ကလဲၤထီၣ်ပယီၤသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤတလီၤတံၢ်ဘၣ်အဂ့ၢ် ကညီဖီၣ်စုက၀ဲၤကရူၢ် ၂ ဒူၣ်စံး၀ဲ

လါမးရှး ၂၄ သီႇ ၂၀၂၁ နံၣ်ႇ ခ့ၣ်အဲးစံၣ်

တၢ်ကမၤပယီၤသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤ ဖဲလါမးရှး ၂၇ သီအနံၤအံၤ ကလဲၤထီၣ်၀ဲအဂီၢ် တလီၤတံၢ်ဒံးဘၣ်အဂ့ၢ် ကညီဖီၣ်စုက၀ဲၤကရူၢ် ၂ ဒူၣ်လၢအမ့ၢ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်- DKBA ဒီး ကညီတၢ်မုာ်တၢ်ခုၣ်ကီၣ်ကး(KNU/KNLA-PC) ၦၤဘၣ်မူဘၣ်ဒါတဖၣ် စံးဘၣ်ခ့ၣ်အဲးစံၣ်န့ၣ်လီၤႉ

ဘၣ်ထွဲဒီးတၢ်ကစီၣ်ဟူထီၣ်လၢ ကညီဖီၣ်စုက၀ဲၤတၢ်ကရၢကရိ ၂ ဒူၣ်ဃုာ်ဒီး ကလုာ်ဒူၣ်ဖီၣ်စုက၀ဲၤကရူၢ် ၄ ဒူၣ်လၢအဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခး(NCA)တဖၣ် ကလဲၤထီၣ်၀ဲသုးကီၣ်ကးအသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤအံၤ ကညီဖီၣ်စုက၀ဲၤၦၤဘၣ်မူဘၣ်ဒါလၢအဘၣ်ထွဲတဖၣ် စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

DKBA ၦၤကတိၤတၢ်ပၢ သုးခိၣ်ကျၢၢ်ဖိ စီၤမူခိၣ် စံး၀ဲ“အိၣ်ဒၣ်လၢပနၢ်ဟူလၢၦၤတဲလီၤႉ တၢ်ကစီၣ်ဒု ဟးထီၣ်အမၠိအါမးလီၤခဲအံၤႉ သုးရိၣ်မဲခိၣ်ကျၢၢ်ဒီးပ၀ဲ CEC တဖၣ် တၢ်တၢၣ်ပီၣ်တဲသကိးတအိၣ်နီတမံၤဒံးဘၣ်ႉ တၢ်ဆၢတဲာ်မ့ၢ်အိၣ်တၢၣ်ပီၣ်တဲသကိး၀ံၤမးဒီး မ့ၢ်ဘၣ်လဲၤဒီးလဲဲၤမီၤနီၤႉ ပယီၤသုးမုၢ်ဒိၣ်အံၤကဲထီၣ်လၢၦၤအၢၦၤသီလံႇမၤသံမၤ၀ီကမျၢၢ်ဒီး အ၀ဲသ့ၣ်တၢ်ဂ့ၢ်တၢ်ကျိၤအဖီခိၣ်န့ၣ် လၢကလဲၤဆီၣ်ထွဲဒုအခီပညီတအိၣ်ဘၣ်ႉ မ့ၢ်ဘၣ်လဲၤ၀ဲဒုကလဲၤ၀ဲဒၣ်လၢတဂၤဂီၢ်ႇတမ့ၢ်လၢ(DKBA)တၢ်ကရၢကရိအဂီၢ်ဘၣ်ႉ မ့ၢ်ကွဲမုာ်ၦၤနါ က့ပတလဲၤဘၣ်ႉ မ့ၢ်လဲၤထီၣ်နါက့ဘၣ်ကနၣ်ထံစ့ၢ်မီၤနီၤႉ မ့ၢ်လဲၤထီၣ်န့ၣ်ကမျၢၢ်ထံၣ်ကရှဲ၀ဲလဲၣ်” အဂ့ၢ်န့ၣ် စံး၀ဲန့ၣ်လီၤႉ

သုးကီၣ်ကးသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤလၢတၢ်ကမၤ၀ဲ ဖဲလါမးရှး ၂၇ သီအနံၤအံၤ တၢ်ကစီၣ်ဟူထီၣ်လၢ ကညီဖီၣ်စုက၀ဲၤကရူၢ်လၢအမ့ၢ် -DKBA˜ ကညီတၢ်မုာ်တၢ်ခုၣ်ကီၣ်ကး(KNU/KNLA-PC)ႇ မိၣ်ကီၢ်သီပၣ်တံၣ်(NMSP) ဒီး ရၢၣ်ခၢၣ်ကီၢ်တၢ်ထူၣ်ဖျဲးပၣ်တံၣ်(ALP)တဖၣ်လၢအဆဲးလီၤထံကီၢ်ဒီဘ့ၣ်တၢ်ပတုာ်တၢ်ခးတဖၣ် ကလဲၤထီၣ်၀ဲဒၣ်န့ၣ်လီၤႉ

ကညီတၢ်မုာ်တၢ်ခုၣ်ကီၣ်ကး နဲၣ်ရွဲၣ်သဃဲၤ သုးခိၣ်ဒိၣ်စိ စီၤကၠီၤညိၣ်စ့ၢ်ကီးစံး၀ဲလၢ “ဘၣ်ဃးလၢကလဲၤထီၣ်သုးမုၢ်ဒိၣ်မုၢ်နံၤန့ၣ်တၢ်ရဲၣ်တၢ်ကျဲၤတအိၣ်ဘၣ်ႉ ခဲအံၤလၢခံန့ၣ်ပနၢ်ဟူက့ၤန့ၣ် တၢ်ရ့လိာ်မုာ်လိာ်၀ဲၤဒၢးၦၤဘၣ်မူဘၣ်ဒါတဖၣ် လၢကလဲၤထီၣ်တၢ်ရဲၣ်တၢ်ကျဲၤအံၤအဂီၢ် နၢ်ဟူလၢဟ့ၣ်ဃာ်မံၤစရီအိၣ်လီၤႉ တၢ်ဆၢတဲာ်လီၢ်တံၢ်လီၤဆဲးလၢအိၣ်ဒီးလံာ်လဲၢ်ဒုတအိၣ်နီတမံၤဘၣ်ႉ ခီဖျိလၢတၢ်တခါအံၤပတပာ်လၢအရ့ဒိၣ်ဘၣ်အဃိပတတၢၣ်ပီၣ်တဲသကိးဘၣ်ဘၣ်ႉ တၢ်ကဲထီၣ်သးဒ်အံၤန့ၣ်လၢပဂီၢ်န့ၣ်မ့ၢ်တၢ်မၤလိဖးဒိၣ်တခါညါလီၤႉ တၢ်တခါအံၤယနၢ်ပၢၢ်န့ၣ် ခိၣ်နၢ်လၢတၢ်ဖီလာ်တဆီတၢ်ကတိၤဒုကတလၢတဆဲးတမွဲးဒုယဆိမိၣ်ဒုကအိၣ်မီၤနီၤႉ လီၢ်ခၢၣ်သးတၢ််ပာ်သးဒုတလဲၤထီၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဘၣ်ဆၣ်မ့မ့ၢ် KNU=ကညီဒီကလုာ်စၢဖှိၣ်ကရၢႇတၢ်က့ၤသူၣ်ထီၣ်က့ၤယိၤဒိၣ်ကီၢ် ကီၣ်ကး/ယိၤဒိၣ်သုးမုၢ်ဒိၣ်(RCSS§SSA)ႇပအိၣ်ဒီကလုုာ်တၢ်ထူၣ်ဖျဲးကရူၢ်(PNLO)တဖၣ်ဃုာ်ဒီး ကလုာ်ဒူၣ်ဖီၣ်စုက၀ဲၤတၢ်ကရၢကရိလၢအဆဲးလီၤထံကီၢ်ဒီဘ့ၣ်တၢ်ပတုာ်တၢ်ခးတဖၣ်အါဒၣ်တက့ၢ်န့ၣ် တလဲၤထီၣ်၀ဲပယီၤသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ထွဲသုးဟံးဆူၣ်ကွံာ်ထံကီၢ်တၢ်စိတၢ်ကမီၤအဖီခိၣ်အံၤ ဖီၣ်စုက၀ဲၤတၢ်ကရၢကရိအဒူၣ် ၁၀ လၢအဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခးတဖၣ် ထီဒါတတူၢ်လိာ်၀ဲဘၣ်ဒီး ကဆိကတီၢ်ဃာ်တၢ်တၢၣ်ပီၣ်တဲသကိးတၢ်ဒီးသုးကီၣ်ကးလၢအဟံးဆူၣ်တၢ်စိတၢ်ကမီၤအဂ့ၢ်န့ၣ် ထုးထီၣ်ဘိးဘၣ်ရၤလီၤ၀ဲဒၣ် ဖဲအပူၤကွံာ် လါဖ့ၤဘြူၤအါရံၤ ၂၀ သီအနံၤန့ၣ်လီၤႉ