ခီဖျိသုးတၢ်ဟူးတၢ်ဂဲၤဟဲအါထီၣ်အဃိ ၦၤလီၢ်အိၣ်ကမှံလၢအအိၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်အပူၤတဖၣ် တၢ်ကီတၢ်ခဲအိၣ်လၢကဒိးန့ၢ်ဘၣ်တၢ်အီၣ်တၢ်အီ

လါအီကူး ၂၃ သီႇ ၂၀၂၁ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲတလါညါအံၤအတီၢ်ပူၤ ခီဖျိသုးမီၤစိရိၤအသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်ဟူးဂဲၤဟဲအါထီၣ်အဃိ လီၢ်က၀ီၤပူၤကမျၢၢ်ၦၤလီၢ်အိၣ်ကမှံဖိတဖၣ်ကဒိးန့ၢ်ဘၣ်တၢ်အီၣ်တၢ်အီအဂီၢ် ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲစှၤသီအတီၢ်ပူၤအံၤ ခီဖျိသုးမီၤစိရိၤအသုးဟူးဂဲၤဟဲအါထီၣ်န့ၢ်ဒံးအပူၤကွံာ်လၢညါဒံးအဃိ ကမျၢၢ်ၦၤလီၢ်အိၣ်ကမှံလၢအဘၣ်ဃ့ၢ်မှံဟးဖျိးလၢကစၢၢ်ခိၣ်ကလိကျါတဖၣ် လၢကလဲၤဆှၢန့ၢ်အ၀ဲသ့ၣ်တၢ်အီၣ်တၢ်အီအဂီၢ်တၢ်ကီတၢ်ခဲဟဲအိၣ်ထီၣ်၀ဲအဂ့ၢ်န့ၣ် ကညီပိာ်မုၣ်ကရၢ(KWO)လၢအမၤစၢၤၦၤလီၢ်အိၣ်ကမှံအံၤ အနဲၣ်ရွဲၣ်ခိၣ်ကျၢၢ် နီၢ်ကညီဖီ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တၢ်လီၢ်လၢအဘူးဒီးသုးဟူးဂဲၤအလီၢ်န့ၣ် လီၢ်က၀ီၤဖိတဖၣ်က့ၤလၢသ၀ီတဘူၣ်ဘၣ်ႉ ဘၣ်စံၣ်အိၣ်ခူသူၣ်၀ဲဒၣ်လၢသ၀ီချၢလၢၦၢ်ပူၤလီၤႉ တနီၤန့ၣ်ဘၣ်ဟဲ၀ဲအီၣ်တၢ်အီၣ်တုၤ လၢအံတူၢ်ထၣ်ၦၤလီၢ်အိၣ်ကမှံအလီၢ်ညါလီၤႉ လၢကဒိးန့ၢ်ဘၣ်တၢ်အီၣ်တၢ်အီအဂီၢ်တၢ်ကီတၢ်ခဲအိၣ်မီၤနီၤႉ တၢ်မ့ဂၢၢ်ထီၣ်တစဲးန့ၣ်တနီၤန့ၣ်က့ၤအိၣ်လၢသ၀ီပူၤလီၤႉ ခဲအံၤပယီၤသုးဂံၢ်ဘါအါထီၣ်ကွ့ၢ်ကွ့ၢ်အဃိ မ့ၢ်ဟဲထီၣ်လံန့ၣ်တၢ်ဒုးကဲထီၣ်လံ လီၢ်က၀ီၤဖိစ့ၢ်ကီးဘၣ်စံၣ်ထီၣ်ကဒီး၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

ဒူသ၀ီလၢအအိၣ်ဘူးဒီးအံတူၢ်ထၣ်ၦၤလီၢ်အိၣ်ကမှံအလီၢ်တဖၣ် ပာ်ဃာ်၀ဲဂ့ၢ်ဂီၢ်အူတၢ်အီၣ်တၢ်အီလၢ ၦၤလီၢ်အိၣ်ကမှံဖိအဂီၢ် ဖဲအံတူၢ်ထၣ်အိၣ်၀ဲဘၣ်ဆၣ် တၢ်လီၢ်တနီၤလၢၦၤဃ့ၢ်မှံဟးဖျိးလဲၤစံၣ်အိၣ်အလီၢ်န့ၣ် ခီဖျိကျဲတၢ်ကီတၢ်ခဲဒီးတၢ်ဒုးတၢ်ယၤတၢ်အိၣ်သးအဃိ လၢကဆှၢတၢ်အီၣ်တၢ်အီအဂီၢ် တၢ်ကီတၢ်ခဲအိၣ်၀ဲအဖီခိၣ် တနီၤန့ၣ်ဆီၣ်ထွဲမၤစၢၤ၀ဲလၢစ့အိၣ်၀ဲအဂ့ၢ်န့ၣ် သ့ၣ်ညါဘၣ်လၢတၢ်ကရၢ်ကရိလၢအမၤစၢၤၦၤလီၢ်အိၣ်ကမှံဖိတဖၣ်အအိၣ်န့ၣ်လီၤႉ

ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်အပူၤ စးထီၣ်ဖဲအပူၤကွံာ်လါမးရှးန့ၣ် သုးမီၤစိရိၤအသုး ဟဲကွံာ်လီၤမ့ၣ်ပိၢ်ဒီးကဘီယူၤအမဲာ်ညါ ခီဖျိခးလီၤကျိဖးဒိၣ်လၢဒူသ၀ီပူၤအဃိ လီၢ်က၀ီၤကမျၢၢ်ထံဖိကီၢ်ဖိ(၇၀ႇ၀၀၀)ဘျဲၣ်ဘၣ်ပာ်တ့ၢ်ကွံာ်အဟံၣ်အဃီအတၢ်လီၢ်တၢ်ကျဲဒီး တုၤလၢခဲအံၤတစုအါဒၣ်တက့ၢ်န့ၣ်တက့ၤဘၣ်ဒံးလၢအဟံၣ်အဃီဘၣ်ဒီး ဘၣ်ဟးဃ့ၢ်အိၣ်ခူသူၣ်ဒံး၀ဲလၢၦၢ်လၢ်ကျါအဂ့ၢ်န့ၣ် သ့ၣ်ညါဘၣ်လၢၦၤမၤစၢၤတၢ်ဖိအအိၣ်န့ၣ်လီၤႉ

လၢန့ၣ်အမဲာ်ညါ ဖဲလါအီကူး ၁၇ သီဒီး ၁၉ သီအနံၤစ့ၢ်ကီး သုးမီၤစိရိၤအသုးကဘီယူၤဟဲဆှၣ်တၢ်လၢ ခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤအိၣ်၀ဲအဃိ လီၢ်က၀ီၤဖိတဖၣ်ဘၣ်ယိၣ်၀ဲ လၢတၢ်ကဟဲကွံာ်လီၤကဒီးမ့ၣ်ပိၢ်ဒီး အိၣ်ကတဲာ်ကတီၤပာ်ကသးလၢကဘၣ်စံၣ်ကဒီး၀ဲအဂ့ၢ်န့ၣ် ၦၤမၤစၢၤၦၤလီၢ်အိၣ်ကမှံဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