တလါအတီၢ်ပူၤတၢ်ဖီၣ်န့ၢ်ၦၤကီၢ်ပယီၤဖိလၢအနုာ်လီၤခူသူၣ်လၢကီၢ်ဆၢ(၁၀၀၀)ဃၣ်ဃၣ်

လါအီးကထိဘၢၣ် ၂၇ သီႇ ၂၀၂၁ နံၣ်ႇ ခ့ၣ်အဲးစံၣ်

ခီဖျိတၢ်နုာ်လီၤခူသူၣ်လၢကီၢ်ကၠီၣ်တဲၣ်ကီၢ်ဆၢလၢအတဖိးသဲစးဘၣ်အဃိ ဖဲတလါညါအံၤလၢတလါအတီၢ်ပူၤတၢ်ဖီၣ်ချုးန့ၢ်ၦၤကီၢ်ပယီၤဖိအဂၤ(၁ႇ၀၀၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိတၢ်ကစီၣ်ရၤလီၤသးလၢကီၢ်ကၠီၣ်တဲၣ်ပဒိၣ်ကထုးထီၣ်န့ၢ်ကီၢ်ပယီၤၦၤမၤတၢ်ဖိလၢအလံာ်အလဲၢ်တအိၣ်ဘၣ်သ့ၣ်တဖၣ်လၢ(ပါယီၤကးဒီးCI)အဃိ ၦၤကီၢ်ပယီၤဖိတဖၣ်ဟဲနုာ်လီၤခူသူၣ်လၢကီၢ်ကၠီၣ်တဲၣ်ပူၤအိၣ်၀ဲကိးမုၢ်နံၤဒဲးဃၣ်ဃၣ်ညါဒီး ဖဲတလါညါအံၤအတီၢ်ပူၤတၢ်ဖီၣ်န့ၢ်၀ဲခဲလၢာ်အဂၤ(၁ႇ၀၀၀)ဃၣ်ဃၣ်အဂ့ၢ်န့ၣ် (JACBA)ကရူၢ်လၢအအိၣ်ဆီလီၤသးဖဲမဲၢ်ဆီး၀့ၢ် အၦၤပၢၤလီၢ်ဆ့ၣ်နီၤ အူမိကၠိစံး၀ဲန့ၣ်လီၤႉ

ဖဲအပူၤကွံာ်(လါအီးကထိဘၢၣ် ၂၅)သီ တသီအတီၢ်ပူၤ လၢကီၢ်ကၠီၣ်တဲၣ် ကၤခၠနါဘူရံကီၢ်ရ့ၣ်အပူၤ တၢ်ဖီၣ်န့ၢ်ၦၤကီၢ်ပယီၤဖိလၢအနုာ်လီၤခူၣ်သူၣ်(၂၁၂)ဂၤႇကီၢ်သီ-ယနီကီၢ်ဆၢန့ၣ်တၢ်ဖီၣ်ချုးန့ၢ်၀ဲ(၄၄)ဂၤန့ၣ်လီၤႉ ၦၤကီၢ်ပယီၤဖိလၢတၢ်ဖီၣ်န့ၢ်၀ဲသ့ၣ်တဖၣ်အံၤကလဲၤထီၣ်၀ဲဆူဘီကီး၀့ၢ်ဒီးကီၢ်ကၠီၣ်တဲၣ်ပူၤအဂီၢ် ဘၣ်ဟ့ၣ်၀ဲကဲၤရံၤအၦ့ၤတဂၤန့ၣ်လၢစ့ယိၤ(၁၉ႇ၀၀၀)ဘးအဂ့ၢ်န့ၣ် ကီၢ်ကၠီၣ်တဲၣ်ထုးထီၣ်ပာ်ဖျါတၢ်ကစီၣ်အသိး သ့ၣ်ညါဘၣ်န့ၣ်လီၤႉ

