Home တၢ်ကစီၣ် တၢ်ဒုးဆဲးကဲထီၣ်လၢကညီသုးပာ်ဖှိၣ်ဒီးပယီၤသုးအဘၢၣ်စၢၤ ခံခီခံကပၤတၢ်ဘၣ်ဒိဘၣ်ထံးအိၣ်

တၢ်ဒုးဆဲးကဲထီၣ်လၢကညီသုးပာ်ဖှိၣ်ဒီးပယီၤသုးအဘၢၣ်စၢၤ ခံခီခံကပၤတၢ်ဘၣ်ဒိဘၣ်ထံးအိၣ်

301
0

လါအီးကထိဘၢၣ် ၁၃ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ် ကီးတရံး ကလံၤထံးတကပၤ ဖဲတနံၤအံၤ(လါအီးကထိဘၢၣ် ၁၃)သီအနံၤ တၢ်ဒုးဆဲးကဲထီၣ်လၢကညီသုးပာ်ဖှိၣ်ဒီး ပယီၤသုးတဖၣ်အဘၢၣ်စၢၤဒီး ဖဲန့ၣ်ခံခီခံကပၤတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤတၢ်ကစီၣ်အအိၣ်န့ၣ်လီၤႉ

ဖဲတနံၤအံၤဂီၤခီ ၁၁ နၣ်ရံၣ်အဆၢကတီၢ် ပယီၤသုးလၢအအိၣ်ဖဲကီးတရံး၀့ၢ် လဲၤ၀ၣ်ဖယါကိအံၤ ခးလီၤ၀ဲကျိဖးဒိၣ်လၢကမဲၤကိသ၀ီတကပၤ၀ံၤအလီၢ်ခံ တၢ်ခးလိာ်သးဟဲကဲထီၣ်၀ဲဒီး ဟီၣ်က၀ီၤကညီသုးပာ်ဖှိၣ်တဖၣ်အဂ့ၢ်န့ၣ် ၦၤလၢအဘူးဒီးကညီဖီၣ်စုက၀ဲၤကရူၢ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဖဲတဂီၤအံၤ ၁၁ နၣ်ရံၣ်ဃၣ်ဃၣ်န့ၣ် အ၀ဲသ့ၣ်ခး၀ဲဒီးကျိဖးဒိၣ်မီၤနီၤႉ KNLA ဗ)တကပၤဘၣ်ဒိတဂၤ ဘၣ်အစုတၢ်ဘၣ်ယိၣ်ဒုတအိၣ်ဘၣ်ႉ မ့မ့ၢ်အ၀ဲသ့ၣ်တကပၤန့ၣ်သံ(၂)ဂၤလီၤႉ တၢ်အိၣ်သးခဲအံၤဒုခံခီခံကပၤအိၣ်ခိးကွၢ်စူၣ်လိာ်သးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်ခးလိာ်သးကဲထီၣ်အံၤ မ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၆) သုးရ့ၣ်(၁၈)ႇDKBA ထုးဖးကရူၢ်ဒီး ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၁၂)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ-၂၃၀)လၢအအိၣ်ဆီလီၤသးဖဲကီးတရံးအံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်(လါအီးကထိဘၢၣ် ၁၁ႇ၁၂)သီအနံၤစ့ၢ်ကီး ဖဲကီးတရံး ကလံၤထံး ကီးနွဲၢ်သ၀ီဒီးသ၀ီသီတကပၤန့ၣ် ပယီၤသုးခီၣ်ချ့သုးရ့ၣ်(ခမရ-၅၅၆)ဒီး KNLA သုးက့(၆) သုးရ့ၣ်(၁၈)ႇ(DKBA)ထုးဖးကရူၢ်တဖၣ်အဘၢၣ်စၢၤ တၢ်ဒုးကဲထီၣ်ဆဲးတဲး၀ဲခံသီဒံးညါန့ၣ်လီၤႉ
တၢ်ခးလိာ်သးကဲထီၣ်ဘျီ၀ဲန့ၣ် ပယီၤသုးတကပၤသံဘၣ်ဒိဘၣ်ထံး၀ဲအဂၤ(၂၀)ဘျဲၣ်အဂ့ၢ်န့ၣ် ၦၤလၢအဘူးဒီးကညိီဖီၣ်စုက၀ဲၤကရူၢ်စံး၀ဲဘၣ်ဆၣ် ခ့ၣ်အဲးစံၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတအိၣ်ဒံးဘၣ်န့ၣ်လီၤႉ

လၢန့ၣ်အမဲာ်ညါခီဖျိပယီၤသုးခးနါစိၤကျိဖးဒိၣ်အဃိ ဟံၣ်ဃီတနီၤဟးဂူာ်ဟးဂီၤ၀ဲအိၣ်ဒီး လီၢ်က၀ီၤဖိလၢအအိၣ်ဘူးဒီးတၢ်ဒုးကဲထီၣ်အလီၢ်တဖၣ်စ့ၢ်ကီး ဘၣ်သုးလီၢ်သုးကျဲလဲၤစံၣ်အိၣ်၀ဲလၢအဘူးအတံၢ်အဟံၣ်အိၣ်၀ဲအသိး ၦၤလၢအနုာ်လီၤစံၣ်အိၣ်ခူသူၣ်လၢဟံၣ်ဖီလာ်တၢ်ပူၤစ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

တကီၢ်ခါခဲအံၤ ပယီၤသုးသ့ၣ်တဖၣ်ဟံးန့ၢ်အလီၢ်အကျဲဖဲကီးတရံး၀့ၢ် စွ့ၤကၠဲၣ်မ့ဖယါကိႇလံာ်လဲၢ်ဒီးတၢ်ဆဲးတၢ်လၤ၀ဲၤဒၢးႇ ပလဲဖၠူၤတၢ်တိစၢၤမၤစၢၤ၀ဲၤဒၢးတၢ်လီၢ်တဖၣ်န့ၣ်လီၤႉ တုၤလၢတနံၤအံၤဟါခီ ၄ နၣ်ရံၣ်န့ၣ် ပယီၤသုးခးလီၤဒံး၀ဲကျိဖးဒိၣ်ပူၤထံၣ်ပူၤထံၣ်လၢကီးတရံး ကလံၤထံး ကမဲၤကိသ၀ီတကပၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