လါအီကူး ၃၁ သီႇ ၂၀၂၁ နံၣ်ႇ ခ့ၣ်အဲးစံၣ်
ခီဖျိတၢ်ကစီၣ်ဟူထီၣ်လၢသုးမီၤစရိၤကရှဲလဲ၀ဲဟီၣ်က၀ီၤအဃိ ဘျံးဒ၀ဲၢ်ကီၢ်ရ့ၣ်ႇယ့ၤဖၠူၤကီၢ်ဆၣ်အပူၤ ယွၤဘျုးဒိၣ်သ၀ီဖိလၢအဘၣ်စံၣ်အိၣ်ခူသူၣ်တဖၣ် တုၤလၢခဲအံၤတစုဟဲက့ၤ၀ဲတဘူၣ်ခဲလၢာ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သုးက့(၄)တၢ်ပၢဟီၣ်က၀ီၤအပူၤ ဖဲအပူၤကွံာ်လါအီကူး ၂၆ သီအနံၤန့ၣ် သုးမီၤစိရိၤအသုးနုာ်လီၤဟံးန့ၢ်အလီၢ်အကျဲလၢယွၤဘျုးဒိၣ်သ၀ီတကပၤအါအါဂီၢ်ဂီၢ်ဒီး တၢ်ကစီၣ်ဟူထီၣ်လၢကနုာ်လီၤရှဲလဲ၀ဲဟီၣ်က၀ီၤအဃိ လီၢ်က၀ီၤသ၀ီဖိတဖၣ်ဟးစံၣ်အိၣ်ခူသူၣ်ဒီး တုၤလၢလါအီကူး ၃၀သီအနံၤတစုဟဲက့ၤ၀ဲတဘူၣ်ခဲလၢာ်ဒံးဘၣ်အဂ့ၢ်န့ၣ် လီၢ်က၀ီၤခိၣ်နၢ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တုၤလၢခဲအံၤတဟဲက့ၤဒံးဘၣ်ႇမ့ၢ်အလဲၤတုၤဖဲလဲၣ်တသ့ၣ်ညါဘၣ်ႉ ဟးဃုအဖၢမုၢ်လီၤႉ စံၣ်၀ဲသ၀ီဒီတဖျၢၣ်လီၤႉ တုၤလၢခဲအံၤတဟဲက့ၤဒံးဘၣ်ႉ ကိၢ်သးလၢတအီၣ်ဘၣ်အီဘၣ်အဃိ ခဲအံၤဟးဃုအ၀ဲသ့ၣ်လီၤႉ မ့မ့ၢ်ပယီၤသုးဒုက့ၤကဒါလံ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ယွၤဘျုးဒိၣ်သ၀ီလၢလီၢ်က၀ီၤဖိအိၣ်၀ဲလၢအကယၤအံၤ ဟံၣ်ခိၣ်အိၣ်၀ဲခဲလၢာ်(၅၄)ဖျၢၣ်ဒီး တကီၢ်ခါခဲအံၤလီၢ်က၀ီၤသ၀ီဖိတဖၣ်ဟဲက့ၤကဒါအိၣ်စှၤကိာ်ဂၤဒံးလီၤဒီး အါဒၣ််တက့ၢ်န့ၣ်ဟးစံၣ်အိၣ်ခူသူၣ်ဒံး၀ဲအဖၢမုၢ်အဂ့ၢ်န့ၣ် လီၢ်က၀ီၤခိၣ်နၢ်တဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ
