Home တၢ်ကစီၣ် အ့ရှၢၣ်ကျဲမုၢ်တၢ်တိာ်ကျဲၤအဂီၢ် တၢ်ဟ့ၣ်လီၤ ၃ ဘျီတဘျီ စ့အီၣ်လိး အကလီၢ် (၄၀၀၀)ဘျဲၣ်

အ့ရှၢၣ်ကျဲမုၢ်တၢ်တိာ်ကျဲၤအဂီၢ် တၢ်ဟ့ၣ်လီၤ ၃ ဘျီတဘျီ စ့အီၣ်လိး အကလီၢ် (၄၀၀၀)ဘျဲၣ်

1995
0

လါအီကူာ် ၂သီႇ ၂၀၁၉နံၣ်ႇ နါ၀့ၣ်ဖၠိစၣ်

ကညီကီၢ်စဲၣ် အ့ဒူၣ်-ကီးတရံး အ့ရှၢၣ်ကျဲမုၢ်တၢ်တိာ်ကျဲၤလၢ တၢ်တ့ထီၣ်၀ဲန့ၣ် လီၢ်က၀ီၤကမျၢၢ်လၢအဟီၣ်ခိၣ်လီၢ်ဘၣ်ဒိတဖၣ် ကီၢ်စဲၣ်ပဒိၣ် ဟ့ၣ်လီၤ၀ဲ ၃ ဘျီတဘျီ စ့အီၣ်လိး အကလီၢ် ၄၀၀၀ ဘျဲၣ် ဖဲလါအီကူာ် ၁ သီအနံၤန့ၣ်လီၤ.

တၢ်က့ၤဟ့ၣ်ကဒါက့ၤ စ့အီၣ်လိး တၢ်ရဲၣ်တၢ်ကျဲၤ၀ဲန့ၣ် ဘၣ်တၢ်မၤအီၤဖဲ ၀့ၢ်ဖၣ်အၣ် စွဲကပ့ၣ်ဘျီၣ်အပူၤဒီး တၢ်က့ၤ ဟ့ၣ်လီၤက ဒါက့ၤဒ်အမ့ၢ် လၢတၢ်တ့ထီၣ် ကျဲမုၢ်ကတီၢ် ဟံၣ်လီၢ်လၢတပူၤဖျဲးတဖၣ်ႇစံာ်လီၢ်တဖၣ်အဂီၢ် ၦၤဘၣ်ဒိဘၣ်ထံး ၇၅ဂၤအံၤ တၢ်ဟ့ၣ်လီၤက့ၤစ့အီၣ်လိး ၄၉၀ႇ၅၀၄ႇ၅၃၀ (၄ ကထိဘျဲၣ်)ကၠးန့ၣ်လီၤ.

ဘၣ်ထွဲဒီးတၢ်ဟ့ၣ်လီၤ၀ဲစ့အီၣ်လိးတၢ်အိၣ်သးတဖၣ်အံၤန့ၣ် တၢ်သူၣ်ထီၣ်ဘှီထီၣ်ကိတိာ်၀ဲၤကျိၤ ၦၤနဲၣ်တၢ်ခိၣ် (၂) ဒီး အ့ၣ်ဒူၣ်-ကီးတရံးတၢ်တ့ထီၣ်ကျဲတၢ်တိာ်ကျဲၤ(Project Management Unit)ကရၢဖိ မ့ဘညါထီစံး၀ဲဒ်အံၤန့ၣ်လီၤ.

“ဘၣ်ဃးတၢ်ဟ့ၣ်လီၤစ့အီၣ်လိးအံၤန့ၣ် တၢ်တိာ်ပာ်အိၣ်လၢ ပကဟ့ၣ်လီၤတုၤလၢ ၅ဘျီၦဲၤထီၣ်လီၤႉ ဘၣ်ဃးတၢ်ဟ့ၣ်စ့အီၣ်လိး တၢ်က့ၤပာ်လီၤလီၢ်ကျဲတၢ်ဂ့ၢ်သ့ၣ်တဖၣ်အံၤ တၢ်တဲအါကအိၣ်ဒံးတုၤကျဲတၢ်တိာ်ကျဲၤ၀ဲအံၤအ၀ံၤတစုလီၤႉ တၢ်သးတလီၤပလိာ်ႇ တၢ်တီၣ်ဖျါထီၣ် တၢ်ဘၣ်သးတဖၣ်ကအိၣ်ဒံး၀ဲန့ၣ်လီၤႉ ဘၣ်ဆၣ်သနာ်က့ ၄ ဘျီတဘျီ တၢ်ဟ့ၣ်စ့အီၣ်လိးကတီၢ် ပဟ့ၣ်က၀ံၤ ဖးအါလံႉ လၢခံ ၅ ဘျီတဘျီကတီၢ် ကအိၣ်တ့ၢ်က့ၤလၢအစှၤလီၤႉ ပတယးဃာ်ဒ်န့ၣ်လီၤ”အဂ့ၢ် စံး၀ဲန့ၣ်လီၤ.

