လါယူၤလံ ၁ သီ, ၂၀၂၆ နံၣ်, ခ့ၣ်အဲးစံၣ်
(စစ်ကူ)ပယီၤသုးကျိၤလၢအဟဲထီၣ်လၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤပူၤတဖၣ်အကျါ သုးဖိသီ(၉)ဂၤလၢအဘၣ်တၢ် ထၢန့ၢ် ဆူၣ်အီၤလၢသုးပူၤအံၤ တူၢ်ဝဲအသုးရ့ၣ်ခိၣ်အတၢ်မၤနၢၤအီၣ်ဃီၣ်တန့ၢ်လၢၤဘၣ်အဃိ ဆဲးသံကွံၥ်ဝဲဝံၤဟဲက့ၤဃ့ၢ်ထီၣ်ဝဲဆူ ဟီၣ်ကဝီၤ(KNLA)အိၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိဒီးသုးဖိသီလၢအဟဲက့ၤဃ့ၢ်ထီၣ်တဖၣ် စံးဝဲအသိးသ့ၣ်ညါ ဘၣ် န့ၣ်လီၤ.
လၢကလဲၤထီၣ်ဆူဖၣ်ပူၣ်တၢ်ဒုးဆူၣ်လီၢ်အံၤအဂီၢ် ပယီၤသုးကျိၤလၢအဟဲထီၣ်တဖၣ်တဆီဘၣ်တဆီ ဖဲအဝဲသ့ၣ်ဟဲထီၣ်ဟူးဂဲၤ တုၤဝဲ ဖဲကတၢတံၥ် နိၣ်ဖီထံသဝီအခိၣ်အဃၢၤအခါဖဲလါယူၤ ၂၃ သီအနံၤ ပယီၤသုးဖိသီတဖၣ်အံၤ ဆဲးသံကွံၥ်ဝဲ အသုးရ့ၣ်ခိၣ် (ခလရ-၁၉)သုးရ့ၣ်ခိၣ်ဝံၤ ဟဲက့ၤဟ့ၣ်လီၤသးဆူ(KNLA)အအိၣ် ၃ ဂၤဒီး မၤကဒီးမုၢ်ဆ့ၣ်ထီၣ်တနံၤ ဟဲက့ၤဃ့ၢ်ထီၣ်ကဒီးဝဲ(၆)ဂၤ ပၥ်ဖှိၣ် ခဲလၢၥ်(၉)ဂၤဘၣ်ဟဲအိၣ်ထီၣ် ဝဲဒ်အံၤန့ၣ်လီၤ
ဘၣ်ဃးသုးဖိသီမၤသံကွံၥ်သုးရ့ၣ်ခိၣ်ဝံၤဟဲက့ၤဃ့ၢ်ထီၣ်ဆူ(KNLA)အအိၣ်တၢ်ဂ့ၢ်အံၤန့ၣ် တၢ်ပၢၢ်ဆၢကရူၢ် အပှၤလၢအိၣ် တၢ်မဲၥ် ညါတဂၤစံးဝဲလၢ “ဒ်သိးယသ့ၣ်ညါထွဲန့ၣ်ကဘၣ်ဖဲ(၂၃)သီအခါန့ၣ် အဝဲသ့ၣ်ဃ့ၢ်ထီၣ်(၃)ဂၤဘျီဟဲက့ၤ ဃ့ၢ်ထီၣ်လၢပအိၣ်. မ့ဝံၤလၢ လီၢ်ခံတနံၤဘျီဟဲက့ၤကဒီး(၆)ဂၤ ခဲလၢၥ်(၉)ဂၤမီၤနီၤ. အဝဲသ့ၣ်န့ၣ်ပဆှၢထီၣ်အီၤလၢ(သုးက့)အအိၣ်လီၤ.အဝဲသ့ၣ်န့ၣ် အဲၣ် ဒိးက့ၤ ပၢၢ်ဆၢကဒါတၢ်အဃိ အသးဆူၣ်လၢ(PDF)တကပၤဒီးပကွၢ်လၢအဝဲသ့ၣ်ဘၣ်သးဝံၤ ပပျဲက့ၤအီၤလၢန့ၣ် တကပၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
လၢန့ၣ်အမဲၥ်ညါသုးဖိသီတဖၣ်အံၤဖဲအဝဲသ့ၣ်အိၣ်လၢသုးကျါအခါန့ၣ် ဘၣ်တၢ်ဖီၣ်ဃံးအဝဲသ့ၣ်လၢကျဲအကလုၥ်ကလုၥ်အဃိ ပှၤအိၣ်ဒံးဝဲအါမးလၢကဃ့ၢ်ဖျိးထီၣ်အဂ့ၢ်န့ၣ် အဝဲစံးအါထီၣ်ဝဲန့ၣ်လီၤ.
