ကဘီယူၤအဃိ ကါနံၤကမျၢၢ်သံ(၆)ဂၤအကျါပၣ်ဃုၥ်ဖိသၣ်(၃)ဂၤ
လါအ့ဖြ့ၣ် ၁၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ်အပူၤ ဖဲမဟါတါလီၤခံသီတသီအနံၤ ခီဖျိပယီၤသုးကဘီယူၤလဲၤခးလီၤတၢ်လၢကါနံၤသ၀ီပူၤ သီခါဖၠၣ်ကရၢၢ်ပူၤအဃိ ကမျၢၢ်သံ(၆)ဂၤအကျါ ပၣ်ဃုၥ်၀ဲဖိသၣ်(၃)ဂၤ အဂ့ၢ်န့ၣ် ကညီတၢ်ဆီၣ်ထွဲမၤစၢၤတၢ်မုၥ်တၢ်ခုၣ်ပှၥ်ဘျးစဲကရူၢ်(KPSN)ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ. ဖဲမဟါလါအ့ဖြ့ၣ် ၁၅ သီ မုၢ်ဃ့ၢ်လီၤအဆၢကတီၢ်န့ၣ် တၢ်ဒုးကဲထီၣ်တအိၣ်သုးကီၣ်ကးအကဘီယူၤပညိၣ်လဲၤတ့ၢ်လီၤ၀ဲမ့ၣ်ပိၢ် (၅၀၀)ပီၣ် ၂ ဖျၢၣ်လၢကါနံၤသီခါဖၠၣ်ကရၢၢ်ပူၤအဖီခိၣ် တၢ်သံတၢ်ပှၢ်တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤဘၣ်ဟဲကဲထီၣ်၀ဲ ဒိၣ်ဒိၣ် မုၢ်မုၢ်ဒ်အံၤန့ၣ်လီၤ. ခီဖျိလၢကဘီယူၤအံၤအဃိ ကမျၢၢ်သံ(၆)ဂၤအမဲညါ ကမျၢၢ်ဘၣ်ဒိဘၣ်ထံး၀ဲခဲလၢၥ်(၁၆)ဂၤဒီးဖဲန့ၣ်အကျါပၣ်ဃုၥ်၀ဲ သီခါ(၃)ပါဒီး တပွဲ(၈)ပါ အဂ့ၢ်န့ၣ် (KPSN)လံၥ်တၢ်ပၥ်ဖျါအပူၤ စံး၀ဲန့ၣ်လီၤ. ဒ်န့ၣ်အသိးတၢ်ကဲထီၣ်သး၀ံၤဖဲတနံၤအံၤလါအ့ဖြ့ၣ် ၁၆ သီဂီၤခီအဆၢကတီၢ်န့ၣ်စ့ၢ်ကီး ပယီၤသုးကဘီယူၤလဲၤခးလီၤတၢ်လၢ ကီးတရံး-ကြုၢ်တုကျဲဘၢၣ်စၢၤ လ့တဲၤ(လေးတိုင်)သဝီ သီခါဖၠၣ်အဃိ သီခါဖၠၣ်တၢ်သူၣ်ထီၣ်အခိၣ်ဒီးအကပိၤကပၤလီၤပှီၢ် ဘၣ်ဒိဘၣ်ထံး ဟးဂီၤ၀ဲဘၣ်ဆၣ် ကမျၢၢ်တၢ်သံတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. စးထီၣ်ဖဲလါအ့ဖြ့ၣ် ၁၄ သီအနံၤန့ၣ် ပယီၤသုးလၢအိၣ်ဆီလီၤသးဖဲငါတဲၤ(ငါးတိုင်)သ၀ီ ကၠိကရၢၢ်ပူၤအံၤတဖၣ် ဟီၣ်က၀ီၤ တၢ်ပၢၢ်ဆၢသုးပၥ်ဖှိကရူၢ်နုၥ်လီၤခး၀ဲဒီး ဖဲန့ၣ်တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤန့ၣ်လီၤ.ခီဖျိတၢ်ဒုးကဲထီၣ်အဃိ ပယီၤသုးကလၢၤလၢအိၣ်ဘူးဖဲန့ၣ်တဖၣ်ခးလီၤစိ၀ဲကျိဖးဒိၣ်,ကဘီယူၤစ့ၢ်ကီးဟဲခးလီၤတၢ်တပယူၥ်ဃီလၢတၢ်ကဲထီၣ်သးအခိၣ် အဃၢၤန့ၣ်အဃိ ကမျၢၢ်တဖၣ်ဘၣ်ဃ့ၢ် ထီၣ်ဒံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးဖဲလါအ့ဖြ့ၣ် ၁၃ သီ အနံၤန့ၣ်စ့ၢ်ကီး ပယီၤသုး(ခမရ-၅၄၆)ခးလီၤကျိဖးဒိၣ်လီၤတဲၥ်ပိၢ်ဖးထီၣ်လၢကီၣ်၀ါလဲၢ်သ၀ီပူၤအဃိ...
တၢ်ပၢၢ်ဆၢကရူၢ်ကရၢထီဒါဝဲအၣ်စံၣ်ယၣ်ထံကီၢ်ခိၣ်နၢ်ကမၤတၢ်ထံၣ်လိၥ်သးဒီးသုးကီၣ်အခိၣ်မ့အီၣ်လဲၣ်
