ကျဲလၢခ့ၣ်အဲၣ်ယူၣ်က့ၤအိးထီၣ်၀ဲလၢကမျၢၢ်အဂီၢ်အံၤ ခီဖျိသုးမီၤစိရိၤအသုးပာ်ဖှိၣ်တဖၣ်နုာ်လီၤဟံးန့ၢ်လီၢ်ဟူးဂဲၤအဃိ တၢ်ဒုးကဲထီၣ်

လါယူၤလံ ၁၅ သီႇ ၂၀၂၁ နံၣ်ႇ ခ့ၣ်အဲးစံၣ်

လၢလီၢ်က၀ီၤကမျၢၢ်တၢ်လုၢ်အီၣ်နီၢ်ခိသးသမူအဂီၢ် ဖၣ်ပူၣ်–ကမၤမိၢ်ကျဲမုၢ်လၢ ခ့ၣ်အဲၣ်ယူၣ် စုဒုၣ်တီၤအဖီလာ် KNLA သုးက့(၅)က့ၤအိးထီၣ်ကဒါ၀ဲအံၤ ခီဖျိသုးမီၤစိရိၤအသုးဒီး(BGF)သုးပာ်ဖှိၣ်တဖၣ် ဟ့ၣ်ထီၣ်တၢ်ဂ့ၢ်လၢတၢ်ဘံၣ်တၢ်ဘၢအဂီၢ်ဒီးနုာ်လီၤဟံးန့ၢ်အလီၢ်ဟူးဂဲၤအါထီၣ်၀ဲအဃိ တၢ်ဒုးဟဲက့ၤကဲထီၣ်ဒီးဟီၣ်က၀ီၤ(KNLA)အသုးကရူၢ်အဂ့ၢ်န့ၣ် KNU သုးက့(၅)တကပၤ စံး၀ဲန့ၣ်လီၤႉ

ခီဖျိဟီၣ်က၀ီၤပူၤတၢ်တဂၢၢ်တကျၢၤဒံးဘၣ်အဃိ ခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤ KNLA သုးက့(၅)တကပၤကးတံၢ်ဃာ် ဖၣ်ပူၣ်–ကမၤမိၢ်ကျဲမုၢ်ဖးဒိၣ်တစိၢ်တလီၢ်၀ံၤအလီၢ်ခံ လၢလီၢ်က၀ီၤဖိအတၢ်လုၢ်အီၣ်နီၢ်ခိသးသမူအဂီၢ် က့ၤအိးထီၣ်ကဒါကျဲအံၤဖဲအပူၤကွံာ်(လါယူၤ ၉)သီအနံၤန့ၣ်လီၤႉ

တၢ်အိၣ်သးဒ်အံၤအဖီခိၣ်ဟံးန့ၢ်၀ဲတၢ်ခွဲးတၢ်ယာ်ဒီး ဖဲန့ၣ်သုးမီၤစိရိၤအသုးဒီး(BGF)သုးပာ်ဖှိၣ်တဖၣ် နုာ်လီၤဟံးန့ၢ်အလီၢ်ဟူးဂဲၤ၀ဲဖဲကျဲမုၢ်ဖီခိၣ်အ၀ဲန့ၣ်အဃိ တၢ်ဒုးဘၣ်ဟဲက့ၤကဲထီၣ်ကဒါလီၤအဂ့ၢ်န့ၣ် KNU သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲဒ်အံၤန့ၣ်လီၤႉ

“တၢ်ဒုးကဲထီၣ်တၢ်ဂ့ၢ်တခီန့ၣ်ဟဲကဲထီၣ်အသးဒ်အံၤ အပူၤကွံာ်လါယူၤ ၉ သီအနံၤန့ၣ် လၢသုးက့(၅)န့ၣ် တၢ်-တီတံၢ်ဃာ်၀ဲကျဲတၢ်လဲၤတၢ်က့ၤအဃိန့ၣ် အိးထီၣ်ကဒါက့ၤကျဲလၢကမျၢၢ်ထံဖိကီၢ်ဖိကလဲၤထီၣ်လဲၤ လီၤ၀ံအီၣ်စိာ်အီၣ်အဂီၢ်မီၤနီၤႉ တကတီၢ်ဃီန့ၣ်ပယီၤသုးဒီး(BGF)ပာ်ဖှိၣ်ထီၣ်သးဘျီန့ၣ်အ၀ဲသ့ၣ်ဟူးဂဲၤအါထီၣ်မီၤနီၤႉ ဟံးန့ၢ်၀ဲကျဲတၢ်ဘံၣ်တၢ်ဘၢဒီးဆီလီၤသးလၢကျဲမုၢ်ခိၣ်လီၤႉ တကးဒံးဘၣ်ဖဲလၢၢ်ကဘီန့ၣ် (BGF)န့ၣ်ဆီလီၤအါထီၣ် အလီၢ်တတီၤဒီး ထံဖိကီၢ်ဖိကမျၢၢ်လၢအလဲၤထီၣ်လဲၤလီၤတဖၣ်န့ၣ် ဃ့၀ဲဒၣ်စ့မီၤနီၤ မ့တီၣ်၀ဲဟုသးတထၢၣ်အဖီခိၣ်န့ၣ် ဃ့၀ဲဒၣ်စ့(၁၀၀၀)ကၠးမီၤနီၤႉ လၢထံဖိကီၢ်ဖိအဂီၢ်ဒုတၢ်ဘၣ်အီၤဖးနးညါလီၤ” အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

