လါယူၤ ၁ သီႇ ၂၀၂၁ နံၣ်ႇ ခ့ၣ်အဲးစံၣ်
သုးမီၤစိရိၤပာ်ပနီၣ်ဃာ်၀ဲလၢ(၂၀၂၁=၂၀၂၂)တၢ်သိၣ်လိနံၣ်အဂီၢ် ကၠိကဘၣ်အိးထီၣ်၀ဲဖဲတနံၤအံၤ(လါယူၤ ၁) သီအနံၤဒီး ကၠိလၢအအိၣ်ကညီကီၢ်စဲၣ် မၠၣ်၀တံၣ်ကီၢ်ဆၣ်အပူၤတဖၣ် ကၠိစးထီၣ်အိးထီၣ်တၢတသီအနံၤ ၦၤဟဲထီၣ်ကၠိစှၤန့ၢ်ဒံးၦၤဟဲအးဃာ်ကၠိတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီၢ်ပယီၤထံကီၢ်ဒီဘ့ၣ်အပူၤ တၢ်ပာ်ပနီၣ်၀ဲလၢတၢ်အးကၠိဖိအမံၤစးထီၣ်လၢ(လါမ့ၤ ၂၄ တုၤလၢ လါမ့ၤ ၂၅)သီဒီး ကၠိကစးထီၣ်အိးထီၣ်၀ဲဖဲတနံၤအံၤ(လါယူၤ ၁)သီအနံၤန့ၣ်လီၤႉ
မၠၣ်၀တံၣ်ကီၢ်ရ့ၣ်အပူၤ တၢ်အးကၠိဖိအမံၤလၢတနွံအတီၢ်ပူၤ ကၠိဖိလၢကဘၣ်အးကၠိအိၣ်၀ဲ(၃၈ႇ၇၅၁)ဂၤအကျါ ၦၤဟဲအးကၠိအိၣ်ထဲ ၁ ကလးဃၣ်ဃၣ်လီၤအဃိ ၦၤဟဲအးဃာ်ကၠိအိၣ်ထဲ ၃၀ မျးကယၤလီၤအဂ့ၢ်န့ၣ် မၠၣ်၀တံၣ်ကီၢ်ဆၣ် ကူၣ်သ့မူဒါခိၣ် အူမၠ့ၣ်အူ စံး၀ဲဖဲ(လါမ့ၤ ၃၁)သီအနံၤန့ၣ်လီၤႉ
ဘၣ်ဆၣ် ဖဲတနံၤအံၤ(လါယူၤ ၁)သီအနံၤ ကၠိစးထီၣ်အိးထီၣ်တၢတသီအပူၤ ကၠိဖိလၢအဟဲထီၣ်ကၠိအနီၣ်ဂံၢ်စှၤန့ၢ်ဒံးၦၤဟဲအးဃာ်ကၠိနီၣ်ဂံၢ်ဒံးဒီး ၦၤနီၣ်ဂံၢ်အါစှၤလီၤဆီလိာ်သးအိၣ်၀ဲန့ၣ်လီၤႉ
“ဖဲအပူၤကွံာ်စှၤသီန့ၣ်လဲၤအးဃာ်ဖိသၣ်လၢကၠိလီၤႉ ဘၣ်ဆၣ်တနံၤအံၤမ့ၢ်စ့ၢ်ကီးကၠိစးထီၣ်ထီၣ်တၢတသီအသိး ခီဖျိဖဲမဟါ၀့ၢ်ချၢကလံၤထံးတကပၤ တဂၢၢ်ကျၢၤဒံးဘၣ်အဃိ ကဒုးလဲၤထီၣ်ဖိကၠိ အဂီၢ်သးတလီၤတံၢ်ဒံးဘၣ်ႇဘၣ်အိၣ်ခိးကွၢ်ဒံးလီၤ”အဂ့ၢ်န့ၣ် ကၠိဖိမိၢ်ပၢ်တဂၤစံး၀ဲန့ၣ်လီၤႉ
မၠၣ်၀တံၣ်ကီၢ်ရ့ၣ်အပူၤ ကၠိပာ်ဖှိၣ်ခဲလၢာ်အိၣ်၀ဲ ၁၀၉ ဖျၢၣ်အကျါ လၢအတပၣ်ဃုာ်ဒီး ကၠိလၢအအိၣ်လၢကလုာ်ဒူၣ်ဖီၣ်စုက၀ဲၤဟီၣ်က၀ီၤအပူၤ ကၠိ ၂၀ ဖျၢၣ်ဘၣ် ကၠိလၢအအိၣ်တ့ၢ် ၈၉ ဖျၢၣ်န့ၣ် ကၠိကစးထီၣ်အိးထီၣ်ဖဲတနံၤအံၤ(လါယူၤ ၁)သီအနံၤအဂ့ၢ်န့ၣ် ကီၣ်ဆၣ်ကူၣ်သ့မူဒါခိၣ် အူမၠ့ၣ်အူ စံး၀ဲဖဲမဟါအနံၤန့ၣ်လီၤႉ
