လါနိၣ်၀့ဘၢၣ် ၁၂ သီႇ ၂၀၂၁ နံၣ်ႇ ခ့ၣ်အဲးစံၣ်
စးထီၣ်ဖဲအပူၤကွံာ်လါအီးကထိဘၢၣ် ၂၀ သီအနံၤန့ၣ် ပယီၤသုးနုာ်လီၤဆ့ၣ်နီၤအိၣ်ဆိး၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA သုးက့(၆) သုးရ့ၣ် ၁၆ ဟီၣ်က၀ီၤဘံၣ်ဘၢတြဲၤလၢအအိၣ်ဖဲ ကၠၤအ့စ့ၣ်ကၠံကီၢ်ဆၣ် လိၣ်ရှါသ၀ီပူၤ၀ံၤအလီၢ်ခံ လီၢ်က၀ီၤဖိတဖၣ်ဘၣ်ယိၣ်လၢတၢ်ဒုးကကဲထီၣ်အဃိ သ၀ီဖိတဖၣ်ဘၣ်ဟးစံၣ်ပလဲာ်သးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
KNU ဘံၣ်ဘၢတြဲၤလၢအအိၣ်ဖဲလိၣ်ရှါသ၀ီပူုၤအံၤ မ့ၢ်တၢ်လီၢ်တခါလၢအဒီသဒၢ၀ဲလီၢ်က၀ီၤသ၀ီဖိတဖၣ်အတၢ်ဘံၣ်တၢ်ဘၢဒီး တကီၢ်ခါခဲအံၤ စးထီၣ်လၢပယီၤသုးတြိၤ(၂၂)စုဒုၣ်တီၤအဖီလာ်(ခမရ-၂၀၄)သုးဂံၢ်ဘါဟဲဆ့ၣ်နီၤအိၣ်၀ဲအါအါဂီၢ်ဂီၢ်၀ံၤအလီၢ်ခံ လၢအ၀ဲသ့ၣ်တၢ်ဘံၣ်တၢ်ဘၢအဂီၢ်မၢ၀ဲသ၀ီဖိတဖၣ်ကျီန့ၢ်အ၀ၣ်လၢကဂၢၤထီၣ်ကရၢၢ်အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ
အ၀ဲစံး၀ဲလၢ“KNU ဘံၣ်ဘၢတြဲၤလၢအ၀ဲသ့ၣ်ဟံန့ၢ်၀ဲအံၤ လၢတၢ်ဘံၣ်တၢ်ဘၢအဂီၢ်မၢၦၤဃုန့ၢ်အ၀ဲသ့ၣ်၀ၣ်လၢကဂၢၤထီၣ်ကရၢၢ်လီၤႉ ဃုန့ၢ်အ၀ဲသ့ၣ်တဘူၣ်ဘၣ်မီၤနီၤႉ စးထီၣ်ဖဲအ၀ဲသ့ၣ်ဟဲအိၣ်န့ၣ်သ၀ီဒီဖျၢၣ်တၢ်ဘံၣ်တၢ်ဘၢတအိၣ်လၢၤ၀ဲဘၣ်အသိး မုၢ်နၤခီမုၢ်နၤခီန့ၣ်မံလၢသ၀ီပူၤတဘူၣ်လၢၤဘၣ်ႉ ဘၣ်ယိၣ်လၢတၢ်ဒုးကကဲထီၣ်လီၤႉ ဘၣ်စံၣ်ႇလဲၤလၢကျီးပူၤတဘူၣ်လၢၤဘၣ်ႇပျံၤဘၣ်အ၀ဲသ့ၣ်ဒိၣ်မးလီၤႉ အဲၣ်ဒိးလၢအ၀ဲသ့ၣ်ကဟးထီၣ်လၢသ၀ီပူၤလၢအချ့လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲလါနိၣ်၀့ဘၢၣ် ၁၁ သီအနံၤန့ၣ်လီၤႉ