ခီဖျိသုးမီၤစိရိၤအသုးဒီး(BGF)သုးပာ်ဖှိၣ်တဖၣ် နုာ်လီၤဟံန့ၢ်အလီၢ်ဟူးဂဲၤအါထီၣ်အဃိ တၢ်ဖ့ၣ်စၢဟဲအိၣ်ထီၣ်၀ဲဒီး ဟီၣ်က၀ီၤ KNLA သုးက့(၅)ဒီးႇ ဖဲလါယူၤလံ ၁၂ သီ ဒီး ၁၃ သီ လၢခံသီအတီၢ်ပူၤ တၢ်ခးလိာ်သးကဲထီၣ်၀ဲ(၈)ဘျီဒီး ဖဲန့ၣ်သုးမီၤစိရိၤအသုးဒီး(BGF)အသုးသံ၀ဲ ၁၁ ဂၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲန့ၣ်လီၤႉ

ခ့ၣ်အဲၣ်ယူၣ် မုၢ်-တီၢ်ကီၢ်ရ့ၣ် သုးက့(၅)တၢ်ပၢဟီၣ်အ၀ီၤအပူၤ ကိးလါဒဲးခံခီခံကပၤတၢ်ခးလိာ်သးကဲထီၣ်အိၣ်၀ဲအဘျီလၢအကယၤညါလံဒီး စးထီၣ်ဖဲအပူၤကွံာ်လါမ့ၤတုၤလၢလါယူၤလၢာ်န့ၣ် လၢခံလါအတီၢ်ပူၤ တၢ်ဒုးကဲထီၣ်အိၣ်(၄၄၇)ဘျီဒီး ဖဲန့ၣ်သုးမီၤစိရိၤအသုးသံ၀ဲ(၃၃၀)ဘျဲၣ်အဂ့ၢ်န့ၣ် KNU သုးက့(၅)ကိးလါဒဲးတၢ်မၤနီၣ်တၢ်ဒုးကဲထီၣ်စရီအသိး သ့ၣ်ညါဘၣ်န့ၣ်လီၤႉ

ဖဲအပူၤကွံာ်(လါမးရှး ၂၇)သီအနံၤ ကညီတၢ်ထူၣ်ဖျဲးသုးမုၢ်ဒိၣ်(KNLA)သုးက့ ၅ လဲၤထီၣ်ဒုးဟံးန့ၢ်ကွံာ်၀ဲ သံမုၢ်ထၣ်ဒီးသီလဲၤထၣ်ပယီၤသုးကလၢၤလၢအအိၣ်ဖဲခ့ၣ်အဲၣ်ယူၣ် မုၢ်-တီၢ်ကီၢ်ရ့ၣ် သုးက့(၅)ဟီၣ်က၀ီၤအပူၤခံဖျၢၣ်ဒံးန့ၣ်လီၤႉ

ဖဲတၢ်လဲၤထီၣ်ဒုးဟံးန့ၢ်ကွံာ်ပယီၤသုးကလၢၤ(၂)ဖျၢၣ်၀ံၤအလီၢ်ခံ တၢ်ဒုးကဲထီၣ်၀ဲလၢ(ခ့ၣ်အဲၣ်ယူၣ်) တၢ်ပၢဟီၣ်က၀ီၤအပူၤတလီၢ်လီၢ်ဒီး ခီဖျိသုးမီၤစိရိၤအသုးခးလီၤကျိဖးဒိၣ်တဖၣ်လၢဒူသ၀ီပူၤအမဲာ်ညါ ဟဲခးလီၤတၢ်ဒီးကဘီယူၤအဃိ လီၢ်က၀ီၤကမျၢၢ်ထံဖိကီၢ်ဖိလၢ အကလးတုၤလၢခဲအံၤတစုဘၣ်ဟးဃ့ၢ်အိၣ်ခူသူၣ်၀ဲလၢၦၢ်ပူၤကစၢၢ်ကလိကျါဒီး လဲၤစံၣ်အိၣ်၀ဲလၢမၠဲၣ်ကၠံငူၣ်ၦၤလီၢ်အိၣ်ကမှံအလီၢ်အိၣ်၀ဲ(၄ႇ၀၀၀)ဘျဲၣ်န့ၣ်လီၤႉ

လၢန့ၣ်အမဲာ်ညါ လၢသုးက့(၁)ဟီၣ်က၀ီၤအပူၤစ့ၢ်ကီး စးထီၣ်ဖဲလါအ့ဖြ့ၣ်န့ၣ် ခီဖျိသုးမီၤစိရိၤအ သုးမၤအါထီၣ်ဂံၢ်ဘါဟူးဂဲၤအါထီၣ်အဃိ တၢ်ဒုးကဲထီၣ်၀ဲဒီးဟီၣ်က၀ီၤ(KNLA) သုးက့ ၁ အသုးတဖၣ်အိၣ်၀ဲတလီၢ်လီၢ်ဒီး ခီဖျိသုးမီၤစိရိၤအသုးခးလီၤကျိဖးဒိၣ်လၢဒူသ၀ီပူၤအဃိ လီၢ်က၀ီၤသ၀ီဖိတဖၣ်ဘၣ်ဒိဘၣ်ထံးအိၣ်၀ဲအသိး ဟံၣ်ဃီတနီၤဟးဂီၤကွံာ်၀ဲအဂ့ၢ်န့ၣ် KNLA သုးက့(၁)ၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