးတၢ်ဂဲၤဖီခိၣ်အဃိကၠိတနီၤန့ၣ်တၢ်အိးထီၣ်၀ဲသ့လံအိၣ်.ဘၣ်ဆၣ်ကၠိအိးထီၣ်အံၤတမ့ၢ်လၢပ၀ဲၤကျိၤဟံမူဒါလိၤလိၤဘၣ်.ပမၤသကိးတၢ်ဒီးကီၢ်ရ့ၣ်,ကီၢ်ဆၣ်ဒီးလီၢ်က၀ီၤဒူသ၀ီခိၣ်နၢ်,ကၠိကမံးတံၥ်ပှၤဘၣ်မူဘၣ်ဒါမီၤနီၤ.အဃိလၢအ၀ဲသ့ၣ်တၢ်ဟ့ၣ်၀ဲတၢ်အုၣ်ကီၤသးအဖီခိၣ်န့ၣ်ကၠိတနီၤဒုအိးထီၣ်သ့လံ,တနီၤဒုတအိးထီၣ်ဒံးဘၣ်ဒီးတနီၤဒုအိၣ်လၢတၢ်ရဲၣ်သဲကတီၤအီၤဘၣ်ဖၢလီၤ”အဂ့ၢ်န့ၣ် စံး၀ဲန့ၣ်လီၤ. ဒ်န့ၣ်အသိးဘၣ်ဃးဒီးတၢ်ဂ့ၢ်အံၤ လီၢ်က၀ီၤပှၤဘၣ်မူဘၣ်ဒါလၢအဒူသ၀ီဘၣ်ကွၢ်ဆၢၣ်မဲၥ်၀ဲသုးမီၤစိရိၤအကျိဖးဒိၣ်အံၤတဂၤစ့ၢ်ကီး စံး၀ဲလၢ “စးထီၣ်လၢခိ၀ံၣ်တၢ်ဆါကဲထီၣ်၀ံၤသုးဟံန့ၢ်တၢ်စိတၢ်ကမီၤတုၤလၢခဲအံၤပှၤကၠိဖိတထီၣ်ဘၣ်ကၠိဂ့ၤဂ့ၤဘၣ်. တုၤလၢခဲအံၤ ပအိးထီၣ်ကၠိတဘူၣ်ဘၣ်.ပအိးထီၣ်လၢတၢ်ဘံၣ်တၢ်ဘၢအလီၢ်လၢပှၤဟံၣ်ဖီလၥ်ဒ်န့ၣ်လီၤ.ပမ့တအိးထီၣ်ကၠိဘၣ်န့ၣ်ခီဖျိပှၤကၠိဖိန့ၣ်အိၣ်ဘှံးတမၤလိဘၣ်တၢ်အနံၣ်အါလံအဃိပဘၣ်အိးထီၣ်ကနၣ်ထံတၢ်အိၣ်သးဒ်အံၤလီၤ.ကနၣ်တၢ်အိၣ်သးမ့တဘၣ်ဂီၢ်ဘၣ်န့ၣ်ပဘၣ်ပံးက့ၤကၠိလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ...
ထံကပျၢၤတၢ်ဒုး KTLA ဖီၣ်မူဒံးန့ၢ်ပယီၤသုး (၄)ဂၤ,မၤန့ၢ်ဃုၥ်တၢ်စုကဝဲၤတနီၤ
လါယူၤ၂၄သီ, ၂၀၂၅ နံၣ်, ခ့ၣ်အဲးစံၣ် ဖဲအပူၤကွံၥ်လါယူၤ ၂၂သီအနံၤ သုးပၥ်ဖှိၣ်ထီၣ်မၤန့ၢ်ကွံၥ်ထံပျၢၤပယီၤသုးကလၢၤဝံၤအလီၢ်ခံ ပယီၤသုးလၢအဃ့ၢ်ဖျိးသ့ၣ်တဖၣ် ဘၣ်တၢ်ခိးခးအီၤလၢ KTLA ကီၢ်သူလ့ၤသုးမုၢ်ဒိၣ် အဃိ KTLA ဖီၣ်မူဒံးန့ၢ်ချုး(၄)ဂၤဒီးမၤန့ၢ်ဃုၥ်တၢ်စုကဝဲၤတနီၤအဂ့ၢ် သ့ၣ်ညါဘၣ်လၢ ကီၢ်သူလ့ၤသုးမုၢ်ဒိၣ် KTLA အပှၤဘၣ်မူဘၣ်ဒါအအိၣ်န့ၣ်လီၤ. ပယီၤသုးလၢထံကပျၢၤသုးကလၢၤပှၤကညီအဂၤ(၅၀)ဘျဲၣ်ဃၣ်ဃၣ်အံၤဃ့ၢ်ထီၣ်ကွံၥ်ဝဲလၢအသုးကလၢၤပူၤဒီးဖဲလၢကခီဃီၤဝဲဆူကီၢ်ကၠီၣ်တဲၣ်တကပၤအဆၢကတီၢ် KTLA ဒီးသုးပၥ်ဖှိၣ်ခိးဝဲဖဲထံကပျၢၤကီၢ်ဆၢအဃိ သံတနီၤ,ဘၣ်ဒိတနီၤ,ဒီးအဂၤတဖၣ်န့ၣ် ဃ့ၢ်မုၢ်ြပံပြါအမဲၥ်ညါတၢ်ဖီၣ်မူဒံးချုးန့ၢ်(၄)ဂၤဒီးတၢ်မၤန့ၢ်စုကဝဲၤအခိၣ်(၂၀)ဃၣ်ဃၣ်အဂ့ၢ် KTLA ကျိၣ်မုၢ်လါသုးက့ လီၢ်ခၢၣ်သးဒုးယၤခံကရူၢ်အဒုးယၤခိၣ် သုးခိၣ်ဒိၣ်စိစီၤဘျးနၢ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ပယီၤသုးန့ၣ်ပဖီၣ်ချုး(၆)ဂၤ,အဝဲခံဂၤန့ၣ်တတူၢ်ဖီၣ်သးဘၣ်အဃိဘၣ်တၢ်ခးသံအီၤန့ၣ်လီၤ.