လါယူၤလံ၁၃သီႇ ၂၀၁၉နံၣ်ႇ စးဖါရှီ
လၢတၢ်မၤဖျါထီၣ်၀ဲထံကီၢ်ဒီဘ့ၣ်တၢ်ပတုာ်တၢ်ခးလံာ်ဃံးဃာ် အဲၣ်စံၣ်အ့ၣ် အမိၢ်လံမိၢ်ၦၢ်ကတီၢ် ဒ်သိးကမ့ၢ်တၢ်ဟုၣ်ကွၢ်စုၣ်တၢ်အလီၢ်လၢတုၤထီၣ်ထီၣ်ဘးကန့ၢ်အဂီၢ် ဂံၢ်ခီၣ်ထံးကမျၢၢ်တၢ်ကရၢကရိအသနၢၣ် တၢ်ပၣ်ဃုာ်လိၣ်၀ဲအဃိ ကမၤသကိးတၢ်အဂ့ၢ် ကီၢ်စၢဖှိၣ်ပတီၢ် တၢ်ကွၢ်ဟုၣ်ကွၢ်စုၣ်တၢ်ပတုာ်တၢ်ခး ကမံးတံာ်(JMC-U)နဲၣ်ရွဲၣ်=၁ ဒီကထၢၣ်ရွ့ၣ်ခါ ဆီၣ်သခူထီၣ်၀ဲန့ၣ်လီၤ.
လါယူၤလံ၁၂သီတုၤ၁၃သီအနံၤ ကညီကီၢ်စဲၣ်ႇ ၀့ၢ်ဖၣ်အၣ်ႇ သဲၣ်လွ့ၣ်ဖါရၣ်တဲၣ်ဟိၤထဲအပူၤ တၢ်မၤ၀ဲတၢ်ဒုးသ့ၣ်ညါ(JMC)အဂ့ၢ်ကျိၤဆၢကတီၢ် ဂံၢ်ခီၣ်ထံးကမျၢၢ်တၢ်ကရၢကရိလၢကညီကီၢ်စဲၣ်အပူၤတဖၣ် ဘၣ်တၢ်ကွဲမုာ်အ၀ဲသ့ၣ်ဒီး တၢ်တဲဆီၣ်သခူထီၣ်အ၀ဲသ့ၣ်ဒ်အံၤန့ၣ်လီၤ.
(JMC-U)နဲၣ်ရွဲၣ်၁ ဒီကထၢၣ်ရွ့ၣ်ခါတဲ၀ဲ“အဲၣ်စံၣ်အ့ၣ် အပူၤသုးတကပၤကဘၣ်လူၤပိာ်မၤထွဲတၢ်ဘျၢအပူၤ (Civilian Protection)တၢ်မၤဖျါထီၣ်အီၤကန့ၢ်အဂီၢ်(CBOs-CSOs)တဖၣ်ကဘၣ်နုာ်လီၤမၤသကိးန့ၣ်လီၤ.ဘၣ်ဃးကမျၢၢ်တၢ်ဂ့ၢ်တဖၣ်တၢ်လၢ ကဘၣ်လူၤပိာ်မၤထွဲ၀ဲန့ၣ်အိၣ်အ၀ဲ၁၇ထံၣ်ႇ တၢ်သ့ၣ်တဖၣ်န့ၣ်အရ့ဒိၣ်လၢကဘၣ်လဲၤတုၤလၢကမျၢၢ်အအိၣ်ႇ တၢ်န့ၣ်အဃိဂံၢ်ခိၣ်တၢ်ကရၢကရိ သ့ၣ်တဖၣ်တၢ်ပာ်ဃုၣ်န့ၣ်အရ့ဒိၣ်မး”အဂ့ၢ် တဲဘၣ်ခ့ၣ်အဲၣ်စံၣ် န့ၣ်လီၤ.
ဂံၢ်ခီၣ်ထံးကမျၢၢ်တၢ်ကရၢကရိတဖၣ် ပၣ်ဃုာ်သ့လၢ(LCM)တၢ်အိၣ်ခီးကွၢ်ကမျၢၢ်တဖၣ်ႇ တၢ်မၤအါထီၣ်ကံၢ်စီတၢ်မၤတဖၣ်ႇ ဘၣ်ဃးဒီးကမျၢၢ်ခံခီခံကပၤတၢ်ဘျၢလၢကဘၣ်လူၤပိာ်မၤထွဲတဖၣ်န့ၣ် ဒ်သိးကမျၢၢ်ကသ့ၣ်ညါအဂီၢ် နုာ်လီၤပၣ်ဃုာ်မၤစၢၤသ့၀ဲအဂ့ၢ် တဲအါထီၣ်၀ဲန့ၣ်လီၤ.
တၢ်ရဲၣ်တၢ်ကျဲၤလၢတၢ်မၤအီၤခံသီအံၤန့ၣ် တၢ်ထုးဖှိၣ်၀ဲ အဲၣ်စံၣ်အ့ၣ်ႇ (JMC)ဟဲကဲထီၣ်အသးဒီးတၢ်မၤအကျိၤအကျဲႇ (JMC)တၢ်မၤအပူၤ (CBO/CSO)တဖၣ်နုာ်လီၤပၣ်ဃုာ်သ့တၢ်ထံၣ်တဖၣ်ႇ တၢ်ခီးကွၢ်လီၢ်က၀ီၤကမျၢၢ် တၢ်မၤတဖၣ်ဒီးတၢ်ကမၤဖျါထီၣ်(LCM-TOR), တၢ်မၤအါထီၣ်(LCM)ကံၢ်စီအပူၤ (CBO/CSO)တဖၣ်အတၢ်ပၣ်ဃုာ်မၤသကိးသ့လၢကျဲဒ်လဲၣ်န့ၣ် တၢ်ကူၣ်လိာ်တၢၣ်ပီၣ်တဲသကိးအီၤန့ၣ်လီၤ.
