လါစဲးပထ့ဘၢၣ် ၃၀ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲမဟါလါစဲးပထ့ဘၢၣ် ၂၉ သီအနံၤ တၢ်ဒွဲၣ်အူကွံာ်ပယီၤသုး(mytel)လီတဲစိအတၢၣ်စဲးဖီကဟၣ်လၢအအိၣ်ဖဲကညီကီၢ်စဲၣ် ကီးတရံး၀့ၢ်ကလံၤထံး ကွ့ကလ့သ၀ီပူၤအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤတၢ်ကစီၣ်အအိၣ်န့ၣ်လီၤႉ
လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“တၢ်ဒွဲၣ်အူ၀ဲဖဲတနံၤညါအံၤဂီၤခီအနၣ်ရံၣ် ၁၀ မီၤနီၤႉ ဖဲမဟါနါက့တၢ်ခးလိာ််သးကဲထီၣ်စ့ၢ်ကီးလီၤႉ ၦၤတဲလၢဟဲမၤတဲာ်၀ဲ(tower)တၢၣ်စဲးဖီကဟၣ်အပျံၤမီၤနီၤႉ တဲ၀ဲလၢၦၤတဒူၣ်ဟဲမၤ၀ဲမီၤနီၤႉ ဖဲမဟါန့ၣ်ပယီၤသုးမၢၦၤကးတံၢ်၀ဲဒီး၀ၣ်ဒံးလီၤ”အဂ့ၢ်န့ၣ်် စံးဘၣ်ခ့ၣ်အဲးစံၣ်ဖဲမဟါ(လါစဲးပထ့ဘၢၣ် ၂၉)သီအနံၤန့ၣ်လီၤႉ
ဖဲအပူၤကွံာ်(လါစဲးပထ့ဘၢၣ် ၂၅)သီအနံၤ တၢ်မၤတဲာ်ကွံာ်ပယီၤသုး အ(mytel)လီတဲစိစဲးဖီကဟၣ်အပျံၤ၀ံၤအလီၢ်ခံ ဖဲလါစဲးပထ့ဘၢၣ် ၂၆ သီအနံၤန့ၣ် ပယီၤသုးတဖၣ်လဲၤသမံသမိး၀ဲ(mytel)လီတဲစိစဲးဖီကဟၣ်အလီၢ်၀ံၤ သံဒိးသံကွၢ်စ့ၢ်ကီးကရၢၢ်အကစၢ်ဒံးန့ၣ်လီၤႉ
ဖဲအ၀ဲသ့ၣ်လဲၤသမံသမိး၀ဲ၀ံၤဟဲက့ၤကဒါအဆၢကတီၢ် ဖီၣ်စုက၀ဲၤတဒူၣ်ဟဲခး၀ဲဒၣ်(tower)စဲးဖီကဟၣ်တခါအံၤဒီးကျိဖးဒိၣ်ကျိဖိန့ၣ်လီၤႉ လၢတၢ်န့ၣ်အဃိ လီၢ်က၀ီၤဖိလၢအအိၣ်ဘူးဒီး(tower)စဲးဖီကဟၣ်လီၢ်၀ဲအံၤတနီၤသုးအလီၢ်လဲၤအိၣ်ခူသူၣ်၀ဲလၢအဘူးအတံၢ်အဟံၣ်အ ဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ဘၣ်ထွဲဒီးတၢ်ဟဲမၤဟးဂီၤလီတဲစိ(tower)တၢၣ်စဲးဖီကဟၣ်အလီၢ်အံၤ ဖဲအပူၤကွံာ်(လါစဲးပထ့ဘၢၣ် ၂၇)သီအနံၤ ပယီၤသုးတဖၣ်ကိးသမံသမိးသံဒိသံကွၢ်၀ဲကွ့ကလ့သ၀ီၦၤဘၣ်မူဘၣ်ဒါတဖၣ်လၢကျ့းသ၀ီဒီး (tower)တၢၣ်အပျံၤလၢတၢ်ဟဲမၤဟးဂီၤ၀ဲအံၤ ပယီၤသုးမၢ၀ဲလီၢ်က၀ီၤသ၀ီဖိတဖၣ်ကးတံၢ်ကရၢၢ်ဒီး ၀ၣ်တကထြၢအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
တကီၢ်ခါခဲအံၤလၢကွ့ကလ့ဒီးကျ့းသ၀ီအပူၤ ပယီၤသုးဒီးသုးခိးကီၢ်ဆၢ(BGF)သုးတဖၣ်အိၣ်ဒံး၀ဲအဂၤ(၅၀)ဃၣ်ဃၣ်ဘၣ်ဆၣ် ခီဖျိ(tower)တၢၣ်စဲးဖီကဟၣ်တၢ်ဂ့ၢ်ကီအဃိ လီၢ်က၀ီၤဖိတဖၣ်ဘၣ်ယိၣ်၀ဲလၢပယီၤသုးကဟဲမၤအါထီၣ်ၦၤနီၣ်ဂံၢ်န့ၣ်လီၤႉ
