လါမးရှး ၉ သီႇ ၂၀၂၁ နံၣ်ႇ ခ့ၣ်အဲးစံၣ်
KNU-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)အပူၤ ဖဲတနံၤအံၤ(လါမးရှး ၉ သီ)အနံၤန့ၣ် ပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA တဖၣ်အဘၢၣ်စၢၤ တၢ်ခးလိာ်သးကဲထီၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိလၢပယီၤသုးတကပၤစးထီၣ်ခးဆိ၀ဲ KNU သုးက့(၁)အဃိ တၢ်ခးလိာ်သးဘၣ်ဟဲထီၣ်အဂ့ၢ်န့ၣ် KNU ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤစိမၠ့ၣ် စံးဘၣ်ခ့ၣ်အဲးစံၣ် ဖဲတနံၤအံၤ(လါမးရှး ၉ သီ)အနံၤန့ၣ်လီၤႉ
“မ့ၢ်၀ဲလီၤႉ ပနၢ်ဟူလၢတၢ်ခးလိာ်သးကဲထီၣ်လၢညီၣ်ကိတကပၤလီၤႉ ပယီၤသုးအံၤဟဲခး၀ဲပသုးကရူၢ်တဖၣ်အဃိ တၢ်ခးလိာ်သးကဲထီၣ်လီၤမီၤႉ ပ၀ဲသ့ၣ်တဖၣ်န့ၣ်မ့ၢ်၀ဲၦၤပၢဆှၢတၢ်အဃိ ဘၣ်ဃးသုး တၢ်ဂ့ၢ်န့ၣ်ပတဲလီၤတံၢ်လီၤဆဲးတသ့ဘၣ်ႉ တသ့ၣ်ညါဘၣ်စ့ၢ်ကီးလီၤတံၢ်လီၤဆဲးဒံးဘၣ်” အဂ့ၢ်န့ၣ် ကီၢ်ရ့ၣ်နဲၣ်ရွဲၣ် စံး၀ဲန့ၣ်လီၤႉ
ဖဲတလါအံၤလါမးရှးအတီၢ်ပူၤ KNU သုးက့(၁) တူၢ်လိာ်မၤစၢၤ၀ဲ ပၢၤကီၢ်သုးႇဘျီၣ်ဒိၣ်ခၢၣ်စးဒီးၦၤလၢအဟူးဂဲၤထီဒါသုးမီၤစိရိၤတဖၣ် အဂၤ ၅၀ ဘျဲၣ်လၢဟီၣ်က၀ီၤပူၤတၢ်ဂ့ၢ်အံၤအဃိ ပယီၤသုးပညိၣ်ဟဲထီၣ်ခး၀ဲလီၤအဂ့ၢ်န့ၣ် တၢ်ပဲာ်ထံနီၤဖးစံး၀ဲအိၣ်၀ဲန့ၣ်လီၤႉ
တၢ်လီၢ်လၢတၢ်ခးလိာ်သးကဲထီၣ်အလီၢ်ဒီး ဘၣ်ထွဲဒီးတၢ်ဘၣ်ဒိဘၣ်ထံးတၢ်အိၣ်သးဒီး ခံခီခံကပၤသုးရ့ၣ်အမံၤန့ၣ်ဆဲးဃုသ့ၣ်ညါ၀ဲအဖၢမုၢ်လီၤအဂ့ၢ်န့ၣ် ကီၢ်ရ့ၣ်နဲၣ်ရွဲၣ် ဆဲးစံး၀ဲန့ၣ်လီၤႉ
ဖဲတလါညါအံၤလါမးရှးအတီၢ်ပူၤ လီၢ်က၀ီၤကညီကမျၢၢ်တဖၣ်မၤ၀ဲတၢ်ပာ်ဖျါထီၣ်သးလၢ တၢ်ထီဒါသုးမီၤစရိၤသနူတၢ်ရဲၣ်တၢ်ကျဲၤအပူၤန့ၣ် ပထံၣ်ဘၣ်လၢ KNU ဟ့ၣ်ဂံၢ်ဟ့ၣ်ဘါဟံးန့ၢ်၀ဲ ကမျၢၢ်လၢအပာ်ဖျါထီၣ်သးတဖၣ်အတၢ်ဘံၣ်တၢ်ဘၢစ့ၢ်ကီးန့ၣ်လီၤႉ
