တၢ်ဒိးစဲးဆၢကတီၢ် ဘၣ်ဃ့ၢ်မှံဟးဖျိးအဃိ တၢ်တံာ်တာ်ကဲထီၣ်လၢ ကၠိဖိတၢ်ဖးလံာ်အဂီၢ်

လါဖ့ၤြဘူၤအါရံၤ ၁၉သီႇ ၂၀၂၀နံၣ်ႇ ခ့ၣ်အဲးစံၣ်

စးထီၣ်ဖဲတလါအံၤ လါဖ့ၤြဘူၤအါရံၤ ၃ သီအနံၤ ခီဖျိ ကီၢ်ပဒိၣ်သုးတကပၤ ခးလီၤ၀ဲကျိဖးဒိၣ်လၢ မုၢ်ြတီၢ်ကီၢ်ရ့ၣ် ႇ လူၢ်သီကီၢ်ဆၣ် ကုၤဒ့သ၀ီအပူၤအဃိႇ သ၀ီဒီတဖျၢၣ် ကမျၢၢ် ၃၀၀ ဘျဲၣ်ဘၣ်ဃ့ၢ်မှံဟးဖျိး၀ဲဒီး ကတီၢ်အံၤမ့ၢ်စ့ၢ်ကီး၀ဲလၢၦၤကၠိဖိသ့ၣ်တဖၣ် ကဘၣ်ဒိးစဲး၀ဲတၢ်ဒိးစဲးအဃိ ၦၤကၠိဖိသ့ၣ်တဖၣ်အဂီၢ် ကဲထီၣ်၀ဲတၢ်တံာ်တာ်လၢ ကမၤလိမၤဒိးတၢ်ဒီး တၢ်ဖးလံာ်ဖးလဲၢ်အဂီၢ်န့ၣ်လီၤႉ

စးထီၣ်ဖဲ လါဖ့ၤြဘူၤအါရံၤ ၁၇ သီအနံၤ ကုၤဒ့သ၀ီ တီၤဖုၣ်ကၠိစးထီၣ်၀ဲတၢ်ဒိးစဲးလံဘၣ်ဆၣ် လၢၦၤကၠိဖိသ့ၣ်တဖၣ် အဂီၢ် တၢ်ဖံးလိမၤလိဒီး ကကွၢ်လံာ်ကွၢ်လဲၢ်လၢၦၢ်လၢ်ကျါအပူၤအဂီၢ် တၢ်ကီတၢ်ခဲအိၣ်၀ဲအဂ့ၢ်န့ၣ် ကုၤဒ့တီၤဖုၣ်ကၠိ ကၠိသရၣ်မုၣ် နီၢ်ထံ၀ါဆၢ စံး၀ဲဒ်အံၤန့ၣ်လီၤႉ

“ပကွၢ်ကဒါက့ၤန့ၢ်အ၀ဲသ့ၣ်လံာ် ပမၢဖးက့ၤလံာ်ဒီးပလဲၤခိးကွၢ်ထဲအွ၀ဲသ့ၣ်လီၤႉ ပသိၣ်လိန့ၢ်အ၀ဲသ့ၣ်လံာ်လၢ သ့ၣ်ဘ့ၣ်ဘၣ်ကပၤလီၤႉ ဖိသၣ်တဖၣ် မုၢ်နၤခီဖးလံာ်လၢပနဲလီၤႉ လဲၤစိာ်ဃုာ်ဒီးပနဲ မ့မ့ၢ်လီမ့ၣ်အူလၢဒွဲၣ်ဒီး (ဘဲးထရံၣ်)တဖၣ် အိၣ်တ့ၢ်ခဲလၢာ်လီၤ” အဂ့ၢ် အ၀ဲစံး၀ဲန့ၣ်လီၤႉ

ကတီၢ်အံၤ ဖိသၣ် (KG-A, KG-B) သ့ၣ်တဖၣ် ဒိးစဲး၀ံၤလံဒီး မ့မ့ၢ်လၢၦၤကၠိဖိ ၁ တီၤတုၤ ၄ တီၤကၠိဖိတဖၣ် အတၢ်ဒိးစဲးက၀ံၤ၀ဲလၢ ၂၁ သီအနံၤန့ၣ်လီၤႉ တကီၢ်ခါဆၢကတီၢ်အခဲအံၤ ကုၤဒ့သ၀ီဖိတနီၤဒီးၦၤကၠိဖိတဖၣ် က့ၤအိၣ်ကဒါက့ၤလၢအသ၀ီပူၤလံဘၣ်ဆၣ် မ့မ့ၢ်ၦၤသူၣ်က့သးၦၢ်တနီၤလၢ ၦၤဘၣ်၀ံဘၣ်စိာ်အီၤတဖၣ် အိၣ်ဒံးဒၣ်တၢ်လၢ ပျၢ်လၢ်ကျါအပူၤဒီး အဖိအလံၤဘၣ်အိၣ်ခိးကွၢ်အ၀ဲသ့ၣ်န့ၣ်လီၤႉ

လၢန့ၣ်အမဲာ်ညါ သ၀ီဖိတဖၣ် က့ၤအိၣ်ဆိးကဒါက့ၤ လၢအသ၀ီအပူၤလံဘၣ်ဆၣ်ႇ ဘၣ်အိၣ်ဒီးတၢ်ပလီၢ်ပဒီထီဘိ ခီဖျိလၢကီၢ်ပဒိၣ်သုးတကပၤ ခးလီၤ၀ဲကျိဖးဒိၣ်ကျိဖိသ့ၣ်တဖၣ် ကိးနံၤဒဲးဃၣ်ဃၣ်ဒီး ၦၤကၠိဖိတဖၣ်အဂီၢ်စ့ၢ်ကီး ဘၣ်ပျံၤဘၣ်ဖုးတၢ်လၢ ဒိးစဲးလံာ်အဆၢကတီၢ်အဂ့ၢ်န့ၣ် ကုၤဒ့သ၀ီဖိ နီၢ်ခုၣ်ဂ့ၤမိၢ် စံး၀ဲန့ၣ်လီၤႉ

“ၦၤကၠိဖိတချုးဟဲက့ၤဒိးစဲးဘၣ်ကတီၢ် ကျိသၣ်သီၣ်ပတုာ်တစဲးႉ ဟဲက့ၤဒိးစဲးတခီကျိသၣ်သီၣ် တသီခံသီတဘျီထီဘိလီၤႉ ခးလီၤ၀ဲ မဟါကၢာ်တနံၤန့ၣ် ကျိဖးဒိၣ်ပၣ် ၃ဖျၢၣ် ႇ ၄ဖျၢၣ်ႉ တနံၤညါအံၤ ခးလီၤ၀ဲကျိဖိ သီၣ်၀ဲ (မဲးကစ့) ခံတီးသၢတီးဒံးႉ ၦၤဒူသ၀ီဖိသူၣ်က့သးၦၢ် ဃ့ၢ်တသ့ႇ ဟးတသ့တခီ အိၣ်ဒံးဒၣ်လၢတၢ်ဃၢၤလီၤ”အဂ့ၢ် နီၢ်ခုၣ်ဂ့ၤမိၢ် စံး၀ဲန့ၣ်လီၤႉ

ကုၤဒ့သ၀ီ တီၤဖုၣ်ကၠိအံၤ ကၠိသရၣ်ႇသရၣ်မုၣ် အိၣ်၀ဲ ၃ ဂၤဒီး ကတီၤဆိကၠိ တုၤ ၄ တီၤန့ၣ် ၦၤကၠိဖိခဲလၢာ်နီၢ်ဂံၢ်အိၣ်၀ဲဒၣ် ၃၆ဂၤန့ၣ်လီၤႉ