အဝဲ(၄)ဂၤန့ၣ်ခီဖျိလၢပပၥ်မူအီၤဒီး တၢ်စုကဝဲၤလၢအဝဲသ့ၣ်အပၥ်ခူသူခူၣ်လီၤဝဲတဖၣ်န့ၣ်ပထီၣ်ရှဲက့ၤဖဲတဂီၤအံၤန့ၣ်လီၤ.တၢ်စုကဝဲၤန့ၢ်ဖးအါညါခီဖျိတၢ်တဝံၤတဲၥ်ဒံးဘၣ်အဃိန့ၣ်ပတဲတသ့ဒံးဘၣ်.ပဝဲ(KTLA) ပခိးပံးဃၥ်အကျဲလၢကီၢ်ဆၢပခးအီၤအဃိ ပန့ၢ်ဘၣ်ကျိဖိကျိးဒိၣ်ခဲလၢၥ်(၁၈)ခိၣ်န့ၣ်လီၤ.ပယီၤသုးသ့ၣ်တဖၣ်န့ၣ် သံတနီၤ,ဃ့ၢ်ဖျိးတနီၤပဆဲးလူၤအဝဲသ့ၣ်တကဲလၢၤဘၣ်ခီဖျိပတအီၣ်ဘၣ်မ့ၤဒီနံၤလံအဃိန့ၣ်လီၤ.ပခိးခးအဝဲသ့ၣ်န့ၣ်ဖဲထံကပျၢၤကီၢ်ဆၢထံးန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ တၢ်စုကဝဲၤလၢKTLA မၤန့ၢ်သ့ၣ်တဖၣ်ဟ့ၣ်လီၤဝဲဒၣ်ဆူKNDOသုးရ့ၣ်(၈)အသုးရ့ၣ်ခိၣ်အအိၣ်ဒီးသုးကလၢၤပူၤစ့ၢ်ကီးတၢ်ရှဲလဲဝဲတဝံၤခဲလၢၥ်ဒံးဘၣ်အဃိတၢ်မၤန့ၢ်တၢ်စုကဝဲၤခဲလၢၥ်တၢ်အိၣ်သးန့ၢ်တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ် KTLAသုးခိၣ်ဒိၣ်စိ စီၤဘျးနၢ်ထဲအါထီၣ်ဝဲဒၣ်စ့ၢ်ကီးန့ၣ်လီၤ. ဖဲမဟါလါယူၤ၂၃သီအနံၤပယီၤသုးလၢအဃ့ၢ်ဖျိးထီၣ်လၢထံကပျၢၤသုးကလၢၤပူၤတဖၣ်အံၤတၢ်ဒုးကဲထီၣ်ဝဲဒီးတၢ်ပၢၢ်ဆၢသုးပၥ်ဖှိၣ်ဖဲကီၢ်ဆၢ စးထီၣ်မုၢ်ထူၣ်(၁၂)နၣ်ရံၣ်တုၤ ဟါခီ(၂)နၣ်ရံၣ်အဃိ တၢ်ထံၣ်န့ၢ်ဝဲပယီၤသုးသံ(၆)ဂၤဒီးတၢ်မၤန့ၢ်စ့ၢ်ကီးဝဲတၢ်စုကဝဲၤအိၣ်တနီၤအဂ့ၢ် ကညီဒီကလုၥ်ဂၢၤသးကရၢ KNDO တပၤစံးဝဲဒၣ်စ့ၢ်ကီးန့ၣ်လီၤ. ခ့ၣ်အဲၣ်ယူၣ် လီၢ်ခၢၣ်သးမၤနၢၤပျီလီၤဝံၤအလီၢ်ခံ ဖဲ၁၉၉၅နံၣ် လါမ့ၤအဆၢကတီၢ် ထံကပျၢၤတၢ်လီၢ်အံၤ ဘၣ်တၢ်ပၥ်အီၤဒ်အမ့ၢ် ခ့ၣ်အဲၣ်ယူၣ်လီၢ်ခၢၣ်သီတၢ်လီၢ်တတီၤဘၣ်ဆၣ် တချုး(၂)နံၣ်ပှဲၤထီၣ် ဖဲ၁၉၉၇နံၣ် လါဖ့ၤဘြူၤအါရံၤအဆၢကတီၢ်ပယီၤသုးဟဲထီၣ်မၤန့ၢ်ကွံၥ်ဒီးအိၣ်ဆီလီၤသး ၂၈ နံၣ်ဘျဲၣ်ဝံၤအလီၢ်ခံ ဖဲလါယူၤ ၂၂သီအနံၤန့ၣ် တၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်ကွံၥ်ဝဲဒၣ်အဂ့ၢ် ခ့ၣ်အဲၣ်ယူၣ်လီၢ်ခၢၣ်သးပၥ်ဖျါဝဲဒၣ်အိၣ်စ့ၢ်ကီးန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်ပယီၤသုးဒြိဒီးကျိဖးဒိၣ်အဃိကမျၢၢ်ဘၣ်ဒိ(၃)ဂၤဒီးဘၣ်ဟးဂီၤတၢ်ဘူၣ်တၢ်ဘါတၢ်သူၣ်ထီၣ်(၂)ဖျၢၣ်
