လါအ့ဖြ့ၣ် ၁၉ သီႇ ၂၀၂၁ နံၣ်ႇ ခ့ၣ်အဲးစံၣ်
ကီၢ်စၢဖှိၣ်ဘျီၣ်ဒိၣ်ခၢၣ်စးကမံးတံာ်(CRPH)အတၢ်ဖံးတၢ်မၤဒီး တၢ်ထီဒါသုးမီၤစိရိၤ CDM န)တၢ်ဟူးတၢ်ဂဲၤတဖၣ်အံၤ တူၢ်လိာ်၀ဲအဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ထုးထီၣ်ပာ်ဖျါလံာ်တၢ်ပာ်သး ဖဲလါအ့ဖြ့ၣ် ၁၇ သီအနံၤန့ၣ်လီၤႉ
CRPH အတၢ်ဟူးတၢ်ဂဲၤဒီးအတၢ်ထုးထီၣ်ပာ်ဖျါလံာ်တၢ်ပာ်သးတဖၣ်အံၤ ခီဖျိ ပညိၣ်ဃီၤဆူဖဲၣ်ဒရၢၣ်ကီၢ်စၢဖှိၣ်အမ့ၢ်အတီလၢအထုးဖှိၣ်ထီၣ်သးဒီးကီၢ်စဲၣ်ခဲလၢာ်အဃိ မုၢ်တြီၢ်ကီၢ်ရ့ၣ်(သုးက့ ၅)တူၢ်လိာ်သဂၢၢ်၀ဲအသိး တူၢ်လိာ်ဟ့ၣ်ဂံၢ်ဟ့ၣ်ဘါ၀ဲ ကီၢ်ပူၤကမျၢၢ်ထံဖိကီၢ်ဖိသူၣ်ဘီၣ်သးစၢ်တဖၣ်ဒီး(CDM)တၢ်ဟူးတၢ်ဂဲၤတဖၣ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါ ကမျၢၢ်လၢအတအိၣ်ဒီးတၢ်စုက၀ဲၤတဖၣ်ႇ သးစၢ်ကၠိဖိတဖၣ်ဒီး သီဘူၣ်သီခါသ့ၣ်တဖၣ် ပာ်ဖျါထီၣ်သးဒီးဃ့ထီၣ်၀ဲတၢ်သ့ၣ်တဖၣ်အံၤ ပယီၤသုးကီၣ်ကးကရူၢ်ကွၢ်ကပာ်၀ဲဒၣ်ဒီး သုးမီၤစိရိၤသုးကီၣ်ကးမၤလီၢ်မုၢ်ပြံပြါခးလီၤကျိဖးဒိၣ်ႇကျိဖိတဖၣ်အၢအၢသီသီအဖီခိၣ် ပဲာ်အၢပာ်သီ၀ဲတဲာ်တဲာ်ဖျုဖျုအဂ့ၢ်န့ၣ် မုၢ်တြီၢ်ကီၢ်ရ့ၣ်(သုးက့ ၅)စံး၀ဲန့ၣ်လီၤႉ
သုးကီၣ်ကးအံၤ ဟံးဆူၣ်ကွံာ်၀ဲထံကီၢ်တၢ်စိတၢ်ကမီၤလၢအတဖိးသဲစးဘၣ်ဒီး ဖီၣ်ဃာ်၀ဲဒၣ် ဒီၣ်အီၣ်ဆါဆူးကၠံၣ်ဃုာ်ဒီးကီၢ်ခိၣ်အူ၀့မၠ့ၣ်ဒီးခိၣ်နၢ်အဂၤတဖၣ်ႇၦၤဟူးဂဲၤတၢ်တဖၣ် အိၣ်လံ၀ဲဒၣ်ခံလါဘျဲၣ်သၢလါဃၣ်ဃၣ်လံဘၣ်ဆၣ် ဘီမုၢ်စၢဖှိၣ်ကရၢဃုာ်ဒီးထံဂုၤကီၢ်ရၤတၢ်ကရိကရၢတဖၣ် တတူၢ်လိာ်ပာ်ပနီၣ်၀ဲဒၣ်သုးမီၤစိရိၤလၢအမ့ၢ်ပဒိၣ်လၢအဖိးသဲစးဘၣ်အသိး