ဒ်သိးကဘှါရှဲသုးတၢ်သဘံၣ်သဘုၣ်တဖၣ်လၢအဆိအချ့အဂီၢ် တၢ်ကရၢကရိ ၁၀၀ ဘျဲၣ် ဆှၢထီၣ်လံာ်ဆူ ကီၢ်ခိၣ် ဒီး ၦၤဟ့ၣ်ကူၣ်တၢ်ဖိအအိၣ်

လါယနူၤအါရံၤ ၂၁ သီႇ ၂၀၂၁ နံၣ်ႇ နါ၀့ၤဖၠိစၣ်

KNU-ကညီဒီကလုာ်စၢဖှိၣ်ကရၢဟီၣ်က၀ီၤအပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA ဒီး ကီၢ်ပယီၤသုးမုၢ်ဒိၣ်တဖၣ်အဘၢၣ်စၢၤ ဘၣ်ထွဲဒီးတၢ်ဒုးဆဲးကဲထီၣ်၀ဲကွ့ၢ်ကွ့ၢ်တၢ်ဂ့ၢ်အံၤ ဒ်သိးကဘှါရှဲ၀ဲလၢအဆိအချ့အဂီၢ် ဖဲလါယနူၤအါရံၤ ၂၀ သီအနံၤ ကမျၢၢ်တၢ်ကရၢကရိ ၁၀၀ ဘျဲၣ် ဆှၢထီၣ်လံာ်တဘ့ၣ်ဆူ ထံကီၢ်ကီၢ်ခိၣ် အူ၀့မၠ့ၣ် ဒီး ၦၤဟ့ၣ်ကူၣ်တၢ်ဖိ ဒီၣ်အီၣ်ဆါဆူးကၠံၣ်အအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိလၢတၢ်ဒုးဆဲးကဲထီၣ်၀ဲတဘိယူၢ်ဃီအဃိ ဖၣ်ပူၣ်ကီၢ်ရ့ၣ်ႇ ဒူသထူၣ်ကီၢ်ရ့ၣ် ဒီး ချၢၣ်လွံၢ်ထူၣ်ကီၢ်ရ့ၣ်တဖၣ်အပူၤ လီၢ်က၀ီၤထံဖိကီၢ်ဖိကမျၢၢ် ၄ႇ၀၀၀ ဃၣ်ဃၣ် ဘၣ်ပာ်တ့ၢ်ကွံာ်အတၢ်အိၣ်တၢ်ဆိးအလီၢ်အကျဲဒီး ဘၣ်လဲၤဃ့ၢ်အိၣ်ခူသူၣ်လၢတၢ်လီၢ်အဂၤတဖၣ်အံၤအဖီခိၣ် ဘၣ်ယိၣ်ဘၣ်ဘှီတၢ်လၢအ၀ဲသ့ၣ်အဂီၢ်အဃိ ဒ်သိးတၢ်ကဘှါရှဲ၀ဲလၢအဆိအချ့အဂီၢ် ကမျၢၢ်တၢ်ကရၢကရိ ၁၆၅ ဒူၣ် ဘၣ်ဆှၢထီၣ်၀ဲလံာ်ဒ်အံၤန့ၣ်လီၤႉ

တၢ်ခးလိာ်သးကဲထီၣ်အဂ့ၢ်အကျိၤန့ၣ် ခီဖျိလၢထံရူၢ်ကီၢ်သဲးတၢ်ဂ့ၢ်ကီအဃိ တၢ်သဘံၣ်သဘုၣ်ကဲထီၣ်တဖၣ်အံၤ ဆၢမုၢ်လၢ်လၢထံကီၢ်ပဒိၣ်အံၤ ကဘှါရှဲဟံးထီၣ်ဖီၣ်ထီၣ်၀ဲအဂီၢ် ကလုာ်ဒူၣ်လီၢ်က၀ီၤ ကမျၢၢ်တၢ်ကရၢကရိတဖၣ်ပာ်ဖှိၣ်ထီၣ်သးဒီး ဘၣ်ဆှၢထီၣ်၀ဲလံာ်ဒ်အံၤလီၤအဂ့ၢ်န့ၣ် ကညီပိာ်မုၣ်ကရၢ နီၢ်ဆၢဆၢ စံး၀ဲန့ၣ်လီၤႉ