လါယူၤ ၂၃ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်တၢ်ပၢဟီၣ်ကဝီၤ,ချၢၣ်လွံၢ်ထူၣ်ကီၢ်ရ့ၣ်အပူၤဖဲအပူၤကွံၥ်လါယူၤ(၁၄)သီအနံၤဒီးအသီ(၂၀)အနံၤလၢခံသီအတီၢ်ပူၤန့ၣ်ခီဖျိပယီၤသုးကီၣ်ကးမၤဝဲတၢ်ခးလီၤကျိဖးဒိၣ်ဒီးသူဝဲကလံၤကျါဒြိမ့ၣ်ပိၢ်အဃိကမျၢၢ်ဘၣ်ဒိဝဲ(၃)ဂၤဒီးဘၣ်ဟးဂီၤကွံၥ်ဝဲတၢ်ဘူၣ်တၢ်ဘါတၢ်သူၣ်ထီၣ်ခံဖျၢၣ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ. ဖဲလါယူၤ(၁၄)သီအနံၤန့ၣ်ပယီၤသုးလၢအမ့ၢ်ခီၣ်သုးရ့ၣ်(ခလရ-၂၆၄)အံၤခးလီၤဝဲ(၁၂၀)မမကျိဖးဒိၣ်ဆူလၢၢ်ဒိၣ်ကီၢ် ဆၣ်ဖဲ(သမ့ၤအ့ကိ)သဝီအပူၤဒီး(ဖၠါတလ့)သဝီပူၤအဃိဘၣ်ဒိဝဲ(သမ့ၤအ့ကိ)သဝီဖိ နီၢ်ဃံလၤဖီ သးနံၣ်(၂၆)နံၣ်တဂၤဒီး(ဖၠါတလ့)သဝီဖိ နီၢ်မူမူ သးနံၣ်(၄၂)တဂၤဃုၥ်ဒီး စီၤဒီၣ်ဖၠီ သးနံၣ်(၁၁)တဂၤသ့ၣ်တဖၣ်အံၤန့ၣ်လီၤ. တကးဒံးဘၣ်ပယီၤသုးကီၣ်ကးလၢအိၣ်(နၣ်သၤကွ့)အံၤစ့ၢ်ကီးဖဲလါယူၤအသီ(၂၀)အနံၤဖဲမူကီၢ်ဆၣ်(အိၡ့ၣ်ကိ)သဝီအပူၤန့ၣ်ဟဲတ့ၢ်လီၤဝဲဒြိမ့ၣ်ပိၢ်(၁၂)ဖျၢၣ်အဃိဘၣ်ဟးဂီၤကွံၥ်ဝဲ(အိၡ့ၣ်ကိ)သဝီသီခါဖၠၣ်တၢ်သူၣ်ထီၣ်(၁)ဖျၢၣ်ဒီးတၢ်ဘါယွၤသရိၥ်တၢ်သူၣ်ထီၣ်တဖျၢၣ်အဂ့ၢ်ဒ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. အဃိဘၣ်ထွဲဒီးပယီၤသုးကီၣ်ကးဟူးဂဲၤခးလီၤကျိဖးသ့ၣ်တဖၣ်ဆူကမျၢၢ်ဒူသဝီအပူၤန့ၣ်အိၣ်ဝဲကိးနံၤဒဲးဃၣ်ဃၣ်လီၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်နဲၣ်ရွဲၣ်သဃဲၤပဒိၣ်စီၤနဲထူပၠဲစံးဝဲအသိးသ့ၣ်ညါဘၣ်န့ၣ်လီၤ. "ပယီၤသုးကီၣ်ကးန့ၣ်အိၣ်လၢအလီၢ်ဒီးမၤဝဲတၢ်ခးလီၤကျိဖးဒိၣ်န့ၣ်မၤဝဲလၢအသုးကလၢၤကိးဖျၢၣ်ဒဲးလီၤ. သုးကလၢၤအဂၤစ့ၢ်ကီခး ဝဲလီၤ. မုၢ်ဆါခးမုၢ်နၤခးလီၤ. " အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်တၢ်ပၥ်ဖျါပူၤအသိးလၢတၢ်ခံသီအတီၢ်ပူၤအံၤန့ၣ်မ့ၢ်ဘၣ်ကွၢ်က့ၤဝဲပယီၤသုးကီၣ်ကးခးလီၤဝဲကျိဖးဒိၣ်ခဲလၢၥ်အဖျၢၣ်(၁၀),ဟဲတ့ၢ်လီၤဝဲဒြိမ့ၣ်ပိၢ်(၁၂)ဖျၢၣ်သ့ၣ်တဖၣ်အံၤဆူကမျၢၢ်ဒူသဝီ(၅)ဖျၢၣ်အပူၤဒီးလၢန့ၣ်အမဲၥ်ညါဘၣ်ဟးဂီၤကွံၥ်ဝဲကမျၢၢ်ဒူသဝီဖိအဟံၣ်(၄)ဖျၢၣ်ဒံးအဂ့ၢ်ပၥ်ဖျါစ့ၢ်ကီးဝဲဒၣ်န့ၣ်လီၤ. ဒ်န့ၣ်အသိးဖဲအပူၤကွံၥ်လါယူၤ(၁၄)သီအနံၤန့ၣ်လၢလၢၢ်ဒိၣ်ကီၢ်ဆၣ်ဟီၣ်ကဝီၤဖဲ(နွါယ့ခၠီ)သဝီအပူၤန့ၣ်မ့ၢ်လၢပယီၤသုးကီၣ်ကးခးလီၤကျိဖးဒိၣ်အဃိဘၣ်သံစ့ၢ်ကီးဝဲပှၤသဝီဖိပိၥ်ခွါတဂၤဒီးဘၣ်ဒိစ့ၢ်ကီးဝဲပှၤပိၥ်မုၣ်တဂၤအဂ့ၢ်ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်ထုးထီၣ် ပၥ်ဖျါဝဲဒၣ်ဖဲမဟါအနံၤလါယူၤ(၁၅)သီအနံၤန့ၣ်လီၤ.