လါအ့ဖြ့ၣ်၁၆သီ, ၂၀၂၅နံၣ်, ခ့ၣ်အဲးစံၣ် ဖဲစှၤသီအတီၢ်ပူၤအံၤန့ၣ် အၣ်စံၣ်ယၣ်ထံကီၢ်ခိၣ်နၢ်တဖၣ်အိၣ်ဒီးတၢ်ရဲၣ်တၢ်ကျဲၤလၢကမၤတၢ်ထံၣ်လိၥ်သးဒီး သုးကီၣ်ကးအခိၣ်မ့အီၣ်လဲၣ်လၢကီၢ်ကၠီၣ်တဲၣ်ဝ့ၢ်ဘီကီးဘၣ်ဃးတၢ်ကမၤစၢၤကမျၢၢ်လၢ အတူၢ်ဘၣ်ဟီၣ်ခိၣ်ဟူးသ့ၣ်တဖၣ်အဂီၢ်အဖီခိၣ် ဘၣ်ဃးတၢ်ဂ့ၢ်ဝဲအံၤန့ၣ်ထီဒါဝဲဒၣ်အဂ့ၢ် တၢ်ပၢၢ်ဆၢကရူၢ်ကရၢ ဒ်အမ့ၢ် ဒီကလုၥ်တၢ်ဃူတၢ်ဖိးပဒိၣ်(NUG), ကညီဒီကလုၥ်စၢဖှိၣ်ကရၢ(KNU), ကရ့ၣ်နံၣ်ဒီကလုၥ်တၢ်လဲၤထီၣ်လဲၤထီပၣ်တံၣ်(KNPP),ခၠ့ဒီကလုၥ်သုးမုၢ်ဒိၣ်(CNF),ကီၢ်ပယီၤကၠိဖိဒံၣ်မိၣ်ကရဲၣ်တ့ၣ်သုးမုၢ်ဒိၣ်(ABSDF),ကီၢ်ပယီၤပိၥ်မုၢ်ကရၢ(WLB),ရိၣ်ဟ့ကၠၢၣ်တၢ်ထူၣ်ဖျဲးကီၣ်ကး(FRC)ဃုၥ်ဒီးတၢ်ကရၢကရိလၢတပၥ်ဖျါမံၤသ့ၣ်တဖၣ်ပၥ်ဖှိၣ်သးဒီးထုးထီၣ်ဝဲဒၣ်အလံၥ်တၢ်ပၥ်သးတဘ့ၣ်ဖဲတနံၤလါအ့ဖြ့ၣ် ၁၆ သီအနံၤအံၤန့ၣ်လီၤ. ဒ်တၢ်ပၢၢ်ဆၢကရူၢ်ကရၢ အလံၥ်တၢ်ပၥ်သးပူၤအိၣ်ဝဲအသိးန့ၣ် သုးကီၣ်ကးအံၤ ကီၢ်ပယီၤဒီတဘ့ၣ် ဟီၣ်ကဝီၤလၢအပၢြပးဝဲန့ၢ် န့ၣ်အိၣ်ဒၣ်ထဲ ၂၂မျးကယၥ်လီၤအဃိ ပှၤဂ့ၢ်တၢ်ဆီၣ်ထွဲမၤစၢၤတဖၣ်န့ၣ်သုတမၤစၢၤလိၤလိၤဆူသုးကီၣ်ကးအအိၣ်တဂ့ၤဒီးကမၤစၢၤခီဖျိ NUGဒီး ကလုၥ်ဒူၣ်တၢ်ပၢၢ်ဆၢကရူၢ်ကရၢဟီၣ်ကဝီၤပူၤပှၤလၢအဘၣ်ထွဲဘၣ်ဃးသ့ၣ်တဖၣ်အဂ့ၢ် ပၥ်ဖျါဝဲလၢအလံၥ်တၢ်ပၥ်သးအပူၤန့ၣ်လီၤ. တကတီၢ်ဃီ သုးကီၣ်ကးအံၤ တုၤဃီၤလၢ ပယီၤနံၣ်ထီၣ်သီဆၢကတီၢ်ဘၣ်ဆၣ်ခးလီၤဝဲဒၣ်ကျိဖးဒိၣ်,ကျိဖိ,ဟဲခးလီၤတၢ်ဒီးကဘီယူၤဒုးသုး,ဟဲတ့ၢ်လီၤမ့ၣ်ပိၢ်ဒီးကဘီယူၤ အိၣ်ဝဲကိးနံၤဒဲးဒီးအခဲအံၤ အၣ်စံၣ်ယၣ်ထံကီၢ်ကဟ့ၣ်တၢ်မၤစၢၤဆီၣ်ထွဲကီၢ်ပယီၤထံဖိကီၢ်ဖိလၢအတူၢ်ဘၣ်ဟီၣ်ခိၣ်ဟူးသ့ၣ်တဖၣ်အဂီၢ် ကထံၣ်လိၥ်တဲသကိးတၢ်ဒီးသုးကီၣ်ကးအခိၣ်ဒ်အံၤအဖီခိၣ်မ့ၢ်ဝဲတၢ်လီၤဘၣ်ယိၣ်အဂ့ၢ် တၢ်ပၢၢ်ဆၢကရူၢ်ကရၢစံးဝဲဒၣ်န့ၣ်လီၤ. လၢန့ၣ်အမဲၥ်ညါထံကီၢ်တၢ်စိတၢ်ကမီၤန့ၣ်အခဲအံၤ တမ့ၢ်တၢ်အိၣ်သးတခါလၢ န့ၣ်ပၠံၣ်ဒီၣ်ပၢဆှၢရဲၣ်ကျဲၤဝဲလိၤလိၤဘၣ်ဒီးမ့ၢ်တၢ်လၢဟဲခီဖျိထံဖိကီၢ်ဖိကမျၢၢ်အဂ့ၢ်န့ၣ်ကပၥ်သူၣ်ပၥ်သးဘၣ်ဝဲအဂ့ၢ်,လၢတၢ်န့ၣ်အဃိ ထံဖိကီၢ်ဖိကမျၢၢ်လၢ အတူၢ်ဘၣ်ဟီၣ်ခိၣ်ဟူးဒီးတၢ်ဒုးတၢ်ယၤသ့ၣ်တဖၣ်အဂီၢ်ပှၤဂ့ၢ်ဝီတၢ်ဆီၣ်ထွဲမၤစၢၤသ့ၣ်တဖၣ်န့ၣ် သုးတမၤတၢ်ထံၣ်လိၥ်သးဒီးမၤစၢၤအီၤလိၤလိၤထဲလၢသုးကီၣ်ကးအအိၣ်တဂ့ၤဒီး ဒ်သိးတၢ်ဆီၣ်ထွဲမၤစၢၤသ့ၣ်တဖၣ်န့ၣ်ကတုၤလၢပှၤတူၢ်ဘၣ်တၢ်သ့ၣ်တဖၣ်အအိၣ်လိၤလိၤအဂီၢ်ကဒုးအိၣ်ထီၣ်တၢ်ဆဲးကျိးတခါဒီးပှၤလၢအဘၣ်ထွဲဘၣ်ဃးသ့ၣ်တဖၣ်လၢတၢ်ကမၤစၢၤပှၤဂ့ၢ်ဝီတၢ်ဆီၣ်ထွဲမၤစၢၤအဂီၢ်အဂ့ၢ် တၢ်ပၢၢ်ဆၢကရူၢ်ကရၢဟ့ၣ်ဒုးသ့ၣ်နီၣ်ထီၣ်ဝဲအၣ်စံၣ်ယၣ်ထံကီၢ်ခိၣ်နၢ်သ့ၣ်တဖၣ်စ့ၢ်ကီးန့ၣ်လီၤ. ဒ်န့ၣ်အသိး ကီၢ်ပယီၤပူၤ ဒ်သိးတၢ်သူၣ်ထီၣ်တၢ်မုၥ်တၢ်ခုၣ်လၢအပၣ်ဃုၥ်ဒီးပှၤခဲလၢၥ်အဂီၢ် ဒ်ကီၢ်ပယီၤထံဖိကီၢ်ဖိအတၢ်လိၣ်ဘၣ်,တၢ်မုၢ်လၢ်လၢအမ့ၢ် (Myanmar Owned and Myanmar- Led process) လဲၤသးကန့ၢ်အဂီၢ် ကပၥ်သူၣ်ပၥ်သးဘၣ်လၢတၢ်မၤတၢ်ထံၣ်လိၥ်သးဒီးသုးကီၣ်ကးအခိၣ် တခီတၢၤအဂ့ၢ် တၢ်ပၢၢ်ဆၢကရူၢ်ကရၢသ့ၣ်တဖၣ်ဆီၣ်တခူထီၣ်ဝဲအၣ်စံၣ်ယၣ်ထံကီၢ်ခိၣ်နၢ်သ့ၣ်တဖၣ်စ့ၢ်ကီးန့ၣ်လီၤ.
