ကညီကီၢ်စဲၣ် ၦၤဂ့ၢ်၀ီကိတိာ်လီၤဟိအလီၢ် တၢ်တီၣ်ထီၣ်၀ဲ ဘိၣ်ဘိၣ်၀့မီၣ်(ကိး)စီၤဘိၣ်ဘိၣ်

လါယူၤ, ၂၄သီႇ ၂၀၁၉နံၣ်ႇ နါ၀့ၣ်ဖၠိစၣ်

ကညီကီၢ်စဲၣ်ႇ ၦၤဂ့ၢ်၀ီကိတိာ်အလီၢ်လၢအလီၤဟိအံၤ တၢ်တီၣ်ထီၣ်က့ၤ၀ဲဘိၣ်ဘိၣ်၀့မီၣ်(ကိး)စီၤဘိၣ်ဘိၣ်အံၤ ဖဲကညီကီၢ်စဲၣ်ဘျီၣ်ဒိၣ်(၁၁) ဘျီတဘျီ တၢ်အိၣ်ဖှိၣ် တၢတနံၤအံၤန့ၣ်လီၤႉ

ကိတိာ်အလီၢ်လၢအလီၤဟိအံၤ ကညီကီၢ်စဲၣ်ကိတိာ်ခိၣ်ကျၢၢ် နါခ့ၣ်ထွ့မၠ့ၣ် ဆှၢနုာ်လီၤ၀ဲလၢဘျီၣ်ဒိၣ်တၢ်အိၣ်ဖှိၣ်အပူၤဒီး ၦၤထီဒါတၢ်တအိၣ်နီတဂၤဘၣ်အဃိ တၢ်ပာ်ဂၢၢ်ပာ်ကျၢၤလီၤအီၤန့ၣ်လီၤ.

ကညီကီၢ်စဲၣ် ကိတိာ်ခိၣ်ကျၢၢ်နါခ့ၣ်ထွ့မၠ့ၣ်စံး၀ဲ“စီၤဘိၣ်ဘိၣ်အံၤ လၢအပူၤကွံာ်မၤစၢၤၦၤလၢပတၢ်မၤအပူၤထီဘိလီၤႉ တၢ်ဃုထၢ ထီၣ်အီၤလၢတၢ်ဖီခိၣ်၀ံၤဆၢတဲာ်၀ဲလီၤႉ အ၀ဲသ့ၣ်ဘၣ်ဟ့ၣ်ထီၣ် နီၢ်ကစၢ်ဂ့ၢ်ကျိၤဒီး လၢသၢဂၤအကျါတၢ်ဃုထၢထီၣ်၀ဲစီၤဘိၣ်ဘိၣ်လီၤႉ ယနာ်၀ဲစီၤဘိၣ်ဘိၣ်အဃိ ယဆှၢနုာ်လီၤန့ၣ်လီၤႉ”အဂ့ၢ် စံးဘၣ် ၦၤဟံးတၢ်ကစီၣ်ဖိတဖၣ်န့ၣ်လီၤ.

လၢအပူၤကွံာ် ၦၤဂ့ၢ်၀ီကိတိာ်၀ဲၤကျိၤ ကိတိာ်လီၢ်လံၤ ဒီကထၢၣ်တ့ၣ်၀့ကၠီၣ်အံၤ ခီဖျိတၢ်အိၣ်ဆူၣ်အိၣ်ချ့အဖီခိၣ် ဃ့ဟးထီၣ်သးလၢမူဒါ အဃိ ကီၢ်ခိၣ်ဟ့ၣ်လီၤတၢ်ကလုၢ် လၢကဟးထီၣ် ဖဲ၂၀၁၉နံၣ်ႇလါမ့ၤ ၁၆ သီအနံၤန့ၣ်လီၤ.

ဒီကထၢၣ်တ့ၣ်၀့ကၠီၣ်ဟံးတၢ်အိၣ်ဘှံး၀ံၤ တၢ်လီၢ်လီၤဟိအံၤ တၢ်တီၣ်ထီၣ်ကဒါက့ၤ၀ဲကိတိာ်အသီဒ်အံၤ ဘၣ်တၢ်ဆၢတဲာ်အီၤလၢကီၢ်စဲၣ်ဘျီၣ်ဒိၣ်ဒီး တၢ်မၤၦဲၤတၢ်လီၢ်လီၤဟိဒ်အံၤတၢ်မၤအီၤဒ်တၢ်မၤအတကွီၢ်ပူၤလီၤအဂ့ၢ်သ့ၣ်ညါဘၣ်လီၤ.

စီၤဘိၣ်ဘိၣ်လၢအဘၣ်တၢ်ဃုထၢက့ၤအီၤလၢၦၤဂ့ၢ်၀ီကိတိာ်အံၤစံး၀ဲ“ကညီကီၢ်စဲၣ်အဂီၢ် ယကမၤယဲလၢအဂ့ၤကတၢၢ်လီၤႉ မ့ၢ်၀ံၤယကဆီၣ်ထွဲမၤစၢၤကိတိာ်ခိၣ်ကျၢၢ် လၢအဂ့ၤကတၢၢ်လီၤႉ”အဂ့ၢ် စံးဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤႉ

စီၤဘိၣ်ဘိၣ် ၃၈ နံၣ်အံၤ တကီၢ်ခါ မ့ၢ်၀ဲ(MTB)စ့တၢး ၦၤနဲၣ်တၢ်အမဲာ်ညါ မ့ၢ်တ့ၢ်စ့ၢ်ကီး ၀့ၢ်တကူၣ်ကီၢ်ခီဒိၣ် (YBS-Yangon Bus Service) အ(CEO)တဂၤန့ၣ်လီၤ.

လၢန့ၢ်အမဲာ်ညါ ဟံးတ့ၢ်မူဒါဖဲ ကလုာ်ဒူၣ်မုၢ်ကျိၤ၀ဲၤကွာ်တၢ်မၤကရူၢ်အနဲၣ်ရွဲၣ်သဃဲၤႇ(KBZ)စ့တၢး (Deputy Managing Director), ထံဂုၤကီၢ်ဂၤ(City Bank) (Ass-Vice President)တဖၣ်ဒီး လၢကညီလံာ်လဲၢ်ဒီးတၢ်ဆဲးတၢ်လၤတၢ်ဖံးတၢ်မၤသ့ၣ်တဖၣ် တၢ်ပၣ်ဃုာ်မၤသကိးတၢ်အိၣ်စ့ၢ်ကီး၀ဲန့ၣ်လီၤ.