လၢတၢ်ဟံးဆူၣ်တၢ်စိတၢ်ကမီၤကရၢအကျါ ပၣ်ဃုာ်၀ဲဒီးကညီခိၣ်နၢ်တနီၤအဖီခိၣ် ကညီသးစၢ်ပာ်ပနီၣ်ပဲာ် အၢပဲာ်သီလၢ ၦၤအယိးကဒါဘီ

လါဖ့ၤဘြူၤအါရံၤ ၅ သီႇ ၂၀၂၁ နံၣ်ႇ စးအဲၣ်ဆူ

ပယီၤသုးမုၢ်ဒိၣ်ဟံးဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ သုးမုၢ်ဒိၣ်ခိၣ်နၢ်ဒုးအိၣ်ထီၣ်၀ဲတၢ်ပၢတၢ်ပြးကီၣ်ကး ကရၢအကျါ ပၣ်ဃုာ်၀ဲဒၣ်ဒီးကညီကမျၢၢ်ပၣ်တံၣ်(KPP)ခိၣ်နၢ်တဖၣ်အဖီခိၣ် ကညီသးလၢအဟ့ၣ်ဂံၢ် ဟ့ၣ်ဘါဆီၣ်ထွဲ၀ဲပၣ်တံၣ်အ၀ဲန့ၣ်တဖၣ်အံၤ ထီဒါပဲာ်အၢပဲာ်သီ၀ဲတဲာ်တဲာ်ဖျုဖျုအဂ့ၢ်န့ၣ် ထုးထီၣ်၀ဲလံာ်တၢ်ပာ်ဖျါ ဖဲမဟါ(လါဖ့ၤဘြူၤအါရံၤ ၄ သီ)အနံၤန့ၣ်လီၤႉ

ကညီပၣ်တံၣ်အထံရူၢ်ကီၢ်သဲးတၢ်မုၢ်လၢ်ကွၢ်စိတဖၣ်အံၤ ဒ်သိးကမၤလိၣ်ထီၣ်ဖးထီၣ်ကညီကလုာ်အ တၢ်မုၢ်လၢ်ကွၢ်စိတဖၣ်အဂီၢ် လၢတၢ်မုၢ်လၢ်အပူၤဟ့ၣ်ဂံၢ်ဟ့ၣ်ဘါဆီၣ်ထွဲ၀ဲဘၣ်ဆၣ် တကီၢ်ခါတၢ်ဟံးဆူၣ်ကွံာ် တၢ်စိတၢ်ကမီၤကဲထီၣ်သးအံၤ ပၣ်ဃုာ်၀ဲဒီးပၣ်တံၣ်၀ဲန့ၣ်အခိၣ်အနၢ်တဖၣ်အဃိ မိၣ်ကီၢ်စဲၣ်ႇ အ့ၣ်ယၣ်၀တံၣ်ကီၢ်ခီဒိၣ်ဒီး ပကိကီၢ်ခီ လၢၢ်ဒိၣ်ဟီၣ်က၀ီၤ ကညီသးစၢ်လၢအဆီၣ်ထွဲဟ့ၣ်ဂံၢ်ဟ့ၣ်ဘါ၀ဲ ပၣ်တံၣ်တဖၣ်အံၤ ဘၣ်ထီဒါပဲာ်အၢပဲာ်သီ၀ဲဒ်အံၤန့ၣ်လီၤႉ