၉ တၢၣ်ဟီၣ်ကဝီၤ ပယီၤသုးဒုးခီၣ်ဆၢက့ၤတၢ်ပၢၢ်ဆၢသုးပၥ်ဖှိၣ်လၢ တၢ်သူၣ်ထီၣ်(၃)ကထြၢတဖျၢၣ်အပူၤ
လါအ့ဖြ့ၣ် ၁၆သီ, ၂၀၂၅နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီးတရံးကီၢ်ဆၣ်ဒီးကြုၢ်တုကီၢ်ဆၣ်အပူၤ စးထီၣ်လၢလါအ့ဖြ့ၣ် ၁၅သီအနံၤ တၢ်ဒုးဆူၣ်ထီၣ်ဝဲဒၣ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, သုးပၥ်ဖှိၣ်ဒီးပယီၤသုးကီၣ်ကးအဘၢၣ် စးထီၣ်ဖဲကီးနွဲၣ်တုၤလီၤဆူ ၉တၢၣ်အဂ့ၢ် သ့ၣ်ညါဘၣ်လၢ တၢ်ပၢၢ်ဆၢသုးပၥ်ဖှိၣ်အပှၤဘၣ်မူဘၣ်ဒါအအိၣ်န့ၣ်လီၤ. လၢတၢ်ဒုးဆူၣ်ထီၣ်ဒ်န့ၣ်အဖီခိၣ် ၅ တၢၣ်တုၤ ၉တၢၣ် ပယီၤသုးသ့ၣ်တဖၣ်အံၤ က့ၤပၥ်ဖှိၣ်သးဒီးခီၣ်ဆၢဒုးက့ၤဝဲ တၢ်ပၢၢ်ဆၢသုးပၥ်ဖှိၣ်ဖဲ ၉တၢၣ် တၢ်သူၣ်ထီၣ်(၃)ကထြၢတဖျၢၣ်အပူၤအဂ့ၢ် လီၢ်ကဝီၤတၢ်ပၢၢ်ဆၢပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ“စးထီၣ်လၢ ကီးနွဲၣ်, ကီးတရံးခိၣ်ထး, ၅တၢၣ်, ၉တၢၣ် ဒီးတုၤလီၤဆူ ကြုၢ်တုခိၣ်ထိးန့ၣ်တၢ်ဒုးကဲထီၣ်ဒီတကျိၤန့ၣ်လီၤ.အခဲအံၤ ၅တၢၣ်ဒီး ၉တၢၣ်ပယီၤသုးသ့ၣ်တဖၣ်န့ၣ် ခီၣ်ဆၢခးပှၤဖဲ ၉တၢၣ် တၢ်သူၣ်ထီၣ်(၃)ကထြၢတဖျၢၣ်အပူၤန့ၣ်လီၤ.တၢ်သံတၢ်ဘၣ်ဒိဘၣ်ထံးလၢခံခီခံကပၤအိၣ်ဒီးဖဲပအိၣ်တကပၤအံၤပမၤန့ၢ်ပယီၤသုးကျိအခိၣ်(၂၀)ဘျဲၣ်အိၣ်စ့ၢ်ကီးန့ၣ်လီၤ.ပယီၤသုးသူကျိဖးဒိၣ်ဒီးကဘီယူၤတပယူၥ်ဃီန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ ကီးတရံးတုၤဆူကြုၢ်တု ဒီတကျိၤလၢသုးက့(၆)တကပၤန့ၣ် သုးကီၣ်ကးအသုးကျိၤအိၣ်ဆီလီၤသးအကျိၤ(၁၀)အမဲၥ်ညါအခဲလၢသုးက့(၇),တန့ဆါကီၢ်ဆၣ်တကပၤစ့ၢ်ကီးသုးကီၣ်ကးအသုးကျိၤဟဲလူၤထီၣ်တၢ်အိၣ်စ့ၢ်ကီးအဂ့ၢ် လီၢ်ကဝီၤတၢ်ပၢၢ်ဆၢပှၤဘၣ်မူဘၣ်ဒါစံးဝဲဒၣ်အသိးသ့ၣ်ညါဘၣ်န့ၣ်လီၤ. ဒ်န့ၣ်အသိးစးထီၣ်လၢ လါအ့ဖြ့ၣ်(၁၄)သီအခါလံၤလံၤ ခီဖျိသုးကီၣ်ကးကလံၤကျါတၢ်ဒုးဒီးကျိဖးဒိၣ်အဃိ ကြုၢ်တုကီၢ်ဆၣ်ဒီးကီးတရံးကီၢ်ဆၣ်အပူၤလီၢ်ကဝီၤကမျၢၢ် တစှၤန့ၣ်(၁၀)ဘၣ်သံဘၣ်ပှၢ်ဝဲဒၣ်အသိးတၢ်ဘၣ်ဒိဘၣ်ထံးစ့ၢ်ကီးအိၣ်တစှၤန့ၣ်အဂၤ(၂၀)ဘၣ်အဂ့ၢ်သ့ၣ်ညါဘၣ်ဒ်လီၢ်ကဝီၤတၢ်ကစီၣ်ပၥ်ဖျါဝဲဒၣ်အိၣ်အသိးန့ၣ်လီၤ. တကီၢ်ခါခဲအံၤန့ၣ် စးထီၣ်လၢ ကီးတရံးဝ့ၢ်ခိၣ်ထိး တုၤလီၤလၢကြုၢ်တုဝ့ၢ်ခိၣ်ထိး ကျိဖးဒိၣ်,ကျိဖိအကလုၢ်သီၣ်ဒံးဝဲအဖၢမုၢ်အဂ့ၢ်လီၢ်ကဝီၤပှၤဘၣ်မူဘၣ်ဒါစံးဝဲဒၣ်အသိးသ့ၣ်ညါဘၣ်န့ၣ်လီၤ.
ပယီၤသုးကဘီယူၤလဲၤခးလီၤတၢ်လၢ(ကါနံၤ)သီခါဖၠၣ် ကမျၢၢ်သံဘၣ်ဒိဘၣ်ထံးအိၣ်၀ဲအါမး
လါအ့ဖြ့ၣ် ၁၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ် ကါနံၤသ၀ီပူၤ တနံၤအံၤခီဖျိ ပယီၤသုး ကဘီယူၤလဲၤတ့ၢ်လီၤမ့ၣ်ပိၢ်အဃိလၢသီခါဖၠၣ်ကရၢၢ်ပူၤအဃိ ကမျၢၢ်သံဘၣ်ဒိဘၣ်ထံးအိၣ်၀ဲအါမးအဂ့ၢ်န့ၣ် တၢ်ကစီၣ်သန့ဒီးတၢ်ဂီၤမူရၤလီၤသးတခါပူၤအသိးသ့ၣ်ညါဘၣ်န့ၣ်လီၤ. ဖဲတနံၤအံၤလါအ့ဖြ့ၣ် ၁၅ သီ တါလီၤခံသီတသီ ကဘၣ်ဖဲဖဲမုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးကဘီယူၤ ပညိၣ်လဲၤခးလီၤတၢ်လၢ ကါနံၤသ၀ီပူၤ သီခါဖၠၣ်အဃိ ကမျၢၢ်သံဘၣ်ဒိဘၣ်ထံးကဲထီၣ်အမဲၥ်ညါ သီခါဖၠၣ်တၢ်သူၣ်ထီၣ်, သိလ့ၣ်သ့ၣ်တဖၣ် ဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်တၢ်ကစီၣ်သန့တဖၣ်ပၥ်ဖျါထီၣ်၀ဲအသိးန့ၣ် တနံၤအံၤခီဖျိဘၣ်လၢတါလီၤကမျၢၢ်တဖၣ်လဲၤထီၣ်မၤဘူၣ်မၤဘါလၢ သီခါဖၠၣ်အံၤအိၣ်၀ဲအါမးဒီး လၢတၢ်ကဲထီၣ်သးအံၤအဃိ သီခါဃုၥ်ဒီးကမျၢၢ်သံဘၣ်ဒိဘၣ်ထံးတစှၤန့ၢ်(၃၀)ဂၤအဂ့ၢ်န့ၣ် စံး၀ဲန့ၣ်လီၤ. တကီၢ်ခါခဲအံၤ ခီဖျိတၢ်ကဲထီၣ်သးအံၤအဃိ သ၀ီပူၤကမျၢၢ်ဃုၥ်ဒီးကမျၢၢ်လၢအိၣ်ဘူးဖဲန့ၣ်တဖၣ် ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ. စးထီၣ်ဖဲမဟါလါအ့ဖြ့ၣ် ၁၄ သီအနံၤန့ၣ် ပယီၤသုးလၢအိၣ်(ကိတဲၤ)ကၠိအံၤတဖၣ် တၢ်ပၢၢ်ဆၢသုးပၥ်ဖှိၣ်ကရူၢ် လဲၤနုၥ်လီၤခး၀ဲဒီး တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤအဂ့ၢ်န့ၣ် လီၢ်က၀ီၤကမျၢၢ်ဒီးပှၤဘၣ်မူဘၣ်ဒါ စံး၀ဲန့ၣ်လီၤ. ဒ်န့ၣ်အသိးခီဖျိလၢတၢ်ဒုးကဲထီၣ်အံၤအဃိစးထီၣ်ဖဲမဟါတုၤလၢတဂီၤအံၤ ပယီၤသုးခးလီၤကျိဖးဒိၣ် တကးဒံးဘၣ် ကဘီယူၤစ့ၢ်ကီးလဲၤ ခးလီၤတၢ်လၢတၢ်ကဲထီၣ်သးအလီၢ်ဃုၥ်ဒီးဒူသ၀ီလၢအိၣ်ဘူးဖဲန့ၣ်တဖၣ်အပူၤတပယူၥ်ဃီဒီး တုၤလၢခဲအံၤတၢ်ဒုးစ့ၢ်ကီးဆဲးကဲထီၣ်ဒံးအသးန့ၣ်လီၤ.
