လါမးရှး ၃၁ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲအပူၤကွံာ်(လါမးရှး ၂၇)သီအနံၤ ခီဖျိသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်လၢ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ မုၢ်တြီၢ်(ဖၣ်ပူၣ်)ဟီၣ်က၀ီၤပူၤအဃိ လီၢ်က၀ီၤသ၀ီဖိ ၇ ဂၤလၢအဘၣ်ဒိဘၣ်ထံးတဖၣ် ဒ်သိးကကူစါယါဘျါသးအဂီၢ် ဖဲမဟါ(လါမးရှး ၃၀)သီ မုၢ်ဃ့ၢ်လီၤအဆၢကတီၢ် ဘၣ်တၢ်ဆှၢထီၣ်အီၤဆူကီၢ်ကၠီၣ်တဲၣ်ကတပၤလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိပယီၤသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်အဃိ လီၢ်က၀ီၤသ၀ီဖိပိာ်မုၣ် ၄ ဂၤဒီး ပိာ်ခွါ ၃ ဂၤလၢအဘၣ်ဒိဘၣ်ထံးတဖၣ်အံၤ ဒ်သိးတၢ်ကဟ့ၣ်ကူစါယါဘျါအီၤလၢကီၢ်ကၠီၣ်တဲၣ်တကပၤကန့ၢ်အဂီၢ် ဒ်လီၢ်က၀ီၤၦၤဘၣ်မူဘၣ်ဒါတဖၣ်တၢၣ်ပီၣ်တဲသကိး၀ဲအသိး ဖဲမဟါမုၢ်ဃ့ၢ်လီၤအဆၢကတီၢ် ဟဲတုၤ၀ဲဒၣ်လၢကီၢ်ကၠီၣ်တဲၣ်ကီၢ်ဆၢသီလဲၤထၣ်သ၀ီလံအဂ့ၢ်န့ၣ် သီလဲၤထၣ်သ၀ီဖိတဂၤပာ်ဂၢၢ်ပာ်ကျၢၤ စံးဘၣ်ခ့ၣ်အဲးစံၣ်န့ၣ်လီၤႉ
ဖဲအပူၤကွံာ်(လါမးရှး ၂၇)သီ ဟါခီ ၇ နၣ်ရံၣ် တုၤလၢ ဂီၤခီ ၂ နၣ်ရံၣ်တခီအဆၢကတီၢ် ခီဖျိပယီၤသုးမီၤစိရိၤဟဲကွံာ်လီၤမ့ၣ်ပိၢ်တလီၢ်လီၢ်အဃိ ဖိသၣ်ဃုာ်ဒီးကမျၢၢ်သံ၀ဲ ၃ ဂၤႇ ဘၣ်ဒိဘၣ်ထံး၀ဲ ၈ ဂၤဒီး ဟံၣ်တနီၤစ့ၢ်ကီးမ့ၣ်အူအီၣ်ဟးဂီၤကွံာ်၀ဲန့ၣ်လီၤႉ
ဖဲလါမးရှး ၂၇ႇ၂၈ႇ၂၉ သီအနံၤ ခီဖျိပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်ဆူ ခ့ၣ်အဲၣ်ယူၣ် သုးက့(၅)ဟီၣ်က၀ီၤပူၤအဃိ ဃိၣ်လိာ်ကျိဒီတကျိၤ မဲၢ်နုာ်ထၣ်ႇဃိၣ်က့ၣ်ႇအံတူၢ်ထၣ်ဒီးအူ၀ဲကျိသ၀ီ လီၢ်က၀ီၤကမျၢၢ် ၃ႇ၀၀၀ ဘျဲၣ် ဘၣ်လဲၤဃ့ၢ်ထီၣ်ဆူဃိၣ်လိာ်ကျိ၀ၢ်ခီကီၢ်ကၠီၣ်တဲၣ်တကပၤန့ၣ်လီၤႉ
ခီဖျိပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်ဆူ မုၢ်တြီၢ်(ဖၣ်ပူၣ်)ဟီၣ်က၀ီၤ ဒူသ၀ီတဖၣ်ပူၤအဃိ လီၢ်က၀ီၤသ၀ီဖိသံဘၣ်ဒိဘၣ်ထံးဒီးဘၣ်ဃ့ၢ်မှံဟးဖျိးအဖီခိၣ် ဖဲလါမးရှး ၂၉ သီအနံၤ ကီၢ်ပူၤကီၢ်ချၢ ကညီကရူၢ်ကရၢတဖၣ်ပဲာ်အၢပဲာ်သီ၀ဲတဲာ်တဲာ်ဖျုဖျုဒီး ထုးထီၣ်ဘိးဘၣ်ရၤလီၤ၀ဲလံာ်တၢ်ပာ်ဖျါတဖၣ်န့ၣ်လီၤႉ