ဘၣ်ထွဲဒီးလံာ်ထုးထီၣ်ပာ်ဖျါ အ့ၣ်ယၣ်၀တံၣ်သးစၢ် စးန့ၤမ့ စံး၀ဲလၢ “၂၀၂၀ တၢ်ဃုထၢအံၤ ပ၀ဲကညီသးစၢ် တဖၣ် ဒ်သိးကမၤနၢၤတၢ်ဃုထၢအဂီၢ် ဟ့ၣ်ဂံၢ်ဟ့ၣ်ဘါမၤစၢၤ၀ဲသၦၢ်ၦၢ်လီၤႉ ခဲအံၤတၢ်ဟံးဆူၣ်ကွံာ်တၢ်စိ တၢ်ကမီၤဟဲကဲထီၣ်သးအဖီခိၣ် ပ၀ဲသးစၢ်တဖၣ်ထီဒါပဲာ်အၢပဲာ်သီ၀ဲအသိး ခဲအံၤသုးမုၢ်ဒိၣ်ဒုး ထီၣ်ပဒိၣ်ကရူၢ်အကျါ ပၣ်ဃုာ်၀ဲဒီး KPP ပၣ်တံၣ် ၦၤပၢၤလီၢ်ဆ့ၣ်နီၤ စီၤထိအီၤမၠ့ၣ် ဒီး မါည့မီၣ်တဖၣ်အမဲာ်ညါ သူအီၣ်၀ဲဒၣ်ကလုာ်ဒီး ကညီလၢအမၤတၢ်လၢနီၢ်ကစၢ်အတၢ်ဘၣ်ဘျုးတဂၤလၢ်လၢ်မ့ၢ်ဂ့ၤ ပ၀ဲသးစၢ်တဖၣ်ပဲာ်အၢပဲာ်သီ ဒ်အမ့ၢ်ၦၤယိးကဒါဘီလၢအၦၤကလုာ်အဖီခိၣ်လီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ထံကီၢ်တၢ်ပၢတၢ်ပြးကီၣ်ကးကရၢလၢ ပယီၤသုးမုၢ်ဒိၣ်လၢအဟံးဆူၣ်တၢ်စိတၢ်ကမီၤဒုးအိၣ်ထီၣ်၀ဲအံၤ ပၣ်ဃုာ်၀ဲဒၣ်ဒီး အပူၤကွံာ် အ့ၣ်ယၣ်၀တံၣ်ကီၢ်ခီႇ ပါတနီၤကီၢ်ဆၣ် တၢ်ဖးဟီၣ်က၀ီၤပူၤ KPP ပၣ်တံၣ်ပတြီၤခၢၣ်စးလၢအမ့ၢ် မါည့မီၣ် ဒီး ကလုာ်ဒူၣ်ကလုာ်ဂ့ၢ်၀ီကိတိာ်၀ဲၤကျိၤအဂီၢ် KPP ပၣ်တံၣ် ၦၤပၢၤလီၢ်ဆ့ၣ်နီၤ စီၤထိအီၤမၠ့ၣ်တဖၣ်န့ၣ်လီၤႉ

လၢန့ၣ်အမဲာ်ညါ ဒ်သိးတၢ်ကထၢနုာ်တၢ်ဖးလၢ KPP အဂီၢ် မၤ၀ဲဒၣ်တၢ်ဟးကရၢကရိတၢ်တဖၣ်အံၤ ကဲထီၣ်က့ၤ၀ဲဒ်တၢ်ဟးကရၢကရိတၢ်လၢတၢ်လံၣ်တၢ်လီအဖီခိၣ် ဃ့၀ံသးစူၤ၀ဲဒၣ်ကညီသးစၢ်တဖၣ်ဒီး မါည့မီၣ်လၢအဒိးဃုထၢသးလၢ KPP ပၣ်တံၣ်ဒီး စီၤထိအီၤမၠ့ၣ်လၢအပၣ်ဃုာ်လၢ တကီၢ်ခါပဒိၣ် ကရူၢ်ပူၤအကျါအံၤ သူအီၣ်၀ဲဒၣ်ကညီဒီကလုာ်ထံရူၢ်ကီၢ်သဲးဒီး ပာ်ပနီၣ််၀ဲလၢအမ့ၢ်ၦၤတဖၣ်လၢ အယိးကဒါဘီလၢအၦၤကလုာ်အဖီခိၣ်အဂ့ၢ်န့ၣ် လံာ်တၢ်ပာ်ဖျါအပူၤ ကညီသးစၢ်တဖၣ်ပာ်ဖျါထီၣ်၀ဲအတၢ်ပာ်သးန့ၣ်လီၤႉ

