လါအ့့ဖြ့ၣ် ၂၁ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲလါဖ့ၤဘြူၤအါရံၤ ၁ သီအနံၤ သုးမီၤစိရိၤဟံးန့ၢ်ကွံာ်တၢ်စိတၢ်မီၤ၀ံၤအလီၢ်ခံ ယူရပၤဘီမုၢ်စၢဖှိၣ်ကရၢစၢဖှိၣ်(EU)ဖီၣ်ဃံးဟံးအါထီၣ်ပယီၤသုးကီၣ်ကးအရ့အကျါ ပၣ်ဃုာ်၀ဲဒီးသုးကီၣ်ကးကရၢဖိ မါည့မီၣ်အဂ့ၢ်န့ၣ် ဖဲလါအ့ဖြ့ၣ် ၁၉ သီအနံၤ လံာ်တၢ်ဘိးဘၣ်ရၤလီၤပူၤအသိး သ့ၣ်ညါဘၣ်န့ၣ်လီၤႉ
တၢ်ဟံး၀ဲဒၣ်သုးကီၣ်ကးအရ့လၢအ၀ဲသ့ၣ်ပၢ၀ဲလၢအမ့ၢ် ကီၢ်ပယီၤမုၢ်ကျိၤ၀ဲၤကွာ်လံၣ်မံၣ်တဲၣ်(MEHL)ႇ ကီၢ်ပယီၤမုၢ်ကျိၤ၀ဲၤကွာ်ခီၣ်ပ့ရှၢၣ်လံၣ်မံၣ်တဲၣ်ဒီး ၦၤအဂၤ ၁၀ လၢအမၤဘၣ်ထွဲလိာ်သးဒီးသုးမီၤစိရိၤအကျါ ပၣ်ဃုာ်၀ဲဒၣ်ဒီးမါည့မီၣ်န့ၣ်လီၤႉ
ၦၤသ့ၣ်တဖၣ်အံၤ ခီဖျိမၤဟးဂီၤ၀ဲဒၣ်ဒံၣ်မိၣ်ခြ့ၣ်စံၣ်ဒီးသဲစးတၢ်ဒိၣ်စိႇမၤကမၣ်၀ဲဒၣ်ၦၤဂ့ၢ်၀ီခွဲးယာ်ဒိၣ်ဒိၣ်မုၢ်မုၢ်အဃိ ဘၣ်တၢ်ဟံးန့ၢ်အရ့လီၤအဂ့ၢ်န့ၣ် တၢ်ဘိးဘၣ်ရၤလီၤအသိးသ့ၣ်ညါဘၣ်န့ၣ်လီၤႉ ၦၤအဂၤ ၁၀ အံၤ ထံကီၢ်ပၢပြးလၢသုးမီၤစိရိၤဒုးအိၣ်ထီၣ်၀ဲအကျါပၣ်ဃုာ်၀ဲဒၣ်ဒီး မါည့မီၣ်ႇအူသ့ညိၣ်ႇအူခ့ၤမီၤစွ့ၤႇဒီၤအ့နုၣ်စ့ၤႇ Jeng Phang နီၤထီၤႇအူမီဟၤႇဒီၣ်ကထၢၣ် ဘညါအီၤမိ ဒီး အူခၠ့ၣ်နဲၤသ့ၣ်တဖၣ်န့ၣ်လီၤႉ
ကညီတၢ်တိစၢၤမၤစၢၤတၢ်မုာ်တၢ်ခုၣ်ၦာ်ဘျးစဲ -KPSN ၦၤကတိၤတၢ်ပၢ နီၢ်၀ါခုၣ်ရှံ စံး၀ဲလၢ “သုးသ့ၣ်တဖၣ်အတၢ်မၤအၢမၤသီႇတၢ်မၤသံမၤ၀ီဆှုၣ်မဲာ်ကဲၤမဲာ်သ့ၣ်တဖၣ်အံၤ ၦၤလၢအမၤသကိးတၢ်ဒီးသုးတဖၣ်န့ၣ် တၢ်ကဘၣ်ဟံးအရ့လီၤမီၤနီၤႉ ဘၣ်ဆၣ်သနာ်က့လၢၦၤကညီဖိအဂီၢ်ဒု ကဲထီၣ်၀ဲဒၣ်တၢ်လီၤသးအုးလၢပထံၣ်ဘၣ်၀ဲဒၣ်ကညီဖိခိၣ်နၢ်လၢအလဲၤပာ်ဖှိၣ်မၤသကိးတၢ်ဒီးသုးမီၤစိရိၤလီၤႉ ကညီခိၣ်နၢ်လၢအလဲၤပာ်ဖှိၣ်မၤသကိးတၢ်ဒီးပယီၤသုးန့ၣ် တၢ်ကဘၣ်မၤမဲာ်ဆှးအီၤဒီးတၢ်ကဘၣ်ဟံးဂ့ၢ်၀ီခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
သုးကီၣ်ကးကရၢဖိ မါည့မီၣ်အံၤ အပူၤကွံာ်မ့ၢ်၀ဲဒၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ လီၢ်ခၢၣ်သးထီဘိကမံးတံာ်တဂၤန့ၣ်လီၤႉ မါည့မီၣ်အံၤဟးထီၣ်၀ဲဒၣ်လၢခ့ၣ်အဲၣ်ယူၣ်အပူၤဒီး ဖဲအပူၤကွံာ် ၂၀၂၀ တၢ်ဃုထၢအခါ နုာ်လီၤဒိးဃုထၢသးလၢ ကညီကမျၢၢ်ပၣ်တံၣ် -KPP ခၢၣ်စး ပါတနီၣ်ကီၢ်ဆၣ် လၢကမျၢၢ်ဘျီၣ်ဒိၣ်ခၢၣ်စးတဂၤအသိးစ့ၢ်ကီးန့ၣ်လီၤႉ
တကီၢ်ခါဆၢကတီၢ်ခဲအံၤ ယူရပၤဘီမုၢ်စၢဖှိၣ်ကရၢ -EU ဟံးအရ့အိၣ်၀ဲဒၣ်ခဲလၢာ် ၃၅ ဂၤလံဒီး တၢ်တြီတံၢ်ဃာ်အ၀ဲသ့ၣ်တၢ်ဟးထီၣ်က့ၤလီၤအမဲာ်ညါ ယူရပၤအထံဖိကီၢ်ဖိတဖၣ်ဒီးမုၢ်ကျိၤ၀ဲၤကွာ်ခီပနံၣ်ဖးဒိၣ်တဖၣ်အံၤ ကးတံၢ်ဃာ်၀ဲဃုာ်ဒီးအ၀ဲသ့ၣ်ကျိၣ်စ့အတၢ်ဘၣ်ထွဲတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