KNLA/KNDO ထီၣ်မၤန့ၢ် ထံကပျၢၤပယီၤသုးကလၢၤလၢဟဲအိၣ်ဆီလီၤသးန့ၢ်(၂၈)နံၣ်
လါယူၤ ၂၃သီ, ၂၀၂၅နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၆),ဒူပျၥ်ယၥ်ကီၢ်ရ့ၣ်, ကီးတရံးကီၢ်ဆၣ်,တီနီၢ်မုၢ်ထီၣ်ဟီၣ်ကဝီၤပူၤ ထံကပျၢၤပယီၤသုးကလၢၤလၢ ဟဲအိၣ်ဆီလီၤသးန့ၢ်(၂၈)နံၣ် တဖျၢၣ်အံၤ ဖဲအပူၤကွံၥ်လါယူၤ(၂၂)သီဂီၤခီအဆၢကတီၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO)တီခိၣ်ရိၣ်မဲ(PDF)သုးပၥ်ဖှိၣ်တဖၣ်ထီၣ်မၤန့ၢ်ကွံၥ်ဝဲဒၣ်အဂ့ၢ် သ့ၣ်ညါဘၣ်လၢ လီၢ်ကဝီၤ KNLA အပှၤဘၣ်မူဘၣ်ဒါအအိၣ်န့ၣ်လီၤ. ထံကပျၢၤပယီၤသုးကလၢၤအံၤ စးထီၣ်လါယူၤထီၣ်(၂)သီအနံၤ အခါလံၤလံၤ တၢ်ပၢၢ်ဆၢသုးပၥ်ဖှိၣ်တဖၣ်ကဝီၤဃၥ်ဝဲဒီးတၢ်ဆၢကတီၢ်ယံၤအသီ(၂၀)ဘျဲၣ်ဝံၤအလီၢ်ခံတၢ်ထီၣ်မၤနၢ်ကွံၥ်အီၤဒ်အံၤလီၤအဂ့ၢ် လီၢ်ကဝီၤ KNLA အပှၤဘၣ်မူဘၣ်ဒါတဂၤစံးဘၣ်ဝဲဒၣ် ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲဒၣ်လၢ“သုးကလၢၤဝဲအံၤ တၢ်ကထီၣ်မၤန့ၢ်အီၤအဂီၢ် တၢ်ဆၢကတီၢ်လၢၤဘူးကအိၣ်လၢအလါန့ၣ်လီၤ.ပယီၤသုးသ့ၣ်တဖၣ်ဃ့ၢ်ထီၣ်ကွံၥ်လၢအသုးကလၢၤအပူၤဒီးမ့ၢ်အလဲၤဃ့ၢ်ဖဲလဲၣ်န့ၣ်တၢ်တသ့ၣ်ညါဒ်ဘၣ်.လၢကီၢ်ကၠီၣ်တဲၣ်ကပၤဒီးပတနၢ်ဟူတၢ်ကစီၣ်နီတမံၤဒံးဘၣ်.မ့ၢ်အက့ၤပၥ်ဖှိၣ်သးဒီးဂီၤလ့ၤဒုးယၤသုးကလၢၤဧါန့ၣ်တသ့ၣ်ညါဒံးဘၣ်.”အဂ့ၢ်စံးဝဲဒၣ်န့ၣ်လီၤ. ဘၣ်ဃးဒီးတၢ်ထီၣ်မၤန့ၢ် ထံကပျၢၤပယီၤသုးးကလၢၤအံၤ ဒ်သိးကသ့ၣ်ညါဘၣ်တၢ်လီၤတံၢ်လီၤဆဲးအဂီၢ် ခ့ၣ်အဲးစံၣ်ဆဲးကျိးသံကွၢ်ဒီး ပှၤတီခိၣ်ရိၣ်မဲတၢ်ဒုး ကညီဒီကလုၥ်ဂၢၤသးကရၢသုးရ့ၣ်(၈)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် အဲၣ်မၠးထူဘၣ်ဆၣ်ဆဲးကျိးတန့ၢ်ဒံးဘၣ်အဂ့ၢ်ဒုးသ့ၣ်ညါဘၣ်ပှၤဒိကနၣ်တၢ်ဖိကိးဂၤဒဲးန့ၣ်လီၤ. ဒ်လီၢ်ကဝီၤ KNLA အပှၤဘၣ်မူဘၣ်ဒါလၢအအိၣ်ဘူးဖဲန့ၣ်စံးဝဲဒၣ်အသိးန့ၣ် ပယီၤသုးလၢအဟဲအိၣ်ဆီလီၤသးဖဲထံကပျၢၤသ့ၣ်တဖၣ်အံၤမ့ၢ်ဝဲ ခီၣ်သုးရ့ၣ်(ခလရ-၃၂)ဒီး