ခီဖျိသုးမီၤစိရိၤအသုးကဘီယူၤဟဲဆှၣ်တၢ်လၢမုၢ်နၤခီအဃိ မီၣ်လီၣ်အံးကစၢၢ်ခီၣ်ထံးလီၢ်က၀ီၤသ၀ီဖိတဖၣ် အိၣ်ဒီးတၢ်ဘၣ်ယိၣ်

လါယူၤ ၂ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲမဟါ(လါယူၤ ၁)သီ မုၢ်နၤခီ ၁ နၣ်ရံၣ်ဘျဲၣ်အဆၢကတီၢ် ခီဖျိကဘီယူၤတဘ့ၣ်ဟဲဆှၣ်တၢ် လၢကညီ ကီၢ်စဲၣ်ႇကၠၤအ့စ့ၣ်ကၠံကီၢ်ဆၣ် တီနီၢ်မုၢ်နုာ် မီၣ်လီၣ်အံးကစၢၢ်ခီၣ်ထံးဒူသ၀ီတဖၣ်အဖီခိၣ်အဃိ လီၢ်က၀ီၤဒူဖိသ၀ီဖိတဖၣ်ဘၣ်ယိၣ်၀ဲလၢတၢ်ဒုးကကဲထီၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲ“ဖဲမဟါမုၢ်နၤခီ ၁ နၣ်ရံၣ်တခီအဆၢကတီၢ် ကဘီယူၤဟဲ၀ဲတဘ့ၣ်လီၤႉ အပူၤကွံာ်လၢညါန့ၣ်တဟဲနီတဘျီဘၣ်ႉ ဟဲဆှၣ်တၢ်အိၣ်ဖးယံာ်ညါလီၤႉ အိၣ်ဟဲ၀ဲဒၣ်ကီတရံးတကပၤဒီးဟဲဆှၣ်၀ဲပသ၀ီ၀ံၤ က့ၤကဒါက့ၤ၀ဲဒၣ်လၢမီၣ်လီၣ်အံးကစၢၢ်ခီၣ်ထံးတကပၤလီၤႉ ခီဖျိလၢသ၀ီသးၦၢ်မၢဟးမံလၢတၢ်လီၢ်အဂၤအဃိ သ၀ီဖိတဖၣ်ဟးစံၣ်မံအိၣ်၀ဲ ၃ သီလံလီၤႉ မ့ၢ်ကဟဲခး၀ဲဧါႇတခး၀ဲဧါန့ၣ်တသ့ၣ်ညါဘၣ်ႉ သ၀ီဖိတဖၣ်ခူၣ်ဃာ်တၢ်ပူၤအိၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

လၢန့ၣ်အမဲာ်ညါ မီၣ်လီၣ်အံးကစၢၢ်ခီၣ်ထံးသ၀ီတဖျၢၣ်လၢအမ့ၢ်ကျ›းသ၀ီအပူၤအံၤ ခီဖျိအိၣ်ဒီးသုးမီၤစိရိၤအသုးကလၢၤတဖျၢၣ်အဃိ ဟံၣ်ဃီလၢအအိၣ်ဘူးဒီးပယီၤသုးကလၢၤတဖၣ် သ၀ီသးၦၢ်ဟ့ၣ်ပလီၢ်ဒုးသ့ၣ်ညါဆိဃာ်၀ဲလၢ မုၢ်နၤခီန့ၣ်ကဟးစံၣ်မံလၢတၢ်လီၢ်အဂၤဒီး ကခူၣ်ဃာ်တၢ်ပူၤတဖၣ်အိၣ်၀ဲစ့ၢ်ကီးအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ

မီၣ်လီၣ်အံးကစၢၢ်ခီၣ်ထံးတၢ်လီၢ်ဖဲန့ၣ်တဖၣ်န့ၣ် ပယီၤသုးမီၤစိရိၤအသုးဒီးသုးခိးကီၢ်ဆၢ BGF သုးပာ်ဖှိၣ်တဖၣ်အမဲာ်ညါ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) ဒီး တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တဖၣ် ဟူးဂဲၤဒၣ်၀ဲန့ၣ်လီၤႉ