Home တၢ်ကစီၣ် ပယီၤသုးဂုာ်ကျဲးစၢးကနုာ်လီၤသမံးသမိးတၢ်လၢလ့က့ၣ်ကီၤ၀့ၢ်သီအပူၤ

ပယီၤသုးဂုာ်ကျဲးစၢးကနုာ်လီၤသမံးသမိးတၢ်လၢလ့က့ၣ်ကီၤ၀့ၢ်သီအပူၤ

2748
0

လါမးရှး ၁၈ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇမၠၣ်၀တံၣ်၀့ၢ် ကလံၤထံးတကပၤ လ့က့ၣ်ကီၤ၀့ၢ်သီလၢအဘၣ်တၢ်သူၣ်ထီၣ်အီၤလၢ
ကညီဒီကလုာ်စၢဖှိၣ်ကရၢ -KNU ဟီၣ်က၀ီၤအပူၤအံၤ ဖဲမဟါ လါမးရှး ၁၇ သီ မုၢ်နၤခီအဆၢကတီၢ် လီၢ်က၀ီၤပယီၤသုးတဖၣ်ဂုာ်ကျဲးစၢး၀ဲဒ်သိးကနုာ်လီၤသမံးသမိးတၢ်အဂီၢ်အဂ့ၢ်န့ၣ် သ့ၣ်ညါဘၣ်လၢ လ့က့ၣ်ကီၤ၀့ၢ်သီၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ

ပယီၤသုး ခီၣ်ချ့သုးရ့ၣ်(ခလရ=၃၁၀)ဘၣ်တၢ်တီခိၣ်ရိၣ်မဲအီၤလၢ သုးခိၣ်ဒိၣ်ဖိအီၤကၠီၤဟ့အံၤ ဖဲမဟါမုၢ်နၤခီ ၁၀ နၣ်ရံၣ်အဆၢကတီၢ် ဆဲးဃီၤ၀ဲလီတဲစိဒီးစံး၀ဲခီဖျိလၢတၢ်ဖီခိၣ်ခိၣ်နၢ်ဟ့ၣ်လီၤတၢ်ကလုၢ်အဃိ ကဘၣ်နုာ်လီၤဒိတၢ်ဂီၤမၤနီၣ်မၤဃါတၢ်လၢလ့က့ၣ်ကီၤ၀့ၢ်သီအပူၤအဂ့ၢ်န့ၣ် လ့က့ၣ်ကီၤ၀့ၢ်သီ ၦၤပၢဆှၢတၢ်ခိၣ် စီၤထ့မၠ့ၣ်အီၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

အ၀ဲစံး၀ဲလၢ“ဖဲမုၢ်နၤခီ ၁၀ နၣ်ရံၣ်အခါန့ၣ်ဆဲးဃီၤ၀ဲလီတဲစိလီၤႉ အ၀ဲသ့ၣ်တဲလၢခိၣ်နၢ်နဲၣ်လီၤလၢ ကဘၣ်နုာ်လီၤဒိတၢ်ဂီၤမီၤနီၤႉ မ့ၢ်မိၣ်သးဒိတၢ်ဂီၤန့ၣ်ဟဲလၢမုၢ်ဆ့ၣ်မုၢ်ဆါမီၤနီၤႉ တၢ်လီၢ်တၢ်ကျဲအံၤ ပခိၣ်ပနၢ်ဒီးကီၢ်ပယီၤခိၣ်နၢ်တၢၣ်ပီၣ်တဲသကိးတၢ်၀ံၤမးတၢ်ဆီလီၤအီၤအဃိ ခံခီယၢ်ပာ်တၢ်ပာ်ကဲလိာ်သးကဘၣ်အိၣ်မီၤနီၤႉ ပ၀ဲဒၣ်နါက့ပအိၣ်ဒီးပတၢ်ဘံၣ်တၢ်ဘၢစ့ၢ်လီၤႉ ပက့ၤတဲကဒါက့ၤလၢမ့ၢ်အဲၣ်ဒိးဟဲန့ၣ်ဟဲလၢမုၢ်ဆါခီဟဲသ့လီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါ သုးခိၣ်အီၤကၠီၤဟ့လၢအဆဲးဃီၤလီတဲစိတဂၤအံၤစ့ၢ်ကီး ဖဲမနၤန့ၣ်ထဲ အကၠး၀့ၢ်ကၠး၀ီၤကဒံကဒါဒီးဘၣ်ဒီတၢ်ဆီၣ်သနံးအိၣ်အဃိ ၁၂ နၣ်ရံၣ်မးအ၀ဲဆဲးဖိတကတၢၢ်ဒံးဘၣ်ဒီး အ၀ဲက့ၤထီၣ်ဟဲက့ၤလီၤက့ၤထီၣ်က့ၤထီၣ်ဟဲက့ၤလီၤအဂ့ၢ်န့ၣ် လ့က့ၣ်ကီၤ၀့ၢ်သီ ၦၤပၢဆှၢတၢ်ခိၣ် စီၤထ့မၠ့ၣ်အီၤ စံးအါထီၣ်၀ဲန့ၣ်လီၤႉ

