လါအ့ဖြ့ၣ် ၈သီႇ ၂၀၁၉နံၣ်ႇ စီၤထိလ့
ကီၢ်ပဒိၣ်ဂံၢ်ခီၣ်ထံး ကၠိသ့ၣ်တဖၣ်ပူၤ နံၣ်လၢအဟဲတၢ်သိၣ်လိနံၣ်အပူၤ ကၠိသ&ၣ်လၢ ကသိၣ်လိတတီၤကညီစှီၤလံာ်အဂီၢ် တၢ်စးထီၣ်အိးထီၣ်န့ၢ်၀ဲ သရၣ်တၢ်သိၣ်လိ ဖဲတလါအံၤ လါအ့ဖြ့ၣ် ၈ သီ လၢ၀့ၢ်တကူၣ်ႇ အလိၤကီၢ်ဆၣ်ႇ မိၢ်ထံး ကညီလံာ်စီဆှံကၠိကရၢၢ်အပူၤအဂ့ၢ် ၦၤဘၣ်မူဘၣ်ဒါတဖၣ်စံး၀ဲလီၤ.
တၢ်သိၣ်လိ၀ဲန့ၣ် ကၠိသရၣ်လၢ အဟဲထီၣ်တဖၣ်ဒ်အမ့ၢ် ကညီကီၢ်စဲၣ်ႇ တလၢၤကီၢ်စဲၣ်ႇ ပကိႇ ၀့ၢ်တကူၣ်ႇ အ့ရၣ်၀တံၣ်ႇ တနီသရံၣ်ကီၢ်ခီဒိၣ်အပူၤ တီၤဖုၣ်ကၠိသရၣ်မုၣ် ခဲလၢာ်၄၃ဂၤ ဟဲထီၣ်၀ဲဒီးတၢ်သိၣ်လိ၀ဲန့ၣ် စးထီၣ်လၢလါအ့ဖြ့ၣ် ၈သီတုၤ ၁၉သီအနံၤန့ၣ်လီၤႉ
တၢ်သိၣ်လိၦၤနဲၣ်တၢ် သရၣ်မုၣ်နီၢ်နံထၣ်စံး၀ဲ “အခဲအံၤပအိးထီၣ်၀ဲတီၤဖုၣ်ကၠိသရၣ်တၢ်သိၣ်လိ(TOT-1)န့ၣ်လီၤႉ သရၣ် သရၣ်မုၣ် လၢအဟဲထီၣ်တဖၣ်လၢကီၢ်ခီဒီး ကီၢ်စဲၣ်တဖၣ်န့ၣ်လီၤႉ အ၀ဲသ့ၣ်ကဘၣ်က့ၤဟ့ၣ်ခီနီၤလီၤ၀ဲလၢ အ၀ဲသ့ၣ်ဟီၣ်က၀ီၤပူၤစုာ်စုာ်လီၤႉ အဃိသရၣ်သရၣ်မုၣ်လၢဟဲထီၣ်တဖၣ် ပကသိၣ်လိအီၤတုၤနၢ်ပၢၢ် ၀ဲဂ့ၤဂ့ၤဘၣ်ဘၣ်န့ၣ်လီၤ”အဂ့ၢ် စံးဘၣ်ခ့ၣ်အဲးစံၣ်လီၤ.
ကၠိသရၣ်တၢ်သိၣ်လိအံၤ ပထီၣ်အီၤ၀ံၤ ကက့ၤသိၣ်ကဒါက့ၤအီၤလၢ ကီၢ်ဆၣ်ပတီၢ် လၢနီၢ်ကစၢ်ဟီၣ်က၀ီၤလၢတဲၣ်ကၠံကီၢ် ဆၣ်ႇအိၣ်ကၣ်သ၀ီအပူၤဖဲ လါအ့ဖြ့ၣ်၂၁သီအနံၤအဂ့ၢ် နီၢ်ဆၢဆၢသရၣ်မုၣ်လၢအလဲၤထီၣ်တၢ်မၤလိအံၤ စံး၀ဲန့ၣ်လီၤႉ
ကညီစှီၤကျိာ်ဂံၢ်ခီၣ်ထံးတၢ်သိၣ်လိ၀ဲန့ၣ် ဒ်သိးတၢ်သိၣ်လိအီၤကန့ၢ်တခါဃီဒ်သိးသိးအဂ့ၢ် ကညီတၢ်ကွဲး လီၤပာ်လီၤလံာ်ညိၣ် သိၣ်ဒိၣ်ကမံးတံာ် ကွဲးပာ်လီၤ၀ဲဒီး ဖဲလါမးရှး ၂၅ သီအနံၤ တၢ်မၤ၀ဲကညီလံာ်ညိၣ်သိၣ်ဒိၣ်တၢ်အိၣ်ဖှိၣ်အပူၤ တၢ်ပာ်ဂၢၢ်ပာ်ကျၢၤ အီၤန့ၣ်လီၤ.
ကညီလံာ်ညိၣ်သိၣ်ဒိၣ် တၢ်လိၣ်ထီၣ်ဖးထီၣ်ကမံးတံာ်ဒီး တၢ်ကွဲးပာ်လီၤ၀ဲလံာ်ညိၣ်သိၣ်ဒိၣ်ကရူၢ်အံၤလၢ ကီၢ်စဲၣ်ဒီး ကီၢ်ခီဒိၣ်(၅)ဘ့ၣ်အပူၤ လံာ်လဲၢ်ဒီးတၢ်ဆဲးတၢ်လၤကမံးတံာ်ခၢၣ်စးတဖၣ်ႇ ၦၤကူၣ်ဘၣ်ကူၣ်သ့လၢတၢ်လီၢ်အါတီၤ ပၣ်ဃုာ်၀ဲဒီး ဖဲတၢ်မၤ၀ဲကညီလံာ်ညိၣ်သိၣ်ဒိၣ် တၢ်ထံၣ်လိာ်တဲသိကိး ဖဲ၂၀၁၈နံၣ်ႇ လါယူၤလံ၂၇သီ တုၤ ၂၈သီ ဖဲ၀့ၢ်တကူၣ်အပူၤအကတီၢ် တၢ်ဒုးအိၣ်ထီၣ်၀ဲန့ၣ်လီၤ.
