လါအီကူး ၂၃ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် သ၀ီတဖၣ်အပူၤ ကမျၢၢ်လၢအလီၤဘၣ်တၢ်ကီတၢ်ခဲသ့ၣ်တဖၣ် ဖဲလါအီကူး ၂၀ သီအနံၤန့ၣ် (DKBA)စးထီၣ်ဆီၣ်ထွဲမၤစၢၤ၀ဲဂံၢ်ခီၣ်ထံးတၢ်အီၣ်တၢ်အီတဖၣ်အဂ့ၢ်န့ၣ် သ့ၣ်ညါဘၣ်လၢ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် -DKBA လီၢ်က၀ီၤၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
ပၠီၤမထ့ၤႇကၠိခၠီႇကၠ့ၤခၠီႇမ့ၣ်တၤဘွံႇလ့ဖးထီသ၀ီဖိလၢအလီၤဘၣ်တၢ်ကီတၢ်ခဲသ့ၣ်တဖၣ်အံၤ တၢ်ဆီၣ်ထွဲမၤစၢၤ၀ဲဟုသးႇသိအီၣ်ႇပသၢသၣ်ဒီးဂံၢ်ခီၣ်ထံးတၢ်အီၣ်တၢ်အီလၢအဂၤတဖၣ်ဒီး လၢဆူၣ်ချ့တၢ်အံးထွဲကွၢ်ထွဲတဖၣ်စ့ၢ်ကီးရဲၣ်ကျဲၤဟံးထီၣ်ဖီၣ်ထီၣ်၀ဲလံအဂ့ၢ်န့ၣ် DKBA နီၣ်ဂံၢ်(၉၀၃)သုးရ့ၣ်ခိၣ် သုးခိၣ်ဒိၣ်ဖိ စီၤအ့ၤ၀ါ စံးဘၣ်ခ့ၣ်အဲးစံၣ်ဖဲလါအီကူး ၂၁ သီအနံၤန့ၣ်လီၤႉ
“ခီဖျိခိ၀ံၣ်ဒီးထံရူၢ်ကီၢ်သဲးတဂၢၢ်တကျၢၤဘၣ်အဃိ ပၦၤကမျၢၢ်တဖၣ်အတၢ်ဖံးတၢ်မၤလီၤစှၤဒီး တၢ်လဲၤတၢ်က့ၤကီခဲထီၣ်ႇတၢ်လုၢ်အီၣ်နီၢ်ခိသးသမူစ့ၢ်ကီးတဘၣ်ဂီၢ်ဘၣ်ဒွါလၢၤဘၣ်မီၤနီၤႉ ဖဲတၢ်သ့အိၣ်ၦၤအသိးပမၤစၢၤ၀ဲဟုသးအထၢၣ်(၈၀၀)ႇသိအီၣ်ႇခီနီဃ့ဘိၣ််ဒီးတၢ်ကူတၢ်ကၤတဖၣ်မီၤနီၤႉ ခီဖျိခိ၀ံၣ်တၢ်ဆါကဲထီၣ်အဃိ လၢအ၀ဲသ့ၣ်တၢ်အံးထွဲကွၢ်ထွဲတၢ်အိၣ်ဆူၣ်အိၣ်ချ့အဂီၢ်စ့ၢ်ကီး ပရဲၣ်ကျဲၤဃာ်၀ဲအိၣ်လီၤ”အဂ့ၢ်န့ၣ် သုးခိၣ်ဒိၣ်ဖိ စီၤအ့ၤ၀ါ စံး၀ဲန့ၣ်လီၤႉ
လီၢ်က၀ီၤကမျၢၢ်လၢအအိၣ်ဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢ ကၠၤအ့စ့ၣ်ကၠံကီၢ်ဆၣ်အပူၤဖဲန့ၣ်သ့ၣ်တဖၣ်အါဒၣ်တက့ၢ်န့ၣ် လုၢ်အီၣ်အသးသမူသူၣ်အီၣ်ဖျးအီၣ်၀ဲဃဲမံၤတံၢ်ႇ ဘီးက့ၣ်တံၢ်တဖၣ်ဒီး ဖဲခိ၀ံၣ်အဆၢကတီၢ်ခီဖျိတၢ်ဆါတၢ်ၦ့ၤလီၤစှၤဒီးၦၤငါတၢ်ဖိတအိၣ်ဘၣ်အဃိ လီၢ်က၀ီၤဖိတနီၤန့ၣ်ဘၣ်ချီအီၣ်၀ဲမ့ၤချီအိၣ်၀ဲအဂ့ၢ်န့ၣ် သ့ၣ်ညါဘၣ်လၢသ၀ီသးၦၢ်အအိၣ်န့ၣ်လီၤႉ
လ့ဖးထီသ၀ီ စီၤအိမီၤ စံး၀ဲလၢ“တၢ်ဖံးတၢ်မၤတအိၣ်လဲၤထီၣ်က့ၤလီၤတသ့ သ၀ီဖိတနီၤန့ၣ်ဘၣ်အီၣ်၀ဲဒၣ်မ့ၤချီလီၤႉ ၦၤၦ့ၤအ၀ဲသ့ၣ်ဘီၣ်ႇဃဲမံၤတံၢ်တဖၣ်စ့ၢ်ကီးတအိၣ်ဘၣ်မီၤနီၤႉ ကီခဲထီၣ်ဒိၣ်မးလီၤႉ DKBA ဟဲမၤစၢၤ၀ဲဟုသးအထၢၣ်ဖးဒိၣ်ႇအထၢၣ်ဆံး(၆၀)ဘျဲၣ် သိအီၣ်ႇ ပသၢသၣ်တဖၣ်ဒ်အံၤအဃိ သးခုဒိၣ်မးလီၤႉ ဖဲဘီးက့ၣ်တံၢ်ဟးထီၣ်အကတီၢ်န့ၣ် သ၀ီဖိတဖၣ်ကဘၣ်ဂီၢ်က့ၤတစဲးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
ဒူသ၀ီတဖျၢၣ်စုာ်စုာ်လၢအအိၣ်လၢကၠၤအ့စ့ၣ်ကၠံကီၢ်ဆၣ်အပူၤတဖၣ် ကမျၢၢ်လၢအလီၤဘၣ်တၢ်ကီတၢ်ခဲတဖၣ် မ့ၢ်ဟ့ၣ်ဒုးသ့ၣ်ညါအ၀ဲသ့ၣ်န့ၣ်ဒ်တၢ်သ့အိၣ်အသိးကဆဲးဆီၣ်ထွဲမၤစၢၤ၀ဲဒီး လၢခံဘျီတဘျီ လၢကဟဲလါအီးကထိဘၢၣ်အတီၢ်ပူၤ ကဆဲးမၤစၢၤ၀ဲဂံၢ်ခီၣ်ထံးတၢ်အီၣ်တၢ်အီတဖၣ်ဒံးအဂ့ၢ်န့ၣ် သ့ၣ်ညါဘၣ်လၢ(DKBA)ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