ခီၣ်ချ့သုးရ့ၣ်(ခမရ-၅၅၅)သ့ၣ်တဖၣ်ဒီးပှၤနီၣ်ဂံၢ်ကအိၣ်အဂၤ(၆၀)ဃၣ်ဃၣ်အဂ့ၢ် စံးဝဲဒၣ်န့ၣ်လီၤ. မၤနၢၤပျီလီၤဝံၤအလီၢ်ခံဖဲ ၁၉၉၅နံၣ်,လါမ့ၤအဆၢကတီၢ် ခ့ၣ်အဲၣ်ယူၣ်က့ၤပၥ်ဝဲထံကပျၢၤတၢ်လီၢ်အံၤဒ်အမ့ၢ်အဝဲသ့ၣ် လီၢ်ခၢၣ်သးအသီတခါအသိးဘၣ်ဆၣ် တချုးပှဲၤထီၣ်(၂)နံၣ်ဖဲ ၁၉၉၇နံၣ် လါဖ့ၤဘြူၤအါရံၤအဆၢကတီၢ် ပယီၤသုးမုၢ်ဒိၣ်ဟဲထီၣ်မၤန့ၢ်ကွံၥ်ဝဲဒၣ်ဒီးအိၣ်ဆီလီၤဝဲသး(၂၈)နံၣ်ဝံၤအလီၢ်ခံ ဘၣ်တၢ်က့ၤထီၣ်မၤန့ၢ်ကဒါက့ၤအီၤအဂ့ၢ် ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်စ့ၢ်ကီးၥ်ဖျါဝဲဖဲတနံၤအံၤအိၣ်ဝဲဒၣ်န့ၣ်လီၤ. ထံကပျၢၤပယီၤသုးကလၢၤဝဲအံၤန့ၣ်အိၣ်ယံၤဝဲဒီးကီၢ်ကၠီၣ်တဲၣ်ကီၢ်ဆၢထဲ (၂)ကံလိဘျဲၣ်ဒီး သုးကလၢၤဝဲအံၤလီၤဝံၤအလီၢ်ခံ တီနီၢ်မုၢ်ထီၣ်ဟီၣ်ကဝီၤပူၤ ပယီၤသုးကလၢၤအိၣ်တ့ၢ်ဝဲခံဖျၢၣ်ဒ်အမ့ၢ် ဂီၤလ့ၤဒုးယၤသုးကလၢၤဒီး အူးကြ့ၢ်ထၣ်သုးကလၢၤသ့ၣ်ဒီးတကီၢ်ခါခဲအံၤဖဲအူးကြ့ၢ်ထၣ်ပယီၤသုးကလၢၤစ့ၢ်ကီးတၢ်ဒုးကဲထီၣ်ဝဲအဖၢမုၢ်အဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ကြုၢ်တုတၢ်ဒုး(၇)နၣ်ရံၣ်အတီၢ်ပူၤ,တၢ်ထီၣ်မၤန့ၢ်ဝဲသုးကီၣ်ကးစုကဝဲၤအါအါဂီၢ်ဂီၢ်အဂ့ၢ်(MLA)ထုးထီၣ်ပၥ်ဖျါဝဲ
လါယူၤ ၂၂သီ, ၂၀၂၅နံၣ်, ခ့ၣ်အဲးစံၣ်, ကြုၢ်တုကီးတရံးအ့ရှၢၣ်ကျဲမုၢ်အပူၤသုးကီၣ်ကးသုးကျိၤလၢဟဲထီၣ်ဝဲသ့ၣ်တဖၣ်အံၤ,ကညီတၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်ထီၣ်ဒုးဝဲဖဲလါယူၤ(၁၉)သီအနံၤအိၣ်ဝဲဒီးလၢ(၇)နၣ်ရံၣ်အတီၢ်ပူၤသုးကီၣ်ကးလီၤကွံၥ်ဝဲအါအါဂီၢ်ဂီၢ်အသိး,တၢ်မၤန့ၢ်ဃုၥ်ဝဲစုကဝဲၤပီးလီတဖၣ်အါအါဂီၢ်ဂီၢ်အိၣ်ဝဲအဂ့ၢ်,မိၢ်တၢ်ထူၣ်ဖျဲးသုးမုၢ်ဒိၣ်(MLA)ထုးထီၣ်ပၥ်ဖျါဝဲဒၣ်ဖဲမဟါလါယူၤ(၂၁)သီအနံၤန့ၣ်လီၤ. တၢ်ဒုးအပူၤသုးကီၣ်ကး(တမ)(၄၄)ဒီး(တမ)(၅၅)အစုတီၤဖီလၥ်အသုးကျိၤဘၣ်ထွဲသုးရ့ၣ်ခိၣ်(၂)သုးခိၣ်ဒိၣ်ဖိ(၁)တဂၤဒီးသုးဖိအဂၤ(၁၀)ဃၣ်ဃၣ်ဘၣ်ဒိဘၣ်ထံးဝဲဒီးလီၤကွံၥ်ဝဲတစှၤန့ၢ်အဂၤ(၃၀)ဘၣ်အိၣ်ဝဲအဂ့ၢ်(MLA )လံၥ်ထုးထီၣ်ပၥ်ဖျါအပူၤပၥ်ဖျါဝဲဒၣ်စ့ၢ်ကီးန့ၣ်လီၤ. ဖဲတၢ်ဒုးဝံၤအလီၢ်ခံတၢ်ထီၣ်မၤရှဲလဲက့ၤတၢ်လီၢ်တၢ်ကျဲအပူၤတၢ်မၤန့ၢ်ဝဲသုးကီၣ်ကးစုကဝဲၤပီးလီဒ်အမ့ၢ်(MA(1)၊ MA(2)၊ RPG ၊ RPGအချံ)( RPG ပိၣ်ယါ)( 60mm commando)(ကျိဆၣ်ဒၢအကလုၥ်ကလုၥ်)(ကျိချံအကလုၥ်ကလုၥ်)(တၢ်ဒီသဒၢခိၣ်ဖျီၣ်)ဃုၥ်ဒီးသုးတၢ်သူတၢ်စွဲတၢ်ပီးတၢ်လီလၢအဂၤတဖၣ်စ့ၢ်ကီးအဂ့ၢ်(MLA )ပၥ်ဖျါဝဲဒၣ်န့ၣ်လီၤ. တၢ်ထီၣ်မၤန့ၢ်ကွံၥ်သုးကီၣ်ကးအစုကဝဲၤတဖၣ်ဝံၤအလီၢ်ခံဘၣ်ဃးဒီးတကီၢ်ခါခဲအံၤကြုၢ်တုဟီၣ်ကဝီၤဒုးယၤတၢ်အိၣ်သးန့ၣ်,လီၢ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. “ကြုၢ်တုဟီၣ်ကဝီၤတကီၢ်ခါခဲအံၤဒုးယၤတၢ်အိၣ်သးဒုတနံၤတနံၤအိၣ်ဒၣ်ခးစိလိၥ်သးဒံးလီၤ.ခံခီခံကပၤကွၢ်စိလိၥ်သးတၢ်လီၢ်ဖျါတဖၣ်န့ၣ်ခးစိလိၥ်သးလီၤ.မ့မ့ၢ်ကမျၢၢ်တဖၣ်တၢ်အိၣ်သးခီအိၣ်ဒံးလီၢ်လီၢ်လီၤ.လီၢ်ကဝီၤဖိတဖၣ်ဟဲက့ၤအိၣ်က့ၤလၢလီၢ်ကျဲတအိၣ်ဒံး.”အဂ့ၢ်စံးဝဲဒၣ်န့ၣ်လီၤ. ကြုၢ်တုဟီၣ်ကဝီၤလါယူၤ(၁၉)သီအနံၤတၢ်ဒုးအပူၤကမျၢၢ်တၢ်ဘၣ်ဒိဘၣ်ထံးတအိၣ်ဝဲဒၣ်ဘၣ်ဆၣ်,ခီဖျိသုးကီၣ်ကးတဖၣ်အသုးကျိၤနုၥ်လီၤဟူးဂဲၤဝဲလၢကြုၢ်တုကီးတရံးကျဲအိၣ်ဝဲအဃိ,ကမျၢၢ်ဟးထီၣ်က့ၤလီၤတနီၤကအိၣ်ဒီးတၢ်ပလီၢ်ပဒီသးဒီးကပၥ်သူၣ်ပၥ်သးဒီနၢ်လၢသုးကီၣ်ကးကျိဖးဒိၣ်ဒီးကဘီယူၤတၢ်လီၤဘၣ်ယိၥ်အဂ့ၢ်,တၢ်ပၢၢ်ဆၢသုးပၥ်ဖှိၣ်တဖၣ်ဆီၣ်တခူစံးဝဲဒၣ်န့ၣ်လီၤ. ဒ်န့ၣ်အသိး,သုးကီၣ်ကးအံၤအပူၤကွံၥ်လါအ့ဖြ့ၣ်တါလီၤအဆၢကတီၢ်လၢတၢ်ကမၤန့ၢ်ပၢဘၣ်က့ၤကြုၢ်တုကျဲအဂီၢ်,မၤဝဲသုးကျိၤတၢ်ဟူးတၢ်ဂဲၤလၢကြုၢ်တုၢ်ဝ့ၢ်တဆီအိၣ်ဝဲဒီး,ကီးတရံး(စကခ)(၁၂)သ့ၣ်တဖၣ်စ့ၢ်ကီးမၤဝဲသုးကျိၤတၢ်ဟူးတၢ်ဂဲၤအိၣ်ဝဲအဃိ,ကညီတၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်တဖၣ်ကးတံၥ်ပံးကွံၥ်ဝဲအဝဲသ့ၣ်တဖၣ်အိၣ်ဝဲအဖီခိၣ်,ထီၣ်ဝဲဆူမဲၥ်ညါတန့ၢ်ဒံးဘၣ်အဂ့ၢ်ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်န့ၣ်လီၤ.