“အဝဲသ့ၣ်န့ၣ်အဲၣ်ဒိးဟဲက့ၤဃ့ၢ်ထီၣ်အိၣ်အါမးဒံးဘၣ်ဆၣ်လၢတၢ်ကိပူၤန့ၣ်ပှၤဖီၣ်ဃံးအဝဲသ့ၣ်.အဝဲသ့ၣ်န့ၣ်ပှၤဟ့ၣ်လီၤဖီၣ်အီၤကျိဖဲ အဟဲထီၣ်တၢ်တနံၤအံၤအဆၢကတီၢ်လီၤ.တုၤလၢအက့ၤအိၣ်ဘှံးလၢတၢ်လီၢ်ခံန့ၣ်ပှၤတဒုးဖီၣ်အီၤကျိဘၣ်. မ့ဘၣ်ကွၢ်ဒ်သိးသုး ဖိသီ တဂၤတဲဝဲအသိးန့ၣ်ဖဲအဝဲသ့ၣ်ဟဲထီၣ်လၢကျဲအခါန့ၣ်ခးသံကွံၥ်ဝဲ အသုးခိၣ်တဂၤခံဂၤဒံး.အသုးရ့ၣ်ခိၣ်န့ၣ် ဖီၣ်တၢ်ဃံးတလၢ မီၤ. အဃိပှၤလၢအအိၣ်တ့ၢ်ဒံးတဖၣ်န့ၣ်အဘၣ်သးဃ့ၢ်ထီၣ်န့ၣ်အိၣ်ဒီဒူၣ်လီၤ”အဂ့ၢ်န့ၣ် စံးအါထီၣ်ဝဲန့ၣ်လီၤ.
လၢတၢ်ဂီၤမူအတၢ်ပၥ်ဖျါအပူၤ ဒ်သုးဖိသီလၢအဟဲက့ၤဃ့ၢ်ထီၣ်တဖၣ်စံးဝဲအသိးန့ၣ် သုးကျိၤလၢအဟဲထီၣ်ဟူးဂဲၤဘျီဝဲအံၤတဖၣ် အါဒၣ်တက့ၢ်မ့ၢ်ဝဲသုးဖိသီဘၣ်တၢ်ဖီၣ်န့ၢ်ဆူၣ်အီၤလၢသုးကျါဝံၤ တၢ်ဆှၢထီၣ်အဝဲသ့ၣ်တဆီဘၣ်တဆီ တုၤဃီၤဝဲဒၣ်လၢ တၢ်ဒုးထီၣ် အဝဲသ့ၣ်သုးတၢ်မၤလိဝံၤတၢ်ဆၢထီၣ်ဝဲဆူ(သုးက့ ၅)ဟီၣ်ကဝီၤပူၤအံၤန့ၣ်လီၤ.
ဒ်န့ၣ်အသိးဘၣ်ဃးလၢသုးဖိသီအတၢ်ဟဲက့ၤဃ့ၢ်ထီၣ်အံၤ ဖဲတၢ်ပၢၢ်ဆၢသုးကရူၢ် မၤဝဲတၢ်သံဒိးသံကွၢ်ဒီးသုးဖိသီတဂၤအခါ စံးဝဲလၢ “သုးရ့ၣ်ခိၣ်လၢအသံတဂၤန့ၣ်မၤနၢၤအီၣ်ပှၤသုးဖိလၢတၢ်ဖီလၥ်တဖၣ်.ဖဲပအိၣ်(၂၆)ဂၤလၢၥ်အံၤန့ၣ်ပတူၢ်အဝဲတကဲနီ တဂၤဘၣ်. လီၢ်ခံပတူၢ်တန့ၢ်လၢၤဘၣ်အဃိပဆဲးသံကွံၥ်အီၤဒီးပဃ့ၢ်ထီၣ်လီၤ.ယအဲၣ်ဒိးဆီၣ်တခူထီၣ်ယဲလၢပှၤလၢအအိၣ်တ့ၢ်ဒံးဖဲန့ၣ်တဖၣ်ကဟဲက့ၤပၥ်ဖှိၣ်မၤသကိးတၢ်ဒီးပှၤ”အဂ့ၢ်န့ၣ် စံးဝဲန့ၣ်လီၤ.
