Home တၢ်ကစီၣ် တကီၢ်ခါတၢ်ခးလိာ်သးကဲထီၣ်အဖီခိၣ် ကညီဖီၣ်စုက၀ဲၤကဒဲကဒဲကထံၣ်လိာ်တဲသကိးတၢ်

တကီၢ်ခါတၢ်ခးလိာ်သးကဲထီၣ်အဖီခိၣ် ကညီဖီၣ်စုက၀ဲၤကဒဲကဒဲကထံၣ်လိာ်တဲသကိးတၢ်

958
0

လါယူၤ ၁၄ သီႇ ၂၀၂၁ နံၣ်ႇ ခ့ၣ်အဲးစံၣ်

ဘၣ်ထွဲဒီးတၢ်ဒုးကဲထီၣ်လၢကညီဖီၣ်စုက၀ဲၤကဒဲကဒဲအဘၢၣ်စၢၤတၢ်ဂ့ၢ်တဖၣ်အံၤ လၢကဟခဲမုၢ်ဆ့ၣ်(လါယူၤ ၁၅)သီအနံၤ ကညီဖီၣ်စုက၀ဲၤခိၣ်နၢ်ဒိၣ်ထီတဖၣ်ကမၤ၀ဲဒၣ်တၢ်ထံၣ်လိာ်တၢၣ်ပီၣ်တဲသကိးတခါဖဲ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢဟီၣ်က၀ီၤတၢ်လီၢ်တတီၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်အိၣ်ဖှိၣ်အ၀ဲအံၤ တၢ်ရိၣ်ဖှိၣ်ဃူဖိးကညီဖီၣ်စုက၀ဲၤကမံးတံာ်တီခိၣ်ရိၣ်မဲ၀ဲဒီး ကွဲမုာ်၀ဲဒၣ်ကညီတၢ်ထူၣ်ဖျဲးသုးမုၢ်ဒိၣ် -KNLA˜ ကညီသုးခိးကီၢ်ဆၢ(BGF)ႇ တၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီသုးမုၢ်ဒိၣ်(DKBA)ဒီး KNU/KNLA-PC သုးခိၣ်နၢ်ဒိၣ်ထီတဖၣ်အဂ့ၢ်န့ၣ် ကမံးတံာ်လံာ်ကွဲမုာ်အပူၤ ပာ်ဖျါ၀ဲန့ၣ်လီၤႉ

ဘၣ်ထွဲဒီးတၢ်ဂ့ၢ်အံၤ ဃူဖိးကမံးတံာ်အနဲၣ်ရွဲၣ် ပဒိၣ်စီၤအီၣ်မီၢ်အ့ စံး၀ဲလၢ “ခဲအံၤပ၀ဲကညီဖီၣ်စုက၀ဲၤဒီးပ(KNLA)တဖၣ်အဘၢၣ်စၢၤ တၢ်ဘၣ်ဂံာ်ဂူာ်ဟဲအိၣ်ထီၣ်ဒီး တၢ်သံတၢ်ၦၢ်ဟဲအိၣ်ထီၣ်ဒ်အံၤအဖီခိၣ် ပမ့ၢ်တအိၣ်ဖှိၣ်တၢၣ်ပီၣ်တဲသကိးတခါခါဒီး အပတီၢ်မ့ၢ်ထီထီၣ်ခီဒုတဂ့ၤလၢပၦၤကညီဖိအဂီၢ်ဘၣ်မီၤနီၤႉ ခီဖျိလၢတၢ်ဘၣ်ဂံာ်ဂူာ်အိၣ်ထီၣ်လၢ (BGF)ဒီး KNLA သုးက့ ၅ႇသုးက့ ၁ႇသုးက့ ၃ ဒီး သုးက့ ၆ တၢ်ဂ့ၢ်အဖီခိၣ် အလီၢ်အိၣ်လၢပကဘၣ်ထံၣ်လိာ်သးဒီးတၢ်ဂ့ၢ်ကိၢ်ကိၢ်ဂီၤဂီၤလၢအဟဲကဲထီၣ်သးခဲအံၤန့ၣ် ပကဘၣ်ဘှၣ်ရှဲလီၤဒ်လဲၣ်န့ၣ်မ့ၢ်တၢ်ကိး၀ဲဒၣ်တၢ်အိၣ်ဖှိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဖီၣ်စုက၀ဲၤကရူၢ်ကရၢတၢ်အိၣ်ဖှိၣ်အံၤ KNLA တီခိၣ်ရိၣ်မဲ၀ဲဒီး ကွဲမုာ်၀ဲဒၣ် KNU/KNLA-PC တကပၤ သုးခိၣ်ကျၢၢ်ဒိၣ်စိ စီၤထီၣ်လ့ႇ သုးခိးကီၢ်ဆၢ(BGF) သုးခိၣ်ဒိၣ်စိ စီၤခၠ့ၣ်သူၤ ဒီး DKBA တကပၤန့ၣ် သုးခိၣ်ကျၢၢ်ဒိၣ်စိ စီၤမိၤရှ့တကးဘၣ်အမဲာ်ညါ ၦၤလၢအိၣ်ဒီးလီၢ်လးလၢအဆၢတဲာ်တၢ်သ့ဃုာ်ဒီး ၦၤဟ့ၣ်ကူၣ်တၢ်ဂ့ၤတဖၣ်န့ၣ်လီၤႉ

စးထီၣ်ဖဲ(လါဖ့ၤဘြူၤအါရံၤ ၁)သီ သုးမီၤစိရိၤဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ ကညီဒီကလုာ်စၢဖှိၣ်ကရၢ -KNU သုးက့(၅)ႇသုးက့(၁)ဒီးသုးက့(၃)ဟီၣ်က၀ီၤတဖၣ်အပူၤ သုးမီၤစိရိၤအသုးဒီး KNLA သုးကရူၢ်တဖၣ်အဘၢၣ်စၢၤ တၢ်ဒုးကဲထီၣ်အိၣ်၀ဲအဘျီလၢအကယၤညါအသိး တၢ်ခးလိာ်သးကဲထီၣ်စ့ၢ်ကီးဒီး(BGF)သုးတဖၣ်ဒီး ဖဲန့ၣ်(BGF)အၦၤသံ၀ဲအါအါဂီၢ်ဂီၢ်ဟဲအိၣ်ထီၣ်၀ဲန့ၣ်လီၤႉ

ဒ်န့ၣ်အသိး ဖဲတလါအံၤလါယူၤထီၣ်သီအခါစ့ၢ်ကီး KNU သုးက့(၆)တၢ်ပၢဟီၣ်က၀ီၤအပူၤ (DKBA)ထုးဖးသးကရူၢ်ဒီး သုးကီၣ်ကးႇ BGF သုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်၀ဲဒၣ်ဒိၣ်ဒိၣ်မုၢ်မုၢ်ဒီး တၢ်ဒုးဘျီ၀ဲန့ၣ်အပူၤ BGF အၦၤသုးဖိသံအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ရိၣ်ဖှိၣ်ဃူဖိးကညီဖီၣ်စုက၀ဲၤကမံးတံာ်အံၤ ဘၣ်တၢ်ဒုးအိၣ်ထီၣ်၀ဲလၢကညီဖီၣ်စုက၀ဲၤကရူၢ်(၆)ဒူၣ် ဖဲ ၂၀၁၃ နံၣ် လါမ့ၤ ၂၈ သီအနံၤန့ၣ်လီၤႉ ဘၣ်တၢ်ဒုးအိၣ်ထီၣ်အီၤအတၢ်ပညိၣ်ခီန့ၣ် ဒ်သိးကညီဖီၣ်စုက၀ဲၤကရူၢ်ကဒဲကဒဲအဘၢၣ်စၢၤတၢ်ခးလိာ်သးသုတကဲထီၣ်တဂ့ၤအဂီၢ်ဒီး တၢ်ကဒီသဒၢကသံၣ်မူၤဘှီးတၢ်ဂ့ၢ်တဖၣ်အဂီၢ်န့ၣ်လီၤႉ