လါစဲးပထ့ဘၢၣ် ၁ သီႇ ၂၀၂၁ နံၣ်ႇ ခံၣ်အဲးစံၣ်
ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ကျ့းသ၀ီအပူၤ ဖဲတနံၤအံၤ(လါစဲးပထ့ဘၢၣ် ၁)သီ ဂီၤခီအဆၢကတီၢ် ခီဖျိသုးမီၤစိရိၤအသုးဟဲထီၣ်တလၢတၢ်ပာ်ပနီၣ်တၢ်လီၢ်အဃိ တၢ်ခးလိာ်သးဟဲကဲထီၣ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့ ၆ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲမဟါ(လါအီကူး ၃၁)သီ ဟါခီအဆၢကတီၢ် သုးမီၤစိရိၤအသုးတဖၣ်အိၣ်ဟးထီၣ်၀ဲလၢကျ့းသ၀ီဒီး လဲၤထီၣ်၀ဲဆူပဲ-တီဒူသ၀ီတကပၤဒီး ဖဲတနံၤအံၤဂီၤခီအဆၢကတီၢ် တၢ်ခးလိာ်သးစးထီၣ်ကဲထီၣ်ဖဲကျ့းသ၀ီဒီးပဲ-တီဒူသ၀ီအဘၢၣ်စၢၤမဲကျ့ၤထၣ်တၢ်လီၢ်အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ
အ၀ဲစံး၀ဲလၢ“ဖဲတဂီၤအံၤ ၇ နၣ်ရံၣ်ဃၣ်ဃၣ်န့ၣ်တၢ်ခးလိာ်သးကဲထီၣ်မီၤနီၤႉ ခးလိာ်သးကအိၣ်၀ဲဒၣ်တခီနၣ်ရံၣ်ညါႉ ဖဲမဟါမုၢ်နၤခီန့ၣ်အ၀ဲသ့ၣ်လဲၤထီၣ်၀ဲလၢပဲၤကလၤဒိၤလီၤႉ အခီၣ်ထံးန့ၣ် BGF တလဲၤပိာ်အခံဘၣ်ႉ တၢ်ခးလိာ်သးကဲထီၣ်မး(BGF)လဲၤထီၣ်လူၤအ၀ဲသ့ၣ်လီၤႉ မ့ၢ်ကဆဲးလဲၤသးဒ်လဲၣ်ဒုတသ့ၣ်ညါဘၣ်ႉ တၢ်ဘၣ်ဒိဘၣ်ထံးအိၣ်ဧါတအိၣ်ဧါဒုတသ့ၣ်ညါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
သုးမီၤစိရိၤအၦၤတဖၣ်အံၤ (KNLA)ဟ့ၣ်ပလီၢ်အ၀ဲသ့ၣ်လၢတဘၣ်ဟဲတလၢတၢ်လီၢ်အိၣ်၀ဲဘၣ်ဆၣ် ခီဖျိပယီၤသုးဟဲတလၢအ၀ဲသ့ၣ်တၢ်လီၢ်အဃိ တၢ်ခးလိာ်သးဘၣ်ဟဲကဲထီၣ်၀ဲလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ဖဲအပူၤကွံာ်(လါအီကူး ၂၉)သီအနံၤစ့ၢ်ကီး သုးမီၤစိရိၤအသုးဒီး(BGF)သုးအနီၣ်ဂံၢ်လၢအကယၤတဖၣ် ခီဖျိဟဲနုာ်လီၤလၢကျ့းသ၀ီပူၤအဃိ လီၢ်က၀ီၤသ၀ီဖိတဖၣ်စံၣ်အိၣ်ခူသူၣ်သ၀ီဒီတဖျၢၣ်ဒံးန့ၣ်လီၤႉ
ခီဖျိသုးမီၤစိရိၤအသုးအံၤဟးတလၢက့ၤတလၢတၢ်လီၢ်အဃိ လီၢ်က၀ီၤကမျၢၢ်တဖၣ်ပျံၤတၢ်ဖုးတၢ်ဘၣ်ယိၣ်၀ဲလၢတၢ်ဒုးကကဲထီၣ်ဖးဒိၣ်ဒီး တကီၢ်ခါခဲအံၤလီၢ်က၀ီၤကမျၢၢ်တနီၤဟးစံၣ်အိၣ်ခူသူၣ်ဒံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