ကဂုၥ်ကျဲးစၢးဃုကျဲဒီးကတိၤခဲးန့ၢ်တၢ်လၢဒဲက၀ီၤဘၣ်ကီဘၣ်ခဲဖိဂီၢ်အဂ့ၢ်န့ၣ် NGO ပှၤဘၣ်မူဘၣ်ဒါစံး၀ဲ
လါယူၤ ၂၀ သီ, ၂၀၂၅ နံၣ်, ခ့ၣ်အဲးစံၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲက၀ီၤအပူၤ ဖဲတနံၤအံၤလါယူၤ ၂၀ သီလၢအလီၤဘၣ်၀ဲဟီၣ်ခိၣ်ဒီဘ့ၣ် ဘၣ်ကီဘၣ်ခဲဖိမုၢ်နံၤမူးတၢ်ရဲၣ်တၢ်ကျဲၤအပူၤအံၤန့ၣ် ကဂုၥ်ကျဲးစၢးဃုကျဲဒီးကတိၤခဲးန့ၢ်တၢ်လၢဒဲက၀ီၤဘၣ်ကီဘၣ်ခဲဖိကမျၢၢ် အဂီၢ် အဂ့ၢ်န့ၣ် NGO တၢ်ကရၢကရိခိၣ်နၢ်တဖၣ်စံးလီၤ၀ဲန့ၣ်လီၤ. ဖဲတနံၤအံၤဂီၤခီ ၈း၀၀ နၣ်ရံၣ်အဆၢကတီၢ်န့ၣ် မဲၢ်လးဒဲက၀ီၤပူၤက၀ီၤဒ့ကိးဘ့ၣ်ဒဲးက၀ီၤဒ့ခၢၣ်စးဒီးကၠိဖိတဖၣ် စိၥ်ထီၣ်၀ဲလံၥ်ကိး သတြီတၢ်ဂ့ၢ်လၢအမ့ၢ် “ပၥ်ဖှိၣ်ထီၣ်သးတဖျၢၣ်ဃီဃူဃူဃုၥ်ဒီးပှၤဘၣ်ကီဘၣ်ခဲဖိတဖၣ်”၀ံၤ ပိၥ်ထီၣ်ကျဲလဲၤပၥ်ဖှိၣ်မၤလၤ ကပီၤ သကိး၀ဲဟီၣ်ခိၣ်ဒီဘ့ၣ်ဘၣ်ကီဘၣ်ခဲမုၢ်နံၤအံၤဖဲက၀ီၤဒိၣ်(Zone-c) ဖုကိဖျၢၣ်ထူပျီပူၤန့ၣ်လီၤ. လၢမူးတၢ်ရဲၣ်တၢ်ကျဲၤအပူၤန့ၣ် တၢ်ဂ့ၢ်ကီတၢ်တၤတၢ်လၢကမျၢၢ်ဘၣ်ကီဘၣ်ခဲဖိသဂၢၢ်ဘၣ်၀ဲခဲအံၤတဖၣ် ကဂုၥ်ကျဲးစၢးဃုကျဲ, ကတိၤတဲန့ၢ်ခဲးတၢ်ဒီးကဃုကျဲလၢကဘှါဆှဲလီၤ၀ဲတၢ်ဂ့ၢ်ကီအံၤအဂ့ၢ်န့ၣ် (NGO)ပှၤဘၣ်မူဘၣ်ဒါစံးလီၤဒုးသ့ၣ်ညါ၀ဲ ကမျၢၢ် လၢတၢ်ရဲၣ်တၢ်ကျဲၤအံၤအပူၤန့ၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ် မဲၢ်လးဒဲက၀ီၤခိၣ် စီၤသးကၢ စံး၀ဲလၢ “တဂီၤအံၤပထံၣ်ဘၣ်လၢ(NGO)တနီၤလၢအမ့ၢ် (TBC/UNHCR /KRC),ကၠီၣ်တဲၣ်ပှၤဘၣ်မူဘၣ်ဒါတဖၣ်ဟဲဒီးလၢတၢ်ရဲၣ်တၢ်ကျဲၤပူၤန့ၣ်ဒုးသ့ၣ်ညါ၀ဲကမျၢၢ်လိၤလိၤလီၤ.ဆူမဲၥ်ညါတၢ်ဆီၣ်ထွဲမၤစၢၤမ့လီၤစှၤဘၣ်ဆၣ်အ၀ဲသ့ၣ်တပၥ်လီၤဒိပှၤဘၣ်,တပၥ်တ့ၢ်ပှၤဘၣ်.အ၀ဲသ့ၣ်ကဂုၥ်ကျဲးစၢးဃုကျဲ,တဲန့ၢ်ခဲးတၢ်,ကဃုတၢ်ဘှါဆှဲအကျိၤအကျဲဒ်သိးပှၤဘၣ်ကီဘၣ်ခဲဖိတဖၣ်သုတအိၣ်ဒီးတၢ်ကိၢ်တၢ်ဂီၤတၢ်ဘၣ်ယိၣ်ဘၣ်ဘှီတဂ့ၤမီၤနီၤ.