ကီးတရံးကီၢ်ဆၣ် ၂ သီအတီၢ်ပူၤ ပယီၤသုးခးလီၤကျိဖးဒိၣ်,ဒြိအဃိ ကမျၢၢ်ဘၣ်ဒိ(၈)ဂၤအကျါပၣ်ဃုၥ်ဖိသၣ်
လါအ့ဖြ့ၣ် ၁၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်ပူၤ ခံသီအတီၢ်ပူၤပယီၤသုးခးလီၤကျိဖး ဒိၣ်အဃိ ကမျၢၢ်ဘၣ်ဒိ၀ဲ(၈)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါ၀ဲဖဲတနံၤအံၤလါအ့ဖြ့ၣ် ၁၅ သီအနံၤန့ၣ်လီၤ. ဖဲလါအ့ဖြ့ၣ် ၁၀ သီ ဟါခီ ၆း၀၀ နၣ်ရံၣ်အဆၢကတီၢ်န့ၣ် ပယီၤသုးလၢအိၣ်ဆီလီၤသးဖဲကီးတရံး၀့ၢ်ပူၤအံၤတဖၣ် လဲၤတ့ၢ်လီၤ၀ဲဒြိလၢ မီမးသ၀ီသီပူၤအဃိ ဖိသၣ်မုၣ်(၁၀)နံၣ်တဂၤ, ပိၥ်ခွါ(၅၅)နံၣ်တဂၤဒီး ပိၥ်မုၣ်(၅၀)နံၣ်တဂၤ ဘၣ်ဒိဘၣ်ထံး ၀ဲအဂ့ၢ်န့ၣ် လံၥ်တၢ်ပၥ်ဖျါအပူၤစံး၀ဲန့ၣ်လီၤ. ဒ်န့ၣ်အသိးဖဲအပူၤကွံၥ်လါအ့ဖြ့ၣ် ၈ သီ ဟါခီ ၁၀း၃၀ ဃၣ်ဃၣ်အဆၢကတီၢ်န့ၣ်စ့ၢ်ကီး ပယီၤသုးလၢအိၣ်ကီးတရံး၀့ၢ်ပူၤအံၤ တဖၣ် ခးလီၤ၀ဲ(၁၂၀ မမ)ဒီး(၁၂၂ မမ)ကျိဖးဒိၣ် လီၤတဲၥ်ပိၢ်ဖးထီၣ်၀ဲလၢအၤကီၤ(အံကောင်)သ၀ီ, ကၠဲၣ်သလဲၣ်(ကျိုက်သလိုက်)သ၀ီပူၤဒီး ဒီၣ်ပလၤ(ဒေါက်ပလန်)သ၀ီတဖၣ်အံၤ အပူၤန့ၣ်လီၤ. ခီဖျိလၢကျိဖးဒိၣ်အံၤအဃိ ကမျၢၢ်ပိၥ်မုၣ်ပိၥ်ခွါဘၣ်ဒိဘၣ်ထံး၀ဲ(၅)ဂၤအကျါ ပၣ်ဃုၥ်၀ဲ ဖိသၣ်မုၣ်(၁၄)နံၣ်တဂၤ, ဖိသၣ်ပိၥ်ခွါ(၉)နံၣ် တဂၤဒီး ဖိသၣ်ပိၥ်ခွါ(၆)နံၣ်တဂၤန့ၣ်လီၤ.လၢန့ၣ်အမဲၥ်ညါခီဖျိကျိဖးဒိၣ်အံၤအဃိဟံၣ်ဟးဂီၤ၀ဲ(၂)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ. ဒ်န့ၣ်အသိးဖဲမဟါလါအ့ဖြ့ၣ် ၁၄ သီဒီး တနံၤအံၤ ၁၅ သီ တါလီၤအဆၢကတီၢ်အံၤ လၢကြုၢ်တုကီၢ်ဆၣ် ဒူသ၀ီအပူၤ...
