Home တၢ်ကစီၣ် တၢ်ဖီၣ် မၠၣ်၀တံၣ် က၀ီၤဒ့(၂)သးၦၢ်လီၢ်လံၤ

တၢ်ဖီၣ် မၠၣ်၀တံၣ် က၀ီၤဒ့(၂)သးၦၢ်လီၢ်လံၤ

1087
0

လါအ့ဖြ့ၣ် ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ် မၠၣ်၀တံၣ်၀့ၢ်ပူၤ ဖဲမဟါမုၢ်နၤခီအဆၢကတီၢ် တၢ်လဲၤကိးလံၣ်၀ဲက၀ီၤဒ့(၂)သးၦၢ်လီၢ်လံၤဒီး တၢ်ဖီၣ်ဒုးဃာ်၀ဲဖဲမၠၣ်၀တံၣ်မၠိၣ်မၣ်ပၢၤကီၢ်၀ဲၤလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲမဟါ လါအ့ဖြ့ၣ် ၂၈ သီ မုၢ်နၤခီ ၁၁ နၣ်ရံၣ်အဆၢကတီၢ် နီၣ်ဂံၢ်(၁)က၀ီၤဒ့ ကရူၢ်ခိၣ် ဟဲကိး၀ဲသးၦၢ်လီၢ်လံၤတဲ၀ဲလၢအဲၣ်ဒိးဃ့တၢ်မၤစၢၤအိၣ်ဒီးက့ၤကိး၀ဲအဂ့ၢ်န့ၣ် က၀ီၤဒ့(၂)သးၦၢ်လီၢ်လံၤ အူမီၤမီၤညိၣ်အဟံၣ်ဖိဃီဖိတဖၣ် စံး၀ဲန့ၣ်လီၤႉ

“က့ၤကိး၀ဲလၢမၠၣ်၀တံၣ်မၠိၣ်မၣ်ပၢၤကီၢ်၀ဲၤလီၢ်၀ံၤအလီၢ်ခံ တၢ်ဖီၣ်ဒုးဃာ်၀ဲအူမီၤမီၤညိၣ်လီၤႉ ဘၣ်မနုၤအဃိဘၣ်ဟဲဖီၣ်၀ဲလဲၣ်န့ၣ်တသ့ၣ်ညါဒံးဘၣ်အသိး တုၤလၢခဲအံၤတစု တဟ့ၣ်ထံၣ်၀ဲဒီးဟံၣ်ဖိဃီဖိဒံးဘၣ်”အဂ့ၢ်န့ၣ် အဟံၣ်ဖိဃီဖိတဂၤစံး၀ဲန့ၣ်လီၤႉ

မၠၣ်၀တံၣ်၀့ၢ် က၀ီၤဒ့အိၣ်၀ဲ ၅ ခါအကျါ လၢအပူၤကွံာ်သးၦၢ်လီၢ်လံၤ ၄ ဂၤန့ၣ် သုးကီၣ်ဆဲးတူၢ်လိာ်တီၣ်ထီၣ်၀ဲဒီး လီၤဒံး၀ဲမူဒါဘၣ်ဆၣ် မ့မ့ၢ်က၀ီၤဒ့(၂)သးၦၢ်အူမီၤမီၤညိၣ်အံၤ မ့ၢ်ၦၤလၢအဟးထီၣ်တ့ၢ်လၢနီၢ်ကစၢ်တၢ်ဘၣ်သးအသိးတဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲမဟါမုၢ်နၤခီအဆၢကတီၢ် ပၢၤကီၢ်၀ဲၤလီၢ်ကိး၀ဲ မၠၣ်၀တံၣ်၀့ၢ် က၀ီၤဒ့(၅)ခါ က၀ီၤဒ့သးၦၢ် ၅ ဂၤ၀ံၤအလီၢ်ခံ ဖီၣ်၀ဲထဲက၀ီၤဒ့(၂)သးၦၢ်လီၢ်လံၤအူမီၤမီၤညိၣ်တဂၤလီၤအဂ့ၢ်န့ၣ် ၦၤလၢအအိၣ်ဘူးဒီးအဟံၣ်ဖိဃီဖိတဂၤ စံးဘၣ်ခ့ၣ်အဲးစံၣ်န့ၣ်လီၤႉ

ဒ်န့ၣ်အသိး ဖဲမဟါမုၢ်နၤခီအဆၢကတီၢ် ကညီကီၢ်စဲၣ် ကီးတရံး၀့ၢ်ပူၤ တၢ်ဟးဖီၣ်၀ဲဒၣ်သးၦၢ်လီၢ်လံၤလၢအတမၤတၢ်လၢသုးကီၣ်ကးတၢ်ပၢအဖီလာ်တဖၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