ဖဲအပူၤကွံာ်လါအီးကထိဘၢၣ် ၂၀ သီအနံၤ လၢကၠၤအ့စ့ၣ်ကၠံကီၢ်ဆၣ် သၤသယၤခၠီဖၠါဒီးခူၣ်ခၤသ၀ီအဘၢၣ်စၢၤန့ၣ် ခီဖျိပယီၤသုးနုာ်လီၤဟူးဂဲၤတလၢဟီၣ်က၀ီၤတၢ်ပာ်ပနီၣ်အဃိ တၢ်ခးလိာ်သးကဲထီၣ်၀ဲဒီး(KNLA)ဒီး ဖဲန့ၣ်အၦၤလၢအသံလၢတၢ်ဒုးဘျီ၀ဲန့ၣ်အပူၤတဖၣ်လၢကလဲၤဟံးန့ၢ်က့ၤအစိၣ်အဂီၢ် ဃ့ထီၣ်၀ဲအဃိ ကီၢ်ရ့ၣ်ခိၣ်နၢ်တဖၣ်ဟ့ၣ်အခွဲး၀ံၤအလီၢ်ခံ KNLA သုးရ့ၣ်(၁၆)ဘၣ်ပျဲန့ၢ်၀ဲလိၣ်ရှါသ၀ီပူၤဘံၣ်ဘၢတြဲၤအံၤန့ၣ်လီၤႉ တုၤလၢခဲအံၤတစုပယီၤသုးတဖၣ်တဟးထီၣ်ဒံး၀ဲဘၣ်ဒီး နုာ်လီၤအိၣ်ဆိး၀ဲဒၣ်ဖဲဘံၣ်ဘၢတြဲၤအလီၢ်အံၤလီၤအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ၦၤဘၣ်မူဘၣ်ဒါအအိၣ်န့ၣ်လီၤႉ
KNLA သုးက့(၆)ၦၤဘၣ်မူဘၣ်ဒါတဂၤစံး၀ဲ “ဟဲထိၣ်ဃူ၀ဲလၢကဟဲဟံက့ၤအၦၤသံစိၣ်တဖၣ်အဃိ ပသ့ၣ်ညါဃာ်လၢ ဟဲဟံမ့၀ံၤန့ၣ်ကက့ၤကဒါဝဲမီၤနီၤႉ တၢ်စုက၀ဲၤစ့ၢ်ကီးပက့ၤဟ့ၣ်ကဒါလီၤႉ တုၤလၢခဲအံၤတက့ၤလၢၤဘၣ်အမဲာ်ညါ နုာ်လီၤအိၣ်ဆိးလၢပဘံၣ်ဘၢတြဲၤအလီၢ်တခါမီၤနီၤႉ လၢအ၀ဲသ့ၣ်တၢ်ဘံၣ်တၢ်ဘၢအဂီၢ် မၢသ၀ီဖိဃုန့ၢ်အ၀ဲသ့ၣ်၀ၣ်အိၣ်၀ဲ”အဂ့ၢ်န့ၣ် စံး၀ဲန့ၣ်လီၤႉ
ပယီၤသုးကလၢၤလၢအအိၣ်ဆီလီၤသးဖဲ KNU ၀ီၢ်ရီကီၢ်ဆၣ်အပူၤတဖၣ် ဟးခးလီၤနါစိၤကျိဖးဒိၣ်လၢသ၀ီကပိၤကပၤဖဲန့ၣ်အိၣ်၀ဲတလီၢ်လီၢ်ဒီး လီၢ်က၀ီၤသ၀ီဖိလၢအလ့ၢ်လိၤလ့ၢ်ထီၣ်လၢပယီၤသုးကလၢၤအမဲာ်ညါတဖၣ်စ့ၢ်ကီး ခီဖျိအ၀ဲသ့ၣ်ကိးသမံသမိးဒီးမၤဒၢၣ်၀ဲအဃိ သ၀ီဖိတဖၣ်ဘၣ်ဟးဃ့ၢ်အိၣ်ခူသူၣ်၀ဲဒ်အံၤလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
