လါယူၤ ၃၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ်ပူၤ အပူၤကွံၥ်လါမ့ၤလၢၥ် ဘီကၠိၣ်ထၣ်သဝီဖိလၢပယီၤသုးဖီၣ် ဝဲသ့ၣ် တဖၣ် ခဲအံၤတၢ်ပျၢ်လီၢ်က့ၤဝဲလံဘၣ်ဆၣ် အဝဲသ့ၣ်အံၤအိၣ်လၢသဝီပူၤတဘူၣ်ဟးအိၣ်ဝဲလၢတၢ်လီၢ်အဂၤ အဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
ဘီကၠိၣ်ထၣ်သဝီဖိ(၃၂)ဂၤလၢအပၣ်ဃုၥ်ဝဲပိၥ်မုၣ်ပိၥ်မၢၤဖိဒံဖိသၣ်သ့ၣ်တဖၣ်အံၤ ဖဲအပူၤကွံၥ်လါမ့ၤ ၃၀ သီအခါန့ၣ် ပယီၤသုးကျိၤ လၢအဟဲထီၣ်(စစ်ကူ)လၢကလဲၤထီၣ်ဆူ ဖၣ်ပူၣ်အံၤတဖၣ်ဖီၣ်အဝဲသ့ၣ်ဝံၤ တပျဲဟးထီၣ်ဝဲလၢတၢ်ချၢပၥ်ဃၥ်ဝဲလၢသဝီပူၤန့ၣ်လီၤ.
သဝီဖိတဖၣ်အံၤ တၢ်ဖီၣ်ဃၥ်အီၤတၢ်ဆၢကတီၢ်ဘူးထီၣ်လၢတလါဃၣ်ဃၣ်ဝံၤအပူၤကွံၥ်စှၤသီအခါ လၢဟီၣ်ကဝီၤ သုးခိးကီၢ်ဆၢ (BGF)ခိၣ်နၢ်တဂၤအလဲၤအုၣ်ကီၤဝဲအဃိ ဘၣ်တၢ်ပျၢ်လီၤက့ၤဝဲလံအဂ့ၢ်န့ၣ် လၢ(social media)ပူၤတၢ်ပၥ်ဖျါထီၣ်ဝဲအိၣ်အသိး လီၢ်ကဝီၤဂံၢ်ခီၣ်ထံးပှၤဟ့ၣ်တၢ်ကစီၣ်ဖိစ့ၢ်ကီးစံးဘၣ်ပခ့ၣ်အဲးစံၣ်-ကညီတၢ်ကစီၣ်အိၣ်ဝဲန့ၣ်လီၤ.
ဘၣ်ဃးတၢ်ဂ့ၢ်အံၤ(သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီဘ့ၤ စံးဝဲလၢ“ဒ်သိးပနၢ်ဟူအသိးန့ၣ်ပှၤသဝီဖိလၢတၢ်ဖီၣ်ဃၥ်ဝဲတဖၣ် အံၤတၢ်ပျၢ်လီၤက့ၤဝဲလံ. ပနၢ်ဟူလၢ(BGF)အခိၣ်တဂၤ လဲၤအုၣ်ကီၤဝဲမီၤနီၤ. ပှၤသ့ၣ်တဖၣ်အံၤတၢ်ပျၢ်လီၤက့ၤဝဲဘၣ် ဆၣ်ပယီၤသုးန့ၣ်မၢအတၢ် က့ၤဆီလီၤသးလၢသဝီပူၤဘၣ်ဆၣ်အဝဲသ့ၣ်န့ၣ်ပျံၤတၢ် အိၣ်ဝဲတဘူၣ်ဘၣ် ဟးအိၣ်လၢတၢ်လီၢ် အဂၤပနၢ်ဟူ ဒ်န့ၣ်” အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢကလဲၤထီၣ်(စစ်ကူ)ဆူဖၣ်ပူၣ်အဂီၢ် ပယီၤသုးကျိၤလၢအဟဲထီၣ်တဖၣ်အံၤအကျါပၣ်ဃုၥ်ဝဲ အဝဲသ့ၣ်စုတီၤဖီလၥ် ဟီၣ်ကဝီၤ သုးခိးကီၢ်ဆၢ(BGF) သုးရ့ၣ်(၂)ရ့ၣ်ဒီး ဘူးဒးကညီသုးမုၢ်ဒိၣ်(DKBA)သုးခိၣ်ဘိၤဘံၣ် အသုးရ့ၣ်(၁)ရ့ၣ်အဂ့ၢ်န့ၣ် ပဒိၣ်စီၤထိၣ်ရီဘ့ၤ စံးအါထီၣ်ဝဲန့ၣ်လီၤ.
