လါအီးကထိဘၢၣ် ၁၂ သီႇ ၂၀၂၀ နံၣ်ႇ စီၤထိလ့
ကညီကီၢ်စဲၣ်ႇ သၣ်တီၣ်ကၠံကီၢ်ဆၣ်ႇ သၤမိၤတီၤသ၀ီကရူၢ် ကၣ်ပဲၤသ၀ီဒီးထမိၤသ၀ီကရူၢ်အပူၤ ခပီပ့ၤသ၀ီတဖၣ် လဲၤအိၣ်၀ဲဒၣ်လၢ ပကိကီၢ်ခီဒိၣ်ႇ ယ့ၤတၤရှ့ၣ်ကီၢ်ဆၣ်တၢ်ဖးစရီအပူၤတၢ်ဂ့ၢ်အံၤ တၢ်က့ၤဘှီဘၣ်ကဒါတအိၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
သ၀ီခံဖျၢၣ်အံၤ လၢတၢ်ကထၢနုာ်ကဒါစရီလၢ ကညီကီၢ်စဲၣ် သၣ်တီၣ်ကၠံအအိၣ်တကပၤအဂီၢ်လိၣ်၀ဲဒၣ်ဒီး တၢ်က့ၤထၢနုာ်စရီမ့ၢ်၀ံၤမး ပကိကီၢ်ခီ ယ့ၤတၤရှ့ၤတၢ်ဖးစရီအံၤ ထူးသံကွံာ်၀ဲကန့ၢ်လီၤအဂ့ၢ်န့ၣ် ယ့ၤတၤရှ့ၤကီၢ်ဆၣ် ခီၣ်မံရှၢၣ် ၦၤပၢၤလီၢ်ဆ့ၣ်နီၤ အူစ့ၤထိ စံး၀ဲန့ၣ်လီၤႉ
“မ့ၢ်ထၢနုာ်၀ဲလၢန့ၣ်တကပၤန့ၣ် ကဟ့ၣ်လီၤကွံာ်၀ဲလီၤန့ၣ် တဲဃာ်၀ဲလီၤႉ လၢပ၀ဲသ့ၣ်တကပၤထူးသံ၀ဲဒီး လၢန့ၣ် တကပၤထၢနုာ်၀ဲမ့ၢ်တန့ၢ်ဘၣ်န့ၣ် ဘၣ်ယိၣ်လၢကကီခဲ၀ဲဒၣ်န့ၣ်လီၤႉ အခဲအံၤန့ၣ် လၢအံၤတပၤထၢနုာ်ပၠး၀ဲလီၤ လၢန့ၣ်တကပၤပထၢနုာ်လီၤ၀ံၤလံလီၤႉ မ့ၢ်တဲလၢထူးသံန့ၣ် ပထူးသံ၀ဲဒၣ်ညီညီဖိလီၤႉ တုၤလၢခဲအံၤတစု တတဲၦၤတၢ်နီတမံၤဒံးဘၣ်” အဂ့ၢ်န့ၣ် အူစ့ၤထိ စံး၀ဲဒၣ် ဖဲလါအီးကထိဘၢၣ် ၉ သီအနံၤန့ၣ်လီၤႉ
ကၣ်ပဲၤသ၀ီ ဒီး ခပီပ့ၤဒူသ၀ီတဖၣ်အံၤ အပူၤကွံာ်တၢ်ဃုထၢန့ၣ် တၢ်ဖးစရီအံၤပၣ်၀ဲဒၣ်လၢ ကညီကီၢ်စဲၣ်ႇ သၣ်တီၣ်ကၠံကီၣ်ဆၣ် ဘၣ်ဆၣ် ဖဲ ၂၀၁၈ နံၣ်န့ၣ် တၢ်ထၢနုာ်၀ဲဒၣ်လၢယ့ၤတၤရှ့ၤကီၢ်ဆၣ်ပူၤအဃိ ခဲအံၤ က့ၤအိၣ်ကဒါလၢယ့ၤတၤရှ့ၤကီၢ်ဆၣ်တၢ်ဖးစရီအပူၤန့ၣ်လီၤႉ
ဘၣ်ထွဲဒီးတၢ်ဂ့ၢ်အံၤ ကညီကီၢ်စဲၣ်ႇ သၣ်တီၣ်ကၠံကီၢ်ဆၣ် တၢ်ဃုထၢခီၣ်မံရှၢၣ်ကရူၢ်အဒ့ ၦၤပၢၤလီၢ်ဆ့ၣ်နီၤ စီၤကါရှဲၤ စံး၀ဲလၢ “တၢ်ဘိးဘၣ်ရၤလီၤတၢ်ဖးစရီ၀ံၤမး တၢ်ဂ့ၢ်အံၤဟဲထီၣ်၀ဲလီၤႉ ကွၢ်ကဒီးလၢနီၢ်တဘျီတၢ်ဖးစရီပူၤတက့ၢ်” အဂ့ၢ်န့ၣ် စံး၀ဲန့ၣ်လီၤႉ
သ၀ီခံဖျၢၣ်အံၤ အပူၤကွံာ်လၢညါလံၤလံၤန့ၣ် မ့ၢ်၀ဲဒၣ်သ၀ီခံဖျၢၣ်လၢအအိၣ်လၢ ကညီကီၢ်စဲၣ်ႇ သၣ်တီၣ်ကၠံကီၢ်ဆၣ်အပူၤဘၣ်ဆၣ်ႇ ဖဲ ၂၀၁၈ နံၣ် လါအီကူး ၃ သီ ဒ်ကီၢ်စၢဖှိၣ်ကိတိာ်၀ဲၤကျိၤ တၢ်ကလုၢ်တၢ်ဘိးဘၣ်သ့ၣ်ညါလံာ် နီၣ်ဂံၢ်(၁၀၁၅/၂၀၁၈)အသိး ဟီၣ်က၀ီၤလၢအအိၣ်ဘူးလိာ်သးလၢအမ့ၢ် ပကိကီၢ်ခီဒိၣ်ႇ ယ့ၤတၤရှ့ၣ်ကီၢ်ဆၣ်ႇ ကၠွဲယဲပၠ့ၣ်သ၀ီကရူၢ်အပူၤ တၢ်ထၢနုာ်ဒုးအိၣ်ထီၣ်၀ဲန့ၣ်လီၤႉ
တၢ်ထၢနုာ်၀ဲဒၣ်လၢယ့ၤတၤရှ့ၤကီၢ်ဆၣ်အပူၤဒ်အံၤအဖီခိၣ် ယံၤ၀ဲတနံၣ်ဃၣ်ဃၣ်မး သၣ်တီၣ်ကၠံကီၢ်ဆၣ်တကပၤ သ့ၣ်ညါ၀ဲ၀ံၤအလီၢ်ခံႇ ဒ်သိးတၢ်ကက့ၤထၢနုာ်က့ၤလၢကညီကီၢ်စဲၣ်အပူၤဒ်လၢညါအဂီၢ် သၣ်တီၣ်ကၠံကီၢ်ဆၣ်ႇ ကလုာ်ဘျီၣ်ဒိၣ်ခၢၣ်စး နီၢ်ခရံာ်ထိအံၤ ဖဲ ၂၀၂၀ နံၣ် လါမးရှး ၆ သီအနံၤ တၢ်မၤ၀ဲဒၣ်ကလုာ်ဘျီၣ်ဒိၣ်တၢ်အိၣ်ဖှိၣ်ပူၤ သံဒိးသံကွၢ်၀ဲတၢ်န့ၣ်လီၤႉ
လၢတၢ်သံဒိးသံကွၢ်အဖီခိၣ် ကီၢ်စၢဖှိၣ်ပဒိၣ်ကရူၢ်၀ဲၤဒၢး ကိတိာ်၀ဲၤကျိၤ ကိတိာ်(၂)အူတ့ၤမၠ့ၣ် စံး၀ဲလၢ သ၀ီခံဖျၢၣ်အံၤအပူၤကွံာ်န့ၣ် အိၣ်၀ဲဒၣ်လၢ သၣ်တီၣ်ကၠံကီၢ်ဆၣ်ႇ တၢ်ပၢအဖီလာ်ဘၣ်ဆၣ် သ့ၣ်ၦၢ်ပၢဆှၢ၀ဲၤကျိၤ ဒီး ကီၢ်ဆၣ် တၢ်ပၢဆှၢရဲၣ်ကျဲၤစံာ်ၦဲၤဂ့ၢ်၀ီဒီး တၢ်တီခိၣ်ရိၣ်မဲနီၣ်ဂံၢ်စရီ၀ဲၤကျိၤတဖၣ် အတၢ်မၤနီၣ်ဟီၣ်ခိၣ်ဂီၤအပူၤ တပၣ်၀ဲဘၣ်အဃိ တၢ်ထၢနုာ်ဒုးအိၣ််ထီၣ်၀ဲဒၣ်လၢ ယ့ၤတၤရှ့ၣ်ကီၢ်ဆၣ်အပူၤလီၤအဂ့ၢ်န့ၣ် က့ၤစံးဆၢကဒါ၀ဲန့ၣ်လီၤႉ
“ကၣ်ပဲၤသ၀ီဒီးခပီၤပ့ၤသ၀ီအံၤ ဒ်တၢ်ပၢတၢ်ပြးႇ တၢ်ကူၣ်ဘၣ်ကူၣ်သ့ႇ တၢ်အိၣ်ဆူၣ်အိၣ်ချ့ႇ ၦၤဂ့ၢ်၀ီ တၢ်လိၣ် ဘၣ်အသိး တၢ်မ့ၢ်ဘှီဘၣ်ဒုးအိၣ်ထီၣ်၀ဲဒၣ်လၢ ကညီကီၢ်စဲၣ် သၣ်တီၣ်ကၠံကီၢ်ဆၣ်အပူၤန့ၣ် ကီၢ်စၢဖှိၣ်ကီၢ်ခိၣ် ကီၢ်ပယီၤထံကီၢ် ဂံၢ်ခီၣ်ထံးတၢ်ဘျၢသဲစး အဆၢဖိ ၅၃ အသိးႇ ပကိကီၢ်ခီဒိၣ် ဒီး ကညီကီၢ်စဲၣ် အဆၢ ဒ်တၢ်ဆီလီၤပာ်ပနီၣ်၀ဲတၢ်မၤအကျဲအသိး ကဘၣ်ဟံးထီၣ်ဖီၣ်၀ဲလီၤအဂ့ၢ် တီၣ်ဖျါထီၣ်၀ဲလီၤ” အဂ့ၢ်န့ၣ် ကိတိာ်(၂) အူတ့ၤမၠ့ၣ် စံးတ့ၢ်၀ဲန့ၣ်လီၤႉ
ခီဖျိလၢတၢ်ထၢနုာ်၀ဲဒၣ် ကၣ်ပဲၤသ၀ီဒီးခပီၤပ့ၤသ၀ီအံၤ လၢယ့ၤတၤရှ့ၤကီၢ်ဆၣ်အပူၤအဃိ သၣ်တီၣ်ကၠံကီၢ်ဆၣ် ကလုာ်ဘျီၣ်ဒိၣ်ခၢၣ်စး နီၢ်ခရံာ်ထိ ဒီး ၦၤဘၣ်မူဘၣ်ဒါလၢအပၢဆှၢတၢ်တဖၣ်အံၤ ဖဲ ၂၀၁၉ နံၣ် လါအီးကထိဘၢၣ် ၈ သီအနံၤန့ၣ် လဲၤထံၣ်လိာ်အိၣ်သကိး၀ဲဒၣ်လီၢ်က၀ီၤဖိတဖၣ်ဒီး သံဒိးသံကွၢ်၀ဲအတၢ်ပာ်သးတဖၣ်ဒီး လီၢ်က၀ီၤဖိတဖၣ်အဲၣ်ဒိး၀ဲဒၣ်လၢ ကထၢနုာ်၀ဲဒၣ်လၢကညီကီၢ်စဲၣ်အပူၤလီၤအဂ့ၢ်န့ၣ် နီၢ်ခရံာ်ထိ စံး၀ဲဲန့ၣ်လီၤႉ
သ၀ီခံဖျၢၣ်အံၤ ဖဲအပူၤကွံာ်လၢညါလံၤလံၤန့ၣ် အိၣ်၀ဲဒၣ်လၢသၣ်တီၣ်ကၠံကီၢ်ဆၣ်အ့ရယၢ်အပူၤလီၤဒီး ဖဲ ၂၀၁၀ တၢ်ဃုထၢႇ ၂၀၁၄ ထံကီၢ်ဒီဘ့ၣ် တၢ်ထၢဖးဖီမုၢ်စရီဒီး ၂၀၁၅ တၢ်ဃုထၢတဖၣ်အံၤ အိၣ်က့ၤ၀ဲဒၣ်လၢ ကီၢ်ဆၣ်တၢ်ပၢအဖီလာ်အသိး ထုၤလၢ ၂၀၁၉ နံၣ်တစု အိၣ်ဒံး၀ဲဒၣ်လၢ သၣ်တီၣ်ကၠံကီၢ်ဆၣ် စ့တိာ် ပာ်တၢ်သူတၢ်စွဲအဖီလာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