“လၢကလုာ်ဒူၣ်ဟီၣ်က၀ီၤအပူၤ တၢ်ဒုးမ့ၢ်စးထီၣ်ကဲထီၣ်န့ၣ် ပထံၣ်ဘၣ်လၢပယီၤသုးတကပၤစး ထီၣ်မၤကမၣ်တၢ်လီၤမီၤႉ တၢ်အံၤအဖီခိၣ် ကီၢ်ပယီၤသုးမုၢ်ဒိၣ်တကပၤ တတဲတၢ်နီတမံၤဘၣ်ႉ မၤ၀ဲသုး တၢ်ဟူးတၢ်ဂဲၤႇ မၤအါထီၣ်၀ဲၦၤနီၣ်ဂံၢ်ႇ ဆှၢထီၣ်၀ဲတၢ်အီၣ်တၢ်အီႇ တၢ်သ့ၣ်တဖၣ်အံၤန့ၣ် ကမျၢၢ်လၢအအိၣ် လၢကလုာ်ဒူၣ်ဟီၣ်က၀ီၤအပူၤတဖၣ် တအဲၣ်ဒိး၀ဲဒၣ်ကလုာ်ဒူၣ်ဖီၣ်စုက၀ဲၤဖိတဖၣ်စ့ၢ်ကီး သ့ၣ်ညါ၀ဲလီၤႉ ဘၣ်ဆၣ် ပဒိၣ်တကပၤ တတဲတၢ်နီတမံၤဘၣ်ႉ ကဟံးမူဒါတအိၣ်ဘၣ်ႉ တၢ်အဃိန့ၣ် ပ၀ဲသ့ၣ်တဖၣ်ပအိၣ်ဆၢထၢၣ်လၢကမျၢၢ်အအိၣ်တကပၤလီၤဒီး ပဃ့ထီၣ်၀ဲဒၣ်လီၤ” အဂ့ၢ်န့ၣ် နီၣ်ဆၢဆၢ စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါ ကီၢ်ပယီၤသုးမုၢ်ဒိၣ်အံၤ ကွၢ်ကပာ်ကွံာ်၀ဲဒၣ် ထံကီၢ်ဒီဘ့ၣ်တၢ်ပတုာ်တၢ်ခး(NCA)တၢ်သိၣ်တၢ်သီတဖၣ်ဒီး လၢ KNU တၢ်ပာ်ပနီၣ်ဟီၣ်က၀ီၤတဖၣ်အပူၤ မၤအါထီၣ်၀ဲသုးဂံၢ်ဘါဒီးဟူးဂဲၤ၀ဲအဃိ ပယီၤသုးဒီး KNU တဖၣ်အဘၢၣ်စၢၤ သုးတၢ်ဖ့ၣ်ဆၢဟဲအိၣ်ထီၣ်၀ဲဒီး ခီဖျိလၢတၢ်ခးလိာ်သးကဲထီၣ်အဃိ လီၢ်က၀ီၤထံဖိကီၢ်ဖိကမျၢၢ်တဖၣ်ဘၣ်စံၣ်မှံဟးဖျိးအမဲာ်ညါ လီၢ်က၀ီၤကမျၢၢ်တဖၣ်ဘၣ်ဒိဘၣ်ထံးဒီး ဘၣ်သံဘၣ်ၦၢ်ဟဲအိၣ်ထီၣ်၀ဲအဃိ ဒ်သိးကမၤဖျါထီၣ်တၢ်ထဲသိးတုၤသိးအဂီၢ်ဒီး လၢခံလၢလာ်သုးတဟဲအိၣ်ထီၣ်လၢၤတဂ့ၤအဂီၢ် ကဟ့ၣ်၀ဲတၢ်အုၣ်ကီၤသးအဂီၢ် ဆီၣ်တခူထီၣ်၀ဲလၢလံာ်ဆှၢထီၣ်အပူၤန့ၣ်လီၤႉ

ကလုာ်ဒူၣ်ဟီၣ်က၀ီၤတဖၣ်အပူၤ ဖီၣ်စုက၀ဲၤတၢ်သဘံၣ်သဘုၣ်တဖၣ်ကဲထီၣ်သးအဂ့ၢ်အကျိၤအံၤ မ့ၢ်၀ဲဒၣ်ထံရူၢ်ကီၢ်သဲးတၢ်ဂ့ၢ်ကီအဃိ ကြၢးလၢကဘၣ်ဘှါရှဲ၀ဲလၢထံရူၢ်ကီၢ်သဲးအကျိၤအကျဲအသိးလီၤဒီး တၢ်မၤ၀ဲတၢ်ထီၣ်ဒုးဒီး မၤအါထီၣ်နီၣ်ဂံၢ်ဟံးန့ၢ်လီၢ်ကျဲတဖၣ်အံၤကပတုာ်ကွံာ်၀ဲဒီး ဒ်သိးကဟံးထီၣ်ဖီၣ်ထီၣ်ဘှါရှဲ၀ဲလၢအဆိအချ့အဂီၢ် ကမျၢၢ်တၢ်ကရၢကရိတဖၣ် ဆဲးလီၤစုမုၢ်ကျၢၢ်ဃ့ထီၣ်၀ဲန့ၣ်လီၤႉ