လါအ့ဖြ့ၣ် ၂၈ သီႇ ၂၀၂၁ နံၣ်ႇ ခ့ၣ်အဲးစံၣ်
ပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်ခံသီဆဲးတဲးလၢ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်ႇ သုးက့ ၅ တၢ်ပၢဟီၣ်က၀ီၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲမဟါ လါအ့ဖြ့ၣ် ၂၇ သီ ဂီၤခီအဆၢကတီၢ် KNU စုဒုၣ်တီၤအဖီလာ် KNLA သုးက့ ၅ လဲၤထီၣ်ဟံးန့ၢ်ကွံာ်၀ဲ သုးမီၤစိရိၤ အသုးကလၢၤလၢအအိၣ်ဖဲ သီလဲၤထၣ်ႇ ကီၢ်ကၠီၣ်တဲၣ်=ကီၢ်ပယီၤကီၢ်ဆၢ၀ံၤအလီၢ်ခံ သုးမီၤစိရိၤအသုးဟဲကွံာ်လီၤမ့ၣ်ပိၢ်ဒီး ကဘီယူၤအဆၢတတဲာ်၀ဲဘၣ်အဂ့ၢ်န့ၣ် ကညီတၢ်တိစၢၤမၤစၢၤတၢ်မုာ်တၢ်ခုၣ်ြ -KPSN ကရူၢ် စံးဘၣ်ခ့ၣ်အဲးစံၣ်န့ၣ်လီၤႉ
KPSN ၦၤကတိၤတၢ်ပၢ နီၢ်၀ါခုၣ်ရှံ စံး၀ဲ“မဟါန့ၣ်ခး၀ဲတၢ်လီၢ် ၃ တီၤလီၤႉ နၣ်ဟူလၢဟဲကွံာ်လီၤမ့ၣ်ပိၢ်လၢ ဘှါဒၢႇဒါကွ့ၤဒီးသီလဲၤထၣ်အဖီလာ်တၢ်လီၢ်တတီၤလီၤႉ တနံၤညါအံၤဟဲခးကဒီး၀ဲဒါကွ့ၤတဘျီလီၤႉ နၢ်ဟူဘၣ်လၢသ၀ီဖိတဖၣ်ဘၣ်ဒိဘၣ်ထံးအိၣ်ဘၣ်ဆၣ် ပာ်ဂၢၢ်ပာ်ကျၢၤတန့ၢ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ
သုးမီၤစိရိၤအသုးဟဲကွံာ်လီၤမ့ၣ်ပိၢ်ဒီးကဘီယူၤအံၤ ပညိၣ်ဟဲခး၀ဲ တၢ်လီၢ်လၢကမျၢၢ်ထံဖိကီၢ်ဖိအိၣ်အလီၢ်လီၤ အဂ့ၢ်န့ၣ် KNLA သုးက့ ၅ ၦၤကတိၤတၢ်ပၢ သုးခိၣ်ဒိၣ်စိ စီၤကျၢၤဒိၣ် စံး၀ဲဒ်အံၤန့ၣ်လီၤႉ
“လၢအပူၤကွံာ်တဘျီဟဲကွံာ်လီၤမ့ၣ်ပိၢ်န့ၣ်ဟဲကွံာ်လီၤ၀ဲလၢတၢ်လီၢ်လၢကမျၢၢ်ထံဖိကီၢ်ဖိအိၣ်ဆိးအလီၢ်လီၤႉ ဘၣ်ဒိသံ၀ဲထဲဒူဖိသ၀ီဖိလီၤႉ သုးကီၣ်ကးသုးကရူၢ်အံၤဖီၣ်စုက၀ဲၤကဒဲကဒဲအဘၢၣ်စၢၤ တၢ်မ့ၢ်ကဲထီၣ်တမံၤမံၤလံန့ၣ် တခး၀ဲဒၣ်ဖီၣ်စုက၀ဲၤကဒဲဒဲဘၣ်ဒီး ဟဲခးပညိၣ်၀ဲထဲကမျၢၢ်ထံဖိကီၢ်ဖိလီၤႉ အတၢ်ပညိၣ်ခီန့ၣ် ဒ်သိးဒီးကမျၢၢ်ထံဖိကီၢ်ဖိတဖၣ်အတၢ်တူၢ်လိာ်တၢ်ပၢၢ်ဆၢတၢ်ကရၢကရိကလီၤစှၤအဂီၢ်လီၤ” အဂ့ၢ်န့ၣ် စံး၀ဲန့ၣ်လီၤႉ
ကီၢ်ကၠီၣ်တဲၣ်=ကီၢ်ပယီၤကီၢ်ဆၢ ဃိၣ်လိာ်ကျိကၢၢ်နံၤဒီတကျိၤ ခီဖျိမီၤစိရိၤအသုးဟဲကွံာ်လီၤမ့ၣ်ပိၢ်အဃိ လီၢ်က၀ီၤဖိဘၣ်ဃ့ၢ်မှံဟးဖျိးအိၣ်၀ဲ ၇ႇ၀၀၀ ဘျဲၣ်ဒီး ခီဖျိမီၤစိရိၤအသုးဟဲကွံာ်လီၤကဒီးမ့ၣ်ပိၢ်ဒ်အံၤအဃိ လီၢ်က၀ီၤသ၀ီဖိတဖၣ် ဘၣ်အိၣ်လၢတၢ်ပျံၤဘၣ်ဖုးအပူၤအဂ့ၢ်န့ၣ် KPSN စံး၀ဲန့ၣ်လီၤႉ
ဖဲအပူၤကွံာ် လါမးရှး ၂၇ သီအနံၤ KNU သုးက့ ၅ ထီၣ်ဒုးဟံးန့ၢ်ကွံာ် သံမုၢ်ထၣ်ပယီၤသုးကလၢၤလၢအအိၣ်ဖဲဃိၣ်လိာ်ကျိကၢၢ်နံၤတခါ၀ံၤအလီၢ်ခံ စးထီၣ်ဖဲလါမးရှး ၂၇ သီ တုၤလၢ လါအ့ဖြ့ၣ် ၁ သီအနံၤ ခီဖျိသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်အဆၢတတဲာ်ဘၣ်အဃိ ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်အပူၤ ကမျၢၢ်သံ၀ဲအဂၤ ၂၀ ဘျဲၣ်ဒီး ဘၣ်ဒိအဂၤ ၃၀ ဃၣ်ဃၣ်အိၣ်၀ဲအသိး လီၢ်က၀ီၤကမျၢၢ် ၂၃ႇ၀၀၀ ဘျဲၣ် ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