မ့ဘၣ်ကွၢ်ပှၤဘၣ်ကီဘၣ်ခဲဖိခဲအံၤန့ၣ်အ၀ဲသ့ၣ်တၢ်မုၢ်လၢ်တၢ်တိၤပၥ်အိၣ်လၢကီၢ်သၢဘ့ၣ်တဘ့ၣ်ဘၣ်ဘၣ်ခဲအံၤဒုလဲၤတသ့ဒံးဘၣ်.ဘၣ်ဆၣ်ခါဆူညါအ၀ဲသ့ၣ်ဃုကျဲဒီးကျဲကအိးထီၣ်တဘိဘိစ့ၢ်ဧါပတသ့ၣ်ညါဘၣ် မီၤနီၤ”အဂ့ၢ်န့ၣ် စံး၀ဲန့ၣ်လီၤ. ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဘၣ်ကီဘၣ်ခဲဒဲက၀ီၤအံၤမ့ၢ်အိၣ်ဆီလီၤသးန့ၢ်လၢ(၄၀)ဃၣ်ဃၣ်လံဘၣ်ဆၣ် ကမျၢၢ်လၢအိၣ် ဒဲက၀ီၤပူၤတဖၣ်တဒိးန့ၢ်ဘၣ်တၢ်ခွဲးတၢ်ယၤလၢကဟးထီၣ်ဃုဖံးဃုမၤ,ကဟးထီၣ်ဖံးလိမၤဒိးတၢ်လၢတၢ်ချၢဘၣ်အသိး လၢတၢ်တြီ အံၤအမဲၥ်ညါတကီၢ်ခါခဲအံၤအ၀ဲသ့ၣ်သဂၢၢ်ဘၣ်၀ဲဆူၣ်ချ့,တၢ်အီၣ်တၢ်အီတၢ်အံးထွဲကွၢ်ထွဲတၢ်ဆီၣ်ထွဲမၤစၢၤလၢကျဲအကပၤကပၤ န့ၣ်လီၤ. တကးဒံးဘၣ်ကၠိဖိလၢအဖျိထီၣ်ဒဲက၀ီၤပူၤတဖၣ်စ့ၢ်ကီးဒ်သိးကဟးထီၣ်ဃုဖံးဃုမၤဒီးဆဲးထီၣ်ကၠိလၢထံကီၢ်ပၥ်ပနီၣ်၀ဲကန့ၢ်အဂီၢ်န့ၣ် ထံဂုၤကီၢ်ဂၤခိၣ်နၢ်ဘၣ်ထွဲပှၤဘၣ်မူဘၣ်ဒါ ကကွၢ်ဆိကမိၣ်ဟ့ၣ်တၢ်ခွဲးတၢ်ယၤလၢအ၀ဲသ့ၣ်အဂီၢ်အဂ့ၢ်န့ၣ် သးစၢ်ကၠိဖိမုၣ် လၢအဟဲထီၣ် မၤလၤကပီၤမူးတၢ်ရဲၣ်တၢ်ကျဲၤဘျီ၀ဲအံၤတဂၤ ဃ့ထီၣ်စံး၀ဲန့ၣ်လီၤ. အ၀ဲစံး၀ဲလၢ“ယအဲၣ်ဒိးဃ့ထီၣ်လၢလီၤဆီဒၣ်တၢ်သူၣ်ဘီၣ်သးစၢ်တဖၣ်အဂီၢ်မီၤနီၤ.ဘၣ်မနုၤလဲၣ်သးစၢ်တဖၣ် အိၣ်ဒီးတၢ်ကူၣ် ဘၣ်ကူၣ်သ့လၢအဂ့ၤ,အစှၤကတၢၢ်(ဒံၤကရံၤ)ဒီး(ဘၢၤခၠၢၤလၢၤ)န့ၣ်အါဒၣ်တက့ၢ်ဖျိထီၣ်၀ဲလီၤ.ပမ့နုၥ်လီၤမၤတၢ်လၢကၠိသရၣ်မ့ၢ်ဂ့ၤ,လၢဆူၣ်ချ့,လၢရူလၢတ့တကပၤစ့ၢ်ကီးသ့မီၤနီၤ.အဃိတၢ်ခွဲးတၢ်ယၤမ့အိၣ်ဒီးပှၤလၢပဟးဃုဖံးမၤတၢ်လၢတၢ်ချၢန့ၣ်ယထံၣ်လၢအဂ့ၤလီၤ.ပဆၢမုၢ်လၢ်လၢထံဂုၤကီၢ်ဂၤခိၣ်နၢ်ကကွၢ်ဆိၣ်ကမိၣ်စၢၤက့ၤပတၢ်ဂ့ၢ်ကီ၀ဲအံၤဒီးတသ့ဖဲအသ့န့ၣ်ကဘှါဆှဲစၢၤပှၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကတီၢ်ဃီလၢတၢ်ရဲၣ်တၢ်ကျဲၤအပူၤအံၤ ဒဲက၀ီၤခိၣ်လၢအမ့ၢ်...