ဘၣ်ဃးကျဲမုၢ်တၢ်တိာ်ကျဲၤအံၤ ၦၤဘၣ်ဒိတဖၣ်လၢတၢ်က့ၤဟ့ၣ်လီၤစ့အီၣ်လိးကတီၢ် တၢ်ထိၣ်ဒွး၀ဲစ့အီၣ်လိးအံၤ တူၢ်လိာ်၀ဲ တန့ၢ်ဘၣ်ဒီး တနီၤန့ၣ် သးတမံဘၣ်အိၣ်အဃိ အိၣ်ဒံးဒၣ်လၢတၢ်တဲသကိးကတီၢ်ဒ်လီၤအဂ့ၢ် သ့ၣ်ညါဘၣ်လီၤ.

တၢ်က့ၤဟ့ၣ်လီၤစ့အီၣ်လိး ၃ ဘျီတဘျီအံၤ ကီၢ်စဲၣ်ပဒိၣ်ကိတိာ်တဖၣ်ႇ တၢ်သူၣ်ထီၣ်ဘှီထီၣ်ကိတိာ်၀ဲၤကျိၤ ဘၣ်မူဘၣ်ဒါတဖၣ်ႇ ဘျီၣ်ဒိၣ်ခၢၣ်စးႇ တၢ်ပၢဆှၢရဲၣ်ကျဲၤဒီး (CRBC)ခီပနံၣ်ဘၣ်မူဘၣ်ဒါတဖၣ် ဟဲဟ့ၣ်လီၤ၀ဲလၢနီၢ်ကစၢ်န့ၣ်လီၤ. ဖဲန့ၣ် ဖၣ်အၣ်ကီၢ် ဆၣ်အပူၤ သၣ်ယၣ်ကိႇ၀ဲကယ့ၣ်ႇနီၣ်သယဲႇဒူၣ်ရ့ၣ်ႇခယဲ(ကါနါ),ခယဲႇကၠိၣ်စီးႇ ကၠဲသ၀ီတဖၣ်ဃုာ်ဒီး ကီးတရံးကီၢ်ဆၣ် ငါတဲၣ်ဒီး တတါကၠိသ၀ီတဖၣ် ပၣ်ဃုာ်၀ဲန့ၣ်လီၤ.

စီၤသီတ့ၣ်လၢအအိၣ်လၢ ဒူရ့ၣ်သ၀ီတဂၤစံးလၢ“အ၀ဲသ့ၣ်ဟ့ၣ်လီၤစ့အီၣ်လိးအံၤ မ့ၢ်က့ၤကွၢ်ကဒါ က့ၤလၢ (ADB) တၢ်သိၣ်တၢ်သီအသိးန့ၣ် တၢ်လိၣ်တဖၣ်အိၣ်လီၤႉ သနာ်က့ ပ၀ဲကမျၢၢ်သ့ၣ်တဖၣ် တသ့ၣ်ညါတၢ်ဘျၢခဲလၢာ်ဘၣ်ဒီး ဘၣ်ဟံးန့ၢ်စ့အီၣ်လိးတဖၣ် ဒ်ဟ့ၣ်လီၤ၀ဲအသိးန့ၣ်လီၤ”အဂ့ၢ် စံး၀ဲန့ၣ်လီၤႉ

တၢ်တ့ထီၣ်အ့ရှၢၣ်ကျဲမုၢ်တၢ်တိာ်ကျဲၤအဃိ တၢ်က့ၤဟ့ၣ်လီၤကဒါ ၦၤဘၣ်ဒိဘၣ်ထံးတဖၣ် စ့အီၣ်လိးတဖၣ်အံၤ မ့ၢ်၀ဲလၢကီၢ်စၢဖှိၣ်ပဒိၣ် စ့ပာ်ကီၤတဖၣ်န့ၣ်လီၤႉ လၢအပူၤကွံာ် ၂၀၁၇နံၣ်န့ၣ် တၢ်ဟ့ၣ်လီၤ၀ဲ အဆိကတၢၢ်တဘျီလၢ စ့ကကွဲၢ်ကၠး ၇၄၁ႇ ဖဲ၂၀၁၈နံၣ်န့ၣ် ခံဘျီတဘျီလၢ အကကွဲၢ်ကၠး ၁ႇ၁၁၅အဂ့ၢ် သ့ၣ်ညါဘၣ်လီၤ.