လါအ့ဖြ့ၣ် ၂၄ သီႇ ၂၀၁၉နံၣ်ႇ စီၤမၠၣ်အူသၣ်
ကညီကီၢ်စဲၣ် ကၠးအ့ဆ့ၣ်ကၠံကီၢ်ဆၣ်အပူၤ စးထီၣ်လၢတလါအံၤလါအ့ဖြ့ၣ်ကတီၢ် တၢ်ကိၢ်ဒိၣ်အဃိ ဒူသ၀ီအပူၤ ထံပူၤႇ ထံကျိသ့ၣ်တဖၣ်လီၤသံးအဃိ ကတီၢ်အံၤ လီၢ်က၀ီၤဖိသ့ၣ်တဖၣ်သဂၢၢ်ဘၣ်ဒီးထံတၢ်ကီတၢ်ခဲအဂ့ၢ် လီၢ်က၀ီၤဖိတဖၣ်တဲ၀ဲန့ၣ်လီၤႉ
နီတယွၣ်ဒူသ၀ီ ၦၤပၢဆှၢတၢ်အခိၣ် အူညိၣ်စ့ၣ်စံး၀ဲ“ထံကျိလၢသ၀ီကပၤဒီးထံပူၤသ့ၣ်တဖၣ်လီၤသံးလၢာ်လံႉ ၦၤနီၢ်ဂံၢ် ၆၀၀ ဘျဲၣ်အဂီၢ် ပဘၣ်လဲၤဟံးန့ၢ်ထံလၢ ချၢၣ်သ၀ီအစီၤစုၤ၀ဲတမံးလာ်ဘျဲၣ်န့ၣ်လီၤႉ ထံပူၤလၢၦၤဘၣ်မူဘၣ်ဒါတဖၣ်ဟဲခူၣ်န့ၢ်ၦၤသနာ်က့ထံအိၣ်တ့ၢ်ဒၣ်တစဲးဖိလီၤႉ ပဘၣ်ဒိးသန့ၤထီၣ်ပသးလၢ ၦၤလၢအဟဲမၤဘူၣ်ထံတဖၣ်အအိၣ်န့ၣ်လီၤႉ”အဂ့ၢ် စံးဘၣ်ခ့ၣ်အဲးစံၣ်လီၤႉ
ကၠၤအ့ဆ့ၣ်ကၠံကီၢ်ဆၣ်အပူၤ သ၀ီအါဒၣ်တက့ၢ်ဟံးန့ၢ်၀ဲထံလၢ ထံကျိႇ ထံပူၤလၢအကျိၤအကျဲအါဘိဒီး စးထီၣ်ဖဲအ့ဖြ့ၣ်တၢတနွံန့ၣ် တၢ်ကိၢ်ဒိၣ်ထီၣ်အဃိ ထံသ့ၣ်တဖၣ်လီၤသံးဒီး တၢ်လဲၤခူၣ်န့ၢ်၀ဲထံပူၤ လၢထံကျိကပၤဒီး ဘၣ်ဒိးသန့ၤထီၣ်သးလၢၦၤဟဲမၤဘူၣ်ထံသ့ၣ်တဖၣ်အအိၣ်လီၤအဂ့ၢ်လီၢ်က၀ီၤဖိတဖၣ်တဲ၀ဲ လီၤႉ
ပူကလ့ၣ်သ၀ီဖိ ကိၤထိ၀့ စံး၀ဲ “ပဘၣ်လဲၤထီထီၣ် ထံပဲးလၢကစၢၢ်ခိၣ်လၢကန့ၢ်ထံၦၤကညီ ၉၀၀အဂီၢ်လီၤႉ အခဲအံၤထံ၀ဲန့ၣ် တအိၣ်လၢၤဘၣ်ႉ ပဘၣ်လဲၤခူၣ်န့ၢ်ထံပူၤလၢသ၀ီထံကျိကပၤဒီးပဘၣ်ချီအီ၀ဲထံန့ၣ်လီၤ”အဂ့ၢ် တဲ၀ဲန့ၣ်လီၤႉ
ဘၣ်ထွဲဒီး ထံကၤနိကၤ တၢ်ဂ့ၢ်အံၤ အခဲအံၤ တၢ်ကနီၤဖးလီၤစ့တၢ်လၢာ်ဘူၣ်လၢာ်စ့ၤလၢသ၀ီသ့ၣ်တဖၣ်အဂီၢ်၀ံၤ တၢ်ကခူၣ်န့ၢ်၀ဲ အ၀့ၣ်စံၣ်ထံပူၤတဖၣ်ဒီး တၢ်ကိၢ်ခါကတီၢ် တၢ်ကဟ့ၣ်နီၤလီၤ၀ဲထံအီသ့ၣ် တဖၣ်ဒီး သိလ့ၣ်လၢအဆှၢထံသ့ၣ်တဖၣ်တၢ်ကမၤစၢၤ၀ဲ သိၦ့ၤအဂ့ၢ် ကၠၤအ့ဆ့ၣ်ကၠံကီၢ်ဆၣ် ဒူသ၀ီတၢ်ဂုၤထီၣ်ပသီထီၣ်၀ဲၤကျိၤခိၣ် စီၤမၠ့ၣ်အီၣ်လ့ စံးဘၣ် ခ့ၣ်အဲးစံၣ် ကညီတၢ်ကစီၣ် ဖဲ လါအ့ဖြ့ၣ် ၁၄သီအနံၤန့ၣ်လီၤႉ
မ့ၢ်တုၤဃီၤလၢလါအ့ဖြ့ၣ်ကတီၢ် ကၠးအ့ဆ့ၣ်ကၠံကီၢ်ဆၣ်အပူၤ ချၢၣ်သ၀ီႇ နီၢ်တၢႇ ချၢၣ်ဖိႇ ပူလ့ၣ်ႇ မၠိးဟီႇ ၀့ထီၣ်ဒီးသ၀ီအဂၤတဖၣ်သဂၢၢ်ဘၣ်ဒီးထံအီ တၢ်ဂ့ၢ်ကီကိးနံၣ်ဒဲးအဂ့ၢ်သ့ၣ်ညါဘၣ်လီၤႉ