ကြုၢ်တုကီၢ်ဆၣ် ငါတဲၤသ၀ီပူၤတၢ်ဒုးဆဲးကဲထီၣ်ပယီၤသုးကဘီယူၤလဲၤခးလီၤတၢ်အဃိ ကမျၢၢ်ဃ့ၢ်ထီၣ်
လါအ့ဖြ့ၣ် ၁၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ် ဒူသ၀ီတဖၣ်အပူၤ တနံၤအံၤခီဖျိတၢ်ဒုးဆဲး ကဲထီၣ်ဒီး ပယီၤသုးခးလီၤကျိဖးဒိၣ်အဃိ ကမျၢၢ်တဖၣ်ပျံၤတၢ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါဒီး ကမျၢၢ်တဖၣ် အအိၣ်န့ၣ်လီၤ. စးထီၣ်ဖဲမဟါလါအ့ဖြ့ၣ် ၁၄ သီ တါလီၤအခိၣ်တီတနံၤန့ၣ် ပယီၤသုးလၢအိၣ်(ငါတဲၤ)ကၠိကျဲမုၢ်ကပၤအံၤတဖၣ် တၢ်ပၢၢ်ဆၢသုးပၥ် ဖှိၣ်လဲၤခး၀ဲဒီးတၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤတကးဒံးဘၣ် ပယီၤသုးခးလီၤကျိဖးဒိၣ်,ကဘီယူၤစ့ၢ်ကီးဟဲခးလီၤတၢ် တပယူၥ်ဃီ တုၤလၢတဂီၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဂ့ၢ်အံၤလီၢ်က၀ီၤပှၤဘၣ်မူဘၣ်ဒါတဂၤစံး၀ဲလၢ“ခဲအံၤကီးတရံးဒီးကြုၢ်တုကီၢ်ဆၣ်အဘၢၣ်စၢၤန့ၣ်ပယီၤသုးကဘီယူၤ ဟဲခးလီၤတၢ်.ခဲအံၤတၢ်ပၢၢ်ဆၢသုးကရူၢ်နုၥ်လီၤခးပယီၤသုးလၢအိၣ်(ငါတဲၤ)ကၠိတဖၣ်န့ၣ်.ဖဲတဂီၤညါအံၤပယီၤသုးကဘီယူၤဟဲခးတၢ်အိၣ်တဘျီခံဘျီလံ.ပနၢ်ဟူကျိဖးဒိၣ်လီၤတဲၥ်လၢကမျၢၢ်အဟံၣ်ဖီခိၣ်တဖျၢၣ်မ့ၢ်အသံအဘၣ်ဒိဘၣ်ထံးဧါဒုတသ့ၣ်ညါဒံးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ. တကီၢ်ခါခဲအံၤခီဖျိတၢ်ဒုးကဲထီၣ်ဒီးပယီၤသုးခးလီၤကျိဖးဒိၣ်,ကဘီယူၤစ့ၢ်ကီးဟဲခးလီၤတၢ်တုၤလၢခဲအံၤအဃိ (ငါတဲၤ)ကမျၢၢ်ဃုၥ်ဒီး ကမျၢၢ်လၢအိၣ်ဘူးဖဲတၢ်ကဲထီၣ်သးအခိၣ်အဃၢၤန့ၣ်တဖၣ် ပျံၤတၢ်ဖုးတၢ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဖဲတၢ်ကဲ ထီၣ်သးအခိၣ်အဃၢၤအံၤတဂၤ စံး၀ဲဒ်အံၤန့ၣ်လီၤ. “တၢ်ကဲထီၣ်သးခဲအံၤန့ၣ်လၢ(ငါတဲၤ)အဖီခိၣ် တီၤပၠၣ်သီခါဖၠၣ်အခိၣ်အဃၢၤ.မ့၀ံၤမ့မ့ၢ်လၢ(ငါတဲၤ)ကၠိခီန့ၣ်ပှၤဟဲခး.စးထီၣ်လၢဖဲ မဟါမုၢ်နၤခီ (၈း၃၀)န့ၣ်ကဘီယူၤဟဲလီၤ. (၉)နၣ်ရံၣ်ဘျီကျိဖးဒိၣ်လီၤ.လီၤတဲၥ်လၢ(လ့တဲၤ),ယသ့ၣ်တီၤ, ယ့ၤပူၣ်သ၀ီပူၤ. လၢ(၈)တဲၤ, (၉)တဲၤနါက့ခးလဲးလိးလီၤ တနံၤအံၤ ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ. တကးဒံးဘၣ်လၢန့ၣ်အမဲၥ်ညါစးထီၣ်လၢမဟါတုၤလၢတနံၤအံၤလါအ့ဖြ့ၣ် ၁၅ သီ ဂီၤခီတစုန့ၣ် တၢ်ဒုးဆဲးကဲထီၣ်အသး ဒီး တၢ်လီၢ်လၢတၢ်ဒုးကဲထီၣ်အလီၢ်အံၤအိၣ်ဘူး၀ဲဒၣ်ဒီးသီခါဖၠၣ်အဃိ သီခါတဖၣ်ပျံၤတၢ်ဖုးတၢ်ဃ့ၢ်ထီၣ် တသ့အိၣ်ကတၥ်ထီသး လၢဖၠၣ်ပူၤအဂ့ၢ်န့ၣ် သီခါတဖၣ်စံး၀ဲအသိးသ့ၣ်ညါဘၣ်န့ၣ်လီၤ. ဒ်န့ၣ်အသိးတကီၢ်ခဲအံၤခီဖျိတၢ်ဒုးကဲထီၣ်ပယီၤသုးခးလီၤကျိဖးဒိၣ်အဃိ (ငါတဲၤ)သီခါဖၠၣ်လၢအအိၣ်ဘူးဒီးကၠိလၢတၢ်ကဲထီၣ်သး...
KNU သုးက့(၄)အပတီၢ်တအိၣ်လၢကဘၣ်ထၢန့ၢ်ဆူၣ်သုးဘၣ်အဂ့ၢ် သုးက့(၄)စံးဝဲ
လါအ့ဖြ့ၣ် ၁၅သီ, ၂၀၂၅နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄)ဟီၣ်ကဝီၤ, ထမ့မစါသဝီ,စဲၤအ့ၤစူၣ်,လဲၣ်ကူ,တပိၢ်,ကဒဲ,လဲၣ်ပၤပၠ့ၤ,ဒူယ့ပၤရှီၤ,စၤဒံၤဝ့,မၣ်ဒီ,ယ့ၤလၠါ,သၤယၤကိသဝီၤသ့ၣ်တဖၣ်န့ၣ်တၢ်ကစီၣ်ဟးထီၣ်ဝဲလၢ KNDO သုးရ့ၣ်(၇)ထၢန့ၢ်ဆူၣ်ဝဲသုးအိၣ်အဖီခိၣ် သုးက့(၄)အံၤအပတီၢ်တအိၣ်လၢကဘၣ်ထၢန့ၢ်ဆူၣ်သုးဘၣ်အဂ့ၢ် သုးက့(၄)အပှၤဘၣ်မူဘၣ်ဒါစံးဝဲဒၣ်န့ၣ်လီၤ. ဒ်တၢ်ပၢၢ်ဆၢတၢ်ကရၢကရိတဖုအသိး ဂံၢ်ဘါလၢတၢ်လီၤကရၢကရိအီၤန့ၣ်တၢ်မၤအီၤအိၣ်ဘၣ်ဆၣ် သုးက့(၄)အံၤအပတီၢ်တအိၣ်လၢကဘၣ်ထၢန့ၢ်ဆူၣ်သုးဘၣ်အဂ့ၢ် သုးက့(၄)အသုးက့ခိၣ် သုးခိၣ်ကျၢၢ်ဖိစီၤဖိလ့စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“တၢ်ထၢန့ၢ်ဆူၣ်သုးန့ၣ်တအိၣ်ဘၣ်. ဘၣ်ဆၣ်လၢပတၢ်ကရၢကရိဂံၢ်ဘါအဂီၢ်ပဟးတဲနၢ်ပၢၢ်န့ၣ်အိၣ်ဝဲဒၣ်န့ၣ်လီၤ.တၢ်ဂံၢ်တၢ်ဘါသ့ၣ်တဖၣ်န့ၣ်တမ့ၢ်ထဲကဘၣ်ကဲထဲသုးဘၣ်.ကဘၣ်မၤပၢြပးမူဒါအိၣ်,ပၢၤကီၢ်မူဒါအိၣ်,ဒူသဝီဘံၣ်ဘၢသနၥ်က့အိၣ်စ့ၢ်ကီးလီၤ.