လါမ့ၤ ၁၄ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲမဟါ(လါမ့ၤ ၁၃)သီ ဟါခီ ၉ နၣ်ရံၣ်ဘျဲၣ်အဆၢကတီၢ် မ့ၣ်ပိၢ်ပိၢ်ဖးထီၣ်လၢ ကညီကီၢ်စဲၣ် လူၢ်ပျဲၢ်ကမျၢၢ်တၢ်ဆါကရၢၢ်ပူၤတခါတဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
မ့ၣ်ပိၢ်ပိၢ်ဖးထီၣ်အံၤ တၢ်တယးကွၢ်၀ဲလၢအမ့ၢ်မ့ၣ်ပိၢ်လၢတၢ်တ့န့ၢ်လၢစုဒီး ခီဖျိမ့ၣ်ပိၢ်ပိၢ်ဖးထီၣ်အဃိ တၢ်ဘၣ်ဒိဘၣ်ထံးတအိၣ်၀ဲဒၣ်ဘၣ်ဆၣ် တၢ်ဆါဟံၣ်ပဲတြီအယွၤတနီၤဟးဂီၤ၀ဲဒၣ်အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ
“မ့ၢ်မတဂၤဟဲမၤ၀ဲလဲၣ်န့ၣ်တသ့ၣ်ညါဘၣ်ႉ တၢ်ကဲထီၣ်န့ၣ်လၢတၢ်ကဆါဟံၣ်ကရၢၢ်ပူၤလီၤႉ ကမ့ၢ်၀ဲဒၣ်မ့ၣ်ပိၢ်လၢတၢ်တ့န့ၢ်လၢစုလီၤႉ ပိၢ်ဖးထီၣ်၀ဲလၢမုၢ်နၤခီအဃိ တၢ်တဟ့ၣ်ခီ၀ဲလူၢ်ပျဲၢ်တိၤလၢၤဘၣ်ႉ လၢအကပိၤကပၤစ့ၢ်ကီးတၢ်တဟ့ၣ်လဲၤကွၢ်၀ဲဘၣ်ႉ တၢ်ဘၣ်ဒိဘၣ်ထံးဒုတအိၣ်ဘၣ်ႇတၢ်ဆါဟံၣ်အယွၤတနီၤသ့ၣ်ဖး၀ဲလီၤ” အဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ် စံးဘၣ် ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ
မ့ၣ်ပိၢ်ပိၢ်ဖးထီၣ်၀ံၤအလီၢ်ခံ တၢ်ဆါဟံၣ်အခိၣ်အဃၢၤန့ၣ် တၢ်ဆီလီၤ၀ဲတၢ်ဘံၣ်တၢ်ဘၢဟဲအါထီၣ်ဒီး ဖဲမဟါမုၢ်နၤခီ ခၠီကူတိၤလၢကနုာ်လီၤလူၢ်ပျဲၢ်အံၤ တၢ်ကးတံၢ်ဃာ်၀ဲတၢ်လဲၤထီၣ်က့ၤလီၤဒီး ဖဲတနံၤညါအံၤဂီၤခီအဆၢကတီၢ် တၢ်ပျဲကဒါတၢ်လဲၤထီၣ်က့ၤလီၤအခွဲးလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲအပူၤကွံာ် လါမ့ၤ ၄ သီအနံၤစ့ၢ်ကီး လူၢ်ပျဲၢ်၀့ၢ် ကူၣ်သ့ခိၣ်၀ဲၤဒၢးအကပၤ မ့ၣ်ပိၢ်ပိၢ်ဖးကဲထီၣ်သးဒ်အံၤအိၣ်စ့ၢ်ကီး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