ဘၣ်ဆၣ်သနာ်က့ ဘၣ်ထွဲဒီးတကီၢ်ခါသုးမုၢ်ဒိၣ်ဒုးအိၣ်ထီၣ်ပဒိၣ်ကရူၢ်အကျါ တၢ်ဂ့ၢ်ကဲထီၣ်သးလၢပၣ်ဃုာ်၀ဲဒီးပၣ်တံၣ်ဖိတၢ်ဂ့ၢ်အံၤန့ၣ် ကညီကမျၢၢ်ပၣ်တံၣ်တကပၤ တသ့ၣ်ညါဆိပာ်တၢ်ဂ့ၢ်နီတမံၤဘၣ်အဂ့ၢ်န့ၣ် ကညီကမျၢၢ်ပၣ်တံၣ်(KPP) ပၣ်တံၣ်နဲၣ်ရွဲၣ် ဒီၣ်ကထၢၣ်စီၤစဲၤမိၤသၤ အနီၢ်ကစၢ်ဒၣ်၀ဲဆဲးလီၤ၀ဲစုမုၢ်ကျၢၢ် ထုးထီၣ်ဘိးဘၣ်ရၤလီၤဒုးသ့ၣ်ညါ၀ဲန့ၣ်လီၤႉ

ဒ်န့ၣ်အသိး ကညီသးစၢ်ၦာ်ဘျးစဲ(KYN)စ့ၢ်ကီး သုးမုၢ်ဒိၣ်ဟံးဆူၣ်ကွံာ်တၢ်စိတၢ်ကမီၤအံၤ ထီဒါလိာ်အသးဒီး ကညီကလုာ်တၢ်မိၣ်န့ၣ်သးလီကလုာ်တၢ်ထဲသိးတုၤသိးႇ နီၢ်ကစၢ်တၢ်စံၣ်ညီၣ်ပၢလီၤသးဒီး ကညီလၢ အပၣ်ဃုာ်လၢသုးမုၢ်ဒိၣ်တၢ်ပၢတၢ်ပြးအပူၤတဂၤလၢ်လၢ်န့ၣ် ပာ်ပနီၣ်ဘိးဘၣ်ရၤလီၤ၀ဲလၢအမ့ၢ် ၦၤယိးဒါဘီလၢအၦၤကလုာ်အဖီခိၣ် စ့ၢ်ကီးအဂ့ၢ်န့ၣ် ထုးထီၣ်၀ဲလံာ်တၢ်ပာ်ဖျါဖဲမဟါန့ၣ်လီၤႉ

မါည့မီၤလၢအပၣ်ဃုာ်လၢကီၣ်ကးကရူၢ်ဖိအကျါအံၤ အပူၤကွံာ်မ့ၢ်၀ဲဒၣ် ကညီဒီကလုာ်စၢဖှိၣ်ကရၢ -KNU လီၢ်ခၢၣ်သးထီဘိကမံးတံာ်တဂၤန့ၣ်လီၤႉ ဘၣ်ထွဲဒီးအ၀ဲပၣ်ဃုာ်လၢတၢ်ပၢတၢ်ပြးအကျါအံၤ KNU (လီၢ်ခၢၣ်သး)လၢအဘၣ်ထွဲထုးထီၣ်ပာ်ဖျါ၀ဲလၢ မါည့မီၣ်အံၤ ဖဲအပူၤကွံာ်လါယူၤလံအတီၢ်ပူၤန့ၣ် တၢ်မၤ၀ဲ(၇)ဘျီတဘျီ KNU ထီဘိကမံးတံာ်ဂ့ၢ်ဂီၢ်အူတၢ်အိၣ်ဖှိၣ်အပူၤ တီၣ်ထီၣ်လံာ်ဟးထီၣ်ဒ်အနီၢ်ကစၢ်တၢ်ဘၣ်သးဒီး တၢ်ဟ့ၣ်အခွဲးလၢကဟးထီၣ်အဂ့ၢ်ဒီး အတၢ်ဟူးတၢ်ဂဲၤတၢ်ဖံးတၢ်မၤတဖၣ်အံၤ တဘၣ်ဃးဒီး KNU ဘၣ်အဂ့ၢ်န့ၣ် ထုးထီၣ်ပာ်ဖျါဒုးသ့ၣ်ညါ၀ဲ ဖဲလါဖ့ၤဘြူၤအါရံၤ ၃ သီအနံၤန့ၣ်လီၤႉ