လါယနူၤအါရံၤ ၂၁ သီႇ ၂၀၂၀ နံၣ်ႇ နါ၀့ၤဖၠိစၣ်
ကညီကီၢ်စဲၣ်ႇ ဖၣ်အၣ်ကီၢ်ဆၣ် ဃိၣ်လိာ်ကျိမုၢ်နုာ်တပၤ တၢ်လီၢ်လၢထံထီၣ်သူကဲထီၣ်အသးလၢအမ့ၢ် မယ့ကိသ၀ီ တီၣ်ကလ့ကစၢၢ်ခီၣ်ထံးကပၤကမါအပူၤန့ၣ် ညၣ်သ့ၣ်တဖၣ်သံ၀ဲဒၣ်အါအါဂီၢ်ဂီၢ်ကဲထီၣ်သးလၢ တၢ်တသ့ၣ်ညါထွဲ တၢ်ဂ့ၢ်တၢ်ကျိၤဘၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်စံးဘၣ်ခ့ၣ်အဲးစံၣ်လီၤႉ
ဖဲအပူၤကွံာ်တနွံဘျဲၣ်အခါန့ၣ် လၢထံကမါပူၤန့ၣ် ထံသ့ၣ်တဖၣ်အသဘှဲဟဲထီၣ်၀ဲဒၣ်ဒီးႇ အလွဲၢ်စ့ၢ်ကီးဆီတလဲ အသးအိၣ်၀ဲအလီၢ်ခံႇ ညၣ်သ့ၣ်တဖၣ်သံ၀ဲတပယူာ်ဃီဟဲအိၣ်ထီၣ်၀ဲလီၤအဂ့ၢ်န့ၣ် မယ့ကိသ၀ီ လီၢ်က၀ီၤဖိတဂၤလၢအမ့ၢ် အူသါအ့ စံး၀ဲဒ်အံၤလီၤႉ
“ညၣ်တဖၣ်သံ၀ဲန့ၣ် အိၣ်၀ဲလွံၢ်သီလံဒီး အခီၣ်ထံးပဆိကမိၣ်လၢ ညၣ်အဒိၣ်တဖၣ်န့ၣ်အီၣ်၀ဲညၣ်ဖိအဃိ ညၣ်ဖိတဖၣ် သံ၀ဲလီၤႉ အခဲအံၤတနံၤအံၤ ညၣ်အဒိၣ်တဖၣ်သံ၀ဲဒၣ် ၃ ပီၢ်ဘျဲၣ်ညါအဃိႇ တၢ်အံၤလီၤဆီ၀ဲဒၣ်လီၤႉ ပပာ်သူၣ်ပာ် သးန့ၣ် ထံအသဘှဲထီၣ်အံၤအိၣ်၀ဲဒၣ် ၁၅ သီလံႉ ထံအဖီခိၣ်န့ၣ်အသဘှဲတဖၣ် ဖျါ၀ဲဒ်သိးဒီးသိချါဒီးအသဘှဲ တဖၣ်အလွဲၢ်န့ၣ် ဘီ၀ဲလီၤႉ အခဲအံၤကမါပူၤထံတဖၣ်ပထုးထီၣ်ကွံာ်၀ဲဒၣ်လီၤႉ ပက့ၤထၢနုၤက့ၤထံလၢအဂ့ၤတဖၣ်လီၤႉ တၢ်အိၣ်သးအိၣ်ဒ် လဲၣ်န့ၣ်တသ့ၣ်ညါဘၣ်လီၤ” အဂ့ၢ်န့ၣ်အ၀ဲစံး၀ဲလီၤႉ
ထံကမါပူၤလၢထံလၢအတဂ့ၤတဖၣ်န့ၣ် တနံၤအံၤတၢ်ထုးထီၣ်ကွံာ်လၢတၢ်ချၢ၀ံၤအလီၢ်ခံႇ ခီဖျိလၢ တၢ်က့ၤထၢနုၤက့ၤထံ လၢအသီအဃိ မ့ၢ်ညၣ်သ့ၣ်တဖၣ်ကဆဲးသံအိၣ်တအိၣ် ကဘၣ်ခိးကွၢ်၀ဲန့ၣ်လီၤအဂ့ၢ်န့ၣ် အူသါအ့စံးၦဲၤ၀ဲန့ၣ်လီၤႉ
တီၣ်ကလ့ကစၢၢ်ခီၣ်ထံး ထံကမါအံၤန့ၣ်အသးနံၣ်အိၣ်၀ဲဒၣ်လၢ အနံၣ် ၃၀ ဘျဲၣ်လံဘၣ်ဆၣ် ႇ ညၣ်တဖၣ်သံ၀ဲဒၣ်ကဲထီၣ်သးအံၤ တၢ်ထံၣ်ဘၣ်၀ဲဒၣ်အဆိကတၢၢ်တဘျီလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲလီၤႉ
ဖဲအပူၤကွံာ် ၂၀၁၉ နံၣ် စးထီၣ်လၢလါအီးကထိဘၢၣ်ထီၣ်သီန့ၣ် လီၢ်က၀ီၤတဖၣ်လၢအမ့ၢ် ဘ့ကၣ်ႇ အီၣ်ကီၣ်ယ့ႇ ယသ့ၣ်ပၠၣ်ႇ ပါကိ ဃုာ်ဒီးဒူသ၀ီက&ူၢ်အဂၤတဖၣ်အပူၤန့ၣ် လီၢ်က၀ီၤဖိတဖၣ်သူ၀ဲဒၣ်ထံ ထံကမါႇ ထံကမျၢ တဖၣ်အပူၤ ခီဖျိလၢထံတဖၣ်ဟဲထီၣ်သူ၀ဲအဃိ လီၢ်က၀ီၤဖိတဖၣ်သဂၢၢ်ဘၣ်၀ဲဒၣ်ဒီးတၢ်ကီတၢ်ခဲန့ၣ်လီၤႉ ဖဲလါအီးကထိဘၢၣ် ၁၅ သီအနံၤန့ၣ်စ့ၢ်ကီး ဖါကၣ်ဒူသ၀ီကရူၢ်ယ့ၤတွ့ကိသ၀ီပူၤအံၤႇ ဒ်န့ၣ်အသိးညၣ် သ့ၣ်တဖၣ်သံ၀ဲဒၣ်အါအါဂီၢ်ဂီၢ်ကဲထီၣ်တ့ၢ်အသးအိၣ်၀ဲန့ၣ်လီၤႉ
ဘၣ်ထဲဒွီး ညၣ်တဖၣ်သံ၀ဲန့ၣ် ကီၢ်စဲၣ် ဘုၣ်ဖီၣ်မၤညၣ်၀ဲၤကျိၤ ၦၤဘၣ်မူဘၣ်ဒါတဖၣ် ဟဲကွၢ်ဃိထံသ့ၣ်ညါ ဒီး သမံသမိးကွၢ်၀ဲဒီးႇ ညၣ်လၢအသံတဖၣ်န့ၣ် ကက့ၤမၤကွၢ်သမံသမိး၀ဲအဂီၢ် က့ၤစိာ်ဃုာ်၀ဲလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲလီၤႉ
