လါယူၤ ၂ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲတနံၤအံၤ(လါယူၤ ၂)သီ ဂီၤခီ ၄နၣ်ရံၣ်ဃၣ်ဃၣ်န့ၣ်် ဖီၣ်စုက၀ဲၤကရူၢ်တဒူၣ်လဲၤခး၀ဲဒၣ် ၀ီၤလ့ၤ၀့ၢ်ပၢၤကီၢ်၀ဲၤလီၢ် လၢအအိၣ်ဖဲမၠၣ်၀တံၣ်၀့ၢ်ကလံၤထံးတကပၤအသိး ဖဲန့ၣ်တကတီၢ်ဃီဒွဲၣ်အူစ့ၢ်ကီး၀ဲသုးမီၤစိရိၤအသုး အ့ၣ်ကၠံၣ်နံၣ်ယၢၣ်သုး(GE)ဟံၣ်ဒဲဖိတဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
၀ီၤလ့ၤ၀့ၢ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲ “ဖဲတဂီၤအံၤမုၢ်တချုး၀ါဒံးဘၣ်န့ၣ် လၢပၢၤကီၢ်၀ဲၤ လီၢ်ဒီး တၢ်သူၣ်ထီၣ်တိၤကျဲလၢသုးအိၣ်ဆီလီၤသးအလီၢ်တဖၣ်န့ၣ် တၢ်ခးလိာ်သးကဲထီၣ်ဒီး တုၤလၢတဂီၤအံၤ ၉ နၣ်ရံၣ်တစု နၢ်ဟူကျိဖိသီၣ်ဒီး ခးကဒီး၀ဲ RPG ကျိဖးဒိၣ် ၂ ဖျၢၣ်လီၤႉ မ့ၢ်အဘၣ်ဖဲလဲၣ်ဒုတသ့ၣ်ညါဘၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်=ကညီတၢ်ကစီၣ်န့ၣ်လီၤႉ
ဖဲမဟါ(လါယူၤ ၁)သီအနံၤ မၠၣ်၀တံၣ်ကလံၤထံး ဖလူသ၀ီအကပၤစ့ၢ်ကီးတၢ်ဒုးကဲထီၣ်၀ဲအသိး ဖဲတနံၤအံၤ(လါယူၤ ၂)သီအနံၤစ့ၢ်ကီး တၢ်ခးလိာ်သးကဲထီၣ်ဒံး၀ဲန့ၣ်လီၤႉ ခီဖျိတၢ်ခးလိာ်သးကဲထီၣ်အဃိ ထံဖိကီၢ်ဖိကမျၢၢ်လၢအကယၤ ဘၣ်လဲၤဃ့ၢ်ထီၣ်၀ဲဆူကၠီၣ်တဲၣ်တကပၤအိၣ်၀ဲအသိး သ၀ီလၢအဘူးဖဲန့ၣ်တဖၣ်စ့ၢ်ကီး စံၣ်အိၣ်ခူသူၣ်အိၣ်၀ဲဒၣ်န့ၣ်လီၤႉ