တကီၢ်ခါခဲအံၤ ပယီၤသုးဟဲထီၣ်တၢ်ဆၢကတီၢ်အိၣ်(၂)လါဃၣ်ဃၣ်လံဘၣ်ဆၣ် လဲၤထီၣ်ဝဲ တတုၤလၢဖၣ်ပူၣ်ဒံးဘၣ် အိၣ်ဒံးဝဲဒၣ် ဖဲကတၢတံၥ်သဝီဆၢခိၣ် နိၣ်ဖီထံသဝီအခိၣ်အဃၢၤန့ၣ်လီၤဒီး တၢ်ဒုးစ့ၢ်ကီးဆဲးကဲထီၣ်ဒံးဝဲဒီး ဟီၣ်ကဝီၤကညီ ဒီကလုၥ်တၢ်ထူၣ်ဖျဲး သုးမုၢ်ဒိၣ်(KNLA)သုးပၥ်ဖှိၣ်အဖၢမုၢ်တုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးပယီၤသုးပၥ်ဖှိၣ်သ့ၣ်တဖၣ်အံၤဖီၣ်ဝဲဒၣ်ဘီကၠိၣ်ထၣ်ကမျၢၢ်သူဝဲဒၣ်ဒ် တၢ်ဒီသဒၢတခါအသိးတကးဒံးဘၣ်အမဲၥ်ညါ ပှၤသဝီဖိတဖၣ်တချုးတၢ်ပျၢ်လီၤဝဲဒံးဘၣ်အခါ (၃၂)ဂၤအကျါန့ၣ် ဘၣ်တၢ်မၤသံဝဲ(၂)ဂၤမ့ၢ်ဝဲပိၥ်ခွါခံဂၤလၢၥ် အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
ကမၤမိၢ်ဒီးကတၢတံၥ်ဘၢၣ်စၢၤ စးထီၣ်လၢပယီၤသုးပၥ်ဖှိၣ်ဟဲထီၣ်ဟူးဂဲၤဒီတကတီၢ်အခါန့ၣ် လုၢ်သ့ၣ်ခါပတၥ်မၤကမၣ်ဝဲ ဟီၣ်ခိၣ်ဒီဘ့ၣ်သုးအကွီၢ်မ့ၣ်အိၣ်ဝဲဒၣ်ဖျိဖျိဖျါဖျါန့ၣ်လီၤ.
အပူၤကွံၥ်လါမ့ၤအခါန့ၣ်စ့ၢ်ကီး ပယီၤသုးကျိၤလၢအဟဲထီၣ်တဖၣ်အံၤဖဲအဝဲသ့ၣ်ဟဲထီၣ်အခါ နုၥ်လီၤဒွဲၣ်အူအီၣ်တ့ၢ်ဒံးဝဲ လ့ဖိထၣ်ကရူၢ်, မဲၤပြံးကရူၢ်(၂)ဘ့ၣ်အံၤအပူၤ ဝၣ်သိထၣ်,မံၤလး(၄၀),လၢၢ်ကွဲဒိၣ်သဝီ ဒီး လၢၢ်ကွဲဖိသဝီသ့ၣ်တဖၣ် အံၤပူၤ ကမျၢၢ်ဟံၣ်အဖျၢၣ်(၁၆၀)ဒံးန့ၣ်လီၤ.
ဒ်န့ၣ်အသိး လၢပယီၤသုးကျိၤအတၢ်ဟဲထီၣ်ဘျီဝဲအံၤစ့ၢ်ကီး ကတၢတံၥ်ကရူၢ်, ကၠီပါကရူၢ်, ဒ့ဝါကရူၢ် ဒီး လ့ဖိထၣ်ကရူၢ်ပူၤ ကမျၢၢ်အဂၤ(၁၀၀၀၀)ဘျဲၣ်ဘၣ်ဃ့ၢ်ထီၣ်တုၤလၢခဲအံၤအါဒၣ်တက့ၢ်က့ၤအိၣ်ဆိးလၢသဝီပူၤတဘူၣ်ဒံးဝဲဘၣ် ဘၣ်ဟးအိၣ်ကဒုဒံး သးလၢတၢ်လီၢ်အဂၤအဖၢမုၢ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