သုးမီၤစိရိၤအသုးတဲ၀ဲလၢဟီၣ်က၀ီၤအံၤအပူၤ(KNU)တူၢ်လိာ်ဃာ်၀ဲတၢ်ဒီသဒၢကမျၢၢ်သုးမုၢ်ဒိၣ်(PDF)ဒီး ဟ့ၣ်၀ဲသုးတၢ်သိၣ်လိဒီးဆါန့ၢ်၀ဲကျိချံၦာ်သၣ်တဖၣ်အဃိ ဟဲနုာ်လီၤ၀ဲလီၤအဂ့ၢ်န့ၣ် ခ့ၣ်အဲၣ်ယူၣ်ၦၤဘၣ်မူဘၣ်ဒါလၢအဘၣ်ထွဲတဖၣ်စံး၀ဲန့ၣ်လီၤႉ
ဘၣ်ထွဲဒီးတဂ့ၢ်ကဲထီၣ်သးအံၤ အ၀ဲသ့ၣ်ဟဲ၀ဲလၢကဟဲဃု(CDM)ဒီး(PDF)တဖၣ်လီၤဒီး တကီၢ်ခါခဲအံၤပယီၤသုးက့ၤလံအသိး တၢ်ကစီၣ်ဟူထီၣ်လၢကဟးဃုတၢ်ၦၢ်ပူၤအံၤစ့ၢ်ကီး တမ့ၢ်၀ဲ တၢ်ကစီၣ်အမ့ၢ်အတီဘၣ်အဂ့ၢ်န့ၣ် ခ့ၣ်အဲၣ်ယူၣ် သုးက့(၄) တၢ်ရ့လိာ်မုာ်လိာ်၀ဲၤဒၢးခိၣ် ပဒိၣ်စီၤဖျိးစိ၀့ စံး၀ဲဒ်အံၤန့ၣ်လီၤႉ
“သုးခံဖုမ့ဟဲထီၣ်တဘျီဃီန့ၣ် လီၢ်က၀ီၤဖိတဖၣ်ဘၣ််ယိၣ်၀ဲလၢတၢ်ဒုးကကဲထီၣ်အဃိ ဟးစံၣ်အိၣ်ခူသူၣ်၀ဲလီၤႉ ဘၣ်ဆၣ်ဖဲလါအီကူး ၃၀သီအနံၤန့ၣ် ဟဲက့ၤကဒါတနီၤလံႉ ယဆိကမိၣ်တနံၤညါအံၤကဟဲက့ၤအါထီၣ်လီၤႉ ယဆိကမိၣ်ဒုကဟဲက့ၤနုာ်လီၤပိၢ်ပိၢ်လီၤႉ မ့မ့ၢ်လီၢ်က၀ီၤဖိအကျါ ဒုတၢ်ကီတၢ်ခဲဒိၣ်ဒိၣ်မုၢ်မုၢ်ဒုတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
လၢန့ၣ်အမဲာ်ညါခီဖျိတၢ်ကဒုးအိၣ်ထီၣ်တၢ်ဒုးတၢ်ယၤ(D-Day ပ)တၢ်ကစီၣ်အဃိ နၢ်ဟူလၢသုးမီၤစိရိၤအသုးကနုာ်လီၤရှဲလဲသမံသမိးတၢ်လၢအ၀ဲသ့ၣ်ဟီၣ်က၀ီၤပူၤဒီး တုၤလၢတကီၢ်ခါခဲအံၤတစုနုာ်လီၤရှဲလဲသမံသမိးတၢ်တအိၣ်ဒံးဘၣ်ဒီး လၢအ၀ဲသ့ၣ်ဟီၣ်က၀ီၤအပူၤမနုာ်(PDF)ကရူၢ်မးတအိၣ်ဘၣ်အဂ့ၢ်န့ၣ် ပဒိၣ်စီၤဖျိးစိ၀့ စံးအါထီၣ်၀ဲန့ၣ်လီၤႉ
ယွၤဘျုးဒိၣ်သ၀ီအံၤ အပူၤကွံာ်လၢညါသုးမီၤစိရိၤပဒိၣ်စိၤအခါန့ၣ် ခီဖျိတၢ်ဒုးတၢ်ယၤအဃိ မ့ၢ်သ၀ီလၢအဘၣ်သုးလီၢ်သုးကျဲဒီတဖျၢၣ်ညါဒီး စးထီၣ်ဖဲအပူၤကွံာ်(၂၀၁၂)နံၣ်၀ံၤအလီၢ်ခံ လီၢ်က၀ီၤဖိတဖၣ်ဟဲက့ၤကဒါဆူသ၀ီပူၤ၀ံၤသူၣ်ထီၣ်ကဒါက့ၤ၀ဲသ၀ီအံၤန့ၣ်လီၤႉ
