လါအီကူး ၁၁ သီႇ ၂၀၂၁ နံၣ်ႇ ခ့ၣ်အဲးစံၣ်
KNU- ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ သုးမီၤစိရိၤ အသုးဒီး သုးခိးကီၢ်ဆၢ(BGF)အသုးတဖၣ် ဟံးန့ၢ်၀ဲတၢ်ဒီသဒၢလၢ လီၢ်က၀ီၤပိာ်မုၣ်ပိာ်မၢၤတဖၣ်အအိၣ်ဒီး လဲၤထီၣ်က့ၤလီၤဟူးဂဲၤ၀ဲအဂ့ၢ်န့ၣ် KNU ဒူသထူၣ်ကီၢ်ရ့ၣ် စံး၀ဲန့ၣ်လီၤႉ
သုးမီၤစိရိၤအသုးခီၣ်ချ›သုးရ့ၣ်(ခမရ–၄၀၆)ဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် ဖဲလါအီကူး ၇ သီအနံၤ န့ၣ် ဟဲထီၣ်၀ဲဒၣ်ဆူဘံလ့ကီၢ်ဆၣ် ပယၢ်ရီသ၀ီဒီး ဆီလီၤ၀ဲအသုးဖဲန့ၣ်(၃)သီ၀ံၤ ဖဲမဟါ(လါအီကူး ၁၀)သီ ဂီၤခီအဆၢကတီၢ် ဖဲအ၀ဲသ့ၣ်ဟးထီၣ်လၢကၠိ၀ဲသ၀ီအကတီၢ်ဒ်သိးအ၀ဲသ့ၣ်ကအိၣ်ဒီးတၢ်ဒီသဒၢအဂီၢ်် ကိးဃုာ်၀ဲဒၣ်ဒီးပိာ်မုၣ်ပိာ်မၢၤသးၦၢ်လၢအအိၣ်ဖဲသ၀ီပူၤတဖၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤစိမၠ့ၣ် စံးဘၣ်ခ့ၣ်အဲးစံၣ်န့ၣ်လီၤႉ
“အိၣ်လၢပယၢ်ရီဒီးဟဲထီၣ်၀ဲလၢကၠိ၀ဲထံကျိတကပၤမီၤနီၤႉ ဖဲအ၀ဲသ့ၣ်ဟဲထီၣ်အခါကိးဃုာ်၀ဲဒီးပိာ်မုၣ်တ ဖၣ်မီၤနီၤႉ မၢအတၢ်ဟး၀ဲလၢအမဲာ်ညါလွံၢ်ဂၤယဲၢ်ဂၤအဂၤတဆံႇ ဖဲအခၢၣ်သးခီန့ၣ်ပာ်၀ဲခံဂၤသၢဂၤဒ်န့ၣ်မီၤနီၤႉ ယအဲၣ်ဒိးတဲန့ၣ်အ၀ဲသ့ၣ်မ့ၢ်လဲၤန့ၣ်လဲၤမ့ၢ်သဘျ့မီၤနီၤႉ ဟံး၀ဲတၢ်ဒီသဒၢလၢပိာ်မုၣ်ဒ်အံၤတလိၣ်လဲၤဘၣ်မီၤနီၤႉ သ၀ီဖိတဖၣ်ကျိမးတအိၣ်ဘၣ်န့ၣ်ႉ မၤ၀ဲဒ်အံၤတဂ့ၤဘၣ် တၢ်အံၤမ့ၢ်တၢ်မၤကမၣ်၀ဲၦၤဂ့ၢ်၀ီခွဲး ယာ်န့ၣ်ပတဲသ့လီၤ”အဂ့ၢ်န့ၣ် ပဒိၣ်စီၤစိမၠ့ၣ် စံး၀ဲန့ၣ်လီၤႉ
သုးမီၤစိရိၤအသုးဒီး(BGF)သုးပာ်ဖှိၣ်တဖၣ် ဖဲအ၀ဲသ့ၣ်ဆီလီၤသးဖဲပယၢ်ရီသ၀ီပူၤလၢသၢသီအတီၢ်ပူၤန့ၣ် ပာ်လီၤအသုးလၢကၠိပူၤတကးဘၣ်အမဲာ်ညါ ဖဲအ၀ဲသ့ၣ်ဟဲတုၤလၢကၠိ၀ဲသ၀ီပူၤအကတီၢ်စ့ၢ််ကီး ပာ်လီၤအသုး ဖဲသီခါဖၠၣ်တၢ်သူၣ်ထီၣ်အလီၢ်အအဂ့ၢ်န့ၣ် KNU ဒူသထူၣ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါ(လါအီကူး ၁၀)သီ အနံၤန့ၣ်လီၤႉ
လၢကလဲၤထီၣ်က့ၤလီၤဟူးဂဲၤ၀ဲကသ့အဂီၢ် ကိးဟံ၀ဲတၢ်ဒီသဒၢလၢပိာ်မုၣ်ပိာ်မၢၤတဖၣ်အအိၣ်ဒ်အံၤန့ၣ် မ့ၢ်တၢ်တခါလၢတၢ်တဘၣ်မၤ၀ဲဘၣ်အသိး ခီဖျိမၤကမၣ်၀ဲဒၣ်ပိာ်မုၣ်ခွဲးယာ်အဃိ မ့ၢ်တၢ်တခါလၢတူၢ်လိာ် တသ့ဘၣ်ဒီးကဘၣ်ခီၣ်ဆၢ၀ဲအဂ့ၢ်န့ၣ် ကညီပိာ်မုၣ်ကရၢ(KWO)နဲၣ်ရွဲၣ်ခိၣ်ကျၢၢ် နီၢ်ကညီဖီ စံး၀ဲန့ၣ်လီၤႉ
အ၀ဲစံး၀ဲလၢ“တၢ်ဂ့ၢ်၀ဲအံၤမ့ၢ်တၢ်လီၤဘၣ်ယိၣ်လၢပိာ်မုၣ်တဖၣ်အဂီၢ်လီၤႉ ဘၣ်မနုၤအဃိလဲၣ်န့ၣ် လၢတၢ်ဒုးတၢ်ယာ်အဆၢကတီၢ်န့ၣ်တၢ်ကကိး၀ဲဒူဖိသ၀ီဖိလၢကသူအီၣ်၀ဲဒ်သိးဒီးကကဲ၀ဲတၢ်ဒီသဒၢအလီၢ်မ့ၢ်ဂ့ၤႇကလဲၤ ကိးဒူဖိသ၀ီဖိလၢကလဲၤလၢတၢ်ဒုးတၢ်ယၤပျီန့ၣ်တမ့ၢ်တၢ်လၢအဘၣ်နီတခါဘၣ်ႉလီၤဆီဒၣ်တၢ်ပိာ်မုၣ်ပိာ်မၢၤန့ၣ်လီၤပျံၤ ဒိၣ်တစဲးလီၤႉ အဃိန့ၣ်ကဲ၀ဲတၢ်တခါလၢ တၢ်တူၢ်လိာ်၀ဲတသ့လ့ၤတက့ၤ ဘၣ်ဒီးတၢ်ကဘၣ်ထီဒါအီၤလီၤမီၤနီၤႉ တၢ်လီၢ်လၢအ့တနဲးတန့ၢ်အလီၢ်ဒီးတၢ်လီၢ်လၢၦၤမၤတၢ်ကစီၣ်ဖိတအိၣ်အလီၢ်တဖၣ်န့ၣ် သုးမီၤစိရိၤအံၤမၤ၀ဲပိာ်မုၣ်ဘူၣ်အကလုာ်ကလုာ်လီၤႉ မၤတ့ၢ်စ့ၢ်ကီး၀ဲအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဖဲတၢ်တချုးဆဲးလီၤ၀ဲ(NCA)ထံကီၢ်ဒီဘ့ၣ်တၢ်ပတုာ်တၢ်ခးအခါဒံးဘၣ်န့ၣ် ဖဲလၢသုးမီၤစိရိၤအသုးမၤ၀ဲသုးတၢ်ဟူးတၢ်ဂဲၤဖဲသုးက့(၁)အပူၤအကတီၢ် ကိးဟံန့ၢ်၀ဲတၢ်ဒီသဒၢလၢလီၢ်က၀ီၤဒူဖိသ၀ီဖိဒီးပိာ်မုၣ်ပိာ်မၢၤတဖၣ်အအိၣ်ဒီး လဲၤထီၣ်က့ၤလီၤဟူးဂဲၤ၀ဲတလီၢ်လီၢ်အိၣ်၀ဲအမဲာ်ညါ ဆီလီၤအသုးဖဲဟံၣ်လၢအိၣ်သ၀ီပူၤတဖၣ်ယံၤ၀ဲလၢအလါညါအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
တကီၢ်ခါဆၢကတီၢ်ခဲအံၤ ဒ်သိးခိ၀ံၣ်တၢ်ဘၣ်ကူဘၣ်ဂာ်သုတရၤလီၤသးလၢလီၢ်က၀ီၤအပူၤတဂ့ၤအဂီၢ် KNU ဒူသထူၣ်ကီၢ်ရ့ၣ် ကးတံၢ်ဃာ်၀ဲတၢ်နုာ်လီၤဟးထီၣ်လၢအ၀ဲသ့ၣ်တၢ်ပၢဟီၣ်က၀ီၤအပူၤအိၣ်၀ဲဘၣ်ဆၣ် မ့မ့ၢ်သုးမီၤစိရိၤအသုးတကပၤမၤ၀ဲသုးတၢ်ဟူးတၢ်ဂဲၤဒီးနုာ်လီၤဟးထီၣ်လၢဒူသ၀ီပူၤဒ်အံၤအဃိ လီၢ်က၀ီၤဖိတဖၣ်ဘၣ်ယိၣ်၀ဲလၢခိ၀ံၣ်တၢ်ဆါကရၤလီၤအသးလၢလီၢ်က၀ီၤအပူၤန့ၣ်လီၤႉ