အ၀ဲသ့ၣ်စ့ၢ်ကီး လ့ၤတက့ၤတတူၢ်လိာ်ပာ်ပနီၣ်သုးကီၣ်ကးကရူၢ်လၢထံကီၢ်ခိၣ်နၢ်ဘၣ်အဂ့ၢ်န့ၣ် မုၢ်တြီၢ်ကီၢ်ရ့ၣ်(သုးက့ ၅)ထုးထီၣ်ပာ်ဖျါ၀ဲန့ၣ်လီၤႉ
တမ့ၢ်ထဲလၢတသ့ၣ်ညါပာ်ပနီၣ်သုးမီၤစိရိၤကရူၢ်လၢထံကီၢ်ခိၣ်နၢ်တကးဘၣ် ဒ်သိးသုးမီၤစိရိၤသနူကကတၢၢ်ကွံာ်အဂီၢ် မုၢ်တြီၢ်ကီၢ်ရ့ၣ် ကပာ်ဖှိၣ်မၤသကိးတၢ်ဒီးထံဖိကီၢ်ဖိကမျၢၢ်ဒီး ဒ်သိးမီၤစိရိၤသုးအဂံၢ်ကတဲာ်ကွံာ်အဂီၢ် ကဂုာ်ကျဲးစၢး၀ဲထီဘိလီၤအဂ့ၢ်န့ၣ် စံး၀ဲန့ၣ်လီၤႉ
မုၢ်တြီၢ်ဟီၣ်က၀ီၤအပူၤ သုးကီၣ်ကးအရူၢ်လၢအဟံးဆူၣ်ကွံာ်ထံကီၢ်တၢ်စိတၢ်ကမီၤအံၤ ပၢပြးတၢ်လဲၤတရံးသးအကျိၤအကျဲတဖၣ်လၢအပာ်လီၤ၀ဲ ကီၢ်ဆၣ်ႇက၀ီၤဒ့ဒီးဒူသ၀ီသးၦၢ်တဖၣ်အံၤ ကမျၢၢ်ထံဖိကီၢ်ဖိတဖၣ်လ့ၤတက့ၤတဘၣ်တူၢ်လိာ်ဟ့ၣ်ဂံၢ်ဟ့ၣ်ဘါပာ်ဖှိၣ်မၤသကိးတၢ်ဘၣ်ဒီး မ့ၢ်တူၢ်လိာ် CRPH အတၢ်ဟူးတၢ်ဂဲၤႇကီၢ်ပူၤကမျၢၢ်ထံဖိကီၢ်ဖိႇသးစၢ်ကၠိဖိတဖၣ်ဒီး သီခါ(CDM)အတၢ်ဟူးတၢ်ဂဲၤဒီး တၢ်ပာ်ဖျါထီၣ်တၢ်ဘၣ်သးထီဒါသုးမီၤစိရိၤန့ၣ် ပာ်ဖှိၣ်မၤသကိးဒီးမုၢ်တြီၢ်ကီၢ်ရ့ၣ်အဂ့ၢ်န့ၣ် မုၢ်တြီၢ်ကီၢ်ရ့ၣ်(သုးက့ ၅)ဆီၣ်တခူထီၣ်၀ဲန့ၣ်လီၤႉ
လၢန့ၣ်အမဲာ်ညါ ခီဖျိတတူၢ်လိာ်သုးကီၣ်ကးတၢ်ပၢတၢ်ပြးဘၣ်အဃိ မ့ၢ်ဘၣ်သဂၢၢ်ဒီးသးသမူတၢ်ဘၣ်ယိၣ်န့ၣ် တၢ်လၢအလိၣ်တဖၣ်ကဂုာ်ကျဲးစၢၤမၤစၢၤ၀ဲလၢအဂ့ၤကတၢၢ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်(သုးက့ ၅)ထုးထီၣ်ပာ်ဖျါ၀ဲန့ၣ်လီၤႉ