(သွံ)ဂံၢ်ခီၣ်ထံးတၢ်ကရၢကရိ ၦၤနဲၣ်တၢ် မါသ့စီၣ်တဲ၀ဲ“တၢ်ပျဲအိၣ်လၢပကဟ့ၣ်ကမျၢၢ်တဖၣ်ဘၣ်ဃး အဲၣ်စံၣ်အ့ၣ်တၢ်သ့ၣ်ညါ တၢ်သိၣ်လိသ့ၣ်တဖၣ်လီၤႉ လၢတၢ်ကွၢ်ဟုၣ်ကွၢ်စုၣ်အသနၢၣ်တခီ ဂံၢ်ခီၣ်ထံးကမျၢၢ်တၢ်ကရၢကရိတဖၣ်နုာ်လီၤပၣ်ဃုာ်လၢဒီကရူၢ်တန့ၢ်ဘၣ်န့ၣ် ပနၢ်ပၢၢ်လီၤႉ မ့ၢ်၀ံၤ လၢ(LCM)ဒီးဂံၢ်ခီၣ်ထံးကမျၢၢ်တၢ်ကရၢကရိတဖၣ် ကပာ်ဖှိၣ်မၤသကိးတၢ်အဂီၢ် ကျိၤကျဲသ့ၣ်တဖၣ်တၢ်ကတဲသကိးအါထီၣ်အဂ့ၢ် အိၣ်၀ဲန့ၣ်လီၤႉ လၢတၢ်သ့ၣ်တဖၣ်န့ၣ်ကကဲထီၣ်အဂီၢ် ပ၀ဲဒၣ်တကပၤတၢ်အိၣ်သးဒုအိၣ်ဒၣ်ပမုၢ်လၢ်လီၤ”အဂ့ၢ် တဲ၀ဲန့ၣ်လီၤ.
တၢ်မၤဖျါထီၣ် အဲၣ်စံၣ်အ့ၣ် အမိၢ်လံၤမိၢ်ၦၢ်ကန့ၢ်အဂီၢ် ကတီၢ်အံၤကညီကီၢ်စဲၣ်အပူၤ လၢကီၢ်စဲၣ်ပတီၢ် (JMC-S), လီၢ်က၀ီၤ(JMC-L )ဒီးတၢ်ကွၢ်ဟုၣ်ကွၢ်စုၣ်လီၢ်က၀ီၤကမျၢၢ်တဖၣ်(LCM)အံၤ တၢ်ဒုးအိၣ်ထီၣ်ဃာ်အီၤလၢကီၢ်စဲၣ်အပူၤ ကီၢ်ဆၣ်တနီၤအိၣ်ပာ်စၢၤ၀ဲန့ၣ်လီၤ.
ဖဲတၢ်ဒုးသ့ၣ်ညါ၀ဲ(JMC)တၢ်မၤတဖၣ်တၢ်ရဲၣ်တၢ်ကျဲၤအခါန့ၣ် (JMC-U)ကရၢခိၣ်(၂)အူကိၣ်ကိၣ်ကၠံႇ နဲၣ်ရွဲၣ်၁ ဒီကထၢၣ်ရွ့ၣ်ခါႇ ကညီကီၢ်စဲၣ်(JMC-S)ၦၤပၢလီၢ်ဆ့ၣ်နီၤ ၁သုးခိၣ်ဒိၣ်စိစီၤဖီဒိၣ် ခ့ၣ်အဲၣ်ယူၣ်ႇ ကရၢခိၣ်၂ ပဒိၣ်စီၤရွ့ၣ်မီ ခ့ၣ်အဲၣ်ယူၣ် ပၣ်ဃုာ်ဒီးဂံၢ်ခီၣ်ထံးကမျၢၢ်တၢ်ကရၢကရိ၃၂ဒူၣ် ၦၤနီၣ်ဂံၢ်ခဲလၢာ်၇၀ဘျဲၣ်ဟဲထီၣ်၀ဲဒၣ်န့ၣ်လီၤ.
တၢ်မၤတၢ်ထံၣ်လိာ်သးဒီးဂံၢ်ခီၣ်ထံးကမျၢၢ်တၢ်ကရၢကရိသ့ၣ်တဖၣ်ဒီးတကတီၢ်ဃီတၢ်ဒုးသ့ၣ်ညါလီၤ(JMC)တၢ်မၤအကျိၤအကျဲတၢ်ရဲၣ်တၢ်ကျဲၤဒ်အံၤ န့ၣ် ဖဲအပူၤကွံာ်လါယူၤ၁၂သီအနံၤန့ၣ် တၢ်မၤစ့ၢ်ကီးအီၤလၢ ယိၤဒိၣ်ကီၢ်စဲၣ်၊တီၣ်ကၠံ၀့ၢ်အပူၤအဂ့ၢ်သ့ၣ်ညါဘၣ်လီၤ.