ဂံၢ်ဘါန့ၣ်အိၣ်ကလုၥ်ကလုၥ်လီၤ.မ့မ့ၢ်တၢ်ထၢဆူသုးန့ၣ်တအိၣ်ဘၣ်.ပတၢ်ကရၢကရိ ပပှၤန့ၣ်အခဲအံၤန့ၢ်ဒံးဒၣ်တၢ်လီၤ.တလိၣ်လၢကဘၣ်ဖီၣ်ဃံးတဟုးဒၢးဘၣ်.ပတဲနၢ်ပၢၢ်ဒီးပှၤလၢသးအိၣ်မၤတၢ်ပၢၢ်ဆၢဒီးဟဲန့ၣ်အိၣ်ဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ တၢ်မ့ၢ်တလဲၤကဲသုးဘၣ်န့ၣ် တၢ်ထၢန့ၢ်ဆူၣ်ဝဲလၢစ့အဂ့ၢ်တၢ်ကစီၣ်ဟးထီၣ်ဝဲဒၣ်အဖီခိၣ် တၢ်ဂ့ၢ်ဝဲန့ၣ်ကီၢ်ရ့ၣ်ဒီးသုးက့အတၢ်သိၣ်တၢ်ဘျၢလၢတၢ်ပၥ်လီၤအီၤဒ်န့ၣ်တအိၣ်နီတဘျီဘၣ်အဂ့ၢ် သုးခိၣ်ကျၢၢ်ဖိစီၤဖိလ့တဲအါထီၣ်ဝဲဒၣ်စ့ၢ်ကီးန့ၣ်လီၤ. ဒ်န့ၣ်အသိး ဖဲတၢ်လီၤကရၢကရိတၢ်အဆၢကတီၢ် ကမျၢၢ်လၢထံၣ်ဃုၥ်ဝဲဒီးဟဲပၥ်ဖှိၣ်မၤသကိးတၢ်န့ၣ်အိၣ်ဝဲဒၣ်အသိး ကမျၢၢ်တနီၤလၢတထံၣ်ဃုၥ်ဝဲဘၣ်န့ၣ်အိၣ်ဝဲအဖီခိၣ်တၢ်ဘၣ်ကဲထီၣ်သးဒ်အံၤလီၤအဂ့ၢ် ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်အိၣ်ဝဲဒၣ်စ့ၢ်ကီးန့ၣ်လီၤ. တကီၢ်ခါခဲအံၤန့ၣ်ကလုၥ်ဒူၣ်တၢ်ပၢၢ်ဆၢဟီၣ်ကဝီၤပူၤကိးတီၤဒဲးဃၣ်ဃၣ် တၢ်လီၤကရၢကရိဝဲဂံၢ်ဘါအိၣ်အသိး သုးကီၣ်ကးတကပၤစ့ၢ်ကီးလီၤကရၢကရိဝဲဂ့ၢ်ဘါအမဲၥ်ညါထၢန့ၢ်ဆူၣ်ဝဲကမျၢၢ်တၢ်ဘၣ်ကဲသုး အိၣ်ဝဲဒၣ်လၢကီၢ်ပယီၤဒီတဘ့ၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
KTLA တၢ်မၤသကိးတၢ်ဒီး KNLA သုးက့(၄)အအိၣ်အဂ့ၢ် KNLA စံးဝဲ
လါအ့ဖြ့ၣ် ၁၂ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်,သုးက့(၄),KNLA သုးရ့ၣ်(၁၁)ဟီၣ်ကဝီၤပူၤ ကီၢ်သူလ့ၤသုးမုၢ်ဒိၣ် (KTLA) အတၢ်မၤသကိးတၢ်ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၄)လၢတၢ်ဒုးထီဒါဝဲသုးမီၤစိရိၤအိၣ်ဝဲဒၣ်အဂ့ၢ် သ့ၣ်ညါဘၣ်လၢသုးက့အပှၤဘၣ်မူဘၣ်ဒါအအိၣ်န့ၣ်လီၤ. KTLA လၢအအိၣ်ဆီလီၤသးလၢ KNLA သုးရ့ၣ်(၁၁)ဟီၣ်ကဝီၤပူၤ လၢအဘၣ်တၢ်တီခိၣ်ရိၣ်မဲအီၤလၢသုးခိၣ်ထးဆဲးတဖၣ်အတၢ်မၤသကိးတၢ်လၢတၢ်ခီၣ်ဆၢဒုးသကိးသုးကီၣ်ကးအိၣ်ဝဲဒၣ်အဂ့ၢ် သုးက့(၄)အသုးက့ခိၣ် သုးခိၣ်ကျၢၢ်ဖိစီၤဖိလ့စံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“တဲတ တဘၣ် ဘၣ်. မ့မ့ၢ်ကီၤလၤဖိတဒူၣ်န့ၣ် အခဲအံၤဘှ့ၣ်ဘှ့ၣ်ဘှီၣ်ဘှီၣ်လီၤ.လၢKTLA ထံဆဲးမဲယွၤသုးရ့ၣ်တရ့ၣ်န့ၣ်မၤသကိးတၢ်ဒီးပှၤန့ၣ်လီၤ.သုးရ့ၣ်(၁၁)ဟီၣ်ကဝီၤပူၤန့ၣ်တၢ်ဂ့ၢ်ကီတအိၣ်နီတမံၤဘၣ်.မ့မၢ်လၢ သုးက့ဒီးသုးရ့ၣ်(၁၂)ဟီၣ်ကဝီၤလၢကီၤလၤဖိတဒူၣ်န့ၣ် ပတထံၣ်အတၢ်ဟူးတၢ်ဂဲၤအိၣ်နီတမံၤဘၣ်.KTLA ထံဆဲးမဲးယွၤသုးရ့ၣ်လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်ထးဆဲးဒီးသုးခိၣ်သးမၠဲးန့ၣ်တၢ်ဂ့ၢ်ကီတအိၣ်နီတမံၤဘၣ်. အဝဲသ့ၣ်ပၥ်ဖှိၣ်မၤသကိးတၢ်ဒီးပပှၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲညါ တကီၢ်ခါခဲအံၤန့ၣ် KTLA ထံဆဲးမဲးယွၤသုးရ့ၣ်ဒီး KNLA သုးရ့ၣ်(၁၁)ဒီးသိၣ်မှံၤသုးတဖၣ်ဘၣ်သဂၢၢ်ဝဲဒီး သုးကီၣ်ကးအသုးကျိၤ(၂)ဘိလၢကဟဲထီၣ်ဒိၣ်စိဝဲမိဒီၢ်ကျဲဒီတဘိတုၤလၢကီၢ်ဆၢကန့ၢ်အဂီၢ်ဒီး ပှၤဂံၢ်ဘါကအိၣ်(၄၀၀)တုၤ(၅၀၀)ဂၤအဂ့ၢ် သုးခိၣ်ကျၢၢ်ဖိ စီၤဖိလ့တဲအါထီၣ်ဝဲဒၣ်အသိးခီဖျိသုးပၥ်ဖှိၣ်သိၣ်မှံၤအတၢ်ခီၣ်ဆၢဒုးအဝဲသ့ၣ်အဃိသုးကီၣ်ကးအပှၤတဖၣ်အံၤတိဝဲတၢ်တဖျိဒံးဘၣ်ဒီးအိၣ်ဝဲဖဲ သံခိအဂ့ၢ် အဝဲစံးဝဲဒၣ်စ့ၢ်ကီးန့ၣ်လီၤ. တကီၢ်ခါခဲအံၤ KNLA သုးရ့ၣ်(၁၁)ဟီၣ်ကဝီၤပူၤအံၤ သုးကီၣ်ကးဟဲခးလီၤတၢ်ဒီးကဘီယူၤမ့ၢ်ဂ့ၤ,ဟဲဆှၣ်တၢ်ဒီး Droneလၢကဃုသ့ၣ်ညါဝဲတၢ်ပၢၢ်ဆၢသုးပၥ်ဖှိၣ်အိၣ်ဆီၤလီၤသးအလီၢ်မ့ၢ်ဂ့ၤအါထီၣ်ဝဲဒၣ်ဒီး တရူး(Drone) ပှၤသ့ပှၤဘၣ်တဖၣ်နုၥ်လီၤမၤစၢၤသုးကီၣ်ကးလၢDroneတၢ်သ့တၢ်ဘၣ်အိၣ်ဝဲဒၣ်အဂ့ၢ် ခ့ၣ်အဲၣ်ယူၣ်ဘျံးဒဝဲၢ်ကီၢ်ရ့ၣ်အပှၤဘၣ်မူၣ်ဘဒါစံးဝဲဒၣ်အသိးသ့ၣ်ညါဘၣ်န့ၣ်လီၤ.