JACBA ၦၤပၢၤလီၢ်ဆ့ၣ်နီၤ အူမိကၠိစံး၀ဲ“ၦၤဟဲလၢကီၢ်ကၠီၣ်တဲၣ်ပူၤသ့ၣ်တဖၣ်ကြၢးဃုသ့ၣ်ညါ၀ဲ မ့ၢ်အဟဲလၢတၢ်မၤအိၣ်အလီၢ်န့ၣ်မ့ၢ်ဧါႇမ့ၢ်တၢ်မၤအိၣ်အနီၢ်ကီၢ်ဧါန့ၣ်မ့ၢ်ဧါႇမ့ၢ်ကဲၤရံၤအတၢ်ကတိၤန့ၣ်မ့ၢ်အဘၣ်အတီဧါမီၤနီၤႉ ကယဲၢ်မ့ၢ်ကဲၤရံၤအတၢ်ကတိၤန့ၣ်နာ်အီၣ်တသ့ဘၣ်ႇသးတဘၣ်ဒ့ဒီတဂ့ၤႉ ကြၢးလဲၤထီၣ်က့ၤလီၤလၢအ့ၣ်ကၠ့ၣ်စံၣ်တၢ်ရဲၣ်တၢ်ကျဲၤလၢအဖိးသဲစးလီၤ”အဂ့ၢ်န့ၣ် စံး၀ဲန့ၣ်လီၤႉ

ခီဖျိထံရူၢ်ကီၢ်သဲးတဂၢၢ်တကျၢၤဒီးခိ၀ံၣ်တၢ်ဆါအဃိ စဲးဖီကဟၣ်တၢ်မၤလီၢ်(၂၀၀)ဘျဲၣ်လၢထံဂုၤကီၢ်ဂၤဘျၢလီၤဃာ်၀ဲတဖၣ်တၢ်ကးတံၢ်ကွံာ်၀ဲဒီး ခီဖျိၦၤနီၣ်ဂံၢ်လၢအတၢ်ဖံးတၢ်မၤတအိၣ်လၢၤဘၣ်တဖၣ်ဟဲအါထီၣ်၀ဲအဃိ အ၀ဲသ့ၣ်ဟးထီၣ်လၢကီၢ်ပယီၤပူၤဒီးနုာ်လီၤခူသူၣ်၀ဲလၢကီၢ်ကၠီၣ်တဲၣ်ကီၢ်ဆၢဟဲအါထီၣ်ကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါ ခိ၀ံၣ်အတီၢ်ပူၤ စးထီၣ်ဖဲ(၂၀၂၀)လါမးရှးတုၤလၢခဲအံၤတစုန့ၣ် ကီၢ်ပယီၤၦၤမၤတၢ်ဖိလၢအဖံးမၤတၢ်လၢကီၢ်ကၠီၣ်တဲၣ်ပူၤတဖၣ်က့ၤဆူအဟံၣ်အဃီ၀ံၤ ဟဲက့ၤထီၣ်ကဒါလၢကီၢ်ကၠီၣ်တဲၣ်ကီၢ်ဆၢကျဲလၢအတဖိးသဲစးဒ်အံၤအိၣ်၀ဲဒီး ခီဖျိနုာ်လီၤခူသူၣ်လၢကီၢ်ကၠီၣ်တဲၣ်ကီၢ်ဆၢလၢအတဖိးသဲစးဘၣ်အဃိ တုၤလၢတနံၤအံၤလါအီးကထိဘၢၣ် ၂၇ သီအနံၤ လၢ(၁၉)လါအတီၢ်ပူၤ တၢ်ဖီၣ်န့ၢ်၀ဲၦၤကီၢ်ပယီၤဖိခဲလၢာ်အိၣ်၀ဲ(၄၁ႇ၀၀၀)ဘျဲၣ်လံအဂ့ၢ်န့ၣ် ၦၤဟူးဂဲၤဖံးမၤတၢ်လၢခီကီၢ်ၦၤမၤတၢ်ဖိအဂီၢ်တဖၣ် စံး၀ဲန့ၣ်လီၤႉ