Home တၢ်ကစီၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(DKBA)သုးခိၣ်ဒိၣ်စိ စီၤအ့ၤ၀ါတၢ်လီၢ်

သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(DKBA)သုးခိၣ်ဒိၣ်စိ စီၤအ့ၤ၀ါတၢ်လီၢ်

370
0
Photo: Crd.

လါယနူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် (ကၠၤအ့စ့ၣ်ကၠံ)ကီၢ်ဆၣ်အပူၤ ဖဲတနံၤအံၤ ၂၁ သီ ဂီၤခီအဆၢကတီၢ်န့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(လ့၀ါဖျိ)သ၀ီတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) နီၣ်ဂံၢ်(၂)ဒုးယၤ၀ဲၤလီၢ်အဃိ မ့ၣ်အူအီၣ်ကွံာ်၀ဲတၢ်သူၣ်ထီၣ်တနီၤအဂ့ၢ်န့ၣ် သ့ၣ်ညါဘၣ်လၢၦၤဘၣ်မူဘၣ်ဒါအအိၣ် န့ၣ်လီၤႉ

ခီဖျိသုးမိၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိမ့ၣ်အူအီၣ်၀ဲ(DKBA)သုးဟံၣ်ဖိဃီဖိအဟံၣ်အဃီတနီၤဒီး ခီဖျိမ့ၣ်ပိၢ်အံၤလီၤတဲာ်ပိၢ်ဖးထီၣ်၀ဲဖဲတၢ်ဆါဟံၣ်ကပၤဒီးတၢ်ဘါယွၤသရိာ်ကပၤအဃိ တၢ်ဘၣ်ဒိဘၣ်ထံးဟးဂူာ်ဟးဂီၤအိၣ်၀ဲအဂ့ၢ်န့ၣ် သ၀ီၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

“ကဘီယူၤဟဲတ့ၢ်လီၤမ့ၣ်ပိၢ်ဖဲမုၢ်နၤခီ ၁ နၣ်ရံၣ်န့ၣ်ႉဟဲတ့ၢ်လီၤ၀ဲဖဲ(DKBA)သုးကလၢၤတၢ်လီၢ်တဖျၢၣ်ႇ တၢ်ကွဲးတၢ်ကါကသံၣ်ဒၢးလီၢ်ကပၤန့ၣ်တဖျၢၣ်ႇတၢ်ဘါယွၤသရိာ်ကပၤ(ကၠီၣ်တီၤ)န့ၣ်တဖျၢၣ်မီၤနီၤႉ လၢတၢ်ကနုာ်လီၤတြဲၤအိၣ်ခိးတၢ်လီၢ်နါက့ဟဲတ့ၢ်လီၤ၀ဲစ့ၢ်ႉတ့ၢ်လီၤ၀ဲမ့ၣ်ပိၢ်ကအိၣ်(၆)ဖျၢၣ်ညါႉဘၣ်ဒိ၀ဲဒၣ်တဂၤ”အဂ့ၢ်န့ၣ် စံး၀ဲန့ၣ်လီၤႉ

Photo: Crd.

ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢလ့၀ါဖျိသ၀ီဒီး(DKBA)သုးကလၢၤတၢ်လီၢ်အခိၣ်အဃၢၤအဃိ သ၀ီဖိတဖၣ်ဃ့ၢ်ထီၣ်ဟးပလဲာ်အသးလံအဂ့ၢ်န့ၣ်သ့ၣ်ညါဘၣ်န့ၣ်လီၤႉဘၣ်ဃးတၢ်ဟဲတ့ၢ်လီၤမ့ၣ်ပိၢ်တၢ်အိၣ်သးအံၤ ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဂုာ်ကျဲးစၢးဆဲးကျိး၀ဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) ၦၤဘၣ်မူဘၣ်ဒါတဖၣ်ဘၣ်ဆၣ်ဆဲးကျိးတန့ၢ်ဒံး၀ဲဘၣ်အဃိ ပာ်ဂၢၢ်ပာ်ကျၢၤတၢ်ဘၣ်ဒိဘၣ်ထံးတၢ်ဟးဂူာ်ဟးဂီၤ နီၣ်ဂံၢ်စရီတန့ၢ်ဒံး၀ဲဘၣ်န့ၣ်လီၤႉ

DKBA (နီၣ်ဂံၢ် ၂) ဒုးယၤ၀ဲၤလီၢ်လၢသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အံၤ ဘၣ်တၢ်တီခိၣ်ရိၣ်မဲအီၤလၢသုးခိၣ်ဒိၣ်စိ စီၤအ့ၤ၀ါဒီး စးထီၣ်ခိ၀ံၣ်–၁၉ တၢ်ဆါကဲထီၣ်သးအခါန့ၣ် အ၀ဲသ့ၣ်ကရူၢ်အိးထီၣ်န့ၢ်၀ဲတၢ်ဆါဟံၣ်အံၤလၢ ကမျၢၢ်ၦၤထူလံၤဖိတဖၣ်အဂီၢ်ဒီးကူစါယါဘျါကလီန့ၢ်၀ဲလီၢ်က၀ီၤကမျၢၢ်တုၤလၢခဲအံၤတစုလီၤအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ

တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)အံၤမ့ၢ်၀ဲကညီဖီၣ်စုက၀ဲၤကရူၢ်တဒူၣ်လၢအဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခးအံၤန့ၣ်လီၤႉဒ်န့ၣ်အသိးဖဲသုးမီၤစိရိၤအခိၣ်(မ့အီၣ်လဲၣ်)ကွဲမုာ်တၢ်တၢၣ်ပီၣ်တဲသကိးတၢ်မုာ်တၢ်ခုၣ်တၢ်ရဲၣ်တၢ်ကျဲၤအခါစ့ၢ်ကီးန့ၣ် (DKBA)သုးရိၣ်မဲခိၣ်ကျၢၢ် စီၤစတံလ် လဲၤထီၣ်ထံၣ်လိာ်၀ဲခဲအံၤခဲအံၤန့ၣ်လီၤႉ

Photo: Crd.