လါမ့ၤ ၂၅ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် မၠၣ်၀တံၣ်၀့ၢ်ပူၤ စးထီၣ်ဖဲမဟါ(လါမ့ၤ ၂၄)သီအနံၤ ၂၀၂၁=၂၀၂၂ နံၣ်တၢ်သိၣ်လိနံၣ်အဂီၢ်် တၢ်စးထီၣ်ဆဲးလီၤ၀ဲဒၣ်ကၠိဖိအမံၤလံဒီး ဖဲမဟါတၢ်စးထီၣ်ဆဲးလီၤကၠိဖိအမံၤတၢတသီန့ၣ် ၦၤဟဲဆဲးလီၤကၠိဖိမံၤအနီၣ်ဂံၢ်စှၤန့ၢ်အပူၤကွံာ်နံၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးမီၤစိရိၤတိာ်ဃာ်၀ဲလၢကီၢ်ပယီၤဒီတဘ့ၣ်အပူၤ ကက့ၤအိးထီၣ်ကဒါကၠိ ဖဲလါယူၤ ၁ သီအနံၤဒီး မ့မ့ၢ်တၢ်တူၢ်လိာ်ကၠိဖိအမံၤန့ၣ်ပာ်ပနီၣ်၀ဲစးထီၣ် ဖဲလါမ့ၤ ၂၄ သီ တုၤလၢ လါမ့ၤ ၃၁ သီအနံၤန့ၣ်လီၤႉ
ဒ်တၢ်ပာ်ပနီၣ်ဃာ်၀ဲအသိး မၠၣ်၀တံၣ်ကီၢ်ဆၣ်အပူၤ တၢ်စးထီၣ်ဆဲးလီၤကၠိဖိမံၤလံဒီး အပူၤကွံာ်တၢ် သိၣ်လိနံၣ်တဖၣ် ကၠိဖိနီၣ်ဂံၢ် ၂ ကထိဘျဲၣ်ဃၣ်ဃၣ်လၢအလဲၤမၤလိတၢ်လၢ နီၣ်ဂံၢ်(၃)က၀ီၤဒ့ အထက(၂)ကၠိအံၤဒီး အထက အဒ့(၃)ကၠိတဖၣ် ဖဲမဟါ(လါမ့ၤ ၂၄)သီတၢ်ဆဲးလီၤကၠိဖိအမံၤတၢတသီအနံၤ တၢ်ဟဲဆဲးလီၤကၠိဖိမံၤအိၣ်ထဲအဆံလီၤအဂ့ၢ်န့ၣ် အထက(၂)သရၣ်ကၠိခိၣ် အူမိကၠီၤ စံး၀ဲန့ၣ်လီၤႉ
တနံၣ်ညါအံၤ ခီဖျိထံကီၢ်တၢ်အိၣ်သးတဂၢၢ်တကျၢၤဘၣ်အဃိ ကၠိဖိမိၢ်ပၢ်တဖၣ်တၢ်ဘၣ်ယိၣ်ဘၣ်ဘှီအိၣ်၀ဲဒၣ်ဒီး ဒ်သိးတၢ်ဘၣ်ယိၣ်ဘၣ်ဘှီသုတအိၣ်တဂ့ၤအဂီၢ် တၢ်ပာ်လီၤတၢ်ဘံၣ်တၢ်ဘၢလၢကၠိပူၤဃံာ်ဃီၣ်ဒီၣ်အသိး လၢတၢ်ကဒီတဒၢဆိဃာ်ခိ၀ံၣ်တၢ်ဆါတၢ်ရဲၣ်တၢ်ကျဲၤအဂီၢ်စ့ၢ်ကီး တၢ်မၤဃာ်၀ဲဒၣ်အဂ့ၢ်န့ၣ် အထက(၂)သရၣ်ကၠိခိၣ် အူမိကၠီၤ စံးအါထီၣ်၀ဲန့ၣ်လီၤႉ
မၠၣ်၀တံၣ်၀့ၢ်ပူၤကၠိတဖၣ်အပူၤ ပၢပြးကရူၢ်တဖၣ်အမဲာ်ညါ သုးမီၤစိရိၤသုးဒီးပၢၤကီၢ်သုးတဖၣ် ပာ်လီၤ၀ဲ တၢ်ဘံၣ်တၢ်ဘၢလၢက၀ီၤဒ့စုာ်စုာ်အပူၤအိၣ်၀ဲဘၣ်ဆၣ် ဒ်တကီၢ်ခါထံရူၢ်ကီၢ်သဲးတၢ်အိၣ်သးအသိး ကၠိဖိမိၢ်ပၢ်တဖၣ်ဘၣ်ယိၣ်၀ဲလၢတၢ်ကကဲထီၣ်သးတမံၤမံၤန့ၣ်လီၤႉ
“တၢ်အိၣ်သးဆၢကတီၢ်ခဲအံၤ ထံကီၢ်တၢ်အိၣ်သးစ့ၢ်ကီးတဂၢၢ်တကျၢၤဒံးဘၣ်ႉ မ့ၣ်ပိၢ်စ့ၢ်ကီး ပိၢ်ဖးထီၣ်လၢတၢ်လီၢ်အါတီၤအပူၤအဃိ လၢဖိလံၤအဂီၢ်တမ့ၢ်လၢသးကခုၣ်၀ဲဘၣ်ႉ တၢ်အဃိန့ၣ် တနံၣ်ညါအံၤကအိၣ်ခိးကွၢ်တၢ်အိၣ်သးဒီး ထံကီၢ်မ့ဂၢၢ်ကျၢၤထီၣ်မးကက့ၤပာ်ကဒါလၢကၠိလီၤ” အဂ့ၢ်န့ၣ် ကၠိဖိမိၢ်ပၢ်လၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ
ကညီကီၢ်စဲၣ် မၠၣ်၀တံၣ်၀့ၢ်ပူၤ တီၤထီကၠိအိၣ်၀ဲ ၈ ဖျၢၣ်ႇ သီခါဖၠၣ်ကၠိအိၣ်၀ဲ ၅ ဖျၢၣ်ႇ နီၢ်ကစၢ်ကၠိအိၣ်၀ဲ ၂ ဖျၢၣ် ဒီး ကၠိပာ်ဖှိၣ်ခဲလၢာ်အိၣ်၀ဲ ၁၀၉ ဖျၢၣ်န့ၣ်လီၤႉ ဖဲမဟါတၢ်မၤ၀ဲတၢ်ဆဲးလီၤကၠိဖိမံၤဘၣ်ဆၣ် ဖဲန့ၣ်အကျါ ကလုာ်ဒူၣ်ဖီၣ်စုက၀ဲၤဟီၣ်က၀ီၤပူၤ ကၠိခဲလၢာ်အိၣ်၀ဲ ၁၅ ဖျၢၣ်ဒီး တနံၣ်အံၤ ၂၀၂၁=၂၀၂၂ တၢ်သိၣ်လိနံၣ်အဂီၢ် တၢ်အိၣ်သးတအိၣ်လၢတၢ်ကဆဲးလီၤကၠိဖိမံၤဒီးတၢ်ကက့ၤအိးထီၣ်ကဒါကၠိဘၣ်န့ၣ်လီၤႉ