ပယီၤသုးကျိၤလၢအဟဲထီၣ်(စစ်ကူ)ဖဲသုးက့ ၅ ပူၤတဖၣ်ဟဲလၢကျဲဒီတကျိၤအခါန့ၣ် သုးဖိသီလၢအဘၣ်တၢ်ဖီၣ်ဆူၣ် ဝဲ တဖၣ် ဂုၥ်ကျဲးစၢးဃ့ၢ်ဖျိးထီၣ်ဝဲအိၣ်အသိး ပှၤလၢအဃ့ၢ်ထီၣ်အဖၢမုၢ်ဟဲတတုၤဒံးလၢတၢ်ပၢၢ်ဆၢကရူၢ်ကရၢ အအိၣ်ဒံးဘၣ်စ့ၢ်ကီး အိၣ်ဒံးဝဲ အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ပယီၤတဖၣ်အံၤ စးထီၣ်လၢလါမ့ၤထီၣ် အဝဲသ့ၣ်ဟဲထီၣ်လၢကျဲဒီတကျိၤအခါန့ၣ် ကမျၢၢ်သံဘၣ်ဒိဘၣ်ထံး ဘၣ်ဃ့ၢ်ထီၣ်ဝဲအိၣ် အါအါဂီၢ်ဂီၢ်အသိး ဒွဲၣ်အူအီၣ်ကမျၢၢ်အဟံၣ်အဃီ, ဖီၣ်ဃၥ်ကမျၢၢ်လၢအတၢ်ကမၣ်တအိၣ်ဘၣ် လုၢ်သ့ၣ်ခါပတၥ်ဝဲဟီၣ်ခိၣ်ဒီဘ့ၣ် သုးအကွီၢ်မ့ၣ်အကလုၥ်ကလုၥ်န့ၣ်လီၤ.
ဒ်န့ၣ်အသိးကတၢတံၥ်ဟီၣ်ကဝီၤလၢပယီၤသုးဖိသီဃ့ၢ်ထီၣ်ဝဲအံၤန့ၣ် ဖဲမဟါလါယူၤ ၃၀ သီ စးထီၣ်လၢဂီၤခီတုၤ လၢမုၢ်ထူၣ် ဃၣ်ဃၣ်တစု လၢဖယါကိဒီးတီသူကျါသဝီအခိၣ်အဃၢၤန့ၣ် တၢ်ဒုးကဲထီၣ်ဝဲဒိၣ်ဒိၣ်မုၢ်မုၢ် လၢပယီၤသုးဒီးဟီၣ်ကဝီၤ တၢ်ပၢၢ်ဆၢ သုးပၥ်ဖှိၣ်ကရူၢ်အဘၢၣ်စၢၤတၢ်ဆၢကတီၢ်တံၥ်တၥ်ဝဲလၢ(၄)နၣ်ရံၣ်ဃၣ်ဃၣ်ညါန့ၣ်လီၤ.
ဒီးလၢခံခီခံကပၤတၢ်ဒုးဘျီဝဲအံၤအပူၤစ့ၢ်ကီး ပယီၤသုးတကပၤသံဘၣ်ဒိဘၣ်ထံးဝဲအိၣ်ဘၣ်ဆၣ် လီၤတံၢ်လီၤဆဲးခီန့ၣ် မၤလီၤတံၢ်ဝဲတန့ၢ်ဒံးဘၣ်အဂ့ၢ်န့ၣ် (KNLA)အပှၤတဂၤဃီဝဲန့ၣ် စံးအါထီၣ်ဝဲန့ၣ်လီၤ.
သုးမီၤစိရိၤအံၤစးထီၣ်အဝဲသ့ၣ်ဒုးအိၣ်ထီၣ်တၢ်ကဘၣ်ကဲသုးတၢ်သိၣ်တၢ်သီအံၤဝံၤလီၢ်ခံ ဖီၣ်ဆူၣ်ဝဲကမျၢၢ်သူၣ်ဘီၣ်သးစၢ် ဒုးထီၣ် ဝဲဂံၢ်ခီၣ်ထံးသုးတၢ်မၤလိဝံၤ ဆှၢထီၣ်ဝဲဆူတၢ်မဲၥ်ညါတၢ်ဒုးဆူၣ်လီၢ်အဃိ လီၢ်ခံအံၤသုးဖိသီလၢအဘၣ်တၢ်ထၢဆူၣ်ဝဲတဖၣ် ဃ့ၢ်ဖျိး ထီၣ်ဟဲက့ၤဟ့ၣ်လီၤသးဆူဟီၣ်ကဝီၤဖီၣ်စုကဝဲၤတၢ်ပၢၢ်ဆၢကရူၢ်ကရၢအအိၣ် ဟဲအါထီၣ်ဝဲဖျိဖျိဖျါဖျါန့ၣ်လီၤ.
