လါယူၤ ၂၂ သီႇ ၂၀၁၉ နံၣ်ႇ စီၤမၠၣ်အူသၤ
ကညီကီၢ်စဲၣ်ႇ ကၠၤအ့ဆ့ၣ်ကၠံ(နိၣ်တကီ)ကီၢ်ဆၣ်အပူၤ တနံၣ်အံၤ တၢ်ညၣ်ဂိၢ်သွံၣ်ထီၣ် တၢ်ဆါကဲထီၣ်အသး အါန့ၢ်ဒံးနံၣ် လၢအပူၤကွံာ်အဃိ တၢ်သံတၢ်ၦၢ်အိၣ်၀ဲအဂ့ၢ် သ့ၣ်ညါဘၣ် လၢကီၢ်ဆၣ်ဆူၣ်ချ့ အအိၣ်န့ၣ်လီၤ.
လၢအပူၤကွံာ် လါအ့ဖြ့ၣ် တုၤလါယူၤအံၤ တၢ်ညၣ်ဂိၢ်သွံၣ်ထီၣ်တၢ်ဆါကဲထီၣ်အသးအါဒီး တၢ်ညၣ်ဂိၢ်သွံၣ်ထီၣ်တၢ်ဆါလၢ ဟဲကဲထီၣ်အသးအံၤ ဘၣ်ကူဘၣ်ဂာ်လိာ်သးခီဖျိပစိၤ သုတကဲထီၣ်သးအဂီၢ် သ၀ီဖိတဖၣ် ဘၣ်ပလီၢ်သး လၢပစိၤအဂ့ၢ် ကၠၤအ့ဆ့ၣ်ကၠံကီၢ်ဆၣ် ဒီကထၢၣ်ကၠီၣ်စ့ၣ်ထိစံးဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤ.
“တၢ်ညၣ်ဂိၢ်သွံၣ်ထီၣ်တၢ်ဆါအံၤကဲထီၣ်၀ဲၦၤကညီအဂၤ ၃၀ ဃၣ်ဃၣ်လီၤႉ တနံၣ်ညါအံၤ ဟဲအါထီၣ်ႇသံကွံာ်တဂၤႉ ဒ်သိး ပစိၤတ ဖၣ်သုတအိၣ်န့ၣ် ပဟးဟ့ၣ်တၢ်ဟ့ၣ်ပီညါအိၣ်၀ဲန့ၣ်လီၤႉ မုၢ်နၤခီဘၣ်မံၤလၢပ့ၢ်ပီၤကိပူၤႇ ဘၣ်သိးစ့ကၤ စုထီႇဖျီၣ်ခံထီခီၣ်ႇ ကးဘၢတံၢ်ဃာ်နါဒ့အမဲာ်ညါ ကဘၣ်မၤကဆှဲကဆှီစုႇ ခီၣ်ဂ့ၤဂ့ၤလီၤႉ”အဂ့ၢ် ဒီကထၢၣ်ကၠီၣ်စ့ၣ်ထိစံး၀ဲဖဲလါယူၤ၂၀သီအနံၤန့ၣ်လီၤ.
ကၠၤအ့ဆ့ၣ်ကၠံကီၢ်ဆၣ်အပူၤ သ၀ီအါဒၣ်တက့ၢ် တၢ်ညၣ်ဂိၢ်တၢ်ဆါအံၤ ဘၣ်ကူဘၣ်ဂာ်၀ဲချ့ဒီး ဘၣ်၀ဲဟံၣ်ဒီဖျၢၣ်ပတီၢ်အိၣ်၀ဲန့ၣ်လီၤႉ တၢ်ဆါအံၤ တၢ်ညၣ်ဂိၢ်ထီၣ်ႇ စုဆၢခီၣ်ဆၢဆါႇဖံးဘ့ၣ်ခိၣ်တၢ်ပနီၣ်အဂီၤတဖၣ် ဟဲဖျါထီၣ်ဒီး တၢ်လိၤသးသ့ၣ်တဖၣ် အိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိသ့ၣ်တဖၣ်အအိၣ်န့ၣ်လီၤ.
၀ီၢ်ရီလီၢ်က၀ီၤဖိတဂၤလၢအမ့ၢ်နီၢ်တၢ်ဖီစံး၀ဲ“ယဟံၣ်အပူၤ စးထီၣ်အိၣ်တဆူၣ်ဘၣ်လၢ ဖိသၣ်ႇ၀ံၤဟဲကဲထီၣ်အသးတဂၤ၀ံၤ တဂၤလၢဟံၣ်အပူၤႇ စုဆၢခီၣ်ဆၢဆါအဃိ ဟးမးတကဲအါအါဘၣ်ႇ တၢ်ပနီၣ်အဂီၤတဖၣ် ဟဲထီၣ်ဒီတဂၤ၀ံၤ လိၤသးဒိၣ်မး”အဂ့ၢ် စံးဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤႉ
တၢ်ညၣ်ဂိၢ်သွံၣ်ထီၣ်တၢ်ဆါအံၤ ဟဲကဲထီၣ်သးခီဖျိ ပစိၤအ့ၣ်တၢ်တဆီအံၤ အိၣ်တဆူၣ်ဘၣ်အသီအါထီၣ်ႇ အိၣ်တမုာ်ဘၣ်ႇ သွံၣ်ဟးထီၣ် တၢ်ဂ့ၢ်ကီကဲထီၣ်သးႇ သွံၣ်ဟးထီၣ်လၢနါဒ့အပူၤႇ စုထိးနါခီၣ်ထိးနါခုၣ်လီၤႇ သးပ့ၤနီၣ်သးအဃိ တၢ်ဆါ၀ဲန့ၣ် မ့ၢ်ကဲထီၣ်သးတခီလဲၤဒုးနဲၣ်သးလၢကသံၣ်ဒၢးလၢအဘူးတဖၣ်လၢ အဆိအချ့အဂ့ၢ် ဆူၣ်ချ့၀ဲၤကျိၤဘၣ်မူဘၣ်ဒါတဖၣ် စံး၀ဲန့ၣ်လီၤႉ
