လါမ့ၤ ၂၁သီႇ ၂၀၁၉နံၣ်ႇ စီၤထိလ့
တလၢၤကီၢ်စဲၣ်ႇ သထူၣ်ကီၢ်ဆၣ်ႇ ၀့ဖိကစၢ်တၢ်လီၢ်က၀ီၤအပူၤန့ၣ် တၢ်တိာ်ပာ်အိၣ်လၢ ကဒုးအိၣ်ထီၣ်၀ဲ ဒူသ၀ီကမျၢၢ်တဖၣ် တၢ်လဲၤတၢ်က့ၤတၢ်မၤ(CBT)အဂ့ၢ် တလၢၤကီၢ်စဲၣ်ႇ ကလုာ်ဒူၣ်ဂ့ၢ်၀ီဘျီၣ်ဒိၣ်ကမံးတံာ်ကရူၢ်ခၢၣ်စး စီၤကၠီၣ်မိစံးဘၣ် ခ့ၣ်အဲးစံၣ် ကညီတၢ်ကစီၣ်ဖဲ လါမ့ၤ ၂၁သီန့ၣ်လီၤႉ
အ၀ဲစံး၀ဲလၢ “ကီၢ်စဲၣ် ဟိၤထဲဒီးတၢ်လဲၤတၢ်က့ၤ၀ဲၤကျိၤခိၣ်ဒီးယၤႇ ခ့ၣ်အဲၣ်ယူၣ် ကီၢ်ရ့ၣ်ၦၤဘၣ်မူဘၣ်ဒါသ့ၣ်တဖၣ် လဲၤလီၤကွၢ်၀ံၤ ဟံးန့ၢ်သ၀ီဖိသ့ၣ်တဖၣ်တၢ်ပာ်သးဒီးသ၀ီဖိတဖၣ်တူၢ်လိာ်၀ဲႇ ဒီးဒုးအိၣ်ထီၣ်လီၢ်က၀ီၤ ၀့ဖိကမံးတံာ် ဖဲအပူၤကွံာ် ၂နွံအတီၢ်ပူၤ လၢ ကမၤအဂီၢ် အိၣ်လံ၀ဲမျးကယၤ ၉၀ ဃၣ်ဃၣ်လံႉ အိၣ်တ့ၢ်ဒၣ်ကဘၣ်မၤသကိးတၢ်ဒီး တၢ်လဲၤတၢ်က့ၤ အ့ကၠ့ၣ်စံၣ်တဖၣ်လီၤႉ”အဂ့ၢ် စီၤကၠီၣ်မိတဲ၀ဲလီၤ.
၀့ဖိကစၢၢ်အ၀ဲန့ၣ်အိၣ်ဖဲတလၢၤကီၢ်စဲၣ်ႇ သထူၣ်ကီၢ်ဆၣ်ႇ ဒူယ့ဆ့ၣ်သ၀ီႇ ကဘၣ်လဲၤလၢဒိၤသမံၣ်ကျိ တနၣ်ရံၣ်တခီဃၣ်ဃၣ်လၢချံဒီး မ့ၢ်လဲၤန့ၣ် နကွၢ်ကီ၀ဲထံကျိနံၤတၢ်ဃံတၢ်လၤတဖၣ်ဒီးလဲၤဟးလၢ၀့ဖိလ့ပူၤသ့ၣ်တဖၣ်န့ၢ်၀ဲန့ၣ်လီၤ.
လၢန့ၢ်အမဲာ်ညါ တၢ်လီၢ်အဘူးဖဲန့ၣ် ဃုသ့ၣ်ညါန့ၢ်စ့ၢ်ကီးဒီး ဒၣ်ကၠဲၣ်ကစၢၢ်ႇ မီလ့ကစၢၢ်ထူၣ်လ့ပူၤတဖၣ်ႇ တၢ်လဲၤတၢ်က့ၤလၢ အအိၣ်ဒီးတၢ်သူၣ်ပိၢ်သး၀းႇ ဃုသ့ၣ်ညါကညီဖိတဖၣ် လုၢ်လၢ်ထူသနူတၢ်ဆဲးတၢ်လၤတဖၣ်သ့၀ဲအသိး တၢ်ဒုးအိၣ်ထီၣ်၀ဲ တၢ်လဲၤတၢ်က့ၤန့ၣ် လၢလီၢ်က၀ီၤတၢ်လဲၤထီၣ်လဲၤထီလီၤအဂ့ၢ် စီၤကၠီၣ်မိတဲ၀ဲလီၤ.
တၢ်ဒုးအိၣ်ထီၣ်၀ဲ တၢ်လဲၤတၢ်က့ၤတၢ်မၤဒ်အံၤ လၢလီၢ်က၀ီၤဖိသ့ၣ်တဖၣ်အဂီၢ် ဘၣ်ဃးတၢ်နီချံႇ တၢ်ဒုးနဲၣ်ကျဲႇ တၢ်ဖီအီၣ်တ့ၤအီၣ်ဒီး တၢ်အိၣ်တၢ်ဆိးအလီၢ်သ့ၣ်တဖၣ်အံၤ လီၢ်က၀ီၤကမံးတံာ် ကရဲၣ်ကျဲၤမၤ၀ဲန့ၣ်လီၤႉ ဒီးဖဲလါမ့ၤ ၂၅သီတုၤ ၂၆သီအနံၤ ကီၢ်ပယီၤ ထးခီတကပၤ ၀့ၢ်မါတလ့အပူၤ ၦၤဟးလိာ်ကွဲဖိသ့ၣ်တဖၣ် ကဟဲဟးလိာ်ကွဲကွၢ်ကီတၢ်အဂ့ၢ်သ့ၣ်ညါဘၣ်လီၤ.
၀့ဖိကစၢၢ်တၢ်လီၢ်ဟီၣ်က၀ီၤ၀ဲန့ၣ် လၢအပူၤကွံာ် ခီဖျိတၢ်တမုာ်တခုၣ်ဘၣ်အဃိ ၦၤလဲၤတုၤစှၤ၀ဲဒၣ်ဒီး အိၣ်ဒ်န့ဆၢၣ်တၢ်ဘၣ်တ့အသိး န့ၣ်လီၤႉ ဖဲအပူၤကွံာ် ၂၀၁၇ လါယူၤလံကတီၢ် တလၢၤကီၢ်စဲၣ် ကညီဂ့ၢ်၀ီကိတိာ် လဲၤလီၤကွၢ်ဟးလိာ်ကွဲ၀ဲ၀ံၤအလီၢ်ခံ ဆဲးကျိးလိာ်သးဒီးဒူသ၀ီကမျၢၢ်တဖၣ်၀ံၤ ကဒုးအိၣ်ထီၣ်န့ၢ်၀ဲတၢ်လဲၤတၢ်က့ၤ တၢ်မၤဒ်အံၤလီၤအဂ့ၢ် သ့ၣ်ညါဘၣ်လၢလီၢ်က၀ီၤကမျၢၢ်တဖၣ် အအိၣ်န့ၣ်လီၤ.