တၢ်ပၥ်လီၤက့ၤ ဒူသထူၣ်ကီၢ်ရ့ၣ်ခိၣ်လီၢ်လံၤ ပဒိၣ်စီၤကိၣ်လ့အစိၣ်တၢ်ရဲၣ်တၢ်ကျဲၤ၀ံၤ၀ဲ
လါအ့ဖြ့ၣ် ၁၁ သီ, ၂၀၂၅ နံၣ်, ခ့ၣ်အဲးစံၣ် ပဒိၣ်စီၤကိၣ်လ့လၢအမ့ၢ်၀ဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်ခိၣ်လီၢ်လံၤအံၤ ဖဲလါအ့ဖြ့ၣ် ၇ သီ ဟါခီ ၇း၂၈ မံးနံး အဆၢကတီၢ်န့ၣ် စူၥ်ကွံၥ်သးလၢသးပှၢ်တၢ်ဆါ၀ံၤ ဖဲလါအ့ဖြ့ၣ် ၉ သီအနံၤန့ၣ် တၢ်လဲၤပၥ်လီၤက့ၤအစိၣ်တၢ်ရဲၣ်တၢ်ကျဲၤ၀ံၤ၀ဲ လံန့ၣ်လီၤ. ကီၢ်ရ့ၣ်ခိၣ်ပဒိၣ်စီၤကိၣ်လ့အံၤခီဖျိမ့ၢ်၀ဲပှၤဘူးဒးဖိတဂၤအဃိ တၢ်လဲၤပၥ်လီၤက့ၤအီၤဒ်လုၢ်လၢ်အိၣ်၀ဲအသိးဒီး လၢတၢ်လဲၤပၥ်လီၤ က့ၤအီၤတၢ်ရဲၣ်တၢ်ကျဲအပူၤအံၤ ခ့ၣ်အဲၣ်ယူၣ် ကီၢ်ရ့ၣ်ပှၤဘၣ်မူဘၣ်ဒါ, ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးခိၣ်သုးနၢ်,သုးဖိ, တၢ်ပၢၢ်ဆၢသိၣ်မှံၤခိၣ်နၢ်,သုးဖိ,လီၢ်က၀ီၤကမျၢၢ်ခိၣ်နၢ်ဃုၥ်ဒီးကမျၢၢ်လဲၤဆှၢအီၤကအိၣ်၀ဲ(၄၀၀)ဃၣ်ဃၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ. ကီၢ်ရ့ၣ်ခိၣ်လီၢ်လံၤပဒိၣ်စီၤကိၣ်လ့အံၤ စးထီၣ်ဖဲ(၂၀၁၇)တုၤလၢ(၂၀၂၂)န့ၣ် ဟံတ့ၢ်၀ဲမူဒါဒ်ကီၢ်ရ့ၣ်ခိၣ်တဂၤအသိးဒီး ဒ်န့ၣ်အသိး တချုးအ၀ဲဟံမူဒါဒ်ကီၢ်ရ့ၣ်ခိၣ်တဂၤဒံးဘၣ်အခါစ့ၢ်ကီး ဟံတ့ၢ်ဃၥ်မူဒါဒ်ကီၢ်ရ့ၣ်နဲၣ်,နဲၣ်ရွဲၣ်သဃဲၤတဂၤအသိး ယံၤ၀ဲလၢအနံၣ်(၁၀) ဘျဲၣ်ညါအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ. တကးဒံးဘၣ် တချုးအနုၥ်လီၤမၤတၢ်လၢကီၢ်ရ့ၣ်ပူၤဒံးဘၣ်အခါန့ၣ်မ့ၢ်တ့ၢ်စ့ၢ်ကီး၀ဲပှၤမၤတၢ်ပၢၢ်ဆၢဖိတဂၤန့ၣ်လီၤ. ဒ်န့ၣ်အသိး စးထီၣ်ဖဲအအိၣ်ဘှံးလၢကီၢ်ရ့ၣ်ခိၣ်မူဒါတၢ်ဖံးတၢ်မၤပူၤတုၤလၢအသးသမူဟးထီၣ်တစုန့ၣ်အ၀ဲမ့ၢ်ဒံး၀ဲကီၢ်ရ့ၣ်ပှၤဟ့ၣ် ကူၣ်ဟ့ၣ်ဖး တၢ်ဖိတဂၤ ဒီးလၢအတၢ်စူၥ်ကွံၥ်သးအံၤအဖီခိၣ်ကဲထီၣ်၀ဲတၢ်လီၤဟိလီၤပျီလၢတၢ်ဖံးတၢ်မၤပူၤ အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. “ပကီၢ်ရ့ၣ်ခိၣ်လီၢ်လံၤအံၤတဟံမူဒါလၢဒ်ကီၢ်ရ့ၣ်ခိၣ်လၢၤဘၣ်ဆၣ်အ၀ဲမ့ၢ်၀ဲကီၢ်ရ့ၣ်ပှၤဟ့ၣ်ကူၣ်ဟ့ၣ်ဖးတၢ်ဂၤလီၤ.ခဲအံၤခီဖျိအ၀ဲ လဲၤပူၤကွံၥ်သးအဃိတၢ်လီၤဟိလီၤပျီအိၣ်ထီၣ်၀ဲလၢတၢ်ဟ့ၣ်ကူၣ်ဟ့ၣ်ဖးတကပၤန့ၣ်.ပမ့ဘၣ်ကွၢ်လၢတၢ်ပၢၢ်ဆၢအတၢ်လဲၤအဖီဃိၣ်န့ၣ်နါက့အမၤတ့ၢ်တၢ်ပၢၢ်ဆၢအနံၣ်တစှၤဘၣ်.အမ့ၢ်ပှၤတၢ်ပၢၢ်ဆၢတဂၤအသိးလၢခံန့ၣ်ကဲထီၣ်၀ဲကီၢ်ရ့ၣ်နဲၣ်ရွဲၣ်သဃဲၤတဂၤ.ဟံမူဒါလၢကီၢ်ရ့ၣ်နဲၣ်ရွဲၣ်သဃဲၤန့ၣ်န့ၢ်ဖးယံၤညါ.လၢခံကီၢ်ရ့ၣ်နဲၣ်ရွဲၣ်တအိၣ်လၢၤဘၣ်ဘျီအ၀ဲဟံထီၣ်က့ၤမူဒါဒ်ကီၢ်ရ့ၣ်နဲၣ်ရွဲၣ်တဂၤအသိးလီၤ.အဟံမူဒါလၢကီၢ်ရ့ၣ်နဲၣ်ရွဲၣ်န့ၣ်ကအိၣ်လၢအနံၣ်(၁၀)ဘျဲၣ်(၂၀)ညါ.လၢခံမးအကဲထီၣ်က့ၤကီၢ်ရ့ၣ်ခိၣ်.အကဲထီၣ်ကီၢ်ရ့ၣ်ခိၣ်၀ံၤခီဖျိအညါခိၣ်ထီၣ်တဒိးဃုထၢသးလၢတၢ်ဃုထၢဘၣ်အဃိအ၀ဲအိၣ်က့ၤလၢပှၤဒိးန့ၢ်တၢ်ယူးယီၣ်တဂၤအသိးပှၤဟ့ၣ်ကူၣ်ဟ့ၣ်ဖးတၢ်တဂၤအသိးလီၤမီၤနီၤ”အဂ့ၢ်န့ၣ် စံး၀ဲန့ၣ်လီၤ. ကီၢ်ရ့ၣ်ခိၣ်ပဒိၣ်စီၤကိၣ်လ့စူၥ်ကွံၥ်သးအခါအသးနံၣ်အိၣ်၀ဲ(၇၆)နံၣ် အိၣ်ဆိး၀ဲဒၣ်ဖဲဘံလ့ကီၢ်ဆၣ် ဃီဖိပျဲၢ်ကရူၢ် ဃီဖိပျဲၢ်သ၀ီပူၤ န့ၣ်လီၤ....
KNUသုးက့(၄)ဟီၣ်ကဝီၤပူၤ တရူးနုၥ်လီၤမၤစၢၤသုးကီၣ်ကးလၢ Drone တၢ်သ့တၢ်ဘၣ်ဂ့ၢ် KNU စံးဝဲ
လါအ့ဖြ့ၣ် ၁၁သီ, ၂၀၂၅နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄) ဘျံးဒဝဲၢ်ကီၢ်ရ့ၣ် တနီသရံၣ်ကီၢ်ဆၣ်ပူၤ တကီၢ်ခါခဲအံၤန့ၣ် သုးကီၣ်ကးမၤဝဲဒၣ်တၢ်ထီၣ်ဒုးဒီး တရူးတဖၣ်နုၥ်လီၤမၤစၢၤအဝဲသ့ၣ်လၢ Drone တၢ်သ့တၢ်ဘၣ်အိၣ်ဝဲဒၣ်အဂ့ၢ် ကွဲၤကလုၢ်တၢ်ကစီၣ်ပၥ်ဖျါဝဲဖဲ လါအ့ဖြ့ၣ် ၁၁သီအနံၤန့ၣ်လီၤ. ဒ်ကွဲၤကလုၢ်အတၢ်ပၥ်ဖျါအိၣ်ဝဲဒၣ်အသိးန့ၣ် ဖဲအပူၤကွံၥ်လါအ့ဖြ့ၣ်(၉)သီအနံၤန့ၣ် တရူး(Drone) အပှၤသ့ပှၤဘၣ်(၅)ဂၤဟဲတုၤဝဲဒၣ်ဖဲတနီသရံးပယီၤတၢ်မဲၥ်ညါသုးကလၢၤတဖျၢၣ်လၢအမ့ၢ် ခီၣ်ချ့သုးရ့ၣ်(ခမရ-၅၇၁)ဒီးစးထီၣ်အတၢ်ဟူးတၢ်ဂဲၤလၢတၢ်မၤစၢၤဝဲဒၣ်ပယီၤသုးလၢ(Drone) လၢတၢ်ဃုသ့ၣ်ညါဝဲတၢ်ပၢၢ်ဆၢသုးတဖၣ်ဆီလီၤသးအလီၢ်အကျဲအဂ့ၢ်ပၥ်ဖျါဝဲဒၣ်န့ၣ်လီၤ. လၢတၢ်ဂ့ၢ်ဝဲအံၤအဖီခိၣ်န့ၢ် ဘျံးဒဝဲၢ်ကီၢ်ရ့ၣ်အနဲၣ်ရွဲၣ် ပဒိၣ်အဲၣ်နၤစ့ၢ်ကီးပၥ်ဂၢၢ်ပၥ်ကျၢၤဒီး စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ဘၣ်ထွဲဒီး(Drone)အတၢ်သ့တၢ်ဘၣ်န့ၣ် ပယီၤသုးန့ၣ်တအိၣ်အါအါဘၣ်.အဃိလၢခံကတၢၢ်အံၤန့ၣ် ဒ်တၢ်မဲၥ်ညါသုးရ့ၣ်ပ့ၢ်ဆှါတၢ်ကစီၣ်အတၢ်ပၥ်ဖျါအိၣ်ဝဲဒၣ်အသိးန့ၣ်ဖဲလါအ့ဖြ့ၣ်(၉)သီအနံၤန့ၣ် တရူး(Drone) အပှၤသ့ပှၤဘၣ်ဟဲတုၤဝဲဖဲ တနီသရံၣ် တၢ်မဲၥ်ညါပယီၤသုးကလၢၤတဖျၢၣ်ဒီးသ့ၣ်ညါဘၣ်ဝဲလၢမၤစၢၤဝဲပယီၤသုးဒ်သိးကဟးဃုသ့ၣ်ညါဝဲတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်အိၣ်ဆီလီၤသးအဂီၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ တကီၢ်ခါခဲအံၤ ပယီၤသုးအတၢ်ထီၣ်ဒုးလၢ ခ့ၣ်အဲၣ်သုးသုးက့(၄)ပူၤ အတၢ်လီၤဆီအိၣ်ထီၣ်တခါန့ၣ် မ့ၢ်ဝဲ မၤဝဲတၢ်ထီၣ်ဒုးတၢ်လၢ (Drone), ဟးဃုသ့ၣ်ညါတၢ်ဒီး(Drone) ဒီး ဟဲတ့ၢ်လီၤမ့ၣ်ပိၢ်ဒီးကဘီယူၤဟဲအါထီၣ်န့ၢ်ဒံးနံၣ်လၢအပူၤကွံၥ်အဂ့ၢ် ပဒိၣ်အဲၣ်နၤတဲအါထီၣ်ဝဲဒၣ်စ့ၢ်ကီးန့ၣ်လီၤ. ဒ်န့ၣ်အသိး ခ့ၣ်အဲၣ်ယူၣ် သုးက့(၄),သုးရ့ၣ်(၁၁) ဟီၣ်ကဝီၤပူၤ စးထီၣ်လၢအပူၤကွံၥ် ၂၀၂၄နံၣ်,လါဒံၣ်စဲဘၢၣ် အခါလံၤလံၤ ပယီၤသုးကီၣ်ကးအံၤ ဒ်သိးထီၣ်ဒိၣ်စိဝဲမိဒီၢ်ကီၢ်ဆၢကန့ၢ်အဂီၢ် စးထီၣ်မၤဝဲတၢ်ထီၣ်ဒုးလၢ မိဒီၢ်ကျဲမုၢ်ဒီတကတီၢ်တုၤခဲအံၤဘၣ်ဆၣ် ခီဖျိ သုးရ့ၣ်(၁၁)ဒီးတၢ်ပၢၢ်ဆၢသိၣ်မှံၤတဖၣ် ခီၣ်ဆၢဒုးအီၤအဃိအခဲအံၤတိဝဲတဖျိဒံးဘၣ်ဒီးဟဲထီၣ်တုၤဝဲဖဲ သံခိအဂ့ၢ် ကွဲၤကလုၢ်တၢ်ကစီၣ်ပၥ်ဖျါဝဲဒၣ်စ့ၢ်ကီးန့ၣ်လီၤ. ဒ်သိးကီၢ်ကၠီၣ်တဲၢ်ဒီးကီၢ်ပယီၤထံကီၢ်ခံဘ့ၣ်မၤဝဲမုၢ်ကျိၤဝဲၤကွၥ်ဖဲမိဒီၢ်ကီၢ်ဆၢကန့ၢ်အဂီၢ် သုးကီၣ်ကးအသုးကျိၤခံဘိ ဟဲထီၣ်မၤဝဲဒုးယၤတၢ်ဟူးတၢ်ဂဲၤဖဲ မိၢ်ကျဲမုၢ်ဒီးပှၤနီၣ်ဂံၢ်ကအိၣ် (၄၀၀)တုၤ(၅၀၀)ဂၤအဂ့ၢ်သ့ၣ်ညါဘၣ်လၢသုးက့အပှၤဘၣ်မူဘၣ်ဒါအအိၣ်န့ၣ်လီၤ.