လါအ့ြဖ့ၣ် ၂ သီႇ ၂၀၂၀ နံၣ်ႇ စီၤရှါ
ကညီကီၢ်စဲၣ်ဒီတဘ့ၣ်အပူၤ တုၤလၢလါအ့ြဖ့ၣ် ၁ သီအနံၤန့ၣ် တၢ်တထံၣ်န့ၢ်၀ဲ (Covid-19) ဘၣ်သနာ်က့ႇ ၦၤဆါလၢတၢ်အိၣ်ခိးကွၢ်၀ဲတဖၣ်အိၣ်၀ဲတုၤလၢ ၂၃ ဂၤလံအဂ့ၢ်န့ၣ် ကီၢ်စဲၣ်ပဒိၣ်ကရူၢ်လၢအမ့ၢ် ၦၤဂ့ၢ်၀ီကိတိာ် အူဘိၣ်ဘိၣ်၀့ၣ်မီၣ် စံးဘၣ်ခ့ၣ်အဲးစံၣ်လီၤႉ
ဒ်တၢ်မၤကွၢ်အစၢထီၣ်အသိးန့ၣ် ၦၤဆါလၢတၢ်ခိးကွၢ်၀ဲ ၂၃ ဂၤအကျါႇ ၁၅ ဂၤန့ၣ်တၢ်တထံၣ်န့ၢ် ၀ဲတၢ်ဆါအဃၢ်ဘၣ်ဒီး တၢ်ကဘၣ်ဆဲးမၤကွၢ်၀ဲဒၣ်န့ၣ်အိၣ်တ့ၢ် ၈ ဂၤဒံးအဂ့ၢ်န့ၣ် ကိတိာ်စံး၀ဲဒ်အံၤလီၤႉ
“တုၤလၢတနံၤညါအံၤန့ၣ် ၦၤဆါလၢတၢ်အိၣ်ခိးကွၢ်၀ဲန့ၣ်အိၣ်၀ဲ ၂၃ ဂၤလီၤႉ လၢပအိၣ်ခိးအစၢန့ၣ်အိၣ်၀ဲ ၈ ဂၤန့ၣ်လီၤႉ ၦၤလၢတၢ်တထံၣ်န့ၢ်တၢ်ဆါဃၢ်တဖၣ်န့ၣ် ပတပျၢ်က့ၤအ၀ဲသ့ၣ်ဒံးဘၣ်ႉ ကပာ်အ၀ဲသ့ၣ် (၁၄ သီ) မးကက့ၤဆှၢအ၀ဲသ့ၣ်လၢအလီၢ်အကျဲလီၤ” အဂ့ၢ်န့ၣ် ကိတိာ်အူဘိၣ်ဘိၣ်၀့ၣ်မီၣ် စံး၀ဲန့ၣ်လီၤႉ
ဖဲလါမးရှးထီၣ်သီတုၤလၢ လါအ့ြဖ့ၣ် ၁ သီန့ၣ် ၦၤဆါလၢတၢ်အိၣ်ခိးကွၢ်၀ဲ ၂၃ ဂၤအကျါႇ ၁ ဂၤန့ၣ်အိၣ်၀ဲဒၣ်လၢ မိၣ်ကီၢ်စဲၣ်ႇ ဘံလ့ကီၢ်ဆၣ်ဒီး လၢအအိၣ်တ့ၢ်၂၂ ဂၤန့ၣ် မ့ၢ်ဒၣ်ၦၤဖဲ ကညီကီၢ်စဲၣ်အပူၤလီၤအဂ့ၢ်န့ၣ် ကိတိာ်အူဘိၣ်ဘိၣ်၀့ၣ်မီၣ် ဆဲးစံး၀ဲဒၣ်လီၤႉ
ကီၢ်ပယီၤအထံဖိကီၢ်ဖိလၢအဟဲက့ၤနုာ်လီၤ ခီဖျိ၀ဲ ကညီကီၢ်စဲၣ် ကီၢ်ဆၢသ့ၣ်တဖၣ်အံၤအဂီၢ် ဒ်သိးဒီး (Covid-19) တၢ်ဆါအံၤ သုတရၢ်လီၤအသးတဂ့ၤန့ၣ် တၢ်အိၣ်ခိးကွၢ်၀ဲလၢ ၁၄ သီအဂီၢ် မၠၣ်၀တံၣ်၀့ၢ် ဒီး ဖၣ်အၣ်၀့ၢ်တဖၣ်န့ၣ် တၢ်ရဲၣ်ကျဲၤပာ်လီၤ၀ဲဒၣ်တၢ်လီၢ်အိၣ်၀ဲ ၁၆ ခါ အဂ့ၢ်န့ၣ် ကီၢ်စဲၣ်ပဒိၣ်တဖၣ်စံး၀ဲလီၤႉ
တၢ်လီၢ်လၢအဂၤတဖၣ်န့ၣ် ခီဖျိလၢ တၢ်ဆါဘၣ်ကူဘၣ်ဂာ်ႇ တၢ်သံတၢ်ၦၢ်အိၣ်၀ဲဒၣ်အဃိ ကညီကီၢ်စဲၣ်အဂီၢ်စ့ၢ်ကီး တၢ်ဘၣ်ယိၣ်ဘၣ်ဘှီအိၣ်၀ဲန့ၣ် ၦၤလၢအအိၣ်ဖၣ်အၣ်၀့ၢ်ပူၤတဂၤလၢအမ့ၢ် (Miss Ethnic Myanmar 4th Runner up 2020) ၦၤဒိးန့ၢ်ခိၣ်ဖးဖိ နါကၠံၣ်လဲၣ်လဲၣ်စိ စံး၀ဲဒ်အံၤလီၤႉ
နါကၠံၣ်လဲၣ်လဲၣ်စိ စံး၀ဲလၢ “တဘၣ်ဃးလၢပကစၢ်တဂၤအဂီၢ်ဘၣ် နဟံၣ်ဖိဃီဖိလၢနအဲၣ်အီၤႇ ဘၣ်ဃး၀ဲဒၣ်ထံကီၢ်ဒီတဘ့ၣ်အဃိ ပကဘၣ်ပလီၢ်သူၣ်ပလီၢ်သးန့ၣ်လီၤႉ အဃိန့ၣ် တၢ်တဘၣ်မၤ၀ဲတၢ်ရိၣ်ဖှိၣ်ဘၣ်ဒီး မ့ၢ်ဟးလၢတၢ်ချၢတဘျီလၢ်လၢ်န့ၣ် ပကဘၣ်ကးဘၢပနါဒ့ႇ မ့ၢ်တလိၣ်န့ၣ်တလိၣ်လဲၤဘၣ်ႇ ဒ်တၢ်အိၣ်ဆူၣ်အိၣ်ချ့ ဒီး တၢ်လိာ်ကွဲကိတိာ်၀ဲၤကျိၤ နဲၣ်လီၤ၀ဲဒၣ်အသိး ပကဘၣ်ပလီၢ်သးဒီးလူၤပိာ်မၤထွဲအီၤန့ၣ်လိၣ်၀ဲဒၣ်လီၤ” အဂ့ၢ်န့ၣ်စံး၀ဲလီၤႉ
တုၤလၢ(လါအ့ြဖ့ၣ် ၁ သီ)အနံၤန့ၣ် လၢကီၢ်ပယီၤပူၤ ၦၤဘၣ်ကူဘၣ်ဂာ်အိၣ်၀ဲ (၁၅ ဂၤ)အကျါ သံ၀ဲဒၣ် ၁ ဂၤ အဂ့ၢ်န့ၣ် ကီၢ်ပယီၤ တၢ်အိၣ်ဆူၣ်အိၣ်ချ့ဒီး တၢ်လိာ်ကွဲကိတိာ်၀ဲၤကျိၤ ထုးထီၣ်ပာ်ဖျါ၀ဲအသိး သ့ၣ်ညါဘၣ်လီၤႉ
လၢန့ၣ်အမဲာ်ညါ တုၤလၢတနံၤအံၤ လါမးရှး ၂သီအနံၤန့ၣ် လၢကီၢ်ကၠီၣ်တဲၣ်ပူၤစ့ၢ်ကီး (Covid-19) ၦၤဘၣ်ကူဘၣ်ဂာ်အိၣ်၀ဲ (၁ႇ၈၇၄ ဂၤ)အကျါ သံ၀ဲဒၣ် ၁၅ ဂၤလံအသိးႇ ဟီၣ်ခိၣ်ဒီတဘ့ၣ်အပူၤဘၣ်ကူဘၣ်ဂာ် ၦၤနီၣ်ဂံၢ်အိၣ်၀ဲ (၈ ကလီၢ်)ဘျဲၣ်လံဒီး သံ၀ဲဒၣ်(၄ ကလး)ဘျဲၣ်လံအဂ့ၢ်န့ၣ် သ့ၣ်ညါဘၣ်လီၤႉ
