လါယူၤ ၅ သီႇ ၂၀၁၉နံၣ်ႇ စးအဲၣ်စူ
ဖဲတနံၤအံၤ လါယူၤ (၅သီ) အနံၤ လၢအလီၤဘၣ်၀ဲ ဟီၣ်ခိၣ်ဒီဖျၢၣ်ခိၣ်ဃၢၤန့ဆၢၣ်အမုၢ်နံၤအံၤန့ၣ် ဖဲကညီကီၢ်စဲၣ်ႇ ရၤမတံကီၢ်ဆၣ်ႇ သ့ၣ်ဘီဘိသ၀ီအပူၤ ကညီကၠိဖိသးစၢ်တဖၣ် ဃုာ်ဒီးကၠိဖိမိၢ်ပၢ်တဖၣ်ႇ ဂံၢ်ခီၣ်ထံးတၢ်ကရၢကရိတဖၣ် ပာ်ဖှိၣ်ထီၣ်သးဒီးသူၣ်သကိး၀ဲသ့ၣ်လၢအကထိဘျဲၣ် အဂ့ၢ်သ့ၣ်ညါဘၣ်န့ၣ်လီၤ.
ခိၣ်ဃၢၤန့ဆၢၣ်တၢ်ဘၣ်ဒိဘၣ်ထံးအံၤ အိၣ်ဖျါထီၣ်၀ဲဖျိဖျိဖျါဖျါလံဒီး ဒ်သိးကၠိဖိသးစၢ်သ့ၣ်တဖၣ် ကပလီၢ်အသးႇ ကသ့အဲၣ်ခိၣ်ဃၢၤ န့ဆၢၣ်အဂီၢ် တၢ်ပညိၣ်အီၤဒီး တၢ်မၤ၀ဲတၢ်ရဲၣ်တၢ်ကျဲၤဒ်အံၤလီၤအဂ့ၢ် ကညီဂံၢ်ခီၣ်ထံးတၢ်ကရၢကရိ ၦၤတဲတၢ်ပၢ နီၢ်စၤဒၤ၀ဲ စံး၀ဲဒ်အံၤန့ၣ်လီၤ.
အ၀ဲစံး၀ဲလၢ“တၢ်အရ့ဒိၣ်တခါန့ၣ် ဒ်သိးကၠိဖိသးစၢ်သ့ၣ်တဖၣ် ကအိၣ်ဒိးသန့ၤထီၣ်အသးဒီး ခိၣ်ဃၢၤန့ဆၢၣ် ဒီး ဆူမဲာ်ညါ ကသ့သူၣ်ထီၣ် တၢ်ဆိမိၣ်အသီလၢ ဘၣ်ဃးဒီး ခိၣ်ဃၢၤန့ဆၢၣ်အဂ့ၢ် ပပညိၣ်အီၤဒီး ပမၤအီၤအဆိကတၢၢ်တဘျီန့ၣ်လီၤႉ”အဂ့ၢ် စံးဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤႉ
တၢ်သူၣ်သ့ၣ်တၢ်ရဲၣ်တၢ်ကျဲၤဘျီ၀ဲန့ၣ် ဖဲဂီၤခီအကတီၢ် ဂံၢ်ခီၣ်ထံးကညီတၢ်ကရၢကရိဘျးစဲႇ ကၠိဖိမိၢ်ပၢ်ႇ ကၠိသရၣ်ႇ မုၣ်ကၠိဖိသ့ၣ် တဖၣ် သူၣ်လီၤ၀ဲသ့ၣ် အထူၣ်(၉၀၀)၀ံၤ လၢဟါခီန့ၣ် သူၣ်လီၤအါထီၣ်၀ဲ(၇၀၀)ဃၣ်ဃၣ်အဂ့ၢ် သ့ၣ်ညါဘၣ်န့ၣ်လီၤႉ
လၢတၢ်သူၣ်၀ဲသ့ၣ်တကထိဘျဲၣ်၀ဲန့ၣ် ပၣ်ဃုာ်၀ဲသ့ၣ်အကလုာ်တဖၣ် ဒ်အမ့ၢ် မလ့ရှါပတီႇကျီးကျ့ၣ်ႇ ဘၣ်ဒၤ(ဗာဒံ)ဒီး သ့ၣ်ခၠဲၤရံၣ်တဖၣ် န့ၣ်လီၤႉ
ဟီၣ်ခိၣ်ဒီဖျၢၣ် ခိၣ်ဃၢၤန့ဆၢၣ်အမုၢ်နံၤအံၤ ကညီ ခိၣ်ဃၢၤန့ဆၢၣ်ဒီး ၦၤဂ့ၢ်၀ီဟူးဂဲၤ ဘျးစဲ (KESAN) တီခိၣ်ရိၣ်မဲ၀ဲဒီး မၤ၀ဲတၢ်သူၣ်သ့ၣ် တၢ်ရဲၣ်တၢ်ကျဲလၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤႇ ကီၢ်ပူၤဒီးကီၢ်ဆၢတၢ်လီၢ်သ့ၣ်တဖၣ် ကိးနံၣ်ဒဲးန့ၣ်လီၤ.