ပယီၤသုးတဖၣ်မ့ၢ်ဟဲနုာ်လီၤဘၣ်ဖုးန့ၣ် လီၢ်က၀ီၤကမျၢၢ်လၢအအိၣ်၀့ၢ်သီအပူၤတဖၣ် တၢ်သူၣ်ကိၢ်သးဂီၤကအိၣ်ထီၣ်၀ဲအဃိ ဟီၣ်က၀ီၤၦၤဘၣ်မူဘၣ်ဒါတဖၣ်တဟ့ၣ်အခွဲးဘၣ်ဒီး မ့ၢ်ဟဲနုာ်လီၤန့ၢ်ဆူၣ်ဘၣ်ဖုးန့ၣ် ကဘၣ်သဂၢၢ်လိာ်သးဒီး KNU တၢ်ဘံၣ်တၢ်ဘၢသုးကရူၢ်လၢအဟံးန့ၢ်၀့ၢ်သီတၢ်ဘံၣ်တၢ်ဘၢတဖၣ်အဂ့ၢ်န့ၣ် လ့က့ၣ်ကီၤ၀့ၢ်သီၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ

ကီၢ်ပယီၤပူၤ ဘၣ်ထွဲသုးမီၤစိရိၤဟံးဆူၣ်ကွံာ်ထံကီၢ်တၢ်စိတၢ်ကမီၤအံၤန့ၣ် KNU အတၢ်ပာ်သးတၢ်အိၣ်ဆၢထၢၣ်တဖၣ်လီၤဆီလိာ်အသးဒီး သုးကီၣ်ကးအတၢ်ပာ်သးအဃိ လၢခ့ၣ်အဲၣ်ယူၣ်ဟီၣ်က၀ီၤအပူၤတနီၤန့ၣ် ခံခီခံကပၤတၢ်ခးလိာ်သးဟဲက့ၤကဲထီၣ်ကဒါန့ၣ်လီၤႉ

လ့က့ၣ်ကီၤ၀့ၢ်သီအံၤ ခ့ၣ်အဲၣ်ယူၣ် ဒီး ကီၢ်စၢဖှိၣ်ပဒိၣ်တဖၣ် ထိၣ်ဃူထိၣ်ဖိးဒုးအိၣ်ထီၣ်၀ဲအမဲာ်ညါ မ့ၢ်၀့ၢ်သီလၢအဘၣ်တၢ်ဆီၣ်ထွဲမၤစၢၤအီၤလၢ ယပၣ်ထံကီၢ်ႇနံၣ်ပီဖီၣ်ဒ့ရှၢၣ်ဒီး စးထီၣ်ဖဲ ၂၀၁၄ နံၣ် လါယူၤအတီၢ်ပူၤန့ၣ် တၢ်စးထီၣ်မၤဖျါအမိၢ်လံၤမိၢ်ၦၢ်သူၣ်ထီၣ်၀ဲလၢ ၅နံၣ်တၢ်တိာ်ကျဲၤန့ၣ်လီၤႉ ၦၤလၢအအိၣ်ဖဲ၀့ၢ်သီအပူၤတဖၣ် ပၣ်ဃုာ်ဒီၦၤအိၣ်ဟဲက့ၤလၢကီၢ်ဆၢဘၣ်ကီဘၣ်ခဲဒဲက၀ီၤပူၤတဖၣ်စ့ၢ်ကီးန့ၣ်လီၤႉ